འདི་ལོའི་བོད་ཀྱི་མཛངས་མའི་འགྲན་སྡུར་ཕྱི་ཟླ་ ༦ ཚེས་༧ ཉིན་དྷ་ས་བོད་ཀྱི་ཟློས་གར་ཁང་དུ་འཚོགས་རྒྱུ་ཡིན་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་མཛངས་མའི་འགྲན་སྡུར་གོ་སྒྲིག་པ་བློ་བཟང་དབང་རྒྱལ་ལགས་སུ། འདི་ལོའི་བོད་ཀྱི་མཛངས་མའི་འགྲན་སྡུར་ག་དུས་འཚོགས་འཆར་ཡོད་མེད་དྲིས་པར། བོད་ཀྱི་མཛངས་མའི་དྲ་རྒྱ་ཐོག་ཕྱི་ལོ་ ༢༠༡༤ ཟླ་ ༡༢ ནས་འདི་ལོའི་ཕྱི་ཟླ་ ༤ པའི་ཟླ་མཇུག་བར་སྙན་ཞུ་སྤྲོད་དགོས་པའི་གསལ་བསྒྲགས་སྤེལ་ཡོད་ལ། འདི་ལོའི་ཕྱི་ཟླ་ ༦ ཚེས་ ༧ ཉིན་བཞུགས་སྒར་དྷ་རམ་ས་ལའི་བོད་ཀྱི་ཟློས་གར་ཁང་དུ་དངོས་གཞིའི་འགྲན་སྡུར་འཚོགས་རྒྱུ་ཡིན་སྐོར་བརྗོད་བྱུང་།
འདི་ལོའི་མཛངས་མའི་འགྲན་སྡུར་ནང་སྙན་ཞུ་རྒྱག་མཁན་ག་ཚོད་བྱུང་ཡོད་དྲིས་པར་ཁོང་གིས། ལྷོ་ཕྱོགས་ནས་བུ་མོ་༢ དང་རྡེ་ར་རྡུན་ནས་གཅིག་བཅས་བུ་མོ་ ༣ གྱིས་སྙན་ཞུ་བརྒྱབ་སོང་། ཡིན་ནའང་། དངོས་གཞིའི་ནང་ཚང་མ་ཡོང་ཐུབ་ཀྱི་ཡོད་མེད་བཤད་ཚོད་ཐུག་གི་མ་རེད། གལ་སྲིད་ཁོང་ཚོ་གསུམ་ག་ཡོང་གི་ཡོད་ན། ཕྱི་ཟླ་ ༦ ཚེས་ ༤ ཉིན་འགྲན་ཞུགས་པ་རྣམས་དྷ་རམ་ས་ལར་འཛོམས་རྒྱུ་དང་། ཚེས་ ༥ ཉིན་གྱི་སྔ་དྲོར་གསར་འགོད་ལྷན་ཚོགས་ཤིག་འཚོགས་འཆར་ཡོད། དེ་ནས་ཚེས་ ༦ ཉིན་སྔོན་འགྲོའི་འགྲན་སྡུར་ཁག་ཅིག་བྱ་རྒྱུ་དང་། ཕྱི་ཚེས་ ༧ ཉིན་བོད་ཀྱི་ཟློས་གར་ཁང་དུ་འགྲན་སྡུར་དངོས་གཞི་འཚོགས་འཆར་ཡོད། ཅེས་བརྗོད་བྱུང་།
ང་ཚོའི་སྤྱི་ཚོགས་ནང་བོད་ཀྱི་མཛངས་མའི་བྱ་དགའ་ཧིན་སྒོར་འབུམ་གཅིག་དེ་ཉུང་དྲགས་འདུག་ཟེར་མཁན་ཡོད་པས། ད་ལོར་སྤྱིར་བཏང་གི་འགྲན་སྡུར་རྣམ་གྲངས་དང་བྱ་དགའ་སོགས་ཀྱི་ཐོག་ཡར་རྒྱས་འདྲ་བཏང་ཡོད་མེད་དྲིས་པར། བྱ་དགའ་འབུམ་གཅིག་དེ་ཉུང་དྲགས་ཡོད་ན། ཉུང་དྲགས་འདུག་ལབ་མཁན་ཁོ་རང་ཚོས་ཁ་སྣོན་གནང་རོགས་ཞུ་རྒྱུ་ཡིན། ང་ཚོའི་སྤྱི་ཚོགས་ནང་ལས་འགུལ་མང་པོ་སྤེལ་གྱི་ཡོད་ཀྱང་། བྱ་དགའ་ཧིན་སྒོར་སྟོང་ཕྲག་ལྔ་དང་བཅུ་མ་གཏོགས་འབུམ་གཅིག་སྤྲད་པ་ད་ལྟའི་བར་དུ་གོ་མ་མྱོང་། ན་ནིང་གཞི་ནས་སྲིད་སྐྱོང་སློབ་ཡོན་བྱ་དགའ་འབུམ་གཅིག་གནང་བ་མ་གཏོགས་དེའི་སྔོན་ལ་གོ་རྒྱུ་ཡོད་པ་མ་རེད། དེ་ནས་འགྲན་སྡུར་ཐད་དམིགས་བསལ་གྱི་འགྱུར་བ་ཅི་ཡང་མེད། གང་ཡིན་ཟེར་ན། གལ་ཆེ་ཤོས་དེ་བོད་ཀྱི་མཛངས་མའི་འགྲན་སྡུར་མུ་མཐུད་དུ་སྤེལ་ཐུབ་དགོས་པ་རེད། ཅེས་དང་། ཡང་ཁོང་གིས་མུ་མཐུད་དུ། ང་ལ་དཔལ་འབྱོར་གྱི་རྒྱབ་རྟེན་གང་ཡང་མེད་ཀྱང་། སོ་སོས་དཀའ་ལས་བརྒྱབ་སྟེ་མུ་མཐུད་དུ་བོད་ཀྱི་མཛངས་མའི་འགྲན་སྡུར་སྤེལ་ཐུབ་པ་བྱུང་བ་དེ། ང་རང་གི་གཟི་བརྗིད་དང་སྤོབས་པ་ཞིག་ཡིན་བསམ་གྱི་ཡོད། ཡིན་ནའང་། མུ་མཐུད་དུ་སྤེལ་ཐུབ་དང་མ་ཐུབ་ཟེར་བ་དེར་བལྟ་རྒྱུ་རེད། གལ་སྲིད་མི་གཞན་པར་ལས་འགུལ་འདི་གནང་འདོད་ཡོད་ན་ཕན་ཚུན་གྲོས་སྡུར་བྱ་ཆོག་གི་རེད། ཅེས་བརྗོད་བྱུང་།
བོད་ཀྱི་མཛངས་མ་ཁག་ཅིག་སའི་གོ་ལའི་མཛངས་མ་འགྲན་སྡུར་ནང་ཞུགས་ཐུབ་ཡོད་ཀྱང་། བར་ལམ་ནས་རྒྱ་གཞུང་གི་གནོན་ཤུགས་འོག་ཁག་པོ་ཆགས་པའི་སྐོར་ལ་ཁོང་གིས། སའི་གོ་ལའི་མཛངས་མ་འགྲན་སྡུར་གོ་སྒྲིག་པས་ང་ཚོར་མགྲོན་འབོད་གནང་བ་དང་། ཡང་ང་རང་ཚོའི་ངོས་ནས་ཕར་སྙན་ཞུ་བརྒྱབ་སྟེ་དང་ལེན་གནང་བ་བཅས་ད་ལྟའི་བར་སའི་གོ་ལའི་མཛངས་མ་འགྲན་སྡུར་ནང་ཐེངས་ ༧ ཙམ་ལ་ཞུགས་རྒྱུ་རག་ཡོད་པ་རེད། ཡིན་ནའང་། ཕྱིས་སུ་གོ་སྒྲིག་བྱེད་མཁན་ཁ་ཤས་ཀྱིས་ད་ཡོང་ས་མ་རེད་ང་ཚོར་དཀའ་ངལ་འཕྲད་ཀྱི་འདུག རྒྱ་ནག་གིས་རྙོག་དྲ་བཤད་ཀྱི་འདུག་ཟེར་ནས་ཚུར་ལབ་ཀྱི་འདུག གོ་སྒྲིག་བྱེད་མཁན་ཚོས་ང་ཚོར་མགྲོན་འབོད་མ་བྱས་ན་ང་ཚོའི་ངོས་ནས་འཛུལ་རྒྱུ་ཡིན་ལབ་ས་ཡོད་པ་མ་རེད། སྤྱིར་བཏང་ང་ཚོས་འཛུལ་ཞུགས་བྱེད་པར་ཐབས་ཤེས་མང་པོ་བྱས་པ་ཡིན་ལ། ཁག་ཅིག་ལ་འགྲན་སྡུར་ནང་འཛུལ་ཞུགས་བྱེད་པར་དངུལ་ཕོན་ཆེན་པོ་དགོས་པས། ང་ཚོས་གཏོང་མ་ཐུབ་པའི་དཀའ་ངལ་ཡང་ཡོང་གི་འདུག ཅེས་བརྗོད་བྱུང་།
བོད་ཀྱི་མཛངས་མའི་འགྲན་སྡུར་ཐེངས་དང་པོ་དེ་ཕྱི་ལོ་ ༢༠༠༢ ལོར་བཞུགས་སྒར་དྷ་རམ་ས་ལར་ཚོགས་ཡོད་པ་དང་། ད་ལྟའི་བར་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་བུ་མོ་ ༡༣ ལ་བོད་ཀྱི་མཛངས་མའི་དབུ་རྒྱན་གཡོགས་ཡོད་པ་དང་འབྲེལ། ཧིན་སྒོར་འབུམ་ ༡ རེ་ཡི་བྱ་དགའ་སྤྲད་ཡོད་པ་དང་། འགྲན་ཞུགས་པ་ ༢ དང་ཡང་ན་ ༢ ལས་མང་བ་བྱུང་སྐབས། ཨང་གཉིས་པར་བྱ་དགའ་སྒོར་ཁྲི་ ༥ དང་། ཨང་གསུམ་པར་བྱ་དགའ་སྒོར་ ༢༥༠༠༠ རེ་སྤྲད་ཡོད་པ་རེད།
གསར་འགོད་པ། པདྨ་མཚོ།
