བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༤ སྟེང་གི་རྩོམ་སྒྲིག་པའི་གཏམ།
ཉེ་ལམ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་དང་ཁེ་ན་ཌའི་ཏཱ་ལའི་བླ་མའི་ཐེབས་རྩ་མཉམ་འབྲེལ་ཐོག་‘ཆེས་ཐོག་མའི་གསར་གཏོད་ཀྱི་རྣམ་པའི་ཐོག་ནས’ བོད་མི་ཆེད་མཁས་ཚོང་པར་སྲིད་སྐྱོང་གཟེངས་རྟགས་ཧིན་སྒོར་འབུམ་ ༢༡ དང་། ཚོང་པ་གསར་པ་སྐོར་ཞིག་ལ་རོགས་སྐྱོར་ཧིན་སྒོར་འབུམ་ ༡༥ སྤྲོད་རྒྱུའི་གསལ་བསྒྲགས་བསྐྱངས་སོང་། དགུ་དགུ་དགུའི་དམ་འབུལ་གསར་གཏོད་བྱས་པ་ནས་བཟུང་། གསར་གཏོད་ཡིན་མིན་གང་ལྟར་ཡང་གསར་གཏོད་ཅེས་པའི་ཚིག་ཅིག་མེད་ན། ལས་འགན་བསྒྲུབ་མེད་པ་དང་བསྒྲུབ་ཡོད་ཀྱང་ངོ་སོ་མེད་པའི་ངོས་འཛིན་འོག ལྷན་ཁང་ཁག་གི་འཆར་ཅན་ལས་བསྡོམས་དང་སྡེ་ཚན་ཁག་གི་ལས་འགུལ། སློབ་གྲྭ་ཁག་གི་ལོ་འཁོར་མཛད་སྒོ་ཚུན་གསར་གཏོད་ཅེས་པའི་ཡིག་འབྲུ་འདིའི་ནང་ཨུ་ཚུགས་ཀྱིས་བླུགས་ཏེ། ཡར་ལྷ་ལ་མཆོད་པ་འབུལ་སྤྱད་དང་མར་འདྲེ་ལ་གླུད་གཏོར་བརྡབ་སྤྱད། མཐའ་ན་སོ་སོའི་བྱས་ཉེས་འགེབ་སྤྱད་དང་འཐུས་ཤོར་སྦེད་སྤྱད་ཀྱང་ཡིག་འབྲུ་འདིས་མཐུ་དང་ནུས་པའི་འདག་གི་ཡོད་ཚོད་འདུག
སྲིད་སྐྱོང་མཆོག་གི་གསར་གཏོད་ཀྱི་རྨི་ལམ་ཐན་ཐུན་དེས་ལོ་ལྔ་དང་བཅུ་ཡི་སྟོན་ནམ་རིང་མོ་སྐྱེལ་ཐུབ་ཀྱང་། མི་མཁྲིས་ནད་ཅན་གྱི་མིག་ལ་དུང་དཀར་པོའི་ཁ་ཏོག་སེར་པོར་སྣང་བ་ལྟར། ལོ་བཞི་བཅུ་ལྔ་ཅུར་གངས་སྐྱིད་ནས་བསྐྱལ་བའི་སྨུག་ནག་གི་ཁ་མདོག་ཅན་ཚོར་གསར་པ་དང་རྙིང་པ་གོ་འཛོལ་ཤོར་བ་དང་། གསར་ཞུགས་གཞོན་སྐྱེས་ལས་བྱེད་ཚོར་ཡང་བོད་མིའི་སྒྲིག་འཛུགས་ཀྱི་སྲིད་བྱུས་ཡོངས་རྫོགས་དང་། མཐའ་ན་ལས་ཁུངས་ཁག་གི་མདུན་ཅོག་དང་རྐུབ་སྟེགས་ཀྱང་གསར་པ་ཡིན་སྟབས། ཡོད་ཚད་གསར་པ་དང་གསར་གཏོད་ཀྱི་འཁྲུལ་ཤེས་དེས་རང་རྨོངས་པའི་སྟེང་ལ་གཞན་ཡང་རྨོངས་སུ་འཇུག་གི་ཡོད།
དེ་སྔའི་བཀའ་ཁྲི་ཟམ་གདོང་རིན་པོ་ཆེ་མཆོག་དང་ད་ལྟའི་སྲིད་སྐྱོང་བློ་བཟང་སེང་གེ་རྣམ་གཉིས་བོད་རྒྱ་ཆེའི་མི་མང་གིས་ཐད་ཀར་འོས་འདེམས་བྱས་པའི་དབུ་ཁྲིད་ཅིག་ཆགས་ཡོད། ཁོང་གཉིས་ལ་དམངས་གཙོའི་རིན་ཐང་ཆེན་པོ་ལྡན་ལ། བོད་མི་མང་གིས་རེ་བའང་ཆེན་པོ་བརྒྱབ་ཡོད། ཟམ་གདོང་རིན་པོ་ཆེ་སྲིད་སྟེགས་སུ་བསྡད་མ་ཐག་ལས་དོན་ཡོངས་རྫོགས་འཚེ་བ་མེད་པ་དང་། རྒྱུན་གནས་ཡོང་བ། ཡུལ་ཁྲིམས་དང་མཐུན་པ་བཅས་ཀྱི་ལྟ་གྲུབ་གསུམ་གཞི་རྩར་བཟུང་སྟེ་ལག་བསྟར་གནང་ཡོད་ལ། བློ་བཟང་སེང་གེ་མཆོག་གིས་ཀྱང་ཆིག་སྒྲིལ་དང་གསར་གཏོད་དང་། རང་ཁ་རང་གསོ་གསུམ་རྩ་དོན་དུ་བཟུང་ཡོད།
བཀའ་ཁྲི་སྔོན་མས་ཡུལ་ཁྲིམས་དང་མཐུན་པའི་ལྟ་གྲུབ་འོག་ནས་ཚོང་ལས་ཡོངས་རྫོགས་སྒེར་བདག་ཅན་དུ་བསྒྱུར་བ་དང་། སྲིད་སྐྱོང་འདི་བས་སྒེར་བའི་ཚོང་གཉེར་བ་ཚོར་སྐུལ་འདེད་ཀྱི་ལས་གཞི་མང་དག་ཅིག་བརྩམས་དང་རྩོམ་བཞིན་ཡོད་ཀྱང་། ལས་གཞི་དེ་དག་གི་ཆ་རྐྱེན་ནང་ཚོང་ལས་ཀྱི་ངོ་བོ་ག་འདྲ་དགོས་མིན་ཚིག་ཟུར་ཙམ་ཡང་མེད་པ་མ་ཟད། མི་འགྲོ་འདེམས་སྟངས་གང་ཡིན་དང་། མཐའ་མའི་ཐག་གཅོད་སུས་བྱེད་སོགས་ཀྱང་གསལ་ཁ་མི་འདུག
གསར་གཏོད་ལ་རྔམ་དྲགས་ཏེ་དངུལ་ཚུར་ཡོང་རྒྱུ་དང་ལས་དོན་ལེགས་འགྲུབ་ཀྱི་ལམ་ཁ་གསར་གཏོད་བྱེད་པའི་ཚབ་ཏུ། རང་གི་དངུལ་ཁུག་ནང་གི་མ་དངུལ་ཕར་སྤྲོད་རྒྱུའི་ལས་རིམ་དེ་ཡང་གསར་གཏོད་དུ་བགྲང་ཆོག་ན། ཅ་དངོས་ཉོས་པ་དང་ཁང་པ་གསར་རྒྱག་སོགས་ཀྱང་གསར་གཏོད་དུ་བགྲང་ཆོག བཀའ་ཁྲི་དང་སྲིད་སྐྱོང་རྣམ་གཉིས་ཀྱི་ལྟ་གྲུབ་བར་རྩ་བའི་ནང་འགལ་མེད་ཀྱང་། ཕུགས་ཀྱི་དམིགས་ཡུལ་དང་འཕྲལ་དུ་ལག་ལེན་བསྟར་ཕྱོགས་ཐོག་བར་ཁྱད་ཅིག་རྒྱ་ཇེ་ཆེ་ནས་གཏིང་ཇེ་རིང་དུ་འགྲོ་བཞིན་འདུག་གོ།
