ཁ་སང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ད་ལོའི་སྟོན་ཁར་ཉི་ཧོང་དང་རྒྱ་ནག ལྷོ་ཀོ་རི་ཡ་གསུམ་གྱི་སྲིད་འཛིན་མཉམ་ཞུགས་ཀྱི་ལྷན་ཚོགས་ཆེན་མོ་ཞིག་ལྷོ་ཀོ་རི་ཡར་བསྡུ་རྒྱུ་ཡིན་འདུག
ཐེངས་འདིའི་ཆེས་མཐོའི་དཔོན་རིགས་ལྷན་ཚོགས་སྟེང་། ཤར་ཨེ་ཤེ་ཡའི་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་གསུམ་གྱི་ངོས་ནས་དཔལ་འབྱོར་འདུ་འགོད་མཉམ་འབྲེལ་གྱི་ལས་དོན་རྒྱུན་སྐྱོང་དང་། ༢༠༡༢ ལོར་གྲོས་མོལ་བྱས་པའི་རྒྱལ་ཁབ་གསུམ་བར་གྱི་མཐའ་མཚམས་རྩོད་གླེང་། དེ་བཞིན། ལྷོ་ཀོ་རི་ཡ་དང་རྒྱ་ནག་གཉིས་ཀྱིས་ཉི་ཧོང་བཙན་རྒྱལ་ཆེན་མོའི་དུས་སྐབས་ཀྱི་ཡ་ང་བའི་གཡུལ་འཁྲུག་གི་སྐོར་ལ་གླེང་མོལ་བྱེད་རྒྱུ་ཡིན་འདུག
བདུན་ཕྲག་སྔོན་མར་ལྷོ་ཀོ་རི་ཡའི་ཕྱི་སྲིད་བློན་ཆེན་ཉི་ཧོང་དུ་བསྐྱོད་ཡོད་པ་མ་ཟད། ཉི་ཧོང་གི་ཕྱི་འབྲེལ་བློན་ཆེན་དང་མཇལ་འཕྲད་ཀྱིས་ད་ལོའི་ཕྱི་ཟླ་ ༨ ནས་ ༩ ཡས་མས་སུ་ལྷོ་ཀོ་རི་ཡར། གོང་སྨོས་རྒྱལ་ཁབ་གསུམ་གྱི་ཆེས་མཐོའི་དཔོན་རིགས་ལྷན་ཚོགས་ཀྱི་ཚོགས་ཆེན་བསྡུ་སྐོང་བྱེད་ཕྱོགས་ཐད་གྲོས་མོལ་བྱས་ཡོད་ལུགས་སོགས་བསྒྲགས་འདུག
ལྷོ་ཀོ་རི་ཡ་དང་ཉི་ཧོང་གཉིས་བར་སྔོན་ཆད་ཉི་ཧོང་བཙན་རྒྱལ་ཆེན་མོའི་དུས་སྐབས་སུ། ཉི་ཧོང་དམག་དཔུང་གིས་ལྷོ་ཀོ་རི་ཡའི་བུད་མེད་མང་པོ་འཛིན་བཟུང་བྱས་ཏེ། ཉི་ཧོང་དུ་གཞང་ཁང་ཆེད་བཙུགས་དང་བཙན་ཤེད་ཀྱིས་རིགས་རྒྱུད་བསྲེས་སྤེལ་བྱེད་དུ་བཅུག་པའི་ཡུན་རིང་གི་ལོ་རྒྱུས་ཡོད་པ་མ་ཟད། འཛམ་གླིང་དམག་ཆེན་གཉིས་པའི་རྗེས་སུ། རྒྱལ་ཁབ་གཉིས་བར་བྱུང་བའི་མཚོ་ཁུལ་རྩོད་གླེང་འདུམ་འགྲིག་ཐད་ལ་འབད་བརྩོན་བྱེད་ཀྱི་ཡོད་པ་དང་། ཡང་རྒྱལ་ཁབ་འདི་གཉིས་ཨ་རིའི་མནའ་འབྲེལ་རྒྱལ་ཁོངས་སུ་ཞུགས་ནས་རྒྱ་ནག་དང་བྱང་ཀོ་རི་ཡ་རྒྱལ་ཁབ་གཉིས་ཀྱི་ཁ་གཏད་དུ་ལངས་ཡོད་སྐོར་སོགས་བརྗོད་འདུག
