གསུམ་དུས་རྔ་རིང་མ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༥༩ སྟེང་གི་རྩོམ་སྒྲིག་པའི་གཏམ།
ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་ཏུ་བྱུང་བའི་རྙོག་གླེང་དེའི་མཇུག་མ་ནག་པོ་ད་དུང་བསྐུམ་ཐུབ་མི་འདུག དབུས་བོད་ཀྱི་གཞོན་ནུ་ལྷན་ཚོགས་ཀྱིས་ཆེན་པོ་ཆུང་ཆུང་དང་ཆུང་ཆུང་མེད་པ་བཟོ་རྒྱུའི་ཚབ་ཏུ་རྙོག་མ་གཏིང་སློང་བྱས་ཏེ། མི་ཁ་ཤས་མངོན་དུ་ཐོན་ཏེ་ཁ་མཆུ་རྒྱག་པ་དང་། ཁ་ཤས་ལྐོག་ཏུ་ཡིབ་ནས་སྐུལ་སློང་བྱེད་པ། ཁག་ཅིག་ཕར་འཁོར་ནས་ཕར་ལ་འགྲིག་འགྲིག་ཅིག་དང་། ཚུར་འཁོར་ནས་ཚུར་ལ་བདེན་བདེན་ཞིག་བཤད་དེ། རྙོག་གླེང་འདི་བསམ་བཞིན་དུ་གཏིང་ཇེ་ཟབ་ནས་རྒྱ་ཇེ་ཆེར་བཏང་དང་གཏོང་གི་འདུག
    གཞོན་ནུའི་དབུས་རྒྱུན་ལས་ཁང་གིས། ནེའུ་ཡོག་ས་གནས་རྒྱུན་ལས་ཚོའི་ལས་ཀར་ནོར་འཁྲུལ་ཤོར་བའི་ཉེས་མིང་འོག ས་གཞོན་ཚོགས་གཙོར་ལས་མཚམས་འཇོག་དགོས་པའི་བཀའ་བཅད་བཏང་སོང་། ན་ནིང་ད་ལོར་བོད་ཀྱི་གཞོན་ནུ་ལྷན་ཚོགས་ཀྱིས་ཐལ་ཆ་ཅན་གྱི་ལས་ཀ་གཅིག་རྗེས་གཉིས་མཐུད་དུ་བྱས་སོང་། དབུ་མའི་ལམ་གྱི་ལངས་ཕྱོགས་འཛིན་མཁན་ལྷོ་ཕྱོགས་ས་གནས་བརྒྱད་ཀྱི་རྒྱུན་ལས་རྣམས་ཕྱིར་འཕུད་བཏང་བ་དང་། ད་རེས་སླར་ཡང་བོད་མིའི་སྒྲིག་འཛུགས་ལ་གཞོགས་འདེགས་བྱེད་མཁན་ནེའུ་ཡོག་ས་གནས་གཞོན་ནུའི་ཚོགས་གཙོ་ཕྱིར་འཕུད་བཏང་སོང་།
    ཁ་ནས་བོད་སྤྱི་དོན་དང་༧གོང་ས་མཆོག་གི་བཀའ་དགོངས་ལབ་བཞིན་དུ། ལག་ལེན་དངོས་ཐོག་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ལངས་ཕྱོགས་འཛིན་མཁན་དག་ལ་ཉེས་ཆད་གཏོང་སྟངས་འདི། གཞོན་ལྷན་གྱི་ཐོག་མའི་དམིགས་ཡུལ་དང་འགལ་ཡོད་ལ། བོད་རྒྱ་ཆེའི་མང་ཚོགས་ཀྱིས་གཞོན་ནུར་བཟུང་བའི་རེ་བའང་འདི་ལྟ་མིན། གཞོན་ནུ་ལྷན་ཚོགས་ཀྱི་གཡོན་ལྷུང་གི་བྱ་སྤྱོད་འདི་དག སྐབས་བཅོ་ལྔ་པའི་གཞོན་ནུ་ལྷན་ཚོགས་ཁོ་ནའི་བྱས་ཉེས་ཤིག་མིན་པ་མ་ཟད། ལས་ཐོག་དབུས་རྒྱུན་རེ་ཟུང་གི་ཕྱིའི་ཀུན་སྤྱོད་དང་ནང་གི་ཀུན་སློང་གི་ཚབ་མཚོན་ཞིག་དེ་བས་ཀྱང་མ་རེད།
    ད་རེབ་ཀྱི་རྙོག་གླེང་འདི་དང་འབྲེལ་ཏེ། བཙན་བྱོལ་སྤྱི་ཚོགས་ནང་གི་གཞུང་འབྲེལ་མིན་པའི་ཚོགས་པ་ཟེར་བ་འདི་དག་ལའང་བསམ་གཞིག་ཅིག་བྱེད་དགོས་བྱུང་སོང་། ཐོག་མ་མི་ལ་ཞེན་ཅན་སྐོར་ཞིག་གིས་རླབས་ཆེ་བའི་ལས་དོན་ཞིག་ལ་དམིགས་ཚད་བཟུང་སྟེ་ཚོགས་སྡེ་འདི་དག་གསར་འཛུགས་གནང་ཡང་། ད་ཆར་ཚོགས་སྡེ་འདི་དག་གིས་ཡང་སྙིང་ཅི་ཞིག་སྒྲུབ་བཞིན་ཡོད་པ་དང་། མ་འོངས་པར་གང་ཞིག་བསྒྲུབ་འདོད་ཡོད་པ་རེད། ད་ལྟ་སྒྲུབ་བཞིན་པའི་ལས་ཀ་འདི་དག་གིས་བོད་སྤྱི་དོན་ལ་ཕན་གྱི་འདུག་གམ་གནོད་ཀྱི་འདུག གནད་དོན་འདི་དག་ཐོག་མི་སུ་ཞིག་ཡིན་ཡང་ཞིབ་ཏུ་བསམ་བློ་བཏང་ན་ཀླད་དཀྱིལ་ནང་དྲི་རྟགས་རྐྱང་རྐྱང་ལས་ཅི་ཡང་འཆར་མི་སྲིད།
    ད་ལྟ་བོད་ནང་གི་བོད་མི་ཚོའི་སེམས་ཤུགས་ལ་རྒྱ་དང་བོད་ཕྱི་ལ་འཆང་བའི་ཡིད་ཆེས་རེ་བ་ཚད་མཐོ་བའི་རྩེ་མོར་སོན་ཡོད། བོད་ཕྱི་ལོགས་ཀྱི་ཚོགས་པ་སྒྲིག་འཛུགས་དག་གིས་འདི་ལྟར་དགྲ་དགའ་གཉེན་སྡུག་གི་བྱ་སྤྱོད་སྤེལ་ན། མིའི་དགའ་སྐྱོ་ཆགས་སྡང་ནི་ཚད་ཅན་ཞིག་དང་། ཡིད་ཆེས་རེ་བ་ནི་ལྟོས་བཅས་ཤིག་ཡིན་སྟབས། བོད་ནང་གི་བོད་མི་ཚོས་བོད་པའི་རྩ་དོན་འཐབ་རྩོད་ཐོག་འཛིན་པའི་ཆོད་སེམས་ལ་གཡོ་བ་མེད་ཀྱང་། ནམ་ཞིག་བོད་ཕྱི་ལ་བཟུང་བའི་ཡིད་ཆེས་ཇེ་ཆུང་ནས་ཇེ་སྲབ་ཏུ་འགྲོ་སྲིད་ལ། གཅིག་བྱས་ན་རྦད་དེ་ཡིད་ཐང་ཆད་དེ་ལམ་ཁ་གཞན་ཞིག་ལ་གྲ་སྒྲིག་བྱེད་ཀྱང་སྲིད་དོ།།