བོད་ནང་རང་ལུས་མེར་བསྲེགས་གནང་འདུག

ད་ནང་ཐོ་རངས་ལ་བོད་ཀན་ལྷོ་ཅོ་ནེ་ཆས་བུ་གཤིས་དགོན་འདབས་ཀྱི་རྒྱ་གཞུང་ལས་ཁུངས་མདུན་དུ་བོད་པའི་བུ་མོ་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་ཕྱིན་འདུག

དེ་རིང་ཞོགས་པའི་བོད་ནང་གི་ཆུ་ཚོད་ ༤ ཙམ་ལ། ཀན་སུའུ་ཞིང་ཆེན་ཀན་ལྷོ་ཁུལ་ཅོ་ནེ་རྫོང་ཁོངས། ཆས་བུ་གཤིས་སམ་ཆོས་དཔལ་ཞིང་བཀྲ་ཤིས་ཆོས་འཁོར་གླིང་དགོན་པའི་ཉེ་འདབས་སུ་ཡོད་པའི་རྒྱ་གཞུང་སྤྱི་བདེ་ཉེན་རྟོག་པ་དང་དམག་མི། ལས་དོན་རུ་ཁག་བཅས་མཉམ་སྡོད་བྱེད་སའི་(分局)ཅེས་པའི་སྒོ་ཁར། བོད་རིགས་བུ་མོ་སངས་རྒྱས་མཚོ་ཞུ་བས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་ཕྱིན་ཡོད་འདུག

དེ་རིང་ཞོགས་པར་རྒྱ་ནག་གི་ལས་ཁུངས་དེའི་མི་སྣ་ཚོས་ཁོང་མོའི་ཕུང་པོ་གཙོད་གྲོང་ཁྱེར་དུ་འཁྱེར་ཡོད་འདུག ད་ལྟ་མོ་རང་གི་ཁྱིམ་དུ་ཉེན་རྟོག་པ་མང་བོ་བསླེབས་ཏེ་ཁྱིམ་མི་ཚོར་འདྲི་གཅོད་དང་འགྲོ་འོང་བཀག་སྡོམ་ཤུགས་ཆེན་པོ་བྱེད་བཞིན་ཡོད་འདུག

མདང་ནུབ་ཆུ་ཚོད་ ༣།༡༠ ཡས་མས་ལ་མོ་རང་གི་སྐད་འཕྲིན་(Wechat)ནང་སྐད་ཆ་ཁ་ཤས་བཤད་ཡོད་སྟབས། ནང་མི་ཚོས་སེམས་འཚབ་ཆེན་པོས་ཡར་མར་བརྩད་གཅོད་བྱས་ཀྱང་རྙེད་ཐུབ་མེད་ཀྱང་། ད་ནང་ཞོགས་པར་ཁོང་མོས་རང་ལུས་མེར་བསྲེགས་གནང་སྟེ་ཕུང་བོ་རྒྱ་གཞུང་གིས་འཁྱེར་ཡོད་པ་ཤེས་རྟོགས་བྱུང་ཡོད་འདུག

སངས་རྒྱས་མཚོ་ལགས་ཀྱིས་རང་ལུས་མེར་བསྲེགས་གནང་སྐབས་མདང་ནུབ་ནམ་སྨད་ལ་ཁེལ་ཡོད་སྟབས། མོ་རང་གིས་འབོད་སྒྲ་གང་འདྲ་ཞིག་བརྒྱབ་ཡོད་མེད་དང་ཤུལ་དུ་དགོས་འདུན་འདྲ་བཞག་ཡོད་མེད་སོགས་ད་སྔ་ཤེས་རྟོགས་ཐུབ་མེད་ཀྱང་། གནས་ཚུལ་མཁོ་སྤྲོད་པས་བརྗོད་པར། ས་གནས་བོད་རིགས་མང་ཚོགས་ལ་མནར་གཅོད་གཏོང་མཁན་རྒྱ་ནག་གཞུང་གི་ལས་ཁུངས་དེའི་སྒོ་ཁར་རང་ལུས་མེར་བསྲེགས་གནང་བ་དེ་ནི་ཆབ་སྲིད་ཀྱི་རྣམ་འགྱུར་ཆེན་པོ་ཞིག་ཆགས་ཡོད་པ་རེད་ཟེར།

ཁོ་མོ་ནི་ཆས་བུ་གཤིས་རྨེ་རུ་སྲིབ་པ་སྡེ་བར་སྐྱེས་ཤིང་། ད་ལྟ་རང་ལོ་ ༣༦ ཡིན་ཞིང་། ལོ་བརྒྱད་དགུ་ཙམ་གྱི་སྔོན་དུ་ཁོ་མོ་ཆས་བུ་གཤིས་རྨེ་རུ་ཉིན་པ་སྡེ་བའི་བླ་ཁོ་ཚང་གི་བུ་རྟ་མགྲིན་དབང་རྒྱལ་གྱི་མནའ་མར་ཡོང་སྟེ། ད་སྐབས་ཁོང་བཟའ་མི་གཉིས་ལ་ཚེ་རིང་དོན་འགྲུབ་ཅེས་པའི་བུ་ཞིག་དང་། མཁའ་འཚོ་ཞེས་པའི་བུ་མོ་གཅིག་བཅས་ཡོད་འདུག

སངས་རྒྱས་མཚོའི་རང་ལུས་མེར་བསྲེགས་གནང་ཡུལ་གྱི་རྒྱ་གཞུང་ལས་ཁུངས་དེ་སྔོན་ཆད་རྒྱ་ཆུང་ངུ་ཞིག་ལས་མེད་ཀྱང་། ༢༠༠༨ ལོའི་ས་བྱི་ཞི་རྒོལ་བྱུང་སྐབས། ཆས་བུ་གཤིས་བཀྲ་ཤིས་ཆོས་འཁོར་གླིང་དགོན་པའི་དགེ་འདུན་པ་ཚོས་འོས་ལངས་བྱས་པའི་རྗེས་སུ་ལས་ཁུངས་དེ་སྔར་ལས་རྒྱ་སྐྱེད་བཏང་ཡོད་འདུག