ཁོ་བོ་རྒྱལ་གཅེས་དཔའ་བོ་ཅི་ལ་མིན།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༦༨ སྟེང་གི་རྩོམ་སྒྲིག་པའི་གཏམ།
ཟླ་སྔོན་མའི་ཟླ་མཇུག་ཙམ་ལ་བོད་ནང་གི་གཞོན་སྐྱེས་རྩོམ་པ་པོ་ཁ་བ་སྙིང་ལྕགས་ཞུ་བ་ཞིག་གིས་མཚོ་སྔོན་ཁྲི་ཤོར་རྒྱལ་མོའི་གསེར་ཉ་སྲུང་སྐྱོབ་ཆེད་རང་གི་ཚེ་སྲོག་ཤོར་བའི་གནས་ཚུལ་ཞིག་དྲ་ལམ་ཁག་ཏུ་ཁྱབ་བཞིན་འདུག ངས་སྔོན་ཆད་ཁ་བ་སྙིང་ལྕགས་ཟེར་བ་ཞིག་གི་རྩོམ་ཡིག་རེ་འགའ་བཀླགས་མྱོང་བའི་དྲན་པ་རབ་རུབ་ཅིག་ལས་ཁོ་ལ་རྒྱུས་མངའ་གཞན་གང་ཡང་མེད།
    གནས་ཚུལ་འདི་ཐོག་མར་མཐོང་སྐབས་སྙན་ངག་ཅིག་ཡིན་ཤག་གིས་དོ་སྣང་དེ་ཙམ་མ་བྱུང་ཡང་། དྲ་ལམ་ཁག་དང་ངོ་དེབ་སོགས་སུ་འདིའི་སྐོར་ཉིན་རེ་ལས་ཉིན་རེར་ཇེ་མང་དང་། རིམ་གྱིས་སྐད་འཕྲིན་ཚོགས་པ་ཁག་ཏུའང་འདིའི་སྐོར་གྱི་གནས་ཚུལ་དང་། རྗེས་དྲན་སྙན་ངག བློས་བསླངས་རི་མོ་སོགས་སྤུངས་ནས་ཡོང་གི་འདུག་སྟབས། གཞི་ནས་དོ་སྣང་བྱུང་སྟེ་དེ་འབྲེལ་གྱི་གནས་ཚུལ་རིགས་ཞིབ་ཏུ་བཀླགས་པ་ཡིན། 
    ཕ་ཡུལ་མཚོ་སྔོན་ནས་ཡིན་ཞིང་སློབ་གྲྭ་ཆེན་མོ་ཐོན་རྗེས། ཟི་ལིང་དུ་བྱིས་སྒྲུང་རྩོམ་སྒྲིག་གི་ཕྱག་ལས་གནང་གི་ཡོད་པ་དང་། ད་ལྟ་རང་ལོ་ཉེར་དྲུག་ལ་སོན་མ་ཐག་པའི་ཁ་བ་སྙིང་ལྕགས་ཞུ་བ་ཁོང་གྲོགས་པོ་འགའ་དང་མཉམ་དུ། མཚོ་སྔོན་པོའི་མཁའ་རུ་ཁྲིམས་འགལ་གསེར་ཉ་རྐུ་མཁན་བཀག་འགོག་བྱེད་པར་སོང་ཡོད་པ་དང་། མཚན་ཞིག་མཚོ་མཁའི་ཉ་རྒྱ་གཏོར་དུ་འགྲོ་སྐབས་སྟབས་མ་ལེགས་པར་མཚོ་གཏིང་དུ་ནུབ་འདུག
    བོད་དོན་དེ་ཡང་མཐར་གཏུགས་ན་བོད་པའི་ཆོས་དང་རིག་གཞུང་། ཁོར་ཡུག་སྲུང་སྐྱོབ་སོགས་ཀྱི་ཆེད་དུ་ཡིན་ཟེར་བ་ལྟར། ཁ་བ་སྙིང་ལྕགས་ལགས་ཀྱང་བོད་ཀྱི་རང་བྱུང་ཁོར་ཡུག་དང་སྐྱེས་དངོས་སྲོག་ཆག་སྲུང་སྐྱོབ་ཆེད་ཚེ་སྲོག་ཤོར་སྟབས། ཁོ་བོ་རྒྱལ་གཅེས་དཔའ་བོ་ཞིག་ཅི་ལ་མིན། དེང་སྐབས་འཛམ་གླིང་ཐོག་མི་ཚང་མས་དོ་སྣང་དང་གཙིགས་ཆེན་བྱེད་ཡུལ། མི་རིགས་ལས་བརྒལ་ཏེ་མིའི་རིགས་དང་། མིའི་རིགས་ལས་བརྒལ་ཏེ་ཚེ་སྲོག་ཡོད་དོ་ཅོག་གི་ཆེད་དུ་ཀུན་ཁྱབ་འགན་འཁྲི་འཁྱེར་བའི་རླབས་ཆེ་བའི་བསམ་བློ་པ་ཞིག་ཏུའང་བགྲང་ཆོག
    བོད་ནང་དོན་རྐྱེན་དེ་བྱུང་མ་ཐག་རྩོམ་པ་པོ་དང་སྙན་ངག་པ་རྒན་གཞོན་སེར་སྐྱ་མང་པོས། འདས་པོ་ཁོང་ལ་མྱ་ངན་གྱི་ཚོགས་འདུ་བསྐོངས་པ་དང་། སེམས་ཀྱི་གདུང་བ་མཚོན་པའི་སྙན་ངག་འབྲི་བ། བོད་པའི་སྲོལ་རྒྱུན་ལྟར་བསྔོ་སྨོན་མཆོད་འབུལ་བྱེད་པ་སོགས་ཀྱི་བྱེད་སྒོ་སྣ་ཚོགས་སྤེལ་བཞིན་འདུག་ལ། དེ་དག་ལས་ཀྱང་རིན་ཐང་ཆེ་བ་ཞིག་ནི། མི་འགྱངས་བར་མཚོ་སྔོན་པོའི་མཁར་ཁོ་ལ་དྲན་རྟེན་རྡོ་རིང་ཞིག་བཞེངས་འཆར་ཡོད་པ་དེ་རེད།
    བློ་ཕམ་པ་ཞིག་ལ་བོད་ཕྱི་ནང་གཉིས་སུ་ཁ་བ་སྙིང་ལྕགས་ཀྱི་ཚེ་སྲོག་ཤོར་བར། ཕངས་སེམས་དང་བརྩེ་དུང་གི་སེམས་ཚོར་སྟོན་མཁན་མང་བ་ལས། ཁ་བ་སྙིང་ལྕགས་ཀྱིས་སུ་ཞིག་གི་ཆེད་དུ་ཅིའི་ཕྱིར་ཚེ་སྲོག་བཏང་བའི་ཀུན་སྤྱོད་དང་། འགན་འཁྲིའི་རིན་ཐང་གི་ངོས་ནས་གླེང་མཁན་ཉུང་ཉུང་རེད་ལ། ལྷག་པར་དུ་བོད་ཕྱི་ཕྱོགས་ཀྱི་བརྒྱུད་ལམ་ཁག་ཏུ་དེ་ནི་སྙན་ངག་གམ་སྒྱུ་རྩལ་ཞིག་གི་མཚོན་སྟངས་དང་། ན་གཞོན་བསམ་མེད་ཅིག་འདུག་ཚོད་མ་ཟིན་པའི་ཆག་སྒོ་ཙམ་ལ་ངོས་འཛིན་བྱེད་མཁན་ཡང་ཡོད་པ་འདིའོ།།
    འདས་པོ་ཁོང་གི་དེ་སྔའི་ཟིན་ཐོ་དག་གི་སྣེ་དང་ཟུར་ན་འདི་ལྟར་བཀོད་འདུག “ལས་ཀྱི་དབང་གིས་གངས་རིའི་ཞོལ་དུ་སྐྱེས། ལས་ཀྱི་དབང་གིས་གདོང་དམར་བོད་དུ་སྐྱེས། ལས་ཀྱི་དབང་གིས་ཕ་ས་གཞན་དུ་ཤོར། ལས་ཀྱི་དབང་གིས་གཞན་ཡུལ་ལུང་པར་འཁྱར།”  “མཐོ་སྒང་ནི་མི་སྒེར་དང་ཚོགས་པ་སུ་ལའང་དབང་བ་མ་རེད། དེ་ནི་མེས་པོ་གོང་མས་བུ་རབས་ཚ་རྒྱུད་ལ་གནང་བའི་འབོག་སྐལ་དེ་ཡིན་ནོ།།” “བོད་ཀྱི་ཆ་ས་མང་པོ་ཞིག་ཏུ། ས་ཆ་རང་དུ་སྡོད་པའི་བོད་མི་ཚོའི་མགོ་འཕང་ཇེ་དམའ་དང་། ཕྱི་ཡོང་རྒྱ་མི་དང་ཁ་ཆེ་བའི་མགོ་འཕང་ཇེ་མཐོ་རེད།”  “རྒྱ་སྐྱག་ཚོས་སྐྱིད་པོ་ཞིག་དྲན་འདུག ལྷ་ས་ནས་གཞིས་ཆགས་རྒྱུ་ཡིན་ཟེར། ཇ་འཐུང་ནས་ཉི་མར་ལྡེ་རྒྱུ་ཡིན་ཟེར། བོད་མོ་བཏུ་དགོས་ཟེར། གནའ་ཤི་བོ་ད།”  “རི་ཡི་སྟེང་ལ་གངས་ཀྱི་འདབ་མ་བརྩེགས་པ་དེ་ངའི་ཕ་ཡུལ་ཡིན་མོད། གངས་ཀྱི་འགབ་ལ་ལྕགས་ཀྱི་ལག་པ་བསྲིངས་མཁན་དེ་ཁྱེད་ཀྱི་སྲིད་ཇུས་ཡིན་འདུག”