ཁ་སང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། རེས་གཟའ་ཕུར་བུའི་ཉིན། རྒྱ་ནག་གཞུང་རང་སྲིད་རང་སྐྱོང་གིས་འཚོ་བའི་གོ་མིན་ཏང་མཚོ་འགག་གི་ཁ་གཏད་དུ་ལངས་ཏེ། ལོ་རྗེས་མའི་ཕྱི་ཟླ་ ༡ ཐེ་ཝན་གྱི་སྲིད་འཛིན་འོས་བསྡུ་དེ། རང་དབང་རང་བཙན་གྱི་འོས་གཞི་མིན་ཚེ་ཅི་ནས་ཀྱང་དགའ་བསུ་ཡི་རངས་ཞུ་ངེས་ཡིན་ལུགས་བརྗོད་འདུག
འདས་པའི་ལོ་ངོ་འདི་དག་གི་རིང་ལ། ཐེ་ཝན་མཚོ་འགག་པེ་ཅིན་གྲོང་ཁྱེར་ནང་རྟེན་གཞི་བྱས་པའི་རྒྱ་ནག་དམར་ཤོག་ཚོགས་པ་དང་ཆེས་རྣོ་ངར་ལྡན་པའི་ཆབ་སྲིད་ཀྱི་འགལ་ཟླར་ལངས་ཡོད་པ་དང་། རྒྱ་ནག་གཞུང་གིས་ཐེ་ཝན་མཚོ་འགག་ནི་རང་གི་རྒྱལ་ཁོངས་མཚོ་ཁུལ་ཞིག་དང་རང་རྒྱལ་ལ་ངོ་ལོག་པའི་ཞིང་ཆེན་ཞིག་ཡིན་ལུགས་རྩོད་གླེང་བྱེད་ཅིང་། གལ་ཏེ་ཐེ་ཝན་མཚོ་འགག་གིས་ད་དུང་རང་དབང་རང་བཙན་གྱི་གླེང་ཕྱོགས་འཛིན་ཚེ། བཙན་ཤེད་ཀྱིས་རང་གི་མངའ་འོག་ཏུ་བསྡུ་རྩིས་ཡོད་པ་རེད།
ད་རེབ་ཐེ་ཝན་རང་སྐྱོང་མཚོ་འགག་གི་སྔོན་འགྲོའི་སྲིད་འཛིན་འོས་བསྡུ་དེ། ཐེ་ཝན་རྒྱལ་ཞེན་ཚོགས་པའི་སྲིད་འཛིན་འོས་མི་ལྕམ་ཧོང་ཞུ་ཀྲུའུ་(Hung-shiu-chu)དང་ཐེ་ཝན་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལྕམ་ཚེ་ཡིན་ཝོན་(Tsai-lng-Wen)གཉིས་བར་གྱི་རྩོད་འགྲན་གྱི་རྣམ་པ་ཞིག་ཏུ་གྱུར་ཡོད་པ་དང་། རེས་གཟའ་ལྷག་པའི་ཉིན། ཐེ་ཝན་གྱི་ཆེས་མཐོའི་སྲིད་དོན་ཚོགས་པ་ཁག་གི་དཔོན་རིགས་ཚོའི་བཀའ་འཁྲོལ་ཐོབ་རྗེས། ལྕམ་ཧོང་ཞུ་ཀྲུའུ་གོམ་གང་མདུན་སྤོས་ཀྱིས་ཐེ་ཝན་རྒྱལ་ཞེན་ཚོགས་པའི་འོས་མིར་ལངས་པ་རེད།
ཡང་རྒྱ་ནག་གཞུང་འབྲེལ་ཞིན་ཧྭ་གསར་ལམ་དུ། རྒྱ་ནག་གི་ཐེ་ཝན་ལས་དོན་ལྷན་ཁང་གི་མགྲིན་ཚབ་པ་མའོ་ཞོ་ཀུང་ཟེར་བ་ཞིག་གིས། ལྕམ་ཧོང་ཞུ་ཀྲུའུ་ཡི་གནས་ཚུལ་ལ་དོ་སྣང་བྱུང་ཡོད་ཚུལ་བརྗོད་ཅིང་། ཡང་ཁོ་ཚོ་ཐེ་ཝན་མཚོ་འགག་གི་འོས་བསྡུའི་རྩོད་གླེང་ནང་དུ་ཚུད་འདོད་མེད་ལུགས་དང་། ཐེ་ཝན་གྱི་རང་བཙན་རྩོད་གླེང་མ་གཏོགས། ཁོ་ཚོས་དུས་དང་རྣམ་པ་ཀུན་ཏུ་ཐེ་ཝན་མཚོ་འགག་གི་སྲིད་ཚོགས་ཁག་དང་མི་སྒེར་སུ་ཡིན་ཡང་། ཁོ་ཚོར་དགའ་བསུ་དང་ཡི་རངས་ཡོད་སྐོར་བརྗོད་འདུག
‘ཕྱི་ལོ་ ༡༩༩༢ ལོའི་གྲོས་ཆོད་དེ’‘རྒྱ་ནག་རྒྱལ་ཁབ་གཅིག’གི་རྩ་འཛིན་ནང་། པེ་ཅིན་གཞུང་གིས་ཐེ་ཝན་མཚོ་འགག་ནི་རྒྱ་ནག་གི་ཆ་ཤས་ཡིན་ལུགས་དྲངས་ཡོད་པ་གཞིར་བྱས་ཐོག ཐེ་ཝན་རྒྱལ་ཞེན་ཚོགས་པའི་འོས་མི་ལྕམ་ཧོང་ཞུ་ཀྲུའུ་ཡིས་རྒྱ་ནག་གི་སྲིད་ཇུས་ལ་རྒྱབ་སྐྱོར་གྱི་ལངས་ཕྱོགས་བཟུང་སྟེ། ཁོ་མོས་རྒྱ་ནག་དང་ལྷན་དུ་ཞི་འགྲིག་གི་ཆིངས་ཡིག་ལ་མིང་རྟགས་བཀོད་འདོད་ཡོད་ཚུལ་བཤད་པ་དང་སྦྲགས་ཏེ། ཉེ་བའི་བདུན་ཕྲག་འདི་དག་གི་རིང་ལ། རྒྱ་ནག་གཞུང་གིས་ཐེ་ཝན་དམངས་གཙོ་ཡར་ཐོན་ཚོགས་པའི་འོས་མི་ལྕམ་ཚེ་ཡིན་ཝོན་ལ་ཁ་རྡུང་དྲག་པོ་བཏང་སྟེ། ཁོ་མོས་རྒྱ་ནག་ལ་བཟུང་བའི་སྲིད་ཇུས་དང་ཁོ་མོས་ཕྱོགས་གཉིས་བར་གྱི་ཞི་བདེ་ཡི་མཇུག་ཅི་ལྟར་སྐྱོང་རྩིས་ཡོད་པ་སོགས་གསལ་འདེབས་བྱེད་དགོས་སྐོར་བརྗོད་ཅིང་། ཡང་ཐེ་ཝན་མཚོ་འགག་གི་སྲིད་ཇུས་མཐུན་ཚོགས་ནས་གནས་ཚུལ་བསྒྲགས་པ་ལྟར་ན། རེས་གཟའ་ལྷག་པའི་ཉིན་གྱི་སྔོན་འགྲོའི་འོས་འདེམས་ཁྲོད་དུ། ལྕམ་ཚེ་ཡིན་ཝོན་ལ་ཡུལ་མི་ 50.2% ལྷག་གི་རྒྱབ་སྐྱོར་ཐོབ་ཡོད་པ་དང་། ལྕམ་ཧོང་ཞུ་ཀྲུའུ་ལ་ 29.3% ཙམ་ལས་ཐོབ་མེད་ལུགས་བརྗོད་འདུག
