བོད་ཀྱི་སྟག་དང་རྒྱ་མིའི་ཝ་མོ།

རིན་ཆེན་དབང་རྒྱལ། (རྡ་ས་རིགས་སློབ)

༄༅། །སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་བཙོན་ནས་སྐུ་སྲོག་འཕྲོག་པར་སྐྱོ་གདུང་དྲག་པོས་མྱ་ངན་ཞུ། ཁོང་ལོ་ངོ་དུ་མའི་རིང་བཙོན་འཇུག་གི་སྡུག་སྦྱོང་དྲག་པོས་མནར་ཏེ་མཐའ་མར་སྐུ་སྲོག་ཀྱང་འཕྲོག་པ་རེད། འོ་ན། དོན་དུ་ཁོང་བཙོན་དུ་འཇུག་པའི་དངོས་ཀྱི་སྦྱོར་བ་རྩོམ་མཁན་དེ་སུ་ཡིན་ནམ།

    དེ་ནི་ཉེ་དུས་སྲིད་འཛིན་ཞི་ཅིན་ཕིན་གྱིས་དམར་ཤོག་ནང་ཁུལ་གྱི་ལྐོག་ཟ་རུལ་སུངས་ལ་རྒོལ་བརྡུང་གཏོང་བ་ཟེར་བའི་ནང་གི”སྟག”དང་”སྦྲང་མ”གཉིས་ལས་སྟག་རྒན་ཀྲུག་ཡོང་ཁཱང་ཡིན། དེ་ཡང་། ཁོས་ ༡༩༩༩ ལོ་སི་ཁྲོན་ཞེང་ཆེན་གྱི་དམར་ཤོག་དྲུང་ཆེ་བྱས་ཏེ། ༢༠༠༢ ལོ་སྤྲུལ་སྐུ་བསྟན་འཛིན་བདེ་ལེགས་འཇུ་བཟུང་གི་བཀའ་རྒྱ་བསྒྲགས་པ་དང་། རེ་ཞིག་ལམ་འགྲོ་རྒྱུག་སྟེ་དཔོན་ཆུང་ “སྦྲང་མའི” གོ་གནས་ནས་དཔོན་ཆེན་”སྟག”གི་གོ་གནས་སུ་འཕོ་འགྱུར་བྱས་པ་རེད། འོན་ཀྱང། དོན་ངོ་མར་ཁོ་སྟག་ཅིག་ཡིན་ནམ་མིན་ཞེ་ན། ང་ཚོས་འདིར་དོན་ཚན་ལྔ་ཡི་སྒོ་ནས་ཁོ་དང་རིན་པོ་ཆེ་གཉིས་ཀྱི་མི་ཚེ་ལ་ཞིབ་བསྡུར་ཅིག་བྱ། 

གཅིག

    ཀྲུག་ཡོང་ཁཱང་ལོ་རབས་བཞི་བཅུ་པར་དམར་ཤོག་སྲིད་གཞུང་མགོ་མ་ཚུགས་པའི་སྔོན་དུ་སྐྱེས་ཤིང་དམར་པོའི་སློབ་གྲྭར་ཞུགས་ནས་དམར་པོའི་ཤོག་ཁག་གི་མགོ་གཡོག་དྲན་འཕྲུལ་གྱི་སྲིད་བྱུས་ལ་ཕྱི་ཚུལ་ནས་བློ་སྙིང་དཀར་བའི་མི་ཞིག་ཏུ་འགྱུར་བའི་སློབ་གསོ་ཐོབ་པ་དང་། སྤྲུལ་སྐུ་བསྟན་འཛིན་བདེ་ལེགས་ལོ་རབས་ལྔ་བཅུ་པར་འཁྲུངས་ཤིང་སྐུ་ན་ཕྲ་མོའི་དུས་ནས་ཆོས་སྒོར་ཞུགས་ཏེ། འབྱུང་འགྱུར་གཞན་ཕན་སྒྲུབ་པའི་སློབ་གསོ་ཡི་རྨང་གཞི་ཐོབ།  
 

གཉིས།

    ཀྲུག་ཡོང་ཁཱང་གོ་གུང་བར་གྱི་འཐབ་རྩོད་དང་སྲིད་གཞུང་བརྗེ་བསྒྱུར་གྱི་རླུང་འཚུབ་ཁྲོད་ཀྱི་སྲིད་དོན་གྱི་བྱ་བྱེད་ལ་རིང་དུ་འདྲེས་ཏེ་འཚར་ལོངས་བྱུང་ཞིང་། སྤྲུལ་སྐུ་བསྟན་འཛིན་བདེ་ལེགས་དམར་པོའི་སྲིད་གཞུང་གིས་བོད་ལ་དབང་བསྒྱུར་བའི་དམག་འཁྲུག་གི་དུད་ཞགས་དང་རིག་གནས་གསར་བརྗེའི་དྲག་པོའི་འབུར་འཇོམས་ཀྱི་བག་ཆགས་གཏིང་ཟབ་ཐོབ་སྟེ་འཚར་ལོངས་བྱུང་།   

གསུམ།

    ཀྲུག་ཡོང་ཁཱང་གིས་ས་གནས་ཀྱི་རྡོ་སྣུམ་བཟོ་གྲྭའི་ལས་འཛིན་པ་ནས་དབུས་གཞུང་གི་རྡོ་སྣུམ་ལས་གྲྭའི་སྤྱི་ཁྱབ་འགན་འཛིན་གྱི་གོ་གནས་བླངས་ཏེ་རྡོ་སྣུམ་ཕྱིར་འཚོང་གི་ལས་དོན་བསྒྲུབས་པ་ཁོ་ན་ལས་དམངས་ཕན་གྱི་ལས་དོན་གང་ཡང་བྱས་མེད། འོན་ཀྱང། བསྟན་འཛིན་བདེ་ལེགས་ཀྱིས་ནང་ཆོས་ཀྱི་བཀའ་སློབ་བསྩལ་བ་ནས་སྐད་ཡིག་དར་སྤེལ་དང་། དྭ་ཕྲུག་གསོ་སྐྱོང་ནས་བགྲེས་སོང་རོགས་ཕན། ཁྱིམ་ཚང་འཆམ་མཐུན་ནས་མི་རིགས་མཐུན་སྒྲིལ། ཁོར་ཡུག་སྲུང་སྐྱོབ་ནས་དུད་འགྲོ་ཚེ་ཐར་སོགས་ཀྱི་བྱ་གཞག་བསྒྲུབས།

བཞི།

    ཀྲུག་ཡོང་ཁཱང་གིས་དམར་ཤོག་ཕྱོགས་ཁག་ལ་བློ་སྙིང་དཀར་བའི་ཟོལ་གྱིས་རྡོ་སྣུམ་ཕྱིར་འཚོང་གི་ལས་ལ་ཧུར་ཐག་གིས་ཞུགས་ཏེ། རྡོ་སྣུམ་འགྲེམ་འཚོང་གི་མ་དངུལ་ནས་རང་ཉིད་ཕྱུག་བདག་ཅན་དུ་འགྱུར་བའི་བགྲོད་ལམ་བརྟན་པོ་བཙུགས་པ་དང་ཆབས་ཅིག སི་ཁྲོན་ཞིང་ཆེན་གྱི་དམར་ཤོག་དྲུང་ཆེ་ནས་དབུས་ཀྱི་ཆེས་མཐོའི་དཔོན་རིགས་ཀྱི་གྲས་སུ་ཚུད་པའི་སྲིད་དོན་གྱི་གཡོ་འཕྲུལ་ཀྱང་དོན་ཐོག་ཏུ་སྨིན། སྤྲུལ་སྐུ་བསྟན་འཛིན་བདེ་ལེགས་ཀྱིས་མི་རིགས་ཀྱི་བདེན་དོན་ཁུར་དུ་བླངས་པ་ལས་མིག་མཐོང་ལག་ཟིན་གྱི་འབྲས་བུ་སྨིན་ཏེ། རང་ཡུལ་གྱི་མི་མང་གི་འདི་ཕྱི་གཉིས་ཀྱི་དོན་དམ་པའི་བླ་མ་རུ་གྱུར་པར་མ་ཟད། མཐོང་རྒྱ་ཡངས་པའི་རྒྱ་རིགས་ཤེས་ཡོན་ཅན་རྣམས་ཀྱི་ཁྲོད་དུ་བོད་ཀྱི་བླ་མ་ཨ་ངག་བཀྲ་ཤིས་ཞེས་མཚན་སྙན་རྒྱས་ཏེ། རྩོམ་པ་པོ་ཝང་ལི་ཞུང་ཡིས་བོད་ཀྱི་བླ་མ་ཨ་ངག་བཀྲ་ཤིས་ལ་མི་མང་གིས་བརྩི་བཀུར་ཐོབ་པའི་རྒྱུ་མཚན་ནི་འདི་ཡིན་ཞེས་ཞིབ་འཇུག་གིས་རྩོམ་ཡིག་ཅིག་ཀྱང་བྲིས་ཡོད།

ལྔ།

    ཀྲུག་ཡོང་ཁཱང་གིས་གསར་བརྗེ་གླུ་དབྱངས་རྙིང་པ་དྲིལ་སྒྲོག་གི་དཔོན་ངན(པའོ་ཞི་ལེ་དང་བློ་མཐུན་ཡིན)དང་ལག་སྦྲེལ་བྱས་པའི་གསང་བ་དམར་ཤོག་ནང་ཁུལ་དུ་ཁྱབ་སྟེ། ལྐོག་རྔན་འབོར་ཆེན་བླངས་པ་དང་། དབང་ཆ་ལོག་པར་སྤྱད་པ། བསམ་བཞིན་དུ་རྒྱལ་ཁབ་ཀྱི་གསང་བ་ཕྱིར་སྒྲོག་པ་ཞེས་པའི་ནག་ཉེས་འོག་ཚེ་བཙོན་དུ་ཚུད། ད་དུང་གཞུང་གི་ཁྲིམས་ལུགས་ལ་བརྩི་བཀུར་ཡོད་པའི་རྣམ་འགྱུར་སྟོན་ཁུལ་བྱས་པ་རེད། སྤྲུལ་སྐུ་བསྟན་འཛིན་བདེ་ལེགས་མཆོག་ཤི་གསོན་གྱི་འགག་འཕྲང་དུ་ལུས་པའི་བོད་མི་རིགས་འདིའི་དོན་དུ་སྐུ་ལས་བསྐྱོན་པའི་མཐའ་མར་བཙོན་དུ་ཚུད་དེ་བཙོན་ནས་མཐར་སྐུ་སྲོག་ཀྱང་འཕྲོག་པ་རེད།

    མདོར་དྲིལ་ན། ཀྲུག་ཡོང་ཁཱང་གིས་ཝ་མོའི་འཇབ་འགྲོས་ཀྱི་གསང་བའི་བྱེད་ཐབས་བཀོལ་ཏེ་རང་ཉིད་ཝ་མོར་འགྱུར་བའི་ལས་ཁོ་ན་བྱས་ཤིང་། སྤྲུལ་སྐུ་བསྟན་འཛིན་བདེ་ལེགས་ཀྱིས་མི་རིགས་ཀྱི་བདེན་དོན་ཁུར་དུ་བླངས་ཏེ་རང་ཉིད་སྟག་ཏུ་འགྱུར་བའི་སྦྱོར་བ་འབའ་ཞིག་བརྩམས་པ་རེད། དེས་ན། ཀྲུག་ཡོང་ཁཱང་ནི་རྒྱ་མིའི་ཝ་མོ་དང་། སྤྲུལ་སྐུ་བསྟན་འཛིན་བདེ་ལེགས་ནི་བོད་ཀྱི་སྟག་ཡིན།། །།