བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ལྷན་ཁང་གི་ཚོགས་གཞོན་ཟུར་བ་ལེ་ཏ་ཁོ་ཟེར་བ་ཞིག་ལ་ལྐོག་ཟ་རུལ་སུངས་ཀྱི་དོགས་གཞིའི་འོག་ཞིབ་བཤེར་བྱེད་བཞིན་ཡོད་འདུག
རོའུ་ཌར་གསར་ལམ་ཐོག་གནས་ཚུལ་སྤེལ་བ་ལྟར་ན། འདས་པའི་ལོ་གཅིག་ལྷག་རིང་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གིས་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཁང་གི་ཚོགས་གཞོན་ལེ་ཏ་ཁོ་ (Le Dake) ལ་རྟོག་ཞིབ་བྱས་པ་བརྒྱུད། ཁོས་ལུགས་འགལ་ཁྲིམས་འགལ་གྱི་ནག་ཉེས་ཚབས་ཆེན་བསགས་ཡོད་པ་མ་ཟད། གཞུང་རྒྱུ་ལྐོག་ཟ་བྱས་པའི་དོགས་གཞིའི་འོག་བཀག་བསྐྱིལ་ཞིབ་བཤེར་ བྱེད་བཞིན་ཡོད་སྐོར་བརྗོད་འདུག
འདིའི་ཐད་རྒྱ་ནག་དབུས་སྒྲིག་ཁྲིམས་ཞིབ་བཤེར་ཚོགས་ཆུང་གི་དྲ་ཚིགས་ཐོག ང་ཚོས་ལོ་གཅིག་ལྷག་རིང་ལེ་ཏ་ཁོ་ལ་རྟོག་ཞིབ་བྱས་པ་བརྒྱུད། ཁོས་རྒྱལ་ཁབ་ལ་གནོད་པའི་ཁྲིམས་འགལ་གྱི་ནག་ཉེས་བསགས་ཡོད་པ་མ་ཟད། ལྷག་པར་དུ་རྒྱལ་དོན་རས་སུ་བོར་ནས་རང་དོན་བསྒྲུབས་པ་དང་ལྐོག་ཟ་བྱས་ཡོད་པ་བཅས་ཀྱི་དོགས་གཞི་བྱུང་སྟེ། ད་ལྟ་རང་སྐྱོན་ངོས་ལེན་གྱིས་ཞིབ་བཤེར་དང་འདྲི་གཅོད་བྱེད་བཞིན་ཡོད། ཅེས་བཀོད་འདུག
ལེ་ཏ་ཁོ་ནི་ ༡༩༦༠ ལོའི་ཟླ ༣ པའི་ནང་ཅང་ཞི་ཏུང་ཞང་དུ་སྐྱེས་ཡོད་པ་དང་། ༡༩༧༦ ལོའི་ཟླ་ ༡༢ ནས་ ༡༩༧༨ ལོའི་ཟླ་ ༣ པ་ཉིན་བར་ཅང་ཞི་ཞིང་ཆེན་ཏུང་ཞང་རྫོང་སྐར་དམར་སྤོལ་འདེབས་ཁང་གི་ན་གཞོན་ཤེས་ཡོན་ཅན་ལ་བདམས་པ་དང་། ༡༩༨༨ ལོའི་ཟླ་ ༣ ནས་ ༡༩༨༠ ལོའི་ཟླ་ ༢ བར་ཅང་ཞི་ཞིང་ཆེན་ཏུང་ཞང་དགེ་ཐོན་སློབ་གྲྭར་སློབ་སྦྱོང་བྱས་རྗེས། ༡༩༨༠ ལོའི་ཟླ་ ༢ ནས་ ༡༩༨༡ ལོའི་ཟླ་ ༢ བར་རྒྱ་ནག་ཉེས་དོན་མྱུལ་ཞིབ་སློབ་གླིང་ནས་སློབ་སྦྱོང་བྱས་ཡོད་འདུག
༡༩༨༣ ལོའི་ཟླ་ ༩ ནས་ ༡༩༨༦ ལོའི་ཟླ་ ༧ བར་ཅང་ཞི་སློབ་ཆེན་ནས་རྒྱའི་སྐད་བརྡ་དང་རྩོམ་རིག་ཐོག་ཆེད་ལས་སློབ་སྦྱོང་བྱས་ཡོད་པ་དང་། ༡༩༨༨ ལོའི་ཟླ་ ༨ ནས་བཟུང་ལོ་གཅིག་རིང་ཅང་ཞི་ཞིང་ཆེན་ཧྲང་ཀོ་རྫོང་ཉེན་རྟོག་ཁང་གི་སྤྱི་ཁྱབ་ཉེན་རྟོག་པ་གཞོན་པ་བྱས་ཏེ་ལས་ཀའི་གྲུབ་འབྲས་ལེགས་པོ་བྱུང་ཡོད་སྟབས། ༡༩༩༡ ལོའི་ཟླ་ ༩ ནས་ ༡༩༩༤ ལོའི་ཟླ་ ༡༢ ཉིན་བར་ཅང་ཞི་ཞིང་ཆེན་སྤྱི་བདེ་ལས་ཁུངས་རུ་ཁག་དགུ་བའི་མགོ་གཙོ་གཞོན་པར་བསྐོས་ཡོད་འདུག
༡༩༩༤ ལོའི་ཟླ་ ༡༢ ནས་ ༡༩༩༥ ལོའི་ཟླ་ ༦ བར་ཅང་ཞི་ཞིང་ཆེན་རྒྱལ་ཁབ་བདེ་འཇགས་ལས་ཁུངས་རུ་ཁག་གཉིས་པའི་མགོ་གཙོ་གཞོན་པ་དང་། ༡༩༩༥ ལོའི་ཟླ་ ༦ ནས་ ༢༠༠༠ ལོའི་ཟླ་ ༨ བར་ཅང་ཞི་ཞིང་ཆེན་རྒྱལ་ཁབ་བདེ་འཇགས་ལས་ཁུངས་རུ་ཁག་གཉིས་པའི་མགོ་གཙོ་བྱས་ཡོད་པ་དང་། ༢༠༠༠ ལོའི་ཟླ་ ༨ ནས་ ༢༠༠༤ ལོའི་ཟླ་ ༨ བར་ཅང་ཞི་ཞིང་ཆེན་རྒྱལ་ཁབ་བདེ་འཇགས་ལས་ཁུངས་ཀྱི་མགོ་དཔོན་གཞོན་པ་དང་། ༢༠༠༤ ལོའི་ཟླ་ ༨ ནས་ ༢༠༠༤ ལོའི་ཟླ་ ༩ བར་ཅང་ཞི་ཞིང་ཆེན་བདེ་འཇགས་ལས་ཁུངས་ཀྱི་འགན་འཛིན་གཞོན་པ་བྱས་ཡོད་འདུག
༢༠༠༤ ལོའི་ཟླ་ ༡༡ ནས་ ༢༠༡༢ ལོའི་ཟླ་ ༡༢ བར་བོད་རང་སྐྱོང་ལྗོངས་རྒྱལ་ཁབ་བདེ་འཇགས་ལས་ཁུངས་ཀྱི་སྤྱི་ཁྱབ་ཉེན་རྟོག་པ་དང་། ༢༠༡༢ ལོའི་ཟླ་ ༡༢ ནས་ ༢༠༡༣ ལོའི་ཟླ་ ༡ བར་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཁང་གི་ཚོགས་མི་དང་སྤྱི་ཁྱབ་ཉེན་རྟོག་པ་གཅིག་ལྕོགས་བྱས་ཡོད་པ་དང་། དེའི་རྗེས་ ༢༠༡༣ ལོའི་ཟླ་ ༡ བར་བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་རྒྱུན་ལས་ཁང་གི་ཚོགས་གཞོན་བཅས་ཀྱི་འགན་འཁུར་བླངས་ཡོད་འདུག
