ད་ལྟའི་རྒྱ་ནག་སྐམ་ས་ཆེན་མོའི་མི་གཤིས་ཀུན་སྤྱོད་སྐོར་གླེང་པ།

རྒྱ་ནག་གི་ལྔ་གཅིག་ངལ་རྩོལ་དུས་ཆེན་གྱི་གཞུང་འབྲེལ་གུང་གསེང་སྐབས། རྒྱ་རིགས་ཡུལ་སྐོར་སྤྲོ་འཆམ་པ་ཞིག་གིས་ཁྲིན་ཏུའུ་རུ་ཡོད་པའི་རྒྱ་ནག་གི་ལོ་རྒྱུས་རང་བཞིན་ལྡན་པའི་ཀྲའུ་ཀི་ལོང་ (Zhu GeLiang)མཆོག་གི་གསུངས་རྩོམ་རྡོ་རིང་སྟེང་། “ ཕྱི་ལོ་ ༢༠༡༥ ལོའི་ཟླ་ ༤ ཚེས་ ༣༠ ཉིན་ལའུ་ཕེའི་ཀུའོ་(Lu Peiguo)གནས་སྐོར་ཐེངས་གཅིག” ཅེས་བསྐོས་ཡོད་པ་དེ་དང་འབྲེལ་ཏེ། བརྒྱུད་ལམ་ཁག་ཏུ་ད་ལྟའི་རྒྱ་ནག་སྐམ་ས་ཆེན་མོའི་མི་གཤིས་སྐོར་ལ་གླེང་སློང་ཤུགས་ཆེན་པོ་བྱུང་བ་དང་བསྟུན་ཏེ། ཕྱི་སྡོད་རྒྱ་མིའི་ཞིན་ཐང་རིན་བརྙན་འཕྲིན་ཁང་གིས་རྒྱ་རིགས་ཆབ་སྲིད་དཔྱད་ཞིབ་པ་ཁྲིན་ཕའོ་ཁོན (Chen Pokong)དང་། དུས་དོན་དཔྱད་ཞིབ་པ་ཚའོ་ཁྲང་ཆིན་ (Cao Changqing) སོགས་གདན་འདྲེན་ཞུས་ཏེ་གླེང་མོལ་བྱས་ཡོད།

མདོ་འཛིན་པས། རྣམ་པ་གཉིས་ཕེབས་པར་ཐུགས་རྗེ་ཆེ། དང་པོ་ཁྲིན་ཕའོ་ཁོན་ལ་འདྲི་རྒྱུར། ཁྲིན་ཏུའུ་ཝོ་ཧོ་ཚི་ (Wu Houci) སྔོན་བྱོན་སློབ་དཔོན་མིང་ཐོའི་རྡོ་རིང་སྟེང་ཡི་གེ་སྐོས་པའི་སྐོར་ཡིན། རྡོ་རིང་འདི་གནའ་རྫས་རེད་ཟེར་ན་ཆོག་མོད། ཀྲའུ་ཀི་ལོང་གི་རྩོམ་ཡིག་དེ་ཡོའེ་ཧྥའི་(Yue Fei) ༼ ནི་རྒྱལ་ཁབ་གསུམ་གྱི་སྐབས་ཀྱི་དམག་དཔོན་ཞིག ༽ ཡིས་རྡོའི་སྟེང་ལ་བསྐོས་པ་རེད། མི་ཞིག་གིས་དེའི་སྟེང་ཡི་གེ་གཞན་ཞིག་བསྐོས་ཡོང་ན་ངོ་མ་སེམས་ལ་ན་ཟུག་སྐྱེས་དགོས་པ་ཞིག་རེད། ཡིན་ན་ཡང་མི་ཁ་ཤས་ཀྱི་གོ་བ་ལེན་སྟངས་ཀྱི་དབང་གིས་ག་རེ་བྱས་ཏེ་རྩ་ཆེན་གནའ་རྫས་དེའི་སྟེང་ཡི་གེ་བསྐོས་པ་རེད།

ཁྲིན་ཕའོ་ཁོན། རྒྱ་ནག་གི་ཡུལ་སྐོར་སྤྲོ་འཆམ་པ་ཚོས་ཝོ་ཧོ་ཚི་སྔོན་བྱོན་སློབ་དཔོན་མིང་ཐོའི་རྡོ་རིང་སྟེང་ཡི་གེ་བསྐོས་པ་མ་ཟད། ལོ་ངོ་སུམ་སྟོང་ལྷག་གི་ཨི་ཇིབ་ (Egypt) ལྷ་ཁང་གི་སྟེང་དུའང་ “ང་རྒྱ་ནག་གི་མི་ xxxxx གནས་འདིར་ཡུལ་སྐོར་ཐེངས་ཤིག” ཅེས་ཡི་གེ་བསྐོས་ཡོད་འདུག སྔོན་ཆད་ཨི་ཇིབ་ས་ཆར་བྱུང་མྱོང་མེད་པའི་གནས་ཚུལ་དང་། རྒྱལ་ཁབ་གཞན་པའི་ཡུལ་སྐོར་སྤྲོ་འཆམ་པ་སུས་ཀྱང་བྱས་མྱོང་མེད་པའི་ཐ་ཤལ་གྱི་བྱ་སྤྱོད་དེ་འདྲ་ཞིག་རྒྱ་མི་ཚོས་བཟོས་པ་རེད། རྒྱ་མིས་ཧོང་ཀྲའུ་ (Hang Zhou) ནུབ་མཚོའི་ནང་རྐང་པ་བཀྲུས་པ་མ་ཟད། ཧྥ་རན་སིའི་ལོ་ཝལ་ཆུ་རྫིང་ (Louvre pool) ནང་དུའང་རྐང་པ་བཀྲུས་པ་རེད། རྒྱ་ནག་གི་མིས་སོ་སོའི་རྒྱལ་ཁབ་ཀྱི་གནམ་ཐང་དུ་འཁྲུག་པ་བརྒྱབ་པ་མ་ཟད། རྒྱལ་ཁབ་གཞན་གྱི་རྒྱལ་སྤྱིའི་གནམ་ཐང་ནས་ཀྱང་འཁྲུག་པ་བརྒྱབ་པ་རེད། རྒྱ་ནག་ནང་གནས་ཚུལ་འདི་རིགས་རྒྱུན་པར་འབྱུང་གི་ཡོད་སྟབས། སྔོན་ཆད་པེ་ཡཱང་ (Bai Yang) གིས་ ‘སྐྱུག་བྲོ་བའི་ཀྲུང་གོ་བ་’ ཞེས་བྲིས་ཡོད། ད་ལྟ་རྒྱ་རིགས་ཚོ་རྒྱལ་སྤྱིའི་སྟེང་འགྲོ་བཞིན་ཡོད་པ་དང་བསྟུན་ཏེ། སྐྱུག་བྲོ་བའི་རྒྱ་མིའི་གཟུགས་བརྙན་དེ་ཡང་རྒྱ་ནག་ནས་རྒྱལ་སྤྱིའི་སྟེང་ཁྱབ་བཞིན་ཡོད་པ་དང་། མཇུག་མཐར་རྒྱ་ནག་གི་གནད་དོན་འདི་རྒྱལ་སྤྱིའི་གནད་དོན་ཞིག་ཏུ་གྱུར་ཏེ། ལྷོ་ཤར་ཨེ་ཤ་ཡ་དང་ཧོང་ཀོང་། ཡུ་རོབ། ཨ་རི་སོགས་སུ་རྒྱ་ནག་གི་ཐ་ཤལ་རང་གཤིས་དེ་གླེང་གི་ཡོད་པ་རེད།

མདོ་འཛིན་པ། ཉེ་བའི་ལོ་གཉིས་ནང་རྒྱ་ནག་གི་ཕྱི་སྐྱོད་ཡུལ་སྐོར་སྤྲོ་འཆམ་པ་མང་དུ་སོང་པ་དང་བསྟུན་ཏེ། རྒྱ་ནག་གི་ཡུལ་སྐོར་སྤྲོ་འཆམ་པའི་སྤྱོད་ངན་མིང་བྱང་དེ་ཡང་རྒྱལ་ཁབ་ཕྱི་རུ་ཐོན་ཡོད་སྟབས། ལོ་གཉིས་སྔོན་ལ་ནེའུ་ཡོག་དུས་བབ་ཀྱིས་རྩོམ་ཡིག་ཅིག་སྤེལ་ཡོད་པའི་ནང་། ‘ད་ལྟ་རྒྱ་ནག་གི་ཡུལ་སྐོར་སྤྲོ་འཆམ་པ་རྣམས་ཆེས་དགའ་མོས་མི་བྱེད་པའི་ཡུལ་སྐོར་སྤྲོ་འཆམ་པ་རུ་གྱུར་པ་’ ཞེས་པ་དང་། ཕའོ་ཁོན་ཁྱེད་རང་གིས་ཉེ་ཆར་བརྩམས་པའི་ ‘དགའ་བསུ་མེད་པའི་ཀྲུང་གོ་པ’ ཞེས་པའི་དེབ་ཅིག་བཏོན་ཡོད་པའི་ནང་དོན་ཡང་ང་ཚོས་གླེང་བཞིན་པའི་གནས་ཚུལ་འདིའི་སྐོར་རེད། དེས་ན་ཁྱེད་ཀྱི་ལྟ་སྟངས་དང་དཔྱད་པ་ཞིག་གླེང་རོགས།

ཁྲིན་ཕའོ་ཁོན། དང་པོ་ང་ཚོས་ཧོང་ཀོང་དང་ཐའེ་ཝན་གླེང་། ལོ་རྟག་པར་རྒྱ་ནག་སྐམ་སའི་བུད་མེད་སྦྲུམ་མ་ཚོ་ཧོང་ཀོང་ལ་རྒྱུག་ནས་ཕྲུ་གུ་སྐྱེ་བཞིན་ཡོད་པ་དང་། ཀྲུང་གོ་བ་ཧོང་ཀོང་ལ་ཐོན་པ་དང་འོ་རྩམ་འཕྲོག་རེས་རྒྱག་གི་ཡོད་པ་རེད། དེ་བཞིན། ཧོང་ཀོང་གི་སྲང་ལམ་ནས་ཕྲུ་གུ་ཚོར་གཅིན་སྐྱག་གཏོང་བཅུག་པ་དང་། ས་འོག་མེ་འཁོར་ནང་ནས་ཁ་ལག་ཟ་བ་སོགས་བྱུང་ཡོད། ད་དུང་གནམ་ཐང་དུ་ཞབས་ཞུ་བས་ཁོ་ཚོའི་གཟུགས་པོར་རྟག་དཔྱད་བྱེད་སྐབས་ལག་འགུལ་ནས་རྒྱག་རེས་བྱེད་པ་སོགས་བྱུང་ཡོད་སྟབས། ཧོང་ཀོང་མི་ཚོས་རྒྱ་ནག་སྐམ་སའི་མི་ཡོང་དུས་འབུ་ཆ་གྭ་པ་བསླེབས་སོང་ཟེར་ཀྱི་ཡོད།

ཐའེ་ཝན་ནས་ཀྱང་གཅིག་པ་རེད་འབུ་ཆ་གྭ་པ་ཟེར། གནམ་ཐང་དང་སྲང་ལམ་ན་སྐད་ཅོར་ཆེན་པོ་རྒྱག་པ་དང་གནམ་གྲུ་ཏོག་ཙམ་རྗེས་ལུས་ཐེབས་དུས་ཁོ་ཚོས་ལམ་སང་རྙོག་དྲ་བཟོ་པ་མ་ཟད། ཡུལ་སྐོར་པ་གཞན་རྣམས་བཀག་ནས་འགྲོ་རུ་མི་བཅུག་པའི་བྱ་ངན་རྩོམ་བཞིན་ཡོད་སྟབས། ཐའེ་ཝན་ཉེན་རྟོག་པས་མེ་མདའ་བཏོན་ཏེ་སྟངས་འཛིན་བྱེད་དགོས་བྱུང་ཡོད། སྐར་མ་གཅིག་གི་ལམ་ཁ་ནས་མེད་པའི་གསང་སྤྱོད་ཟུར་དུ་བཞག་ནས་ཨ་མ་ཞིག་གིས་གནམ་ཐང་གི་མི་མང་འཛོམས་སར་བུ་ཕྲུག་ལ་བཙོག་པ་གཏོང་དུ་བཅུག་འདུག

སེང་གྷ་པུར་ནས་ཀྱང་གཅིག་པ་རེད། རྒྱ་ནག་གི་བུད་མེད་ཚོས་མ་ལི་ཤེ་ཡ་དང་ཧྥི་ལི་ཕིན། ཐེ་ལན་ཌི་སོགས་ཀྱི་སྨད་ཚོང་མའི་ཟ་ཕོར་འཕྲོག་གི་ཡོད་པ་མ་ཟད། མཐའ་ན་བུད་མེད་ཚོའི་མག་པའང་འཕྲོག་ཡོད་འདུག གཞན། སྐད་གྲགས་ཆགས་པའི་ཧྥེ་རིས་ Ferrari རླངས་འཁོར་དོན་རེད། རྒྱ་ནག་གི་མཐོ་རིམ་དཔོན་རིགས་ཤིག་གི་བུས་སེང་གྷ་པུར་ནས་རླངས་འཁོར་དོན་རྐྱེན་བྱུང་སྟེ་རང་ཉིད་གྲོངས་པ་མ་ཟད། གླ་གཏོང་རླངས་འཁོར་ཞིག་གི་ཁ་ལོ་བ་ཡང་བསད་ཡོད། སྐབས་དེར་སེང་གྷ་པུར་གྱི་མི་མང་ཚོས་རྒྱ་ནག་གི་དཔོན་རིགས་ཚོའི་བྱིས་པ་དེ་དག་གི་སྤྱོད་པ་དེ་འདྲའི་སྡུག་པ་ལ་ཞེས་སྐད་གྲགས་ཆགས་ཡོད།

ཁེ་ན་ཌ་ནས་རྒྱ་ནག་པ་ཚོས་རང་གི་ཁེ་ཕན་རྫུན་བཟོ་བྱས་པ་མ་ཟད། ཨ་རི་ནས་ཀྱང་ཁེ་ཕན་རྫུན་བཟོ་བྱས་པ་དང་། རང་གི་ཐོབ་ཐང་རྫུན་བཟོ་བྱས་པ་སོགས་བྱུང་སྟབས། ད་ལྟ་རྒྱ་ནག་གླེང་སློང་ཤུགས་ཆེ་རུ་འགྲོ་བཞིན་ཡོད། སྤྱིར་བཏང་དེ་ནི་རྒྱ་ནག་གི་མི་གཤིས་དམའ་རུ་སོང་པ་རེད། རྒྱ་ནག་ལ་རང་གཤིས་མཁྲེགས་པོ་དང་གཉོམ་ཆུང་གི་རང་གཤིས་དེ་དག་ཉམས་ཆགས་སུ་སོང་པ་དེ་ནི་བློ་ཕམ་གྱི་རང་བཞིན་ཞིག་རེད།

མདོ་འཛིན་པ། ང་ཚོས་འདི་ག་རེ་བྱས་ནས་བྱུང་པ་ཡིན་མིན་གྱི་དབྱེ་ཞིབ་བྱ་རྒྱུའི་ཐོག་མར་སྐུ་ཞབས་ཚའོ་ཁྲང་ཆིན་ལ་འདྲི། གོང་ནས་ང་ཚོས་ཁ་བརྡ་བྱས་པར་སྣང་ཚུལ་འདྲ་མིན་ཞིག་མཐོང་སོང་། མང་པོ་ཞིག་བརྒྱུད་ལམ་ཁག་ནས་བཏོན་པའི་གནས་ཚུལ་རེད། ལོ་བཅུ་ཕྲག་རིང་ཁྱེད་རང་གི་སྟེང་ལ་གནས་ཚུལ་འདི་འདྲ་བྱུང་བའི་ཉམས་མྱོང་ཡོད་དམ།

ཚའོ་ཁྲང་ཆིན། རེད། གོང་ནས་ཕའོ་ཁོན་གྱིས་མང་པོ་ཞིག་གླེང་སོང་། ཁོས་དེབ་ཅིག་བྲིས་ཡོད་པ་དེའང་འདིའི་སྐོར་གྱི་ཞིབ་འཇུག་རང་བཞིན་ཅན་ཞིག་རེད། འོན་ཀྱང་། ཁོས་བྲིས་བའི་དེབ་ནང་ལ་ཡོད་པ་མང་ཆེ་བ་ཁོ་རང་གི་སྟེང་ལ་བྱུང་བ་མ་རེད། ཁོས་ཀྱང་བརྒྱུད་ལམ་ཁག་ཏུ་མཐོང་བའི་གནས་ཚུལ་རེད། ཁོས་མཐོང་ཡོད་པའི་གནས་ཚུལ་ཁ་ཤས་ངས་ཀྱང་མཐོང་སོང་། གནས་ཚུལ་དེ་དག་བདེན་པ་རེད། རྒྱ་ཡིག་དང་དབྱིན་ཡིག་གི་གསར་ལམ་ཁག་ཏུ་ནམ་རྒྱུན་ཡོང་གི་ཡོད་པ་རེད།

ལམ་ལུགས་ཀྱི་ངོ་བོ་ནས་མ་གླེང་བར་རིག་གཞུང་གི་ངོ་བོའི་སྟེང་ནས་བཤད་ན། ཁྱོད་ཀྱིས་ཐའེ་ཝན་གྱི་མི་ལ་ཅུང་ཙམ་ཡ་རབས་གུས་བཀུར་ཡོད་པ་གསལ་བོར་ཚོར་ཐུབ། ལས་སླ་བོས་བཤད་ན། ཐའེ་ཝན་གྱི་མིས་ངའི་མདུན་ནས་ཚའོ་ཁྲང་ཆིན་ཞེས་འབོད་མཁན་ཡོད་པ་མ་རེད། ཁོ་ཚོས་སྐུ་ཞབས་ཚའོ་དང་། ཡང་ན་གུས་ལུགས་གཞན་ཞིག་གི་ཐོག་ནས་འབོད། ཚང་མར་ཧ་ཅང་ཡ་རབས་ཀྱི་འབོད་སྟེངས་ཤིག་ཡོད། གལ་སྲིད་ཁྱེད་རང་རྒྱ་ནག་ནང་ཡོད་ན་འདི་རིགས་མཐོང་མི་ཐུབ། གོང་ནས་ཁྱེད་ཀྱིས་གླེང་བའི་ཝོ་ཧོ་ཚི་རྒྱ་ནག་གི་གནའ་རྫས་གལ་ཆེན་ཞིག་གི་སྟེང་ཁོའི་མིང་བསྐོས་ཏེ། གནས་འདིར་ཡུལ་སྐོར་ཐེངས་ཤིག་བྱས་པ་ཡིན་ཟེར་བ་དེ། ཁོ་རང་མིང་གྲགས་ཅན་ཞིག་བྱ་འདོད་པ་དང་། རང་རློམ་ཆེ་དྲགས་པ་མ་ཟད། རང་རློམ་ཆེ་བའི་མཇུག་འབྲས་དེས། རང་དང་རང་གི་མི་རིགས། རང་གི་རྒྱལ་ཁབ་སོགས་ཀྱི་ཆེ་མཐོང་བརླག་བཅུག་པ་རེད།

མདོ་འཛིན་པ། ཁྲིན་ཕའོ་ཁོན་ཁྱེད་ཀྱིས་གོང་ནས་གླེང་པ་དང་ང་ལ་བག་ཆགས་གཏིང་ཟབ་མོ་ཞིག་ཡོད་པ་དེ་ནི། ལོ་སྔོན་མའི་ལོ་མཇུག་ལ་ཐེ་ལན་ཌིའི་གནམ་གྲུའི་གནས་ཚུལ་ཞིག་བྱུང་བ་དེ་རེད། རྒྱ་རིགས་བུད་མེད་ཡུལ་སྐོར་སྤྲོ་འཆམ་པ་ཞིག་གིས་ཐུག་པ་ཕོར་བ་གང་གིས་གནམ་གྲུའི་ཞབས་ཞུ་མའི་གདོང་ལ་གཞུས་པ་དང་། ད་དུང་མོས་རོགས་པ་སྐྱེས་པ་ཁག་ཅིག་གིས་གནམ་གྲུའི་ནང་འབར་རྫས་གས་གཏོར་བྱ་རྒྱུ་ཡིན་སྐོར་བཤད་དེ། གནམ་གྲུ་ཕྱིར་བྷན་ཁོག་ (Bangkok) ལ་ལོག་སྟེ་ཉེན་རྟོག་པས་མི་དེ་དག་འཛིན་བཟུང་བྱས་ཡོད་པ་དེ་རེད། གནས་ཚུལ་འདི་དག་མཐོང་ཡོང་དུས་ང་རང་ཡང་རྒྱ་མི་ཞིག་ཡིན་པའི་ངོས་ནས། སྔོན་ཆད་རྒྱ་མི་རིགས་དེ་ཡ་རབས་སྤྱོད་བཟང་ཞིག་ཡིན་ཡང་། ད་ལྟ་འདི་ལྟ་བུ་ཞིག་ལ་ཇི་ལྟར་གྱུར་བ་རེད་དམ་སྙམ་པའི་སེམས་ཚོར་དེ་ཤུགས་ཆེན་པོ་ཡོང་གི་འདུག

ཁྲིན་ཕའོ་ཁོན། དེ་རིང་གི་རྒྱ་ནག་དར་རྒྱས་བྱུང་ནས་ཀྲུང་གོ་པའི་སྐེད་པའི་དངུལ་ཁུག་སྤོས་ནས་རྒྱུ་ཆེན་ཆགས་པ་རེད། འཛམ་གླིང་ག་ས་གང་དུ་ཡུལ་སྐོར་སྤྲོ་འཆམ་ལ་འགྲོ་བཞིན་འདུག ཉི་ཧོང་གི་འགྲེམ་སྟོན་ཁང་དུ། ཅ་དངོས་ལ་ལག་པ་མ་འཆིང་ཞེས་བྲིས་ཡོད་པ་མཐོང་བཞིན་དུ་ལག་པ་འཆིང་བ་དང་། ཚོད་ལྟ་བྱས་མི་ཆོག་པའི་གྱོན་ཆས་རིགས་ཨུ་ཚུགས་ཀྱིས་གྱོན་ཏེ་ཚོད་ལྟ་བྱས་ཡོད།

ལོ་སྔོན་མའི་ཟླ་ ༡༢ ནང་ཐེ་ལན་ཌིའི་གནམ་གྲུ་ཞིག་གི་ནང་དུ། རྒྱ་ནག་གི་བུད་མེད་གཅིག་གིས་ཐུག་པ་སྐམ་པོ་ཆུ་ཁོལ་ནང་སྦང་ཆེད། ཞབས་ཞུ་མར་ཆུ་ཁོལ་འཁྱེར་ཤོག་ལབ་འདུག ཞབས་ཞུ་མས་ཅུང་ཙམ་དལ་འགོར་བྱས་ཡོད་སྟབས། ཆུ་ཁོལ་འཁྱེར་ཡོང་མ་ཐག་ཞབས་ཞུ་མའི་གདོང་ལ་གཏོར་འདུག ཁོ་ཚོའི་བར་ཁ་རྩོད་བྱུང་མ་ཐག བུད་མེད་དེའི་རོགས་པ་སྐྱེས་པ་གསུམ་གྱིས་ཀྱང་བུད་མེད་དེར་རྒྱབ་རྩ་བྱས་ཏེ། གནམ་གྲུའི་ནང་ནས་སྐད་ཅོར་བརྒྱབ་འདུག ད་དུང་ང་ཚོར་སྒོར་མོ་མི་འདུག་བསམ་པ་ཡིན་ནམ། ཞེས་སྒོར་མོ་ཕྱི་ལ་བཏོན་འདུག གནམ་གྲུའི་ནང་འབར་རྫས་ཀྱིས་གས་གཏོར་བྱ་རྒྱུ་ཡིན་ཞེས་པ་དང་། མཚམས་ཤིག་ལ་ང་ལ་སེམས་ནད་ཡོད། ངས་རང་ཤི་རྒྱག་རྒྱུ་ཡིན་སོགས་ལབ་འདུག དངོས་གནས་བྱས་ན། གནམ་གྲུའི་ནང་ཟ་མ་ག་རེ་དགོས་ཀྱང་ཡོད་པ་རེད། སོ་སོ་སྒེར་གྱི་ཁུག་མའི་ནང་ནས་ཐུག་པ་སྒམ་པ་བཏོན་ཏེ། གནམ་གྲུའི་ཞབས་ཞུ་མར་ཆུ་ཁོལ་འཁྱེར་ཤོག་ལབ་ན་འགྲིག་གི་རེད་དམ།

མདོ་འཛིན་པ། འད་དག་གོ་ཡོང་དུས་ཁོ་ཚོ་ཧ་ཅང་རང་ཉིད་གཙོ་འཛིན་ཅན་རྐྱང་རྐྱང་རེད་འདུག

ཁྲིན་ཕའོ་ཁོན། དེ་ནི་མགོ་བདེ་ཁྲེལ་མེད་འཁྲབ་པ་རེད། རྒྱ་ནག་མི་ཡོངས་རྫོགས་མགོ་བདེ་ཁྲེལ་མེད་འཁྲབ་མཁན་རེད་ལབ་ན་འགྲིག་གི་ཡོད། དོན་དངོས་སུ་ལམ་ལུགས་ཡོངས་རྫོགས་མགོ་བདེ་ཁྲེལ་མེད་རེད། དེ་བཞིན་རྒྱ་ནག་གི་མགོ་ཁྲིད་རིམ་པ་ནི་མགོ་བདེ་ཁྲེལ་མེད་གྱི་མགོ་ཁྲིད་དང་། གོང་དཔེ་ལད་ཟློས་བྱས་ཏེ་དཔོན་ངན་ལ་གཡོག་ངན་དང་། ཆུའི་མགོ་ཁུངས་རྙོག་ཏེ་ཆུ་གཞུག་ཡོངས་རྫོགས་སྦགས་བཙོག་བཟོས་པ་རེད།

རྒྱ་ནག་ནང་དུ་མི་གཅིག་གིས་གཅིག་ལ་རོགས་སྐྱོར་བྱ་རྒྱུར་ཡང་ཞེད་དགོས་པའི་གནས་སྟངས་ཆགས་ཡོད། སྔོན་ཆད་སྐྱེས་པ་ཞིག་དང་ཁོའི་རོགས་པ་གཉིས་ཀྱིས་རྨོ་མོ་ཞིག་ས་ལ་འགྱེད་ཡོད་པ་ཡར་བསླངས་པར། རྨོ་མོ་དེས་ཁོ་གཉིས་ཁྲིམས་གཏུག་བྱས་འདུག་པ་མ་ཟད། རྗེས་སུ་མོ་ས་ལ་འགྱེད་པའི་སྨན་རིན་ཡང་ཁོ་གཉིས་ལག་ནས་འཕྲོག་འདུག གནས་ཚུལ་དེ་དང་འབྲེལ་ནས་རྒྱ་ནག་ནང་མི་ས་ལ་འགྱེད་ཡོད་ན་ཡར་བསླང་ན་འགྲིག་གི་ཡོད་མེད་ཀྱི་རྩོད་གླེང་ཞིག་བྱུང་བ་རེད། དགོད་བྲོ་བ་ཞིག་ལ། དགོང་མོ་ཞིག་ལ་ཧྲང་ཧེ་ས་འོག་མེ་འཁོར་ནང་ཕྱི་གླེང་བ་ཞིག་ས་ལ་འགྱེད་སྐབས། སྐར་ཆ་ ༡༠ ནང་མེ་འཁོར་ནང་གི་རྒྱ་མི་ཚང་མ་ཕྱིར་བྲོས་པ་མ་ཟད། མི་མང་བོས་ཞེད་སྣང་གིས་འཚང་ཁ་བརྒྱབ་སྟེ་མགོ་དང་རྐང་ལག་སྒོ་དང་སྒེའུ་ཁུང་ལ་བརྡབ་ནས་རྨས་སྐྱོན་བཟོས་ཡོད།

སྣང་བརྙན་འདི་རིགས་རྒྱལ་ཁབ་གཞན་ལ་ཕལ་ཆེར་མཐོང་རྒྱུ་མེད་པ་དང་། གལ་སྲིད་ཡོད་ནའང་ཉུང་ཉུང་ཡིན་རྒྱུ་རེད། འོན་ཀྱང་། རྒྱ་ནག་ནང་ལ་ག་རེ་བྱས་ནས་བྱུང་པ་རེད། ང་ཚོས་མི་གཤིས་སྟེང་གི་གནད་དོན་འཚོལ་དགོས་པ་མ་ཟད། དེ་དང་འབྲེལ་ནས་སྤྱི་ཚོགས་ཀྱི་སློབ་གསོ་ཞིག་གམ་ལམ་ལུགས་ཤིག་གི་རྩ་བ་འཚོལ་དགོས་པ་རེད། ཉེ་བའི་དུས་རབས་ཕྱེད་ཀའི་ནང་རྒྱ་ནག་རྒྱལ་ཡོངས་ཀྱི་ཕུན་ཚོགས་ཀུན་སྤྱོད་རྩ་མེད་དུ་ཕྱིན་དང་འགྲོ་བཞིན་ཡོད། བཅོས་བསྒྱུར་སྒོ་འབྱེད་ཟེར་བ་དང་། ཕྱུག་པོ་གསར་བའི་དུས་རབས་ཟེར་བ། རྒྱ་ནག་ཡུལ་གྱི་གཤེད་མ་དང་། མི་དྲག་ངན་པ་ཟེར་བ་དེ་དག་གིས་རྒྱ་ནག་གི་ཀུན་སྤྱོད་དེ་རྩ་མེད་བཟོ་བཞིན་འདུག

མདོ་འཛིན་པ། སྐུ་ཞབས་ཚའོ་ཁྲང་ཆིན་ལགས་ཁྱེད་ཀྱི་མཐོང་ཚུལ་གསུང་ན་འགྲིག་གམ། ག་རེ་བྱས་ནས་རྒྱ་མི་མང་པོ་ཞིག་གི་སྟེང་དུ་གུས་བཀུར་ཞེས་པའི་ཚིག་འབྲི་དེ་གཉིས་མེད་སོང་པ་རེད།

ཚའོ་ཁྲང་ཆིན། གོང་ནས་ཕའོ་ཁོན་གྱིས་གླེང་བའི་ལམ་ལུགས་ཀྱི་གནད་དོན་རེད་ཅེས་པ་དེའི་སྟེང་ངས་ཀྱང་གལ་ཆེན་བྱས་ནས་འདིའི་སྟེང་བཤད་འདོད་བྱུང་སོང་། དེང་སྐབས་ཐའེ་ཝན་མི་མང་བརྒྱ་ཆ་ ༦༠ ཡིས་ཁོ་ཚོ་རྒྱ་མི་མིན། ཐའེ་ཝན་ཡིན་ཟེར་གྱི་ཡོད། ཁོ་ཚོ་རྒྱ་མི་ཡིན་ཟེར་རྒྱུར་ངོ་ཚ་ཡི་ཡོད་པ་རེད། ང་ཚོས་ཐའེ་ཝན་མི་གླེང་། ང་ཚོས་ཨ་རི་དང་ཕྱི་ལོགས་སུ་རྒྱ་རིགས་ཁྲི་སྟོང་མང་པོ་དང་བསྡུར་དང་། ཨ་རིའི་བརྒྱུད་ལམ་ཁག་ཏུ་ག་རེ་བྱས་ནས་ཨ་རིར་སྡོད་པའི་རྒྱ་མི་ཚོར་ཉོབ་སྣང་གི་གནས་ཚུལ་འཐོན་རྒྱུ་མེད་པ་རེད། ཨ་རིར་སྡོད་པའི་རྒྱ་མི་ཚོ་ཡ་རབས་མིན་པ་དང་གུས་བཀུར་མེད་ཚུལ་ཅིའི་ཕྱིར་མ་གླེང་བ་རེད། ག་རེ་བྱས་ནས་རྒྱ་ནག་ནས་ཡོང་བའི་ཡུལ་སྐོར་སྤྲོ་འཆམ་པ་གླེང་དགོས་ཐུག་པ་རེད། རྒྱ་མི་ཡིན་པ་གཅིག་པ་ཡིན་ཡང་། ཅིའི་ཕྱིར་རྒྱ་ནག་ནས་ཡོང་བའི་རྒྱ་རིགས་ཚོ་དེ་འདྲའི་བྱ་སྤྱོད་ངན་པ་དང་། ཨ་རིར་སྡོད་པའི་རྒྱ་རིགས་ཚོ་ཡག་པོ་ཆགས་པ་རེད། འདི་ནི་རིག་གནས་ཤིག་གི་གནད་དོན་རེད། རིག་གནས་དེ་ནི་མི་གཤིས་ཀྱི་རིག་གནས་ཤིག་དང་ཡ་རབས་ཀྱི་རིག་གནས་ཤིག བཟོ་བཅོས་བྱས་ཟིན་པའི་རིག་གནས་ཤིག དམངས་གཙོའི་ལམ་ལུགས་ཀྱི་རིག་གནས་ཤིག་ལ་ཐུག་ཡོད་པ་རེད།

གཞན། ཨ་རིའི་ནང་མི་ཁྲམ་པ་ཞིག་གོང་རིམ་མགོ་གཙོ་བྱ་ཐུབ་རྒྱུ་རེད་དམ། ལམ་སང་མང་ཚོགས་ཀྱིས་ཁོའི་ནག་ཉེས་གླེང་གི་རེད་ལ་ཁྲིམས་ཐོག་ནས་ཀྱང་ཁོ་ལ་ཁེ་ཕན་རག་ཐབས་ཡོད་པ་མ་རེད། རྒྱ་ནག་ལ་ག་རེ་མ་འགྲིག་པ་རེད། གོང་ནས་ཁྲིན་ཕའོ་ཁོན་གྱིས་གླེང་པའི་ཁྲིན་ཀོང་པའུ་ཡིས་རྟགས་བསྟན་པའི་གནད་དོན་དེ་རེད། རྒྱ་ནག་ལ་མྱོན་པ་དང་ཨ་Q ནི་རྒྱུན་ལྡན་རེད། ༼ཨ་Q ཞེས་པ་ནི་རྒྱ་ནག་གི་ཉེ་རབས་རྩོམ་པ་པོ་ལུའུ་ཞུན་གྱིས་བྲིས་པའི་བརྩམས་སྒྲུང་ཞིག་གི་ནང་ནས་མི་སྣ་གཙོ་བོ་དང་ཆེས་དགོད་བྲོ་བ། སྤྱོད་པ་ཧ་ཅང་ཐ་ཤལ་ཅན་ཞིག་ཡོད་པ་དེ་ལ་ཟེར།༽ སྤྱི་ཚོགས་ཀྱང་ཕལ་ཆེར་དེ་འདྲ་ཡིན་སྲིད། ཁྲིན་ཀོང་པའུ་ནི་རྒྱ་ནག་གི་ངལ་རྩོལ་རྩེ་ཕུད་ཀྱི་མི་སྣ་ཞིག་དང་། རྒྱ་ནག་གུང་ཁྲན་ཏང་གི་ཆབ་སྲིད་ཨུ་ཡོན་ཞིག་ཀྱང་རེད་འདུག འདི་ལྟ་བུའི་ཆབ་སྲིད་ཨུ་ཡོན་ད་དུང་བསྡད་ཡོད་པ་རེད། གུང་ཁྲན་ཏང་གིས་རིན་ཐང་ག་འདྲ་ཞིག་བསྐྲུན་ཡོད་དམ།

 དེ་རིང་ང་ཚོས་ཕྱི་སྡོད་རྒྱ་ནག་པ་ཚོ་དང་མི་བསྡུར། རྒྱ་ནག་མེན་གོ་སྐབས་དང་བསྡུར། གློག་བརྙན་དང་སྒྲུང་གཏམ་སོགས་ལས་སྐབས་དེའི་མི་རྣམས་ལ་ལྟོས་དང་། སྐབས་དེར་ཅ་དངོས་གཡར་པ་དང་ཟ་ཁང་ནས་ཟ་མ་བཟོས་རྗེས་ཐོ་འགོད་བྱས་ཏེ། ཟླ་མཇུག་ལ་སྤྲད་ཆོག་པ་ལྟ་བུའི་ཕན་ཚུན་ལ་ཡིད་ཆེས་ཡོད་པ་རེད། ད་ལྟ་རྒྱ་ནག་གི་མི་ཚོར་ཡིད་ཆེས་ཡོད་དམ། རྩ་བ་ནས་ཡོད་པ་མ་རེད། ད་ལྟའི་རྒྱ་ནག་གི་མི་རྣམས་ཕ་མ་བུ་ཕྲུག་བར་དང་། ཕུ་ནུ་མིང་སྲིང་བར། གྲོགས་པོ་ཕན་ཚུན་བར་སོགས་ལ་ཡིད་ཆེས་མེད་པའི་གནས་ཚུལ་འདི་དག་ཡོངས་རྫོགས་ལམ་ལུགས་ཤིག་དང་ཐད་ཀར་འབྲེལ་བ་ཡོད།

མདོ་འཛིན་པ། དེས་ན་ཁྱེད་རང་ཚོས་གསུངས་པའི་ལམ་ལུགས་དང་། གུང་ཁྲན་ཏང་གིས་རྒྱལ་སྲིད་གཡོ་འཕྲོག་བྱས་ཏེ་རྒྱ་ནག་གི་སྲིད་སྐྱོང་པ་ངས་ཤེས་ཀྱི་ཡོད། རྒྱ་ནག་གི་གནའ་བོའི་རིག་གཞུང་ནི་ཕན་སེམས་དང་དྲང་བདེན། སྤྱོད་བཟང་། ཤེས་རབ། ཡིད་ཆེས་སོགས་གཙོ་བོ་ཡིན། འོན་ཡང་། གུང་ཁྲན་ཏང་སྲིད་སྐྱོང་གིས་ག་རེ་བྱས་ནས་རིག་གཞུང་འདིའི་ཤུན་པགས་བཤུས་པ་རེད་དམ། ཁྲིན་ཕའོ་ཁོན། སོན་ཆིན་ལིན་ (Song Qingling) ནི་ལོ་རབས་སྔོན་མའི་ནང་གི་བུད་མེད་འབྲང་རིམ་ཞིག་ཡིན་ཡང་། རྒྱ་ནག་གསར་བའི་སྐབས་སོན་ཀྲོན་ཧྲན་ (Sun Zhongshan) གྱི་ཡུགས་མོ་དེ་མཐོང་དཀོན་པའི་རྩ་ཆེན་ཞིག་ཏུ་གྱུར་འདུག མཇུག་མཐར་རིག་གནས་གསར་བརྗེ་སྐབས་མོས་རང་གི་ཕུག་རོན་བསད་ཡོད་པ་དང་། མེ་ཏོག་སྟེང་ལ་ཆུ་ཁོལ་བླུགས་ནས་བསད་ཡོད་འདུག འདི་དག་ནི་འབྱོར་ལྡན་གྲལ་རིམ་གྱི་ཉམས་འགྱུར་རེད། མོས་མོ་རང་གི་གྱོན་པ་ལྭ་རིང་སྐུང་ནས་ཇེམ་ཙེ་ཡིས་གཏུབ་པའི་དུས་ལ་བསླེབས་པ་འདི་ནི་འབྱོར་ལྡན་གྲལ་རིམ་གྱི་ཉམས་འགྱུར་སྟོན་ཆེད་རེད། དམིགས་བསལ་རིག་གནས་གསར་བརྗེ་སྐབས་གསོད་གཏུབ་ཀྱི་ཤུགས་རྐྱེན་དེ་ཧ་ཅང་ཛ་དྲག་རེད། གུས་གསོལ་ཡག་པོ་ཡོད་ཚད་རྩ་བ་ནས་གཙང་འཕྱག་བྱས་ཡོད་པ་རེད། སློབ་མས་དགེ་རྒན་ལ་གཅར་རྡུང་བྱས་ནས་བསད་ཡོད་པ་དང་། བུ་ཕྲུག་གིས་ཕ་མར་སྐྱོན་བརྗོད་བྱས་ཏེ་སྲོག་ཁྲིམས་བཅད་པ། ད་དུང་བཟའ་ཟླ་དང་ཕུ་ནུའི་བར། རྙིང་པ་ཡོངས་རྫོགས་དང་རིན་ཐང་ཡོད་ཆ་ཚང་གཏོར་བཤིག་བཏང་ཡོད།

འོན་ཀྱང་། ད་ལྟ་ང་ཚོས་ཡ་མཚན་གྱི་སྣང་ཚུལ་ཞིག་མཐོང་བ་ནི། གུང་ཁྲན་ཏང་གིས་ད་དུང་རྒྱ་ནག་གི་སྲོལ་རྒྱུན་མཛེས་དཔྱོད་དང་རིག་གཞུང་། ད་དུང་ཁུང་ཙི་སོགས་གླེང་གི་ཡོད་ཀྱང་། དངོས་གནས་བྱས་ན་ཀྲུང་ཧྭ་མི་རིགས་ཀྱི་ཡ་རབས་བཟང་སྤྱོད་དེ་ཁྱེད་ཀྱིས་བཙལ་དགོས་ན་རྒྱ་ནག་ནང་ནས་རྙེད་ཐུབ་མེད། ཁྱོད་ཀྱིས་ཐའེ་ཝན་དང་ཉི་ཧོང་། ལྷོ་ཀོ་རི་ཡ་སོགས་སུ་མཛེས་སྡུག་གི་ཤུལ་ལྷག་མཐོང་ཐུབ་ངེས་ཡིན། ཐའེ་ཝན་མི་ཚོའི་སྟེང་ནས་ཁྱོད་ཀྱིས་ལྷག་བསམ་རྣམ་དག་དང་དྲང་པོ་དྲང་བཞག དྭངས་གཙང་སོགས་ཀྱི་སྲོལ་རྒྱུན་གྱི་བྲོ་བ་སྟུག་པོ་ཞིག་རྙེད་ཐུབ།

ངའི་དེབ་འདིའི་ནང་ལ་རྒྱ་ནག་དེང་རབས་ཕྱོགས་ལ་གོམ་པ་མ་སྤོས་སྔོན་ནས་སྲོལ་རྒྱུན་རིག་གནས་གཡུགས་ཚར་བ་རེད། ཉི་ཧོང་དང་ལྡོག་ཟླ་རེད། ཉི་ཧོང་ན་གཉིས་ཆ་ཡོད། སྲོལ་རྒྱུན་ཉར་ཚགས་བྱས་པ་དང་། དཔེར་ན། གྱོན་པ་དང་མེ་ཏོག་འཛུགས་སྟངས། ཇ་ལྡུག་སྟངས་སོགས་ཉར་ཡོད། ཁོ་ལ་དེང་རབས་ཀྱི་དགོས་པ་ཆ་ཚང་ཡོད། དཔེར་ན། དམངས་གཙོའི་ལམ་ལུགས་དང་། སྨྲ་བརྗོད་རང་དབང་། ད་དུང་མི་ལ་བརྩི་འཇོག་སོགས་ཆ་ཚོང་ཡོད། ཁོ་ཚོས་མགོ་གུག་ནས་བརྩི་བཀུར་བྱེད་སྟངས་ཧ་ཅང་ཡག་པོ་ཞིག་ཡོད། དེ་འདྲ་ཡིན་དུས། ངས་དེབ་ཀྱི་རྒྱབ་ཤོག་སྟེང་ལ་སྐད་ཆ་ཅིག ཀྲུང་གོ་མི། ཧོང་ཀོང་མི། ཐའེ་ཝན་མི། ག་རེ་བྱས་ནས་རྒྱུ་གཅིག་རིགས་གཅིག་ཡིན་ཡང་གཤིས་སྤྱོད་མ་གཅིག་པ་རེད་དམ། ཚང་མ་རྒྱ་མི་རེད། ང་ཚོས་གླེང་པའི་མིའི་གཤིས་ཀ་ཡི་རྩ་བ་གང་ནས་ཡོང་པ་རེད། ག་རེ་བྱས་སོང་བ་རེད་ཅེས་བཀོད་ཡོད། གང་ཡིན་ཞེ་ན། ཧོང་ཀོང་དང་ཐའེ་ཝན་གྱི་རྒྱ་མི་ཚོས་སྲོལ་རྒྱུན་གྱི་མཛེས་དཔྱོད་དེ་བོར་ཡོད་པ་མ་རེད། ཁོ་ཚོར་རིག་གནས་གསར་བརྗེ་ཡི་གོད་ཆག་གི་བརྒྱུད་རིམ་དང་། གུང་ཁྲན་ཏང་གི་འདི་འདྲའི་གཙང་བཅོམ་མ་ལུས་ཀུན་འཕྲོག་གིས་ཀླད་པ་བཀྲུས་ཡོད་བ་མ་རེད།

གཞན་ད་དུང་ལམ་ལུགས་སྟེང་རེད། དཔེར་ན། རང་དབང་གི་ཧོང་ཀོང་དང་། དམངས་གཙོའི་ཐའེ་ཝན། ཁྲིམས་སྐྱོང་གི་སེང་གྷ་པུར། ཤུགས་རྐྱེན་བཟང་བོ་ཐེབས་པའི་ཁོ་ཚོའི་མི་གཤིས་དང་རྒྱ་ནག་སྐམ་སའི་རྨིག་ལྕགས་འོག་གི་མི་གཤིས་དང་རྩ་བ་ཉིད་ནས་འདྲ་བོ་ཡོད་མ་རེད། དེ་ཚིག་ཅིག་རེད། རྒྱ་ནག་སྐམ་ས་ནས་ཡོང་བའི་མི་དེ་དག་རང་སྲོག་བློས་གཏོང་གི་དངོས་པོ་རེད། གུང་ཁྲན་རྨིག་ལྕགས་འོག་གི་བེད་སྤྱོད་མེད་པའི་དངོས་པོ་རེད།

མདོ་འཛིན་པ། སྐུ་ཞབས་ཚའོ་ཁྲང་ཆིན་ལགས། གོང་ནས་ང་ཚོས་རྒྱ་མི་ཚོར་དགའ་བསུ་མི་བྱེད་པ་དང་ཡ་རབས་བཟང་སྤྱོད་མེད་པའི་སྣང་ཚུལ་དེ་དག་གིས་མི་སེམས་ལ་སྡུག་བསྔལ་ཞིག་སྐྲུན་གྱིན་ཡོད། འོན་ཀྱང་། མི་ཁ་ཤས་ཀྱིས། སྔོན་ཐོན་གྱི་རྒྱལ་ཁབ་དེ་དག་གི་མི་གཤིས་ཀྱང་ཉིན་གཅིག་གཉིས་ལ་ཡོང་པ་ཞིག་མིན་སྟབས། དུས་ཚོད་ཀྱི་འཕེལ་རིམ་ཁྲོད་ནས་འགྱུར་བ་འབྱུང་བར་ཡིད་ཆེས་བྱེད་ཀྱིན་ཡོད། སྐམ་ས་ཆེན་མོའི་ཡུལ་སྐོར་བ་ཚོ་ཡང་ཅང་མ་འགོར་བར་བརྗེ་བོ་བརྒྱག་གི་རེད་ཟེར་གྱིན་འདུག ཁྱེད་ལ་བཤད་ཚུལ་དེར་ལྟ་སྟངས་ག་འདྲ་ཡོད་དམ།

ཚའོ་ཁྲང་ཆིན། ཡིན་དང་ཡིན། ཁྱོད་ཀྱིས་བཤད་པར་མི་གཤིས་ལ་མ་འདྲ་བ་ཡོད་ཀྱང་། རྒྱ་ནག་ལ་དམིགས་བསལ་གྱི་གཤིས་ཀ་ཞིག་ཡོད་པ་དང་། དམིགས་བསལ་གྱི་གཤིས་ཀ་འདི་ལམ་ལུགས་དང་རིག་གནས་ལ་འབྲེལ་བ་ཡོད། གོང་ནས་ཕའོ་ཁོན་གྱིས་གླེང་བ་ལྟར། རྒྱ་མིས་གསང་སྤྱོད་ནང་གི་ཤོག་བུ་སོགས་འཁྱེར་འགྲོ་བཞིན་ཡོད་སྟབས། ཚད་མཐོའི་ལྕགས་ལམ་མེ་འཁོར་སོགས་ཀྱི་གསང་སྤྱོད་ནང་ཅ་དངོས་རྩ་ཆེན་ཞིག་ཡོད་པ་ལྟར་སྒོར་ལྕགས་བརྒྱབ་འདུག ཐའེ་ཝན་ནས་ང་ཐེངས་མང་ལ་ཚད་མཐོའི་ལྕགས་ལམ་མེ་འཁོར་ནང་སོང་པ་དང་། ཚད་མཐོའི་ལྕགས་ལམ་མེ་འཁོར་གྱི་གསང་སྤྱོད་དག་ལ་དེ་འདྲ་མི་འདུག ངས་འདི་ནི་རྒྱ་ནག་དེ་འདས་པའི་ལོ་མང་རིང་དབུལ་ཕོངས་ཆགས་པར་འབྲེལ་བ་འདུག་བསམ་གྱི་ཡོད། གུང་ཁྲན་ཏང་གི་སྤྱི་ཚོགས་རིང་ལུགས་དང་རྒྱལ་ཁབ་གཅིག་ལ་སླ་ང་ཆེན་པོ་གཅིག་གི་ལམ་ལུགས་ག་ས་གང་ལ་ཡོད་ཀྱང་འགྲིག་འགྲོ་བཞིན་ཡོད། འོན་ཀྱང་། རྒྱ་ནག་ལ་དབུལ་ཕོངས་ཀྱིས་བཟོས་པའི་ཤུགས་རྐྱེན་ད་དུང་བཅོས་བསྒྱུར་བྱས་མེད་པ་དང་། སློབ་སྦྱོང་དང་བསྐྱར་གསོ་ལྷག་འདུག ཉི་ཧོང་གི་སློབ་ཆུང་ནས་མགོ་བཙུགས་ཏེ་རྒྱལ་ཁབ་ཀྱི་སྒྲིག་ཁྲིམས་ལྟར་སློབ་གྲྭའི་འགན་འཛིན་དང་དགེ་རྒན་ཚོས་མཉམ་དུ་ཁ་ལག་ཟ་བ་དང་ཟ་མའང་གཅིག་པ་རེད། དེ་ནས་སློབ་ཆུང་སློབ་མ་ཚོས་རང་གིས་ཕོར་བ་འཁྱེར་ནས་རང་གིས་བཀྲུས་ཏེ་གཙང་མ་བྱས་ནས་འཇོག་གི་ཡོད། རྒྱ་ནག་ལ་འདིའི་སྐོར་གྱི་སློབ་གསོ་མེད། ད་ལྟའི་རྒྱ་ནག་གི་ཡོད་ཚད་ཁྲེལ་མེད་རང་བཞིན་ཞིག་ཏུ་གྱུར་འདུག མང་ཚོགས་ཁྲེལ་མེད་ཡིན་པ་མ་ཟད། མགོ་ཁྲིད་ཚོའང་ཁྲེལ་མེད་རེད། དཔེར་ན། པའོ་ཞི་ལེ་འཛིན་བཟུང་བྱས་མེད་ན། ད་ལྟ་ད་དུང་ཡང་གུང་ཁྲན་ཏང་གི་མགོ་ཁྲིད་རེད། ཀྲུའུ་ཡོན་ཁཱང་ཡང་ཏང་དང་རྒྱལ་ཁབ་ཀྱི་མགོ་ཁྲིད་རེད། ད་འདི་དག་མི་ག་འདྲ་འདུག

མདོ་འཛིན་པ། ང་ཚོའི་ལེ་ཚན་མཇུག་སྒྲིལ་གྲབས་འདུག ཚའོ་ཁྲང་ཆིན་ཁྱེད་ཀྱིས་ལྟད་མོ་བ་ཚོའི་ཁ་པར་གྱི་དྲི་བར་ལན་ག་རེ་བསྐྱོན་འདོད་ཡོད་དམ།

ཚའོ་ཁྲང་ཆིན། ང་རྒྱ་ནག་གི་རེ་འདུན་ལ་ཡིད་ཆེས་ཀྱིས་ཁེངས་ཡོད། གོང་གིས་སྐྱེས་དམན་གྱིས་མ་འོངས་པ་རྒྱ་ནག་འགྱུར་བ་ག་རེ་འགྲོ་གི་རེད་ཟེར། མ་འོངས་པར་ཇེ་བཟང་དུ་ཡོང་གི་རེད། མིའི་རྒྱུ་སྤུས་གནད་འགག་མ་རེད། རྒྱ་ནག་ག་རེ་བྱས་ནས་འདི་འདྲའི་མ་རབས་ཐ་ཤལ་ཞིག་ཆགས་པ་རེད་ཟེར་ན། ཁྱོད་ཀྱི་རིག་གནས་ལ་གནད་དོན་ཡོད་པ་རེད། རིག་གནས་ཀྱི་གནད་དོན་ག་རེ་རེད། གུང་ཁྲན་ཏང་གིས་བཟོས་པའི་རིག་གནས་རེད། མགོ་སྐོར་གཏོང་བྱེད་ཀྱི་རིག་གནས་རེད། རིག་གནས་འདི་ག་རེ་བྱས་ནས་བཅོས་བསྒྱུར་བྱ་དགོས་སམ། ལམ་ལུགས་དང་རིག་གནས། མི། ཕྱོགས་གསུམ་ལྕགས་ཐག་བཞིན་རྒྱུས་ཏེ་ཕན་ཚུན་འཐམས་ཡོད། ལྕགས་ཐག་འདི་གཏོར་དགོས་ན། དང་པོ་ལམ་ལུགས་འདི་གཏོར་དགོས། ལམ་ལུགས་འདི་གཏོར་ཐུབ་པ་ཡིན་ན། ད་གཟོད་རྒྱ་ནག་གི་སྲོལ་རྒྱུན་རིག་གནས་ཀྱི་འཕེལ་རྒྱས་རྒྱུན་སྐྱོང་བྱ་ཐུབ་ལ། དེ་ནས་རིམ་བཞིན་ནུབ་ཕྱོགས་ཀྱི་ཡ་རབས་རིག་གནས་ནང་འདྲེན་བྱེད་དགོས། འདི་ལྟར་བྱས་ན། རིམ་གྱིས་རྒྱ་མི་རིགས་ཀྱི་བསམ་བློའི་གནས་ཚད་ཡར་རྒྱས་འགྲོ་ཐུབ། ལམ་ལུགས་བཅོས་བསྒྱུར་བྱ་རྒྱུ་ཐོག་མ་རེད། ལམ་ལུགས་བཅོས་བསྒྱུར་བྱས་རྗེས། རིག་གནས་བཅོས་བསྒྱུར་བྱེད་དགོས་པ་དང་། དེའི་རྗེས་ལ་མི་བཅོས་བསྒྱུར་བྱ་དགོས།

གསར་འགོད་པ། འཇིགས་མེད་རྒྱ་མཚོས་བསྡུ་སྒྲིག་བྱས།