ཞལ་ནས་གང་གསུངས་པ་དེ་ལྷག་བསམ་ཟོལ་མེད་ཡིན།

ཨ་རིའི་སྲིད་འཛིན་ཟུར་པ་བྷུ་ཤིས་༧གོང་ས་མཆོག་གནད་འདྲེན་ཞུས་ཏེ་ཁོང་ཕྱི་ལུགས་ལྟར་དགུང་གྲངས་ ༨༠ ཕེབས་པའི་འཁྲུངས་སྐར་གསོལ་སྟོན་གཤམ་ཡོད་འདུག  

ཨ་རིའི་སྲིད་འཛིན་ཟུར་པ་ཇོར་ཇི་བྷུ་ཤི་( George W. Bush) མཆོག་གིས་གདན་འདྲེན་ཞུས་པ་ལྟར། ༧གོང་ས་མཆོག་གི་དབྱིན་ཡུལ་གྱི་མཛད་འཕྲིན་གྲུབ་རྗེས། ཟླ་འདིའི་ཕྱི་ཚེས་ ༡ ཉིན་ཨ་རིའི་ལྷོ་ཕྱོགས་མངའ་སྡེ་ཊེག་སེ་སི་(Taxas)ནང་ཆིབས་བསྒྱུར་བསྐྱངས་ཏེ། སྲིད་འཛིན་ཟུར་པ་བྷུ་ཤི་མཆོག་གི་དཔེ་མཛོད་ཁང་དུ་གཟིགས་ཞིབ་མཛད་རྗེས། དཔེ་མཛོད་ཁང་དེར་རང་དབང་དང་མགོ་ཁྲིད་ཀྱི་ནུས་པ་སྐྱེད་སྲིང་སྐོར་གྱི་ཟབ་སྦྱོང་ནང་ཞུགས་མཁན་འབར་མའི་སློབ་ཕྲུག་ཁག་ཅིག་ལ་བཀའ་སློབ་བསྩལ་སྐབས།  དེ་རིང་འདིར་ངོས་ཀྱི་གྲོགས་པོ་རྙིང་པ་དང་སླར་ཡང་མཇལ་འཕྲད་བྱུང་བ་མ་ཟད། ཁོང་གི་བསྟི་གནས་ཁང་གསར་པ་འདིར་དམངས་གཙོ་དང་རང་དབང་གོང་སྤེལ་གཏོང་བར་ལས་འཆར་ཟབ་སྦྱོང་གོ་སྒྲིག་གནང་བཞིན་པ་མཐོང་སྐབས་ངོས་རང་ཧ་ཅང་དགའ་པོ་ བྱུང་། ཨ་རིའི་དམག་གི་སྟོབས་ཤུགས་ལ་ངོས་ཀྱིས་ཡིད་སྨོན་བྱེད་ཀྱི་མེད་ཀྱང་། དམངས་གཙོ་དང་རང་དབང་གི་ལྟ་གྲུབ་ལ་གཙིགས་ཆེན་བྱེད་པ་དེར་ཡིད་སྨོན་བྱེད་བཞིན་ཡོད། འཛམ་གླིང་ནང་རང་དབང་གོང་སྤེལ་གཏོང་བའི་འགན་གཙོ་བོ་དེ་ཨ་རིས་འཁྱེར་བཞིན་ཡོད། སྤྱིར་སྐུ་ཉིད་མཆོག་ད་ཆ་རྒས་ཡོལ་དུ་ཕེབས་ཟིན་ཡོད་ཀྱང་། མུ་མཐུད་ནས་དམངས་གཙོ་དང་རང་དབང་གོང་སྤེལ་གཏོང་ཆེད་འབད་བརྩོན་གནང་བཞིན་པ་དེར་ངོས་རང་ཧ་ཅང་དགའ་པོ་བྱུང་། ཞེས་གསུངས་འདུག  

འབར་མའི་སློབ་ཕྲུག་ཚོར་བཀའ་སློབ་གནང་དོན། སྤྱིར་ཐོབ་ཐང་རྩོད་རྒྱུར་ངེས་པར་དུ་ཤེས་ཡོན་དགོས་ལ། འབར་མའི་གཞུང་དེ་གཞི་རྩའི་དབང་ཆ་གཅིག་སྡུད་ཀྱི་གཞུང་ཞིག་ཡིན་སྟབས། ཁྱེད་ཚོས་འདིར་སློབ་སྦྱོང་གི་གོ་སྐབས་ཆ་ཚང་བླངས་ནས་ཧུར་ཐག་བྱེད་དགོས་པ་ལས། ཕྱི་དངོས་པོའི་ཁྲ་ཁྲ་ཟང་ཟིང་ཙམ་ལ་མགོ་འཁོར་ནས་སྡོད་ཀྱི་ཡོད་པ་མ་རེད། དམངས་གཙོ་དང་རང་དབང་གི་ལྟ་གྲུབ་དག་ལ་ཞིབ་ཚགས་པོས་སློབ་སྦྱོང་གནང་རྒྱུ་གལ་ ཆེན་པོ་རེད། སློབ་སྦྱོང་བྱས་ནས་དེང་རབས་ཀྱི་ལྟ་གྲུབ་དང་སྲོལ་རྒྱུན་གྱི་རིན་ཐང་ལྟ་བ་གཉིས་ཀྱི་ཐོག་ནས་གོམ་པ་མདུན་སྤོས་བྱེད་ཐུབ་དགོས། ང་ཚོའི་འཐབ་རྩོད་ནི་མེ་མདའ་དང་བདེན་པའི་བར་གྱི་འཐབ་རྩོད་རེད། འཕྲལ་དུ་མེ་མདའི་ནུས་པ་ཆེ་བ་ལྟ་བུར་མངོན་ཡང་། ཕུགས་སུ་དྲང་བདེན་གྱི་ནུས་པ་ཆེ་བ་ཡོང་རྒྱུ་ཡིན་པས་ཆོད་སེམས་བརྟན་པོ་དགོས། དབང་ཆ་ཡོད་མཁན་ཚོས་དྲག་ཤུགས་ཁོ་ནར་སྐྱབས་བཅོལ་ནས་བསྡད་ཡོད་ཀྱང་། དེ་འདྲ་བྱས་ནས་ཁུངས་འཁྱོལ་ཐབས་མེད། སྔ་ཕྱི་མ་གཏོགས་དྲང་བདེན་ལ་རྒྱལ་ཁ་འཐོབ་རྒྱུ་ཡིན་སྟབས།  བོད་པའི་གཏམ་དཔེར་ལན་དགུ་ཆད་མཐུད་ཅེས་པ་ལྟར་འབད་བརྩོན་མུ་མཐུད་བྱེད་དགོས་ལ། སྙིང་སྟོབས་ནམ་ཡང་ཞུམ་རྒྱུ་ཡོད་པ་མ་རེད། ཅེས་གསུངས་ཡོད་འདུག

༧གོང་ས་མཆོག་དང་སྲིད་འཛིན་བྷུ་ཤི་མཆོག་རྣམ་གཉིས་ཀྱི་འཁྲུངས་སྐར་ཉིན་གཅིག་ཏུ་ཁེལ་ཡོད་པ་མ་ཟད། ༧གོང་ས་མཆོག་ཕྱི་ལུགས་ཀྱི་དགུང་གྲངས་ ༨༠ ཕེབས་པའི་འཁྲུངས་སྐར་བསླེབ་ལ་ཉེ་སྟབས། ཉིན་དེའི་ཉིན་གུང་གི་ལྗགས་སྨིན་ཐོག་གནད་ཡོད་མི་སྣ་ ༡༠༠ ལྷག་འདུ་འཛོམས་ཀྱིས་མངར་ཟས(Cake)འདེགས་འབུལ་ཞུས་ཏེ་འཁྲུངས་སྐར་གྱི་སྨོན་ཚིག་ཕུལ་ཡོད་འདུག སྐབས་དེར་སྲིད་འཛིན་ཟུར་པ་བྷུ་ཤི་མཆོག་གིས། དེ་རིང་འདིར་རྣམ་པ་ཚོ་ཚང་འཛོམས་གནང་ནས་འཁྲུངས་སྐར་གྱི་མངར་ཟས་གོ་སྒྲིག་གནང་བར་ཐུགས་རྗེ་ཆེ་ཞུ་རྒྱུ་ཡིན། ཆབ་སྲིད་པ་འགའ་རེས་མི་སྣར་ཐུག་སྐབས་ཁ་ཞེ་གཉིས་མེད་ཀྱི་སྐད་ཆ་ཤོད་ཀྱི་མེད་ཀྱང་། ཏཱ་ལའི་བླ་མ་མཆོག་གིས་ཁྱེད་ཀྱི་མིག་ལ་ཐད་ཀར་གཟིགས་ཏེ་ཞལ་ནས་གང་གསུང་བ་དེ་ལྷག་བསམ་ཟོལ་མེད་ཡིན་པ་རེད། རྒྱ་ནག་གིས་ཁོང་ལ་ཁག་པོ་བཟོ་ཡི་ཡོད་ཀྱང་། ཁོང་ནི་དུས་རྟག་ཏུ་ཐུགས་དགའ་ཚོར་ཆེན་པོའི་ངང་བཞུགས་ཡོད་པ་རེད། དེ་ནི་ཁོང་གི་ཐུགས་བརྒྱུད་བཟང་ཞིང་བྱམས་སེམས་ཀྱིས་ཁེངས་ཡོད་པས་རེད། ཅེས་གསུངས་འདུག

དེའི་རྗེས་༸གོང་ས་མཆོག་གིས་ངོས་ཀྱི་སྙིང་ཉེ་བའི་གྲོགས་པོ་སྐུ་ཞབས་བྷུ་ཤི་མཆོག་དང་ལྕམ་སྐུ་མཆོག་བཅས་ཐེངས་འདིར་ང་ཚོ་སླར་ཡང་འདུ་འཛོམས་བྱུང་བ་ནི་ངོས་ལ་དགའ་སྤྲོའི་མཇལ་འཛོམས་ཤིག་ཆགས་ཡོད། ངོས་རང་བོད་བྱང་ཤར་གྱི་ས་ཁུག་ཅིག་ཏུ་སྐྱེས་ཤིང་སྐུ་ཉིད་མཆོག་འཛམ་གླིང་གི་ས་ཕྱོགས་གཞན་ཞིག་ཏུ་འཁྲུངས་ཡོད། འོན་ཀྱང་འཁྲུངས་པའི་ཟླ་ཚེས་གཅིག་པ་ཁེལ་ཡོད། ངོས་རང་ནང་པའི་ཡུལ་གྲུ་ཞིག་དང་སྐུ་ཉིད་ཡེ་ཤུའི་རྒྱལ་ཁབ་གཅིག་ནང་འཁྲུངས་ཡོད་ཀྱང་། འགྲོ་བ་མི་ཞིག་ཡིན་པའི་ངོས་ནས་ངོས་གཉིས་གཅིག་པ་ཡིན། འདི་ཧ་ཅང་གལ་ཆེན་པོ་ཡིན། གང་ཡིན་ཞེ་ན། དེང་སྐབས་འཛམ་གླིང་ནང་གི་རྙོག་གྲ་མང་ཆེ་བ་རིགས་རུས་དང་ཆོས་ལུགས་སོགས་མི་འདྲ་བའི་ཁྱད་པར་ལ་བརྟེན་ནས་ཡོང་བཞིན་ཡོད། དེ་ནི་གནད་དོན་གལ་ཆེ་ཤོས་གཉིས་པ་དེ་རེད། དང་པོ་དེ་ང་ཚོ་ཚང་མ་གཞི་རྩའི་ཆ་ནས་འགྲོ་བ་མིའི་རིགས་ཡིན་ལ།  ལུས་དང་སེམས་ཚོར་སོགས་གང་གི་ཆ་ནས་ཀྱང་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན། ཐོག་མར་མ་ལས་སྐྱེས་སྟངས་དང་མཐར་འཆི་སྟངས་སོགས་གཅིག་མཚུངས་ཡིན། ཞེས་སོགས་གསུངས་ཡོད་འདུག

ཉིན་གུང་གི་ལྗགས་སྨིན་གྲུབ་རྗེས། ཉེ་འགྲམ་དུ་རྟེན་གཞི་བྱས་པའི་གཙུག་ལག་སློབ་ཆེན་(Southern Methodist University) ནང་ཆིབས་སྒྱུར་བསྐྱངས་ཏེ། སློབ་ཆེན་དེའི་དགེ་ལས་སློབ་ཕྲུག་བཅས་ཁྱོན་མི་གྲངས་ ༥༠༠༠ བརྒལ་བར་འགྲོ་བ་མིའི་རིན་ཐང་གོང་སྤེལ་དང་ཆོས་ལུགས་མཐུན་སྒྲོལ་སོགས་ཀྱི་སྐོར་ལ་བཀའ་སློབ་བསྩལ་ཡོད་པ་དང་། སྐབས་དེར་ཨ་རིའི་ཨེ་བྷི་སི་གསར་ཁང་ (ABC News) གི་ཆབ་སྲིད་ལས་རིམ་གཙོ་སྐྱོང་བ་གྲགས་ཅན་ལྕམ་ཀུ་ཀི་རོ་བྷ་ཌི་ (Cokie Roberts )ལགས་ཀྱིས། བུད་མེད་ཚོས་སྤྱི་ཚོགས་ཞི་བདེ་ལྡན་པ་ཞིག་ཡོང་རྒྱུར་ཞབས་འདེགས་ག་འདྲ་བསྒྲུབ་ཐུབ་སྐོར་བཀའ་འདྲི་ཞུས་པར་ཁོང་གིས། ཐོག་མ་མིའི་འགྲོ་བ་ཆགས་སྐབས་རྗེས་འབངས་ཀྱི་སྲོལ་མེད་པར་སྤྱི་ཚོགས་ནང་རུབ་རུབ་བྱས་ནས་འཚོ་བ་བསྐྱལ་ཡོད་ཀྱང་། རིམ་བཞིན་མིའི་རྣམ་དཔྱོད་ཀྱི་ནུས་པ་རྒྱས་ནས་དམངས་ཀྱི་མགོ་ཁྲིད་འདེམས་རྒྱུའི་སྲོལ་དར་བ་དང་། སྐབས་དེར་ཤེས་བྱ་ཡོན་ཏན་ལ་གཞི་བཅོལ་ནས་མགོ་ཁྲིད་འདེམས་སྲོལ་མེད་སྟབས། གཙོ་བོ་ལུས་ཀྱི་སྟོབས་ཤུགས་ཆེ་ཆུང་གཞི་རྩར་བཟུང་ནས་སྐྱེས་པ་ཕོ་རྣམས་རང་བཞིན་གྱིས་ལུས་སྟོབས་ཆེ་བ་ཡོད་སྟབས། སྐྱེས་པ་ཕོ་རྣམས་སྤྱི་ཚོགས་ནང་མགོ་ཁྲིད་ལྟ་བུ་ཆགས་ནས་སྤྱི་ཚོགས་ཀྱི་དཔལ་ཡོན་དར་མགོ་བཙུགས་ཡོད། དེང་སྐབས་ལུས་སྟོབས་ཆེ་ཆུང་དང་ཤེས་བྱ་ཡོན་ཏན་ཁོ་ནས་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་ཐུབ་ཀྱི་མེད་སྟབས། ཚན་རིག་པ་ཚོས་བརྟག་དཔྱད་ཀྱི་ལམ་ནས་བུད་མེད་ལ་རང་བཞིན་ལྷན་སྐྱེས་སུ་བྱམས་བརྩེའི་ནུས་པ་དེ་སྐྱེས་པ་ཕོ་ལས་ཆེ་བ་དང་། གཞན་གྱི་བདེ་སྡུག་ལ་ཚོར་ཤུགས་ཆེ་བ་ཡོད་པར་བརྟེན། གལ་ཏེ་བུད་མེད་ཚོས་འཛམ་གླིང་གི་ལམ་སྣེ་འདྲེན་པ་ཡིན་ན། ཕལ་ཆེར་སྤྱི་ཚོགས་ནང་དེང་སྐབས་ལས་ཀྱང་ཞི་བདེ་བརྟན་ལྷིང་ཆེ་བ་ཞིག་ཡོང་ཐུབ་པའི་ཐུགས་རེ་མཛད་བཞིན་ཡོད་སྐོར་བཀའ་ལན་གནང་འདུག

ཟླ་འདིའི་ཕྱི་ཚེས་ ༥ ནས་ ༧ བར་༧གོང་ས་མཆོག་གིས་བྱམས་བརྩེའི་ཉམས་ལེན་སྐོར་ལ་བཀའ་སློབ་གནང་རྒྱུ་ དང་། སྒྱུ་རྩལ་པ་ཁག་ཅིག་དང་ལྷན་དུ་གསར་གཏོད་དང་སྒྱུ་རྩལ་གྱི་ཕན་ནུས་སྐོར་ལ་བགྲོ་གླེང་གནང་རྒྱུ་ཡིན་པ་དང་། ཕྱི་ཚེས་ ༩ དང་ ༡༠ ལ་ཨ་རིའི་གྲོང་ཁྱེར་ནེའུ་ཡོག་ཏུ་སློབ་དཔོན་ཀརྨ་ལ་ཤི་ཡིས་མཛད་པའི་སྒོམ་རིམ་བར་མའི་བཀའ་ཆོས་དང་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་རྒྱུ་ཡིན་འདུག