ཨུ་རུ་སུ་རྒྱ་ནག་ལ་བློ་ཁ་ཕྱོགས་རྒྱུ་དེ་འཁྲུལ་སྣང་ཡིན་དོན་ཅི།

ཕྱི་ཚེས་ ༨ ནས་ ༩ བར་ཨུ་རུ་སུ་གཞུང་གིས་རྒྱ་ནག་དང་རྒྱ་གར། བྷར་ཛེལ་དང་ལྷོ་ཨ་ཧྥི་རེ་ཁ་བཅས་ཀྱི་སྲིད་འཛིན་རྣམས་ལ་མགྲོན་བསུ་བྱས་ཏེ། ཨུ་རུ་སུའི་བྷ་ཞི་ཁོར་ཊོ་སི་ཐན་ (Russian republic of Bashkortostan) ནང་། དེང་སྐབས་དཔལ་འབྱོར་འཕེལ་རྒྱས་སུ་འགྲོ་བཞིན་པའི་མཉམ་འབྲེལ་རྒྱལ་ཁབ་ལྔ་ (BRICS) ཡིས་གྲུབ་པའི་ཆེས་མཐོའི་དཔོན་རིགས་ཚོགས་ཆེན་སྐབས་བདུན་པ་བསྡུ་སྐོང་བྱས་ཡོད་པ་དང་། དེ་ཡང་ཡུའུ་ཁི་རེན་རྩོད་གླེང་གི་ཐད་ནས་ཨུ་རུ་སུ་ནུབ་གླིང་རྒྱལ་ཁབ་ཁག་དང་འགལ་ཟླར་གྱུར་ཅིང་། མོ་སི་ཁོ་གཞུང་གིས་སྲིད་འབྱོར་གཉིས་ཀྱི་སྒོ་ནས་ཨེ་ཤ་ཡའི་དབུས་ཕྱོགས་འཁོར་ཏེ། ནུབ་གླིང་གི་རྒྱལ་ཁབ་ཁག་ལ་རྒྱབ་གཏད་སྲིད་པའི་སེམས་འཚབ་ཀྱི་མེ་སྟག་མཆེད་ཀྱིན་པའི་དུས་སྐབས་འདིར། གོང་སྨོས་བགྲོ་གླེང་ཚོགས་ཆེན་དེ་འདྲ་ཞིག་བསྡུས་པ་རེད།

ཉེ་ལམ་ཉི་ཧོང་གིས་ནུབ་གླིང་རྒྱལ་ཁབ་ཁག་དང་མཉམ་འབྲེལ་གྱིས་ཨུ་རུ་སུར་དཔལ་འབྱོར་ཉེས་ཆད་བཏང་བ་ནས་བཟུང་། རྒྱ་གར་དང་ཨུ་རུ་སུའི་ཉོ་འཚོང་མཉམ་འབྲེལ་ལ་འགྲན་རྩོད་རང་བཞིན་གྱི་བྱེད་ནུས་ཕྲན་བུ་ལས་ཐོན་གྱི་མེད་པ་དང་། མོ་སི་ཁོ་སྲིད་གཞུང་ཨེ་ཤ་ཡའི་ཕྱོགས་སུ་འཁོར་པ་ལས་ཀྱང་རྒྱ་ནག་གི་ཕྱོགས་སུ་འཁོར་རྒྱུ་དེ་ཧ་ཅང་རྩ་འགངས་ཆེན་པོ་ཆགས་ཡོད་ལ། ཡུའུ་ཁི་རེན་རྒྱལ་ནང་ལ་དུས་འགྱུར་བྱུང་བའི་ཟླ་བ་འདི་དག་རིང་། མོ་སི་ཁོ་གཞུང་གིས་རྒྱ་ནག་དང་མཉམ་འབྲེལ་ལས་གཞི་ (རྒྱལ་ཁབ་གཉིས་བར་དངུལ་ཁང་གནས་སྤོར་དང་བུན་གསབ་སྡེ་ཁག་མཉམ་འབྲེལ་བཅས་ཀྱི་བྱེད་ཐབས་གསར་བ) མང་པོ་ཞིག་ཁྱབ་བསྒྲགས་བྱས་པ་དང་། དེ་ཡང་རྒྱལ་ཁབ་གཉིས་བར་དཔལ་འབྱོར་འཛུགས་སྐྲུན་དང་ཐུན་མོང་དུ་སྤྱོད་པའི་མ་དངུལ་འཇོག་ཐབས་ཤིག་ཡིན་ཞིང་། དེ་ལ་བརྟེན་ནས་རྒྱལ་ཁབ་གཉིས་ཀྱིས་རང་དབང་གི་སྒོ་ནས་ནུབ་གླིང་གི་མ་འཇོག་ཚོགས་སྡེ་གཙོ་བོ་ཁག་དང་མཉམ་ལས་བྱ་ཐུབ་སྲིད་པ་རེད།

དེར་མ་ཟད། རྒྱ་ནག་དང་ཨུ་རུ་སུ་རྒྱལ་ཁབ་གཉིས་ད་དུང‘ནུབ་གླིང་གི་འཛམ་གླིང་དངུལ་ཁང་གཙོ་བོ’དང‘རྒྱལ་སྤྱིའི་དངུལ་ལོའི་ཐེབས་རྩ’ ‘ཡར་རྒྱས་དངུལ་ཁང་གསར་བ’སོགས་ཀྱི་བར་འདམ་ག་བྱེད་པའི་ཤར་ནུབ་རྒྱལ་ཁབ་ཁག་གི་གྲས་སུའང་ཚུད་ཡོད་པ་དང་། དངུལ་ཁང་འདི་དག་དང་མཉམ་འབྲེལ་ཐོག་དཔལ་འབྱོར་ཁྲོམ་རའི་མ་རྐང་གསར་འཛུགས་དང་གོང་སྨོས་མཉམ་འབྲེལ་རྒྱལ་ཁབ་ཁག་ལྔའི་དཔལ་འབྱོར་འདུ་འགོད་ཀྱི་ལས་འཆར་གཞན་དག དེ་བཞིན། ཨ་སྒོར་ཁྲག་ཁྲིག་ ༡༠༠ ཡི་འགྲོ་རྒྱུག་ཟུར་འཇོག་དམིགས་བསལ་ཐེབས་རྩ་སོགས་ལ་བརྟེན་ནས། དེང་གི་འཛམ་གླིང་དཔལ་འབྱོར་འདུ་འགོད་ཀྱི་ཉམ་ཉེས་སྲུང་སྐྱོབ་དང་ཤར་ནུབ་ཀྱི་རྒྱལ་ཁབ་མང་པོར་མཐུན་སྦྱོར་བྱ་རྩིས་བཅས་ཡིན་པ་རེད།

གང་ལྟར། དེང་གི་དཔལ་འབྱོར་འཕེལ་རྒྱས་ཀྱི་བྱེད་ནུས་གཙོ་བོ་དེ་ནུས་ཤུགས་ཐོན་སྐྱེད་ཆགས་ཡོད་པ་དང་། ༢༠༡༤ ལོའི་ཟླ་ ༥ ནང་རྒྱ་ནག་དང་ཨུ་རུ་སུ་རྒྱལ་ཁབ་གཉིས་ཀྱིས་རང་བྱུང་སོལ་རླངས་ཐོན་སྐྱེད་ཐད་ལ་ཨ་སྒོར་ཁྲག་ཁྲིག་ ༤༠༠ གྲོས་ཆིངས་བཞག་ཅིང་། དེའི་ཁྲོད་དུ་རྒྱ་ནག་བྱང་ཤར་ནས་ཨུ་རུ་སུའི་མངའ་ཁུལ་སེ་བྷི་རེ་ཡའི་ཤར་རྒྱུད་བར་ཏེ། ལེ་དབར་ ༢༠༠༠ རིང་ཚད་ལ་སོལ་རླངས་སྦུགས་ལམ་འདྲེན་པའི་ཨར་ལས་འཛུགས་སྐྲུན་གྱི་ལས་གཞི་ཡང་ཚུད་ཡོད། ད་དུང་ལོ་སྔོན་མའི་ཕྱི་ཟླ་ ༡༡ ནང་རྒྱ་ནག་དང་ཨུ་རུ་སུ་གཉིས་ཀྱིས་ཨུ་རུ་སུའི་མངའ་ཁུལ་སེ་བྷི་རེ་ཡའི་ (Siberia) ནུབ་རྒྱུད་ནས་རྒྱ་ནག་གི་མངའ་ཁུལ་དུ་འདོད་པའི་ཞིན་ཅིང་མི་རིགས་རང་སྐྱོང་ལྗོངས་དབར་ཐེངས་གཉིས་པའི་སོལ་རླངས་སྦུགས་ལམ་འཛུགས་སྐྲུན་ལས་གཞིའི་ཐད་ལ་མོས་མཐུན་མིང་རྟགས་བཀོད།

རེབ་འདིའི་སོལ་རླངས་སྦུགས་ལམ་དེ་ཡ་གླིང་ཨེ་ཤ་ཡའི་དབུས་ཁུལ་གྱི་ཨལ་ཐེ་ (Altai) རི་རྒྱུད་ནས་འདྲེན་འཆར་ཡོད་པ་རེད། གོང་སྨོས་སེ་བྷི་རེ་ཡའི་ཤར་རྒྱུད་ཀྱི་སོལ་རླངས་སྦུགས་ལམ་དང་མི་འདྲ་བར། རི་བོ་ཨལ་ཐེ་རྒྱུད་ཀྱི་སོལ་རླངས་སྦུགས་ལམ་དེ་སི་བྷི་རེ་ཡའི་ནུབ་རྒྱུད་ཀྱི་སོལ་རླངས་སྦུགས་ལམ་དང་གཅིག་མཚུངས་ཡིན་ཞིང་། ཉེ་བའི་ཆར་སོལ་རླངས་སྦུགས་ལམ་འདི་དག་ལས་ཡུ་རོབ་གླིང་ལ་སོལ་རླངས་ནུས་ཤུགས་མཁོ་སྤྲོད་བྱེད་ཀྱི་ཡོད་པ་དེས། མོ་སི་ཁོ་སྲིད་གཞུང་ལ་ཤར་ནུབ་རྒྱལ་ཁབ་ཁག་བར་སོལ་རླངས་ནུས་ཤུགས་མཁོ་སྤྲོད་དང་བརྗེ་གཏོང་བྱེད་པའི་འཇོན་ཐང་འཕར་མ་ཞིག་སྤྲོད་ཀྱི་ཡོད།

མོ་སི་ཁོ་སྲིད་གཞུང་གིས་ད་དུང་སྔར་བྱུང་མ་མྱོང་བའི་གོམ་གང་མདུན་སྤོས་ཀྱིས། རྒྱ་ནག་གི་མ་འཛུགས་ལ་བརྟེན་ནས་རྡོ་སྣུམ་དང་སོལ་རླངས་ཐོན་ཁུངས་ཁག་ཅིག་སྔོག་འདོན་བྱེད་ཀྱི་ཡོད་ཅིང་། གཙོ་བོ་སེ་བྷི་རེ་ཡའི་ནུབ་རྒྱུད་ཀྱི་སོལ་རླངས་གཏེར་ཁ་དང་གཞི་རྒྱ་ཆེ་བའི་བལ་ཀོར་རྡོ་སྣུམ་གཏེར་ཁ་ (Vankor oil field) སོགས་ནས་ཐོན་སྐྱེད་བྱེད་ཀྱི་ཡོད།

སྔོན་ཆད་མོ་སི་ཁོ་སྲིད་གཞུང་གིས་དམག་དོན་ལ་རྩ་འགངས་ཆེན་པོ་ཆགས་ཡོད་པའི་རང་རྒྱལ་གྱི་ནུས་ཤུགས་ཐོན་སྐྱེད་ཐད་ཀྱི་རྒྱ་ནག་གི་གནོན་ཤུགས་ལ་བཀའ་འཁྲོལ་ཞུ་འདོད་མེད་སྟབས། ཉེ་བའི་ཆར་ནས་ལག་བསྟར་བྱེད་བཞིན་པའི་བྱ་འགུལ་འདི་རིགས་ལ་གཡོལ་བ་མ་ཟད། ཉེ་ལམ་ད་དུང་སྣུམ་འཁོར་ཐོན་ལས་ཚུད་པའི་རྒྱ་ནག་གི་ཐོན་སྐྱེད་མ་འཛུགས་བྱེད་མཁན་ཁག་ཅིག་གི་འབྲེལ་ལམ་ཡང་བཅད་ཟིན།

དེང་སྐབས་རྒྱ་ནག་གི་ཉོ་ཚོང་ཁང་མང་པོས་ཨུ་རུ་སུའི་ཉོ་ཚོང་ཁང་ཁག་ལ་བཟོ་ལས་རིག་རྩལ་མཁོ་སྤྲོད་བྱེད་ཀྱི་ཡོད་ཀྱང་། ནུབ་གླིང་གི་ཆོག་མཆན་ཐོབ་མེད་སྟབས། ཁོ་ཚོས་ལས་དོན་འདི་དག་ལག་བསྟར་བྱེད་ཐབས་ཡོད་པ་མ་རེད། ཨུ་རུ་སུའི་དཔལ་འབྱོར་འདུ་འགོད་ལ་ཐེབས་པའི་ཉེས་སྐྱོན་དེའི་དབང་གིས་རྒྱ་ནག་གི་དངུལ་ཁང་ཁག་ནི་ཨུ་རུ་སུར་མཚོན་ན་བུན་དངུལ་གྱི་ཡོང་ཁུངས་གཙོ་བོ་ཞིག་ཆགས་ཡོད།

ཡིན་ནའང་། རྒྱལ་ཁབ་གཉིས་ཀྱི་ཉོ་འཚོང་མཉམ་འབྲེལ་ལས་གཞི་མགོ་བཙུགས་ནས་ལོ་ངོ་གཅིག་ལྷག་འདས་རྗེས། ལས་དོན་འདི་ལ་མངོན་གསལ་གྱི་འཕེལ་རྒྱས་ཆེན་པོ་ཞིག་མ་ཐོན་ལ། དེ་དང་མཉམ་དུ་ལས་གཞི་གཞན་ཁག་ཅིག་ཀྱང་རང་བཞིན་གྱིས་འདོར་དགོས་བྱུང་བ་རེད།

རྒྱ་ནག་གཞུང་ཨེ་ཤ་ཡ་འཛུགས་སྐྲུན་མ་འཇོག་དངུལ་ཁང་ (AIIB) ཡར་རྒྱས་སུ་གཏོང་རྒྱུར་དང་ཞེན་ཆེན་པོ་ཡོད་ཅིང་། མོ་སི་ཁོ་སྲིད་གཞུང་ལས་གཞི་འདིའི་ནང་ཞུགས་རྒྱུར་ཐེ་ཚོམ་སྐྱེ་བཞིན་ཡོད་ལ། རྙོག་འཛིང་ཆེ་བའི‘ཡར་རྒྱས་དངུལ་ཁང་གསར་བ’འཛུགས་སྐྲུན་ལས་རིམ་དང་བསྡུར་ན། དེ་གར་ཁོངས་མི་གཞན་གྱི་གོ་དབང་དང་ཁེ་ཕན་དེ་འདྲ་ལོངས་སུ་སྤྱོད་རྒྱུ་གང་ཡང་ཡོད་པ་མ་རེད། པེ་ཅིན་གཞུང་ཨེ་ཤ་ཡ་འཛུགས་སྐྲུན་མ་འཇོག་དངུལ་ཁང་ཡར་རྒྱས་ལས་གཞིའི་ནང་བཙན་གྱིས་འཛུལ་ཏེ། རྒྱལ་ཁབ་གཞན་མང་པོ་ལས་གཞི་འདིའི་ནང་མཉམ་ཞུགས་བྱེད་པར་འབྲེལ་འདྲིས་དང་འབད་བརྩོན་བྱེད་ཀྱི་ཡོད་པ་དང་། ཨུ་རུ་སུས་ཡང་ནས་བསྐྱར་དུ་དངུལ་ཁང་འདིའི་ནང་མཉམ་ཞུགས་བྱེད་པའི་རྒྱ་ནག་གི་གོ་བསྐོན་བློ་འགུག་དང་ལེན་བྱེད་ཀྱི་མེད་ནའང་། མཐའ་མར་དངུལ་ཁང་གསར་བསྐྲུན་ཁོངས་མིར་ཞུགས་པའི་དུས་བཀག་གི་ཉིན་འགའི་སྔོན་ཏེ། ཕྱི་ཟླ་ ༣ ནང་མོས་མཐུན་གྱི་མིང་རྟགས་བཀོད་ཡོད་པ་མ་ཟད། ཐ་ན་ནུས་ཤུགས་ཐོན་སྐྱེད་ཀྱི་ཐད་ནས་ཀྱང་རྒྱལ་ཁབ་གཉིས་ཀྱིས་སོ་སོའི་ལས་འཆར་ལག་བསྟར་ལ་འབད་བརྩོན་བྱེད་ཀྱི་ཡོད་པ་རེད།

༢༠༡༤ ལོའི་ཟླ་ ༩ པའི་ནང་རྒྱལ་ཁབ་གཉིས་ཀྱིས་ཤར་རྒྱུད་སྦུགས་ལམ་འཛུགས་སྐྲུན་མགོ་བཙུགས་ཡོད་ནའང་། ཕྱོགས་གཉི་གས་དེ་སྔོན་རྒྱ་ནག་གཞུང་གིས་ཁག་ཐག་བྱས་པའི་སྦུགས་ལམ་གསར་བསྐྲུན་གྱི་འགྲོ་གྲོན་ཨ་སྒོར་ཁྲག་ཁྲིག་ ༢༥ གཏོང་རྒྱུའི་ཐད་ལ་གྲོས་མཐུན་བྱུང་མེད་སྟབས། ཉེ་བའི་ཆར་དཔལ་འབྱོར་དབྱེ་ཞིབ་པ་ཚོས། སོལ་རླངས་ཐོན་སྐྱེད་ལས་གཞི་དེ་ ༢༠༡༨ ལོར་མགོ་འཛུགས་ཐུབ་མིན་སྐོར་ལ་རེ་དོགས་ཀྱིས་རྩོད་གླེང་བྱེད་མུས་ཡིན་ཞིང་། ལོ་སྔོན་མའི་ཕྱི་ཟླ་ ༩ ནང་ཨུ་རུ་སུའི་མ་དངུལ་མཉམ་འབྲེལ་ཚོང་གཉེར་ཁང་ (Gazprom) གི་དཔོན་རིགས་ཤིག་གིས། འགྲོ་གྲོན་ཐད་ཀྱི་གནད་དོན་དེ་ད་དུང་ཐག་ཆོད་བྱུང་མེད་སྐོར་བརྗོད་བྱུང་།

མ་ཟད་རྒྱལ་ཁབ་འདི་གཉིས་ཀྱིས་གོང་སྨྲས་རི་བོ་ཨལ་ཐེའི་ནུབ་རྒྱུད་ཀྱི་སོལ་རླངས་མཁོ་འདྲེན་དང་མ་དངུལ་འཛུགས་བསྐྲུན་སོགས་ཕྱོགས་མང་པོ་ནས་དཔལ་འབྱོར་འདུ་འགོད་མཉམ་འབྲེལ་ལ་མོས་མཐུན་བྱུང་ཞིང་། སྤྱིར་ ཨུ་རུ་སུའི་སོལ་རླངས་འབོར་ཆེན་ཡ་གླིང་ཨེ་ཤ་ཡའི་དབུས་ཁུལ་གྱི་སྦུགས་ལམ་བརྒྱུད་ནས་རྒྱང་རིང་བའི་རྒྱ་ནག་གི་ས་ཁུལ་ཁག་ནང་སྐྱེལ་འདྲེན་བྱེད་པ་དང་། རྒྱ་ནག་ཤར་རྒྱུད་ཀྱི་བཟོ་ལས་ཐོན་སྐྱེད་ལྟེ་གནས་ཁག་ཏུ་སོལ་རླངས་དགོས་མཁོ་ཆེ་ནའང་། པེ་ཅིན་གཞུང་གིས་ཨུ་རུ་སུའི་སོལ་རླངས་ནང་འདྲེན་ལ་འདོད་བློ་ཚིམས་པའི་རིན་གོང་སྤྲོད་ཀྱི་ཡོད་པ་མ་རེད་ལ། དེ་དང་དུས་མཚུངས་སུ། རྒྱ་ནག་དང་ཨུ་རུ་སུ་རྒྱལ་ཁབ་གཉིས་ཀྱིས་དུས་ཡུན་རིང་བོར་བལ་ཀོར་རྡོ་སྣུམ་གཏེར་ཁ་དང་སོལ་རླངས་གཏེར་ཁ་སོགས་རྒྱ་ནག་གི་དམིགས་འབེན་དུ་བཟུང་བའི་ཐོན་ཁུངས་འདི་དག་སྔོག་འདོན་དང་མཁོ་འདྲེན། ཉོ་འཚོང་བཅས་ཀྱི་ཐད་ལའང་མོས་མཐུན་བྱུང་ཡོད་པ་མ་རེད།

ཨུ་རུ་སུ་དང་རྒྱ་ནག་གི་དཔལ་འབྱོར་འདུ་འགོད་བཀག་རྒྱ་དེ་ཡང་ཕྱོགས་གཅིག་ནས། པེ་ཅིན་གཞུང་གིས་ཡུའུ་ཁི་རེན་གྱི་རྩོད་རྙོག་ལ་གསལ་འདེབས་བྱེད་མིན་ལ་ཐུག་ཡོད། རྒྱ་ནག་གཞུང་འབྲེལ་བརྒྱུད་ལམ་ཁག་གིས་ཡུའུ་ཁི་རེན་རྒྱལ་ནང་གི་ཨུ་རུ་སུའི་དམག་འཐབ་དང་དེའི་དམིགས་ཡུལ་གསལ་རྗེན་དུ་བཏོན་པ་རེད། ཡིན་ནའང་རྒྱ་ནག་གི་མཐོ་རིམ་དཔོན་རིགས་ཚོས་དངོན་གསལ་དོད་པོས་ཨུ་རུ་སུའི་ཁ་གཏད་ཀྱི་ནུབ་གླིང་གི་དཔལ་འབྱོར་ཉེས་ཆད་ལ་རྒྱབ་འགལ་བྱས་ཡོད་ཀྱང་། པེ་ཅིན་གཞུང་གིས་རྩོད་རྙོག་གི་གནད་དུ་གྱུར་བའི་མོ་སི་ཁོ་སྲིད་གཞུང་ལ་ཕྱི་འབྲེལ་ཐད་ནས་རྒྱབ་སྐྱོར་བྱེད་ཀྱི་མེད།

རྒྱ་ནག་གཞུང་གིས་ཨུ་རུ་སུའི་ནུབ་རྒྱུད་དང་ཡུའུ་ཁི་རེན་གྱི་ལྷོ་རྒྱུད་མངའ་ཁུལ་ཁི་རེ་མི་ཡའི་ (Crimea) ཟུར་གཏོགས་ས་ཁུལ་མང་པོར་ཆ་རྒྱུས་ཅི་ཡང་ཡོད་པ་མ་རེད། མངའ་ཁུལ་འདིས་ཉེ་ལམ་འཛམ་གླིང་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཁང་དང་རྒྱལ་སྤྱིའི་ཚོགས་ཆེན་སྟེང་། ཡུའུ་ཁི་རེན་རྩོད་གླེང་འདུམ་འགྲིག་གི་ཐད་ནས་ཨུ་རུ་སུ་ལ་རྒྱབ་འགལ་བྱས་ཡོད་པ་མ་ཟད། ཡུན་རིང་མ་འགོར་བར་ཡུའུ་ཁི་རེན་གྱི་དཔོན་རིགས་གསར་བ་ཚོ་དང་འབྲེལ་ལམ་ཡར་རྒྱས་སུ་བཏང་ཡོད།

ཡུའུ་ཁི་རེན་གྱི་སྐབས་བཞི་བའི་སྲིད་འཛིན་ཡ་ནུ་ཀོ་བེ་ཆ་ (Yanukovych) སྲིད་སྟེགས་ལས་ཕབ་ནས་ཉིན་འགའ་འགོར་རྗེས། རྒྱ་ནག་གི་ཕྱི་སྲིད་བློན་ཆེན་གྱིས་རྒྱ་ནག་གཞུང་གི་ངོས་ནས་ཡུའུ་ཁི་རེན་མི་མང་གི་རང་དབང་རང་བཙན་གྱི་འདམ་གར་བརྩི་མཐོང་བྱེད་ཀྱི་ཡོད་སྐོར་བརྗོད་ཅིང་། སོ་ནམ་ཚན་རིག་གི་ཐད་ནས་ཀྱང་དུས་ཡུན་རིང་བོར་པེ་ཅིན་གཞུང་གིས་ཡུའུ་ཁི་རེན་དང་མཉམ་འབྲེལ་ཟབ་མོ་བྱས་ཡོད་པ་རེད།

དེར་མ་ཟད། གནའ་བོའི་སོ་ཝེ་ཊི་སྤྱི་མཐུན་རྒྱལ་ཁབ་འོག་ཏུ་ཀ་ཛ་ཀི་སི་ཐན་ (Kazakhstan) དང་ཀེར་རྗེ་སི་ཐན། (Kyrgyzstan) ཊ་ཇེ་ཀེ་སི་ཐན། (Tajikistan) ཊུར་ཀི་མི་ནེ་སི་ཐན། (Turkmenistan) ཝ་ཙི་བྷི་ཀེ་སི་ཐན་ (Uzbekistan) སོགས་ཀྱི་ནང་རྒྱ་ནག་གི་ཆེས་གདུག་རྩུབ་ཆེ་བའི་དཔལ་འབྱོར་རྒྱ་སྐྱེད་བྱུང་བ་དེ་མོ་སི་ཁོ་གཞུང་གི་སེམས་ཁྲལ་གྱི་རྒྱུ་རྐྱེན་དུ་གྱུར་ཡོད། ཨེ་ཤ་ཡ་དབུས་ཁུལ་གྱི་ཆབ་སྲིད་དཔལ་འབྱོར་དབྱེ་ཞིབ་པ་ཚོས། ཨུ་རུ་སུའི་དབུལ་ཁུལ་ཀ་རམ་ལེན་ (Kremlin) གྱི་དྲག་པོའི་དམག་དཔུང་གིས་ཡུའུ་ཁི་རེན་རྒྱལ་ནང་དུ་སིམ་འཛུལ་བྱས་ཏེ། འབྱུང་འགྱུར་ཁ་ཛ་ཀི་སི་ཐན་དང་ཀེར་ཇེ་སི་ཐན། ཡང་ན་ཊ་ཇེ་ཀེ་སི་ཐན་སོགས་ཀྱི་རྒྱ་ནག་གི་ཁེ་ཕན་ལ་ཐད་ཀར་རྒྱབ་འགལ་བྱེད་སྲིད་པའི་ཉེན་བརྡ་བཏང་བ་རེད།

རྒྱ་ནག་དང་ཨུ་རུ་སུ་རྒྱལ་ཁབ་གཉིས་དུས་རྒྱུན་ཡུའུ་ཁི་རེན་གྱི་རྩོད་གཞིའི་ནང་ཚུད་ཡོད་ནའང་། དེ་སྔོན་དགའ་དགའ་དུང་དུང་གིས་གསལ་བསྒྲགས་བྱས་ཟིན་པའི་མ་འཛུགས་ལས་འཆར་དང་ཐུན་མོང་རང་བཞིན་གྱི་དཔལ་འབྱོར་ཐོན་སྐྱེད་བཅས་ཀྱི་ཐད་ནས་ཕྱོགས་གཉིས་ཀྱི་འབྲེལ་ལམ་ཡར་རྒྱས་ཕྲན་བུ་འགྲོ་བཞིན་ཡོད།

དེང་གི་ཨུ་རུ་སུ་དང་རྒྱ་ནག་གཉིས་བར་གྱི་མཛའ་བརྩེ་ལྡན་པའི་འབྲེལ་ལམ་དེ་འུད་ཤོབ་ཙམ་མིན་ནའང་། མཛའ་འབྲེལ་དེས་རྒྱལ་སྤྱིར་བཟང་ཕྱོགས་ཀྱི་རྣམ་པ་གང་ཡང་མཚོན་མི་ཐུབ་ཅིང་། མོ་སི་ཁོ་སྲིད་གཞུང་ཡང་བསྐྱར་པེ་ཅིན་གཞུང་དང་མཛའ་འབྲེལ་བྱུང་བ་དེས། ཨུ་རུ་སུ་དང་རྒྱལ་སྤྱིའི་འགལ་བ་སྔར་བས་གཏིང་ཟབ་ཏུ་བཏང་ཡོད།