དེ་རིང་༧གོང་ས་མཆོག་གི་སྐུའི་འཁྲུངས་སྐར་དང་བསྟུན་ཏེ་དྷ་སའི་ཚོགས་པ་ཁག་གིས་ཀྱང་ཆོས་དང་རིག་གཞུང་སྤྱི་ཚོགས་བཅས་ཀྱི་ཐོག་ལས་འགུལ་སྣ་ཚོགས་སྤེལ་ཏེ་འཁྲུངས་སྐར་སྲུང་གཙི་གནང་སོང་།
དེ་རིང་སྔ་དྲོར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་སྲུང་གཙི་ཞུ་བཞིན་ཡོད་པ་དང་བསྟུན་ཏེ། གཞུང་འབྲེལ་མིན་པའི་ཚོགས་སྡེ་ཁག་དང་། མི་མང་ཚོའི་ངོས་ནས་ཀྱང་བོད་པའི་རྩ་དོན་འཐབ་རྩོད་དང་། སྐད་ཡིག་རིག་གཞུང་གཅེས་འཛིན། དེ་བཞིན་སྤྱི་ཚོགས་ཞབས་ཞུ་སོགས་རྣམ་པ་འདྲ་མིན་ཐོག་སྐུའི་འཁྲུངས་སྐར་སྲུང་གཙིའི་ཆ་ཤས་ལེན་བཞིན་འདུག
དེ་རིང་ཞོགས་པའི་ཆུ་ཚོད་ ༨།༠༠ ཙམ་ནས་དྷ་ས་གཙུག་ལག་ཁང་གི་སྒོ་ཆེན་གཡས་གཡོན་དུ་གངས་སྐྱིད་མེས་དབོན་དཔེ་སྟོན་སློབ་གྲྭའི་༼ན་ཆུང་ཚགས་པར༽དང་། བོད་ཀྱི་ཆ་འཕྲིན་གྱི་དབྱིན་ཡིག་ཚགས་པར་༼ The Tibet Post ༽། དེ་བཞིན། མདོ་སྨད་བདེན་རྒྱབ་རྩོམ་སྒྲིག་ཚོགས་ཆུང་གི་དཔེ་དེབ་༼པཎ་ཆེན་སྣང་བ་མཐའ་ཡས།༽སོགས་དཔེ་དེབ་དང་ཚགས་པར་སྣ་ཚོགས་འགྲེམ་ཚོང་བྱེད་བཞིན་འདུག་ལ། དེ་བཞིན། བོད་ཀྱི་བདེ་རྩ་དང་དྷ་ཤོད་རྒྱ་གར་སྨན་ཁང་ཛཱོ་ནར་(Zonal Hospital)མཉམ་འབྲེལ་ཐོག་ཁྲག་སྦྱིན་གཏོང་བ་སོགས་ཀྱི་ལས་འགུལ་ཡང་སྣ་ཚོགས་ཤིག་སྤེལ་བཞིན་འདུག
ཉིན་འདི་འགར་༧གོང་ས་མཆོག་དྷ་རམ་མས་ལར་བཞུགས་མེད་པ་དང་། བདུན་ཕྲག་སྔོན་མར་དྷ་རམ་ས་ལར་༧གོང་ས་མཆོག་ལ་བརྟེན་བཞུགས་དང་སྐུའི་གྱ་སྟོན་སྲུང་གཙི་ཞུས་པ་སོགས་ཀྱི་མཛད་སྒོ་རབ་དང་རིམ་པ་བསྡུས་ཏེ་མང་ཚོགས་འདུ་འཛོམས་ཆེན་པོ་བྱུང་ཡོད་སྟབས། དེ་རིང་འཁྲུངས་སྐར་མཛད་སྒོར་མི་ཕོན་ཆེན་པོ་འདུ་འཛོམས་བྱུང་མེད་ཀྱང་། མདང་ནུབ་ནས་བཟུང་བཞུགས་ཁུལ་གྱི་ཟ་ཁང་དང་ཚོང་ཁང་། སློབ་གྲྭ་སོགས་སུ་དུས་སྟོན་གྱི་རྣམ་པས་ཁེངས་འདུག
དུས་དྲན་མཛད་སྒོའི་སྟེང་དྷ་ས་ཉེ་ཁུལ་གྱི་བོད་པའི་སློབ་གྲྭ་ཁག་གིས་གཞས་སྣ་འཁྲབ་སྟོན་དང་། གོར་ཁ་སྤྱི་མཐུན་ཚོགས་པའི་ངོས་ནས་བལ་ཡུལ་གྱི་སྲོལ་རྒྱུན་འཁྲབ་གཞས་བཅས་གཟིགས་འབུལ་གནང་སོང་། གཞུང་འབྲེལ་མཛད་སྒོ་གྲུབ་རྗེས། དབུས་བོད་ཀྱི་གཞོན་ནུ་ལྷན་ཚོགས་ཀྱིས་འདི་ལོའི་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད། སེ་ལ་ཀུ་བོད་ཁྱིམ་གྱི་སློབ་མ་བུ་མོ་བདེན་འཛོམས་ལགས་ཀྱིས་བོད་ཡིག་གི་བརྒྱ་ཆ་ ༩༨ བླངས་ཏེ་ཨང་དང་པོ་ཆགས་ཡོད་སྟབས། ཁོ་མོར་༼བཀའ་དྲིན་རྗེས་དྲན་གྱི་གཟེངས་རྟགས།༽དང་ཧིན་སྒོར་ ༢༠༠༠༠ བཅས་ཀྱི་གཟེངས་བསྟོད་བྱ་དགའ་གནང་སོང་།
གཞོན་ནུའི་དྲུང་ཆེ་བཀྲ་ཤིས་ལམ་བཟང་ལགས་ཀྱིས་ངོ་སྤྲོད་གནང་བ་ལྟར་ན། གཟེངས་རྟགས་འདི་བོད་རིགས་གཞོན་སྐྱེས་ཚོས་སོ་སོའི་སྐད་ཡིག་ལ་འབད་བརྩོན་དང་དོ་སྣང་ཡོང་ཐབས་ལ་དམིགས་ཏེ། ད་ལོ་གསར་དུ་མགོ་འཛུགས་བྱས་པ་ཞིག་དང་། མ་འོངས་པར་ལོ་ལྟར་འབུལ་རྒྱུ་ཡིན་འདུག སློབ་མ་བདེ་འཛོམས་ལགས་ཀྱིས་ཡིག་རྒྱུགས་སྐར་གྲངས་ ༩༨ བླངས་པ་དེ་ནི་ཧ་ཅང་བསྔགས་བརྗོད་ཞུ་འོས་པ་ཞིག་ཡིན་སྟབས། མ་འོངས་པར་གཞོན་སྐྱེས་ཚོས་ཁོ་མོར་མིག་དཔེ་བལྟ་དགོས་སྐོར་བརྗོད་བྱུང་།
གསར་འགོད་པས་བདེ་འཛོམས་ལགས་སུ་བཅར་འདྲི་ཞུས་པར་ཁོས་མོས། ང་རང་ཆུང་དུས་བོད་ནང་ཕ་མས་བོད་ཡིག་འབྲི་ཀློག་ཐོག་ཤུགས་བརྒྱབ་པ་དང་། རྗེས་སུ་བཙན་བྱོལ་ནང་འབྱོར་རྗེས་སྔར་ལྷག་བོད་ཡིག་ལ་དོ་སྣང་དང་འབད་བརྩོན་ཆེན་པོ་བྱས་པ་ཡིན། སྤྱིར་བཏང་ངས་གཟེངས་རྟགས་འདི་འདྲ་ཞིག་འཐོབ་ཀྱི་རེད་བསམ་པ་ཡིད་ལ་འཁོར་མ་བྱུང་ཡང་། ད་ཐེངས་འདི་ཐོབ་དུས་བློ་ཡུལ་ལས་འདས་པ་ཞིག་བྱུང་སོང་ཞེས་སོགས་བརྗོད་བྱུང་།
བོད་ཀྱི་བདེ་རྩ་དང་ཛོ་ནར་སྨན་ཁང་གཉིས་ཀྱི་ཁྲག་སྦྱིན་དེའི་སྐོར་ལ་བདེ་རྩའི་འགན་འཛིན་ཚེ་རིང་དོན་གྲུབ་ལགས་ཀྱིས་ངོ་སྤྲོད་གནང་བ་ལྟར་ན། ད་རེས་ཁོང་ཅག་གིས་སྔར་དང་མི་འདྲ་བར་༧གོང་ས་མཆོག་དགུང་གྲངས་ ༨༠ ཕེབས་པར་ཆེད་དུ་དམིགས་ཏེ་མི་གྲངས་ ༨༠ ལ་ཁྲག་བསྡུ་རུབ་བྱས་ཏེ། མ་འོངས་པར་ཛ་དྲག་ནད་མནར་རིགས་ལ་ཁྲག་སྦྱིན་གཏོང་རྒྱུ་ཡིན་འདུག
གཞན། བྲག་གཡབ་པ་ངག་དབང་བྱམས་པ་ལགས་ཀྱིས་འདི་ལོ་༧གོང་ས་མཆོག་དགུང་གྲངས་བརྒྱད་བཅུ་བཞེས་པར་དགའ་སྤྲོའི་རྟེན་འབྲེལ་དང་བཀའ་དྲིན་རྗེས་དྲན་མཚོན་ཆེད། དེ་རིང་ནས་མགོ་འཛུགས་ཀྱིས་མ་འོངས་པའི་ལོ་གཅིག་རིང་བོད་ཆས་གྱོན་རྒྱུའི་ལས་འགུལ་ཞིག་ཀྱང་མགོ་འཛུགས་གནང་སོང་། ཁོ་རང་གི་གསལ་བསྒྲགས་ནང་བཀོད་པ་ལྟར་ན། བོད་ཀྱི་ཆོས་དང་རིག་གཞུང་སྐད་དང་ཡི་གེ་སོགས་ཡར་རྒྱས་དར་སྤེལ་གཏོང་ཐབས་སྐོར་དུས་དང་རྣམ་པ་ཀུན་ཏུ་བསམ་གཞིག་འབད་བརྩོན་བྱ་དགོས་པ་ནི། བོད་རིགས་མི་རེ་ངོ་རེའི་ཕྲག་ཏུ་བབ་པའི་འོས་འགན་ཞིག་ཡིན་སྟབས། གུས་པ་རང་ཉིད་ཀྱི་ངོས་ནས་ཀྱང་ད་བར་བོད་ཀྱི་སྐད་ཡིག་སོགས་སྤྱི་ཕན་བྱ་གཞག་ཐད་ཉིན་མཚན་ལྟོས་མེད་རང་ནུས་གང་ཡོད་ཀྱིས་སྒྲུབ་མུས་ཡིན་ཁུལ་ཐོག་ལོ་འདི་ནས་ཀྱང་རྒྱལ་བའི་བཀའ་དྲིན་རྗེས་དྲན་མཚོན་ཆེད་དུ་རང་གིས་ནུས་ཚོད་ལ་དཔག་པའི་བོད་གོས་གྱོན་རྒྱུའི་འཆར་གཞི་ཡོད། ཅེས་སོགས་བཀོད་འདུག
ཉིན་གུང་དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཆེ་ཁག་ལྔ་གཙོས་པའི་ཆོལ་ཁ་གསུམ་གྱི་ཚོགས་པ་དང་། ས་གནས་རང་བདེན་ཚོགས་ཆུང་། ས་གནས་མགོ་འཛིན་ལས་ཁུངས། དྷ་སའི་ཚོང་ཁང་སྐྱིད་སྡུག་སོགས་ཚོགས་པ་སྐྱིད་སྡུག་ཆེ་ཆུང་ ༡༩ མཉམ་འབྲེལ་ཐོག་འཁྲུངས་སྐར་མཛད་སྒོར་ཞུགས་མཁན་མི་མང་ཡོངས་ལ་ཉིན་གུང་གསོལ་ཚིགས་འདེགས་འབུལ་གནང་སོང་།
