འཛམ་གླིང་སྟེང་གི་མི་རབས་འདིའི་ཆེས་སྐྱི་གཡའ་བའི་ཡུལ་བྱོལ་གྱི་གནས་བབ་དང་དེའི་དཀའ་རྙོག་ལ་གདུང་ལེན་བྱེད་ཀྱི་ཡོད།
ཕྱི་ཚེ་ ༩ ཉིན། ནེའུ་ཡོག་དུས་བབ་གསར་ཁང་གིས་གནས་ཚུལ་བསྒྲགས་པ་ལྟར་ན། ལོ་སྔོན་མའི་ཟིང་འཁྲུག་གི་ཁྲོད་དུ། མི་སེར་ས་ཡ་ ༡༡ ལྷག་རྐྱེན་ལམ་དུ་ཤོར་ཡོད་པ་དང་། མི་མང་ཆེ་བ་སེ་རེ་ཡ་དང་ཨི་རག ཡུ་ཁི་རེན། ཨ་ཧྥི་གྷན་ནེ་སི་ཐན་བཅས་ཀྱི་རྒྱལ་ནང་གི་ཆོས་ལུགས་ལྟ་གྲུབ་ཀྱི་འགལ་འདུ་དང་རྩོད་གླེང་། ཟིང་འཁྲུག་གི་ཁྲོད་ནས་རྐྱེན་ལམ་དུ་ཤོར་བ་ཡིན་སྐོར་བརྗོད་འདུག་ལ། འདི་འདྲའི་འཁྲུག་རྩོད་དང་དབུལ་ཕོངས་ཀྱི་ཁྲོད་དུ། མི་སེར་སྟོང་ཕྲག་མང་པོ་གླིང་ཆེན་ཨ་ཧྥི་རེ་ཀ་དང་ལྷོ་ཤར་ཨེ་ཤེ་ཡའི་གྲུ་ཁ་ཁག་ཏུ་ཕྱིར་ཕུད་གཏོང་གི་ཡོད་ཅིང་། གཤམ་གསལ་གྱི་རྒྱལ་ཁབ་ཁག་དང་དེ་དག་གི་ཡུལ་བྱོལ་བ། དེའི་རྩོད་གླེང་དང་དེའི་མི་འབོར་སོགས། འཛམ་གླིང་དམག་ཆེན་གཉིས་པ་བྱུང་བའི་རྗེས་ཀྱི་ཆེས་སྐྱི་གཡའ་བའི་གནས་ཚུལ་འདི་ནི། ཉེ་ལམ་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཕྱི་བསྒྲགས་བྱས་པ་ཞིག་ཡིན་ཚུལ་བརྗོད་འདུག
༼ སེ་རེ་ཡ་དང་ཨི་རག ༽
སེ་རེ་ཡའི་ཁྱིམ་མཚེས་རྒྱལ་ཁབ་ཁག་གིས་ཡུལ་གྱར་བ་ཚོ་རང་གི་མཐའ་མཚམས་བརྒྱུད་ནས་བྲོས་བྱོལ་དུ་འགྲོ་བར་དཀའ་ཁག་མང་པོ་བཟོ་མུས་ཡིན་པ་མ་ཟད། ད་དུང་ཡུལ་གྱར་བ་ཚོས་ཁྱིམ་མཚེས་རྒྱལ་ཁབ་ཁག་ལ་ས་ཁྲལ་འཇལ་དགོས་པ།
ཕྱི་ལོ་ ༢༠༡༡ ལོར། སེ་རེ་ཡའི་ཡུལ་མི་ས་ཡ་ ༡༡ ཡུལ་གྱར་དུ་ཕྱིན་པ་ལས། ས་ཡ་ ༤ མཐའ་མཚམས་སུ་ལྷག་ཅིང་། ཕྱི་ལོ་ ༢༠༡༣ ལོར་ཨི་རག་གི་ཡུལ་མི་ས་ཡ་ ༣ ལྷག་གཞན་ཡུལ་དུ་གྱར་ཡོད་འདུག
སེ་རེ་ཡ་དང་ཨི་རག་རྒྱལ་ཁབ་གཉིས་ནང་ཟིང་འཁྲུག་ལངས་པའི་ལོ་ནས་བཟུང་། ཡུལ་མི་ཚོ་ཁྱིམ་མཚེས་རྒྱལ་ཁབ་ཁག་ནང་ཡུལ་བྱོལ་དུ་ཕྱིན་ཡོད་པ་དང་། རྒྱལ་སྤྱིའི་ངལ་རྩོལ་སྒྲིག་འཛུགས་ཚོགས་པའི་ཞིབ་འཇུག་ལྟར་ན། ཕྱི་ལོ་ ༢༠༡༡ ནས་བཟུང་། རྗོར་ཌན་རྒྱལ་ཁབ་ནང་ཡུལ་གྱར་བས་ཁེངས་ཏེ། ལས་མེད་མི་སེར་ལྡར་འགྱུར་གྱིས་འཕེལ་ཞིང་། ད་ལོ་ཕྱི་ཟླ་ ༡ ནས་བཟུང་། སེ་རེ་ཡའི་མི་མང་གིས་ལི་བྷ་ནོན་རྒྱལ་ཁབ་ལ་མཐོང་མཆན་ལེག་འཁྱེར་ཞུ་འགོ་བརྩམས་ཏེ། དེང་སྐབས་ལི་བྷ་ནོན་རྒྱལ་ནང་གི་མི་འབོར་བརྒྱ་ཆའི་ ༢༠ ལྷག་ཡུལ་གྱར་བ་ཆགས་འདུག་ལ། ད་ལོའི་ཕྱི་ཟླ་ ༣ པའི་ནང་། ཏུར་ཀེ་རྒྱལ་ཁབ་ཀྱིས་སེ་རེ་ཡའི་ཡུལ་གྱར་བ་སྔོན་འགོག་བྱ་ཆེད་དུ། མཐའ་མཚམས་ཀྱི་སྒོ་ཆེན་ཁག་གཏན་སྲུང་བྱ་རྒྱུ་ཡིན་པ་ཕྱི་བསྒྲགས་བྱས་ཡོད་ལུགས་བརྗོད་འདུག
༼ ལྷོ་ཤར་ཨེ་ཤེ་ཡ། ༽
སྡེ་གཟར་དང་མེད་མུག་གི་རྐྱེན་པས། འབར་མའི་རྒྱལ་ཁོངས་ནས་བྷང་ལ་ཌེ་ཞི་བ་དང་རོ་ཧན་རྗ་གྲངས་ཉུང་མི་རིགས་སྟོང་ཕྲག་མང་པོ་གཞན་ཡུལ་དུ་གྱར་བ།
ད་ལོའི་ལོ་འགོར། ནག་ཚོང་གཉེར་མཁན་གྱི་གྲུ་གཟིངས་སྟོང་ཕྲག་ ༢༥.༠༠༠ ལྷག་ཤར་ནུབ་གྱི་རྒྱ་མཚོའི་མཐའ་ཁུལ་དུ་བསྐྱོད་ཡོད་པ་དང་། འབར་མའི་ནང་རོ་ཧན་རྗ་མི་རིགས་ལ་མི་སེར་གྱི་ཐོང་ཐབ་དང་གཞི་རྩའི་འགྲོ་བ་མིའི་ཐོབ་ཐང་གང་ཡང་མ་སྤྲད་སྟབས། མཚོ་ཁུལ་བརྒྱུད་ནས་ཡུལ་བྱོལ་དུ་གྱར་འདུག་ལ། སྔོན་ཆད་ཨིན་ཌོ་ནི་ཞེ་ཡ་དང་མ་ལེ་ཞེ་ཡ་རྒྱལ་ཁབ་གཉིས་ཀྱིས་གསང་བའི་ངང་ནས། འབར་མ་དང་བྷང་ལ་ཌེ་ཞི་ནས་ཡུལ་གྱར་བ་མང་པོ་བླངས་པ་དང་། རིམ་གྱིས་རྒྱལ་ནང་གི་ཡུལ་གྱར་བའི་གྲངས་འབོར་འཕེལ་བ་དང་བསྟུན་ནས། ནང་ཚོང་གཉེར་མཁན་ཚོའི་གྲུ་གཟིངས་སྟེང་། ཡུལ་བྱོལ་བ་མང་པོ་ཞིག་ཕྱིར་གཏོང་བྱེད་རྒྱུ་ཡིན་པའི་ཁ་ཚོན་བཅད་ཡོད་པ་རེད། ཡིན་ནའང་། རྒྱལ་སྤྱིའི་སྤྱི་ཚོགས་ཀྱི་གནོན་ཤུགས་འོག་ཏུ། ཁོ་ཚོས་རང་གི་དེ་སྔའི་ལམ་དབུ་མའི་ལངས་ཕྱོགས་བསྒྱུར་ཏེ། མཚོ་ཁུལ་གྱི་ཡུལ་གྱར་མི་མང་ལ་འཚོ་གནས་མཁོ་སྤྲོད་བྱེད་རྒྱུ་ཡིན་སྐོར་བཤད་ཡོད་ནའང་། ཁོ་ཚོས་མཚོ་ཐོག་གི་ཡུལ་གྱར་བ་ཚོ་སྐམ་སར་མ་བླངས་པ་དང་། མཚོ་སྨུག་གིས་མཐོང་ལམ་བསྒྲིབས་པའི་རྐྱེན་གྱིས། གཅིག་བྱས་ན། མཚོ་ཐོག་གི་ཡུལ་གྱར་བ་ཚོ་རྒྱ་མཚོར་བྱིང་ཡང་སྲིད་པར་ཚོད་དཔག་བྱེད་ཀྱི་ཡོད་ལུགས་བརྗོད་འདུག
ཡུ་རོབ་གྲོས་ཚོགས་ཀྱི་ངོས་ནས། གླིང་ཆེན་ཨ་ཧྥི་རེ་ཁའི་མཚོ་འགྲམ་གྱི་ནག་ཚོང་གཉེར་མཁན་ཚོའི་གྲུ་གཟིངས་བཀག་སྡོམ་བྱེད་མོས་ཡོད་པ་མ་ཟད། མཚོ་མཐར་ལྷུང་བའི་ཡུལ་གྱར་བ་ཚོའི་ལས་དབང་ལ་འཕོ་འགྱུར་གཏོང་བ།
ད་ལོར་མི་མང་སྟོང་ཕྲག་ ༧༨.༠༠༠ གཞན་ཡུལ་དུ་གྱར་བའི་ཁྲོད་ཀྱི། མི་སེར་ ༡༨༠༠ ལྷག་མཚོ་ཐོག་ནས་རྐྱེན་ལམ་ཤོར་ཡོད་པ་དང་། ཡང་ལེ་བྷེ་ཡ་རྒྱལ་ནང་གི་ཟིང་འཁྲུག་ཁྲོད་དུ། ཡུལ་བྱོལ་བ་ཚོར་དམ་དྲག་དང་བཤུ་གཞོག་ཡ་ང་བ་ཐེབས་ཀྱི་ཡོད་འདུག
ཕྱི་ཟླ་ ༥ ནང་ཡུ་རོབ་སྤྱི་མཐུན་ཚོགས་པའི་དབུ་ཁྲིད་ཚོས། ཨེ་ཌ་ལེ་ནང་རྟེན་གཞི་བྱས་པའི་མཁའ་དམག་སྤྱད་དེ། མཚོ་ཐོག་གི་ནག་ཚོང་གཉེར་མཁན་ཚོར་རྒོལ་རྡུང་གཏོང་གི་ཡིན་ཚུལ་བརྗོད་ཅིང་། བདུན་ཕྲག་འདིའི་ནང་ཡུ་རོབ་མཐུན་ཚོགས་ཀྱི་ངོས་ནས། ལྷོ་རྒྱུད་ཀྱི་རྒྱལ་ཁབ་གྷི་རི་སི་དང་ཨེ་ཌ་ལེ་གཙོས། ཚོགས་ཁོངས་ཀྱི་རྒྱལ་ཁབ་ཁག་གིས་ཕྱིའི་ཡུལ་གྱར་བ་ཚོར་སྣེ་ལེན་བྱེད་པ་དང་ཡུལ་གྱར་བའི་དཀའ་སྡུག་ལ་རོགས་སྐྱོར་གནང་དགོས་པའི་རེ་སྐུལ་སྙན་སེང་ཞིག་ཕུལ་ཡོད་འདུག་ལ། ལྷག་དོན་དབུལ་ཕོངས་དང་ཟིང་འཁྲུག་གི་ཡོ་ལང་རྒོད་པའི་ལྷོ་རྒྱུད་ཀྱི་སུ་ཌན་དང་ལེ་བྷེ་ཡ། ནེ་རྗེ་རེ་ཡ་རྒྱལ་ནང་དུ་ཡུལ་བྱོལ་བ་ཚོ་ས་དཀྱིལ་རྒྱ་མཚོ་བརྒྱུད་དེ། འཇིག་ཉེན་ཆེ་བའི་ཡུལ་གྱར་དུ་གཏོང་གི་ཡོད་སྐོར་བརྗོད་འདུག
༼ ཡུ་ཁི་རེན། ༽
ཡུ་ཁི་རེན་གྱི་དམག་དཔུང་དང་ཨུ་རུ་སུའི་ཁ་བྲལ་རིང་ལུགས་པའི་བར་གྱི་ཟིང་འཁྲུག་ལ་བརྟེན་ནས། ཡུ་ཁི་རེན་གྱི་བཟོ་ལས་དཔལ་འབྱོར་གྱི་གནད་ཀར་གཏོར་བཅོམ་ཚབས་ཆེན་ཐེབས་པ།
ཡུ་ཁི་རེན་གྱི་དཔལ་འབྱོར་ཉམ་རྒུད་དུ་གྱུར་བ་དང་། ཡུལ་མི་ས་ཡ་ ༡.༣ ལྷག་ཕྱི་ཡུལ་དུ་གྱར་ཞིང་། ཡུལ་མི་སྟོང་ཕྲག་ ༨༦༧.༠༠༠ རང་རྒྱལ་དང་བྲལ་ཏེ། ཕལ་ཆེ་བ་ཨུ་རུ་སུའི་རྒྱལ་ཁོངས་སུ་འཛུལ་གྱི་ཡོད་འདུག
ཡུ་ཁི་རེན་གྱི་ཡུལ་མི་ཁྲི་སྟོང་མང་པོ་ཨུ་ཪུ་སུར་སྐྱབས་བཅོལ་དུ་ཕྱིན་ཡང་། སྐྱབས་གནས་འཚོལ་ཡུལ་གཙོ་བོ་པོ་ལན་ཌི་དང་འཇར་མན། ཨེ་ཌ་ལེ་ལྟ་བུའི་ཡུ་རོབ་མཐུན་ཚོགས་ཀྱི་རྒྱལ་ཁབ་ཁག་གིས་ཡུ་ཁི་རེན་གྱི་ཡུལ་གྱར་བ་ཚོར་སྣེ་ལེན་བྱས་མེད་པ་དང་། ཡུ་ཁི་རེན་རྒྱལ་ནང་གི་ཟིང་འཁྲུག་དང་དཔལ་འབྱོར་ཉམ་ཉེས་ཐེབས་པའི་རྐྱེན་གྱིས ། ཕྱི་ལོ་ ༢༠༡༥ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་བདེ་རྩ་ཚོགས་པའི་ངོས་ནས་རོགས་དངུལ་ཨ་སྒོར་ས་ཡ་ ༣༡༦.༠༠༠ ལས་བརྒལ་བ་གཏོང་དགོས་ཆགས་ཡོད་ཚུལ་བརྗོད་འདུག
