ཤིན་ཅང་ཡུ་གར་རང་སྐྱོང་ལྗོངས་ཀྱི་ནུབ་ཁུལ་ཞིབ་བཤེར་ས་ཚིགས་ཤིག་ཏུ། ཡུ་གར་མི་མང་དང་རྒྱ་ནག་གི་ཉེན་རྟོག་དམག་མིའི་བར་འཁྲུག་འཛིང་ཤོར་ཏེ་ཡུལ་མི་ ༡༨ རྐྱེན་འདས་སུ་གྱུར་ཡོད་འདུག
གཟའ་ལྷག་པའི་ཉིན་རོའུ་ཊར་བརྒྱུད་ལམ་དུ་གནས་ཚུལ་ཐོན་པའི་ནང་། གྲི་དང་འབར་མདེལ་གྱིས་དམར་འཛིང་དོན་རྐྱེན་དེ་རེས་གཟའ་ཟླ་བའི་ཉིན་ཤིན་ཅང་ལྷོ་རྒྱུད་གྲོང་ཁྱེར་ཀ་ཞི་གྷར་གྱི་རྫོངས་ཁོངས་སུ་བྱུང་ཡོད་པ་དང་། འདས་པའི་ལོ་ངོ་འདི་འགའི་རིང་ལ། ཤིན་ཅང་ལྷོ་ཁུལ་གྱི་ཡུ་གར་ཁ་ཆེ་བ་དང་རྒྱ་ནག་ཧན་མི་རིགས་གཉིས་ཀྱི་བར་ལ་མི་གསོད་ཁྲག་སྦྱོར་གྱི་དོན་རྐྱེན་མང་པོ་འབྱུང་གི་ཡོད་སྐོར་བཀོད་འདུག
རེབ་འདིའི་འཁྲུག་འཛིང་ཁྲོད་དུ། ཉེན་རྟོག་དམག་གི་རླུང་འཁོར་ཞིག་ཤིན་ཅང་ཡུ་གར་རང་སྐྱོང་ལྗོངས་ནུབ་ཁུལ་གྱི་ཞིབ་བཤེར་ས་ཚིགས་བརྒྱུད་ནས་འགྲོ་སྐབས། གྲི་དང་འབར་མདེལ་ཐོགས་པའི་ཉེན་རྟོག་དམག་མི་འགའ་ཞིག་དམར་གསོད་ཐེབས་ཡོད་པར་ཚོད་དཔག་བྱེད་ཀྱི་འདུག་ལ། ཡང་དྲག་ཆས་ཐོགས་པའི་ཉེན་རྟོག་དམག་གིས་ཁ་ཆེ་འཇིགས་སྐུལ་བ་ཡིན་པར་བརྗོད་པའི་ཡུལ་མི་ ༡༥ ལ་མེ་མདས་བརྒྱབ་ནས་དམར་གསོད་བཏང་ཡོད་པ་དང་། ཐེངས་འདིའི་འཁྲུག་འཛིང་གི་དོན་རྐྱེན་དེ་ཁ་ཆ་བའི་ར་མ་དྷན་ (Ramadan) དུས་ཆེན་གྱི་གུང་གསེང་སྐབས་སུ་བྱུང་བ་ཞིག་ཡིན་ཞིང་། མི་ལོ་གསུམ་གྱི་སྔོན་དུའང་། ས་ཁུལ་འདིའི་ཡུ་གར་ཁ་ཆེ་བ་དང་རྒྱ་ནག་ཉེན་རྟོག་དམག་མིའི་བར་ལ་འཁྲུག་རྩོད་ཤོར་ཏེ་ཡུལ་མི་ ༡༠༠ ལྷག་རྐྱེན་འདས་སུ་འགྱུར་ཡོད་འདུག
རེབ་དེའི་དམར་འཛིང་དོན་རྐྱེན་ཐད། པེ་ཅིན་གཞུང་གིས་ཁ་ཆེའི་དྲག་ཆས་དམག་དཔུང་ལ་སྐྱོན་བརྗོད་བྱས་ཡོད་ནའང་། ད་རེབ་ཀྱི་གནས་ཚུལ་དེ་དག་ཕྱི་གླིང་གི་གསར་ལམ་ཁག་ཏུ་ཐོན་ཡོད་པ་མ་གཏོགས། ཤིན་ཅིང་གཞུང་འབྲེལ་གསར་ཁང་གིས་ཕྱི་བསྒྲགས་བྱས་མེད་པ་མ་ཟད། པེ་ཅིན་གཞུང་གི་ངོས་ནས་ཀྱང་དོན་རྐྱེན་དེར་རྒྱུས་ལོན་དང་འདུམ་འགྲིག་གི་ལས་དོན་གང་ཡང་བསྒྲུབས་མི་འདུག
ཕྱི་སྡོད་ཡུ་གར་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་དོན་གཉེར་བ་ཁ་ཅིག་གིས། རྒྱ་ནག་གཞུང་གིས་ཤིན་ཅང་ཡུ་གར་རང་སྐྱོང་ལྗོངས་སུ་དྲག་ཆས་དམག་དཔུང་འབོར་ཆེན་འགྲེམ་འཇོག་གིས། ཡུ་གར་དང་ཁ་ཆེ་བའི་ཡུལ་སྲོལ་གོམས་གཤིས་དང་ཆོས་ལུགས་ཀྱི་དུས་ཆེན་བྱེད་སྒོ་ཁག་བཅས་ལ་དམ་དྲག་ཤུགས་ཆེན་བྱས་ཏེ། འཁྲུག་རྐྱེན་སློང་གི་ཡོད་བཞིན་དུ། པེ་ཅིན་གཞུང་གིས་ད་དུང་རང་སྐྱོན་ངོས་ལེན་བྱེད་ཀྱི་མེད་སྐོར་གྱི་སྐྱོན་བརྗོད་བྱས་ཡོད་འདུག
