“ང་ཚོ་འཇིགས་སྐྲག་གི་དབང་དུ་ཚུད་མི་རུང”

ཉེ་ཆར་ཕྱི་ཟླ་ ༥ ཚེས་ ༣༠ ཉིན། རྒྱལ་སྤྱིའི་བརྒྱུད་ལམ་ཁག་ཏུ། རྒྱ་ནག་དམར་ཤོག་ཚོགས་པས་དྲུག་བཞིའི་དོན་རྐྱེན་སྐབས་ཉེས་མེད་མི་སེར་མང་པོ་དམར་གསོད་བཏང་བའི་གནས་ཚུལ་རྒྱལ་སྤྱིའི་སྤྱི་ཚོགས་དང་རྒྱ་ནག་མི་མང་ལ་འགྲེལ་བཤད་བྱེད་དགོས་པའི་རེ་སྐུལ་ཞུ་ཡིག་ཅིག་སྤེལ་ཡོད་པ་དང་། རེ་སྐུལ་ཞུ་ཡིག་དེར་ཕྱི་སྡོད་རྒྱ་རིགས་སློབ་མ་ ༡༡ གིས་མིང་རྟགས་བཀོད་ཡོད་འདུག

རེ་སྐུལ་ཞུ་ཡིག་ཕུལ་མཁན་གུ་ཡེ་ (Gu Yi) ལགས་ནི་རྒྱ་ནག་ལྷོ་ནུབ་ཁུལ་རྗོར་རྗེ་ཡ་གཙུག་ལག་སློབ་ཆེན་གྱི་རྫས་འགྱུར་སྡེ་ཁག་གི་སློབ་མ་ཡིན་ཞིང་། ཕྱི་ལོ་ ༢༠༡༢ ལོ་ནས་བཟུང་ཁོ་ཨ་རི་ལ་ཡོང་ནས་སློབ་གཉེར་བྱེད་ཀྱི་ཡོད་པ་དང་། ཁོང་གིས་རེ་སྐུལ་ཞུ་ཡིག་དེ་སྤེལ་བའི་ཉིན་འགའི་རིང་རྒྱབ་སྐྱོར་ས་ཡིག་རྒྱག་མཁན་ ༥༠ ལྷག་བྱུང་ཡོད་པ་དང་། སྐབས་དེར་རྒྱ་ནག་རྒྱལ་ཞེན་རིང་ལུགས་ཀྱི་གསར་ཤོག‘གོ་ལའི་དུས་བབ’སྟེང་དུ་རེ་སྐུལ་ཞུ་ཡིག་དེ་ལ‘དོན་དངོས་ལོག་འགྲེལ’དང‘ཕྱི་གླིང་རྒྱལ་ཁབ་ཁག་གི་ཀླད་པ་འཁྲུད་དགོས་འདུག’ཅེས་པ་སོགས་ཀྱི་ཁ་རྡུང་དྲག་པོ་བཏང་བར་བརྟེན་ཏེ། མཚན་གཅིག་རིང་རེ་སྐུལ་ཞུ་ཡིག་དེར་མོས་མཐུན་རྒྱབ་སྐྱོར་གྱི་མིང་རྟགས་འགོད་མཁན་ ༡༢༠ བྱུང་ཡོད་འདུག

ཕྱི་ཟླ་ ༥ ཚེས་ ༢༦ ཉིན་རྒྱ་ནག་གཞུང་གིས‘གོ་ལའི་དུས་བབ’གསར་ཁང་ལ་རེ་སྐུལ་ཞུ་ཡིག་དེ་ལམ་སང་ཕྱིར་བསྡུ་བྱེད་དགོས་པའི་ཛ་དྲག་ཉེན་བརྡ་བཏང་བ་ལྟར། གསར་ཁང་དེས་རེ་སྐུལ་ཞུ་ཡིག་དེ་དང་འབྲེལ་བའི་གནས་ཚུལ་ཁག་ཕྱིར་བསྡུ་དམ་དྲག་བྱས་ཡོད་པ་དང་། གུ་ཡེ་ལགས་ཀྱིས་རྒྱ་ནག་ནང་གི་རང་དབང་དང་དམངས་གཙོ་དོན་གཉེར་མཁན་རྒྱ་རིགས་གཞོན་སྐྱེས་ཚོར། རེ་སྐུལ་ཞུ་ཡིག་དེའི་སྐོར་ལ་བགྲོ་གླེང་དང་གྲོས་མོལ་བྱས་པར་(Asia Blog) གསར་ཁང་གི་གསར་འགོད་པ་ཨི་རེ་ཁི་ (Eric Fish) ཟེར་བ་ཞིག་གིས་ཁོང་ལ་བཅར་འདྲི་ཞུས་པ་གཤམ་གསལ།

དྲི་བ། རེ་སྐུལ་ཞུ་ཡིག་ལ་ས་ཡིག་རྒྱག་མཁན་དེ་ཚོ་སུ་ཡིན་ནམ།

དྲིས་ལན། དེ་ཡང་ཐོག་མར་ཕྱི་སྡོད་རྒྱ་རིགས་སློབ་མ་འགའ་ཡིན་ཞིང་། ཕྱིས་སུ་ང་ཚོས་རེ་སྐུལ་ཞུ་ཡིག་དེ་གྷོ་གྷལ་ཡིག་ཚེགས་སྟེང་སྤེལ་བ་ན། སློབ་མ་དང་དགེ་རྒན་ཆེན་མོ། སྨན་པ་དང་བཟོ་ལས་འཆར་འགོད་པ། ཁེ་ལས་པ། ད་དུང་སྐམ་ས་ཆེན་མོ་ནས་ཡིན་པའི་སློབ་ཆེན་སློབ་མ་ཞིག་གིས་ཀྱང་མ་སྐུལ་རང་མོས་ཀྱིས་མིང་རྟགས་བཀོད་པ་རེད། ཁོང་ལ་དངོས་གནས་བློ་སྤོབས་ཆེན་པོ་འདུག དེ་བས་ཀྱང་ཡ་མཚར་བ་ཞིག་ནི། ‘གོ་ལའི་དུས་བབ’གསར་ཁང་ནས་ང་ཚོར་སྡིགས་མོ་དང་ནག་མེད་ཉེས་འགེལ་བྱས་པའི་ས་ཡིག་བཞི་འབྱོར་བ་དེ་རེད། ཁོ་ཚོས་དེ་ལྟར་བྱེད་དོན་ག་རེ་ཡིན་པ་ང་ཚོས་གསལ་བོ་ཞིག་མི་ཤེས་ལ། ཐ་ན་ང་ཚོས་སྡིགས་མོ་དང་ནག་མེད་ཉེས་འགེལ་གྱི་སྐྱོན་བརྗོད་འདི་དག‘གོ་ལའི་དུས་ཁབ’གསར་ཁང་ངམ། ཡང་ན་གཞན་གྱིས་དྲ་ལམ་དུ་བརྒྱུད་སྤེལ་བྱས་པ་རེད་ཅེས་ཁ་ཚོན་གཅོད་མི་ཐུབ། འོན་ཀྱང་དགའ་འོས་པ་ཞིག་ལ། ང་ཚོའི་རེ་སྐུལ་ཞུ་ཡིག་དེས་རྒྱ་ནག་ལ་ཤུགས་རྐྱེན་མི་དམན་པ་ཞིག་ཐེབས་ཡོད་ཚོད་འདུག་ཅིང་། རེ་སྐུལ་ཞུ་ཡིག་དེས་འདི་འདྲའི་གཡོ་སྒུལ་ཞིག་བསླང་སྲིད་པ་ང་ཚོས་ཡིད་ལའང་མ་དྲན།

དྲི་བ། ཁྱོད་རང་ལ་འཇིགས་སྐུལ་འདྲ་བཏང་བྱུང་ངམ།

དྲིས་ལན། ང་ལ་རྒྱ་ནག་ནས་འཇིགས་སྐུལ་བཏང་བ་དང་ཁ་རྡུང་བཏང་བ། ད་དུང་ངའི་བདེ་འཇགས་ལ་ཉེན་བརྡ་བཏང་བའི་གློག་འཕྲིན་གཉིས་འབྱོར་བྱུང་།

དྲི་བ། ཉེན་བརྡ་དེས་ཁྱོད་ལ་སྐྲག་སྣང་བསླངས་སོང་ངམ།

དྲིས་ལན། ང་ལ་སྐྲག་སྣང་བསླངས་མ་སོང་། འོན་ཀྱང་སེམས་ཁྲལ་ཆེས་ཤོས་ཤིག་ནི་ང་རང་ཕྱིར་རྒྱ་ནག་ནང་ལ་ལོག་དུས། དོན་དག་ཅི་ཞིག་འབྱུང་མིན་དེ་རེད། དེ་ངོ་མ་དཀའ་ཁག་ཅིག་རེད། ཡིན་ནའང་། ང་ཚོ་ཟློག་དཀའ་བའི་འཇིགས་སྐྲག་གི་དབང་དུ་ཚུད་མི་རུང་ལ། འཇིགས་སྐྲག་ལ་བསྟེན་ནས་ཁྲུན་ཐག་ཀྱང་གཅོད་མི་རིགས་ཏེ། དེ་མིན་ཚེ། ང་ཚོ་མི་ཚེ་གང་བོར་འཇིགས་སྐྲག་ཁོ་ནས་འཚོ་སྡོད་བྱེད་དགོས་པ་རེད།

དྲི་བ། མི་འགྱང་བར་ཁྱོད་རང་ཕྱིར་རྒྱ་ནག་ནང་ལ་ལོག་རྩིས་ཡོད་དམ།

དྲིས་ལན། ཉེ་ལམ་ངས་རེ་སྐུལ་ཞུ་ཡིག་དེ་བྲིས་མིན་གང་ལྟར་ཡང་། མ་གཞི་ང་རང་སློབ་མཐར་ཕྱིན་ལ་ཉེ་བའི་སློབ་མ་ཞིག་ཡིན་པའི་ཆ་ནས། སློབ་སྦྱོང་གི་ལས་བྲེལ་ཤིན་ཏུ་ཆེ་བས། ཕྱིར་རྒྱ་ནག་ནང་ལ་ལོག་པའི་ཁོམ་པ་མི་འདུག་སྙམ། ང་ལ་ད་དུང་སློབ་སྦྱོང་གི་ལས་འཆར་མང་པོ་ཡོད། ཡིན་ནའང་། སློབ་མཐར་ཕྱིན་རྗེས། སྐབས་དེའི་གནས་སྟངས་ལ་བལྟ་དགོས་པ་རེད། གཅིག་བྱས་ན། སྐབས་དེར་གནད་དོན་ཆེན་པོ་འབྱུང་མི་སྲིད་ནའང་། དེང་སྐབས་ངས་རང་གི་ནང་མི་ཚོ་ཧ་ཅང་དྲན་གྱི་འདུག་ལ། ཁོང་ཚོ་དང་ལྷན་དུ་འཛོམ་རྒྱུ་བྱུང་ན་སྙམ། ང་ལ་གོང་སྨོས་གློག་འཕྲིན་དེའི་ནང་འཇིགས་སྐུལ་བཏང་བ་ལྟར་དུ། རེ་སྐུལ་ཞུ་ཡིག་དེས་ང་ལ་དཀའ་ཁག་མང་པོ་ཞིག་བཟོ་ཡང་སྲིད་ཀྱང་། ང་ཚོ་བཟློག་དཀའ་བའི་འཇིགས་སྐྲག་དེ་འདྲའི་དབང་དུ་ཚུལ་མི་རུང་བ་མ་ཡིན་ནམ། དེང་སྐབས་མི་ཚང་མ་འདི་འདྲའི་འཇིགས་སྐྲག་ཅིག་གི་འོག་ཏུ་འཚོ་སྡོད་བྱས་ཡོད་སྟབས། ཡར་ལངས་ནས་སྐད་ཆ་བཤད་མཁན་མི་རེ་གཉིས་ལས་ཡོད་པ་མ་རེད། དེས་ན། ང་ཚོ་རང་གི་མེས་རྒྱལ་དང་ང་ཚོ་རང་གི་མི་དམངས་ཡིན་པའི་ཆ་ནས། ང་ཚོའི་གྲས་སུ་སྐད་ཆ་ཤོད་མཁན་གཅིག་ཀྱང་མེད་སོང་ན། འབྱུང་འགྱུར་ཡང་ང་ཚོ་མུ་མཐུད་དུ་འཇིགས་སྐྲག་གི་ཀློང་དུ་འཚོ་སྡོད་བྱེད་རྒྱུ་ལས་འོས་མེད།

དྲི་བ། ཁྱོད་ཀྱིས་རེ་སྐུལ་ཞུ་ཡིག་དེ་འདྲ་ཞིག་སྤེལ་བར། ཁྱོད་རང་གི་ནང་མི་ཚོས་ཅི་བསམ་གྱི་འདུག།

དྲིས་ལན། ངས་ད་དུང་ཁོང་ཚོར་བཤད་མེད། ཞུ་ཡིག་དེ་ཉེ་ལམ་ཕྱི་ཟླ་ ༦ ཚེས་ ༤ ཉིན་སྤེལ་བ་ཞིག་ཡིན་སྟབས། ཁ་སང་དེ་རིང་ཁོང་ཚོར་དཀའ་ཁག་འདྲ་བཟོ་གི་མ་རེད་འདོད། མ་ཟད། རྒྱ་ནག་གཞུང་གིས་རྒྱལ་སྤྱིའི་གསར་གནས་སྤེལ་ཏེ། ངའི་ནང་མི་ཚོར་འདྲི་གཅོད་བྱེད་དུ་ཡོང་འདོད་ཡོད་ཀྱི་མ་རེད་བསམ། ཡིན་ན་ཡང་། ཁོ་ཚོས་འབྱུང་འགྱུར་ཅི་ཞིག་བྱེད་སྲིད་མིན་ངས་གསལ་བོ་མི་ཤེས་མོད། འོན་ཀྱང་རྩོད་གླེང་འདིར་རྙོག་འཛིང་ཆེ་སྟབས། ཁོ་ཚོ་རྩོད་རྙོག་འདི་ལས་གཡོལ་འདོད་ཡོད་ཀྱང་སྲིད་པ་རེད།

དྲི་བ། རེ་ཟུང་གིས་རྒྱ་ནག་གི་རང་དབང་དམངས་གཙོ་དོན་གཉེར་བ་ཚང་མ་མི་རབས་རྒན་པ་ཡིན་དུས། དྲུག་བཞིའི་དོན་རྐྱེན་དང་འབྲེལ་བའི་ལས་འགུལ་འདི་ལོ་རབས་བརྒྱད་བཅུ་དང་དགུ་བཅུའི་ནང་འཚར་ལོངས་བྱུང་བ་ཚོ་དང་འབྲེལ་བ་མེད་པ་ལྟ་བུ་ཞིག་ཏུ་ངོས་འཛིན་གྱི་འདུག ཁྱོད་ཀྱིས་བལྟས་ན་དེ་འདྲ་རེད་དམ།

དྲིས་ལན། ངས་ནི་རང་རྒྱལ་གྱི་ཚབས་ཆེ་བའི་རྙིང་ཞེན་རིང་ལུགས་ལ་འཐབ་རྩོད་བྱེད་ཀྱི་ཡོད་ཅིང་། དོན་དངོས་སུ་གཞིས་བྱེས་གཉིས་ན་ང་ཚོ་ལོ་རབས་བརྒྱད་བཅུ་དང་དགུ་བཅུར་སྐྱེས་པའི་རྒྱ་ནག་གི་རང་དབང་དམངས་གཙོ་དོན་གཉེར་མཁན་མང་པོ་ཡོད་རེད། ཁོ་ཚོ་ཚང་མ་མི་སྣ་གྲགས་ཅན་དེ་འདྲ་མིན་སྲིད་དེ། དཔེར་ན། པེ་ ཅིན་གྲོང་ཁྱེར་གྱི་སློབ་ཆེན་སློབ་མ་ཞིག་གིས་ལོ་སྔོན་མར་ང་ཚོས་སྲིད་དོན་ སྐོར་ཀྱི་ཛ་དྲག་གི་བརྡ་འཕྲིན་ཁག་ཁ་པར་སྐུད་ལམ་ནས་ཕན་ཚུན་ལ་མཁོ་འདོན་དང་ བརྒྱུད་སྤྲོད་བྱས་ན་ལེགས་པའི་བསམ་ཚུལ་བཏོན་པ་ལྟ་བུ་རེད། ཁོང་མོའི་བསམ་ཚུལ་དེ་ངོ་མ་རྒྱ་ནག་སྤྱི་ཚོགས་ལ་ཕན་ཡོན་ལྡན་པ་ཞིག་རེད་ཀྱང་། བསམ་ཚུལ་དེར་བརྟེན་ནས། ཁོང་མོ་གློ་བུར་དུ་གྲགས་འགུལ་མེད་པ་ཆགས་སོང་། ཕྱིས་སོར་གོ་ཐོས་ལྟར་ན། ཁོང་མོ་འཛིན་བཟུང་བྱས་ཡོད་འདུག ཁོང་མོ་དངོས་གནས་སྐྱེས་མ་བློ་སྤོབས་ཅན་ཞིག་རེད།

དེར་མ་ཟད་ད་དུང་། ཕྱི་ལོ་ ༡༩༨༡ ལོར་སྐྱེས་པའི་རང་དབང་རྩོམ་པ་པོ་ལའོ་ཌེ་ (Liu Di) བྱ་བའི་བུད་མེད་གཞན་ཞིག་ཡོད། (ཁོང་མོ་རྒྱ་ནག་ནང་གི་དམངས་གཙོ་དང་སྨྲ་བརྗོད་རང་དབང་དོན་གཉེར་བ་ཞིག་ཡིན་སྐད) ཁོ་མོ་སྔོན་ཆད་སློབ་མ་ཡིན་དུས། མོས་གསར་གནས་བརྒྱུད་ལམ་ཁག་ཏུ་དཔྱད་རྩོམ་དང་ཆེད་རྩོམ་མང་པོ་བྲིས་པར་བརྟེན། ཁོང་མོ་ཡང་ལོ་ངོ་གཅིག་ལྷག་རིང་འཛིན་བཟུང་བཀག་བསྐྱིལ་ཐེབས་པ་རེད། ཡིན་ནའང་། ཁོང་མོ་གློད་གྲོལ་བཏང་རྗེས། མོས་མུ་མཐུད་དུ་རྩོམ་ཡིག་བྲིས་ཏེ། རྒྱ་ནག་ནང་གི་རང་དབང་བསམ་བློ་བ་ཚོར་རང་དབང་རྩོམ་འབྲིའི་མཐུན་རྐྱེན་ལེགས་པོ་ཞིག་བསྩལ་ཡོད་པ་རེད།

དོན་དངོས་སུ། ང་ཚོར་ཁོ་མོ་དང་ཁོ་མོ་ཚོ་ལྟ་བུའི་རང་དབང་དམངས་གཙོ་དོན་གཉེར་བ་མང་པོ་ཡོད་རེད། ཡིན་ན་ཡང་རྒྱ་ནག་ནང་གི་མི་འབོར་དང་བསྡུར་ཚེ། ང་ཚོར་རང་དབང་དམངས་གཙོ་དོན་གཉེར་བ་རེ་འགའ་ཞིག་ལས་བྱུང་ཐུབ་མེད་པ་དངོས་ཡོད་གནས་ཚུལ་རེད། མང་པོ་ཞིག་གིས་གནས་ཚུལ་ངོ་མ་ཧ་མ་གོ་བའམ། ཁོ་ཚོ་ཆབ་སྲིད་ཀྱི་རྙོག་ཟིང་ནང་ཞུགས་མ་འདོད་པར། རང་གི་མི་ཚེ་འཚོ་གནས་ཀྱི་ཁེ་བཟང་གདམ་ངར་བཏང་ཡོད་པ་རེད།

དྲི་བ། ཁྱོད་རང་ཨ་རི་ལ་མ་ཡོང་སྔོན་དུ། དྲུག་བཞིའི་དོན་རྐྱེན་གྱི་གནས་ཚུལ་མང་པོ་ཤེས་ཀྱི་ཡོད་དམ།

དྲིས་ལན། ཤེས་ཀྱི་ཡོད། ཡིན་ན་ཡང་ངས་མང་པོ་མི་ཤེས། སྐབས་དེར་ངས་དམངས་གཙོ་དོན་གཉེར་བ་དང་སློབ་མ་ཁ་ཤས་བསད་པ་ཙམ་མ་གཏོགས་མི་ཤེས་ནའང་། ང་རང་འདིར་སླེབས་རྗེས། དྲུག་བཞིའི་དོན་རྐྱེན་གྱི་དངོས་ཡོད་གནས་ཚུལ་མང་བོ་ཞིག་ཤེས་རྟོགས་བྱུང་སོང་། ངས་དྲ་ལམ་ནས་ (The Gate of Heavenly Peace) ཞེས་པའི་གློག་བརྙན་ལ་བལྟས་ཤིང་། སྐབས་དེའི་སློབ་མ་ཚོ་དང་ཁོང་ཚོའི་དངོས་བྱུང་ལོ་རྒྱུས་མང་པོ་བཀླགས་པ་ཡིན། ང་ད་དུང་ཧོང་ཀོང་ནང་ཡོད་པའི་དྲུག་བཞིའི་དོན་རྐྱེན་གྱི་འགྲེམ་སྟོན་ཁང་ (June 4 museum) ལ་ལྟ་སྐོར་དུ་སོང་ཞིང་། དེ་གར་ངས་ལྕགས་ཞྭ་གྱོན་པའི་སློབ་ཕྲུག་ཅིག་ལ་མེ་མདའ་བརྒྱབ་ནས་བསད་པ་ལྟ་བུའི་ཁུངས་ལྡན་གནས་ཚུལ་མང་པོ་ཤེས་བྱུང་།

དྲི་བ། ཅི་ལྟར་དུ་ཁྱོད་ཀྱིས་རྩོད་རྙོག་འདི་དག་ལ་ལྟ་འདོད་བྱུང་བ་ཡིན་ནམ།

དྲིས་ལན། དེ་ཡང་ང་རང་ཉིད་ཀྱི་ཤེས་འདོད་ཅིག་དང་ང་རང་ཉིད་ཀྱི་འགན་འཁྲིའི་འདུ་ཤེས་ཤིག་ལ་བརྟེན་ནས། ངས་འདས་དོན་དེའི་དོན་དངོས་རྟོགས་འདོད་པ་ཡིན། ངའི་མེས་རྒྱལ་དུ་དོན་རྐྱེན་དེ་འདྲ་ཞིག་བྱུང་བ་དང་། དོན་རྐྱེན་དེའི་དངོས་ཡོད་གནས་ཚུལ་གསང་རྒྱ་བྱས་ཡོད་སྟབས། ངས་གསང་རྒྱ་དེ་གཏོར་ནས། དེའི་དངོས་ཡོད་ཚུལ་གནས་མི་ཚང་མར་ཤེས་སུ་འཇུག་རྒྱུ་དེ། ང་རང་གི་འོས་འགན་ཞིག་ཏུ་འདོད་ཡོད།

དྲི་བ། ཁྱོད་ཀྱིས་བལྟས་ན། ཕྱི་སྡོད་རྒྱ་རིགས་སློབ་མ་ཚོའི་གྲས་ནས་ཁྱོད་རང་། རྒྱ་ ནག་ནང་ཞིབ་བཤེར་བྱེད་ཀྱིན་པའི་དྲུག་བཞིའི་དོན་རྐྱེན་གྱི་དངོས་ཡོད་གནས་ཚུལ་ རྟོགས་འདོད་ཡོད་མཁན་དང་ཕྱིར་སྒྲོག་བྱེད་མཁན་གཙོ་བོ་ཞིག་ཡིན་པར་འདོད་དམ།

དྲིས་ལན། ངས་རང་ཉིད་དེ་ལྟ་ཞིག་ཡིན་པར་མི་འདོད་དེ། ང་ལ་རྒྱ་རིགས་སློབ་མ་གཞན་གྱི་མོས་མཐུན་གྱི་ས་ཡིག་དང་རེ་སྐུལ་གྱི་གློག་འཕྲིན་འབྱོར་བྱུང་ལ། མ་ཟད། ཕྱི་ནང་གི་རྒྱ་རིགས་སློབ་མ་ཚོས་ད་དུང་ཁ་ཞེ་གཉིས་མེད་དུ་རེ་སྐུལ་ཞུ་ཡིག་དེ་ལ་རྒྱབ་སྐྱོར་བྱེད་ཀྱི་ཡོད་ནའང་། སྐབས་ལན་རེར། ཁོ་ཚོས་ཞུ་ཡིག་དེ་ལ་མིང་རྟགས་འགོད་པར་ཞེད་སྣང་སྐྱེས་ཀྱི་ཡོད་པ་རེད།

དྲི་བ། ‘གོ་ལོའི་དུས་བབ’གསར་ཁང་གིས་ཁྱོད་ལ‘ཕྱིའི་དགྲ་བོའི་བཙན་སྐུལ’དང‘ཀླད་པ་འཁྲུད་དགོས་འདུག’ཅེས་སྐྱོན་འདོག་བྱས་པར། ཁྱོད་ཀྱིས་ཁོང་ཚོར་ལན་ཅི་ལྟར་བཏབ་པ་ཡིན་ནམ།

དྲིས་ལན། ཞུ་ཡིག་དེ་ལ་ངོ་ཚར་བའི་སྣང་ཚུལ་གཉིས་བྱུང་ཡོད་དེ། དང་པོ། ཁོ་ཚོས་ང་ཚོར་དོན་དངོས་ལ་བགྲོ་གླེང་མི་བྱེད་ཅིང་། ངའི་རེ་སྐུལ་ཞུ་ཡིག་ནང་། སྐབས་དེའི་ཁྲག་དྲི་བྲོ་བའི་དྲན་གནོན་བྱེད་སའི་ས་གནས་ཁག་དང་སྡུག་སྦྱོང་མྱོང་མཁན་ཚོའི་རུས་མིང་སོགས་ཐོ་འགོད་བྱས་ཡོད་མོད། འོན་ཀྱང་ཁོ་ཚོས་ང་ཚོར་སྐྱོན་བརྗོད་དང་ཁ་རྡུང་གཏོང་བ་མ་གཏོགས། དོན་དངོས་ལ་བགྲོ་གླེང་བྱེད་ཀྱི་མི་འདུག གཉིས་པ། ཞུ་ཡིག་དེ་དྲིལ་བསྒྲགས་བྱས་རྗེས། ལམ་སང་བརྒྱུད་ལམ་ནས་ཕྱིར་བསྡུས་པ་རེད། ཞུ་ཡིག་དེ་བརྒྱུད་ལམ་དུ་ཉར་བ་ལ། ཁོ་ཚོ་ཅིའི་ཕྱིར་སྐྲག་པ་ཡིན་ནམ། དེའི་རྗེས་སུ། མི་དམངས་མང་ཚོགས་ཀྱི་མདུན་ནས། ཁོ་ཚོས་མི་སྨྲ་བའི་བརྟུལ་ཞུགས་འཛིན་དོན་ག་རེ་ཡིན་ནམ། མ་གཞི་འདི་ནི་དོན་དངོས་ལ་ཐུག་ཡོད་པས་མ་ཡིན་ནམ།

དྲི་བ། ཁྱོད་རང་ཨ་རིར་མ་ཡོང་སྔོན་ལ། རྒྱ་ནག་གཞུང་ལ་ལྟ་སྟངས་ཅི་འདྲ་ཡོད།

དྲིས་ལན། དྲང་མོར་བཤད་ན། ང་དུས་ཡུན་རིང་བོར་དེའི་འགལ་ཟླར་ལངས་ཡོད། ཡིན་ནའང་། ང་འདི་གར་ཡོང་རེག་བར་དུ། ངས་ངོ་རྒོལ་ལས་འགུལ་ཅི་ཡང་མ་བསླངས། ང་རང་ཐེ་བའི་རྒྱ་ནག་ནང་གི་མི་མང་པོ་ཞིག་དམར་ཤོག་ཚོགས་པར་དགའ་མོས་ཡོད་པ་མ་རེད། ང་ཚོས་དམར་ཤོག་ཚོགས་པ་ནི་ཁོ་རང་ཚོས་བསྙད་པ་ལྟ་བུ་ཞིག་ཁྱོན་ནས་མ་ཡིན་པ་གསལ་བོར་ཤེས་ཀྱང་། ང་ཚོ་མཐའ་གཅིག་ཏུ་ཡར་ལང་དགོས་དོན་མི་འདུག་སྟེ། མི་མང་པོ་ཞིག་རྒྱལ་ནང་གི་སྒྲིག་སྲོལ་འོག་ཏུ་བསྡད་དེ། དམར་ཤོག་ཚོགས་པ་དང་དེའི་སྒྲིག་འཛུགས་ཁག་ལས་ཁེ་བཟང་ཡག་པོ་འཐོབ་ཀྱི་ཡོད། ཡིན་ན་ཡང་ང་རང་ཉིད་ཀྱི་ངོས་ནས་བཤད་ན། དམར་ཤོག་ཚོགས་པས་རང་གི་མི་མང་མེ་དམས་བསད་ཉིན་ནས་ཟུང་། དེས་རང་ཉིད་ཀྱི་ཁྲིམས་མཐུན་ལུགས་མཐུན་གྱི་རྩ་ཁྲིམས་རྩ་བ་ནས་བཤིགས་ཚར་བ་རེད་སྙམ།

དྲི་བ། ཁྱོད་རང་ཨ་རི་ལ་ཡོང་བ་ནས། འདས་པའི་ལོ་ངོ་གསུམ་གྱི་ནང་རྒྱ་ནག་ལ་འཕོ་འགྱུར་ཇི་འདྲ་ཐེབས་འདུག་གམ། 

དྲིས་ལན། ཞི་ཅིན་ཕིན་གུང་ཁྲན་ཏང་གི་སྲིད་སྟེགས་སུ་བུད་པ་དེ་སྔར་བས་ཀྱང་བཟློག་དཀའ་བའི་དྲག་གནོན་ཞིག་གི་སྔ་ལྟས་ཡིན་པར་འདོད་ཅིང་། སྐུ་ཞབས་ཞི་ཅིན་ཕིན་ནི་མི་སྟོབས་ཅན་ཞིག་རེད་ལ། ཁོས་འགོ་གཙོ་སྔ་མ་ཚོས་བརླགས་ཟིན་པའི་དམར་ཤོག་ཚོགས་པའི་སྟོབས་ཤུགས་ངོ་མ་བོ་སླར་གསོ་བྱེད་ཀྱི་ཡོད་པ་རེད། བྱ་འགུལ་གཉིས་ཀྱི་སྟེང་ནས་ཁོས་དམིགས་བྱ་འདི་རང་སྒྲུབ་ཀྱི་ཡོད་དེ། དང་པོ་ནི། ནང་ཁུལ་གྱི་ལྐོག་ཟ་རུལ་སུངས་རེད། ཁོས་ལྐོག་ཟ་བྱེད་མཁན་དཔོན་ངན་མང་པོ་ཞིག་འཛིན་བཟུང་བྱེད་ཀྱི་འདུག་མོད། འོན་ཀྱང་དེ་ནི་ཁོ་རང་གི་ཁ་གཏད་དུ་ལང་མཁན་ཤ་སྟག་རེད། དེར་བརྟེན། འདི་ནི་དམར་ཤོག་ཚོགས་པ་ནང་ཁུལ་གྱི་ཁ་གཏད་པ་ཚོར་འཐབ་རྩོད་འཛིན་བྱེད་ཀྱི་ལག་ཆ་ཆེས་ནུས་ཤུགས་ལྡན་པ་ཞིག་ཡིན་པ་རེད། གཉིས་པ་ནི། ཁོས་རྒྱ་ནག་ནང་གི་གཞུང་འབྲེལ་མ་ཡིན་པའི་ཚོགས་སྡེ་ཁག་རྩ་མེད་བཟོ་ཡི་ཡོད་དེ། ད་ལྟའི་བར་དུ་ཁོས་རང་དབང་རྩོམ་པ་པོ་དང་དམངས་གཙོ་དོན་གཉེར་བ། ཁྲིམས་རྩོད་པ་སོགས་འཛིན་བཟུང་བཀག་ཉར་བྱེད་ཀྱིན་ཡོད། ངང་ཚུལ་འདི་ནི་རྒྱ་ནག་སྲིད་གཞུང་སྔོན་གྱི་ལོག་ལམ་དུ་ཕྱིར་བསྐྱོད་པ་དང་། ཁོང་གི་སྲིད་གཞུང་ཡང་རྒྱལ་ཞེན་རིང་ལུགས་ཀྱི་དུས་རབས་སུ་ཕྱིར་ལོག་པ་མ་ཡིན་ནམ། ཁོས་ད་དུང་འཇར་པན་རྒྱལ་ཁབ་གཙོས། ཨ་རི་དང་ནུབ་གླིང་རྒྱལ་ཁབ་ཁག་ལ་མཚོ་ཁུལ་རྩོད་གླེང་དང་ཞེ་འཁོན་དྲག་པོ་སློང་གི་ཡོད། དེ་བས། རྒྱ་ནག་གཞུང་ཕྱིར་ཧྥ་ཤུ་སི་རིང་ལུགས་སུ་ལོག་གིན་པའི་སྣང་ཚུལ་འདིས། ང་ལ་སེམས་ཁུར་བསླངས་སོང་།