རྒྱ་མི་ཤིང་ནགས་གཅོད་མཁན་ལ་ཁྲིམས་ཐག་བཅད།

ཁྲིམས་འགལ་གྱིས་རང་བྱུང་ནགས་ཚལ་གཅོད་འབྲེག་བྱེད་མཁན་རྒྱ་མི་ ༡༥༣ ལ་འབར་མའི་ཁྲིམས་ཞིབ་ཁང་གིས་ཚེ་བཙོན་གྱི་ཁྲིམས་ཐག་བཅད་ཡོད་འདུག

དེ་རིང་ཞོགས་པར་བྷེ་བྷེ་སེ་གསར་ཁང་ནས་བསྒྲགས་པའི་གནས་ཚུལ་ནང་། འབར་མའི་ནུབ་ཁུལ་གྱི་ཁྲིམས་ཞིབ་ཁང་ནས་ཁྲིམས་འགལ་གྱིས་ཤིང་ནགས་གཅོད་འབྲེག་བྱེད་མཁན་རྒྱ་མི་ ༡༥༣ ལ་ཚེ་བཙོན་གྱི་ཉེས་ཆད་བཅད་ཡོད་པ་དང་འབར་མའི་རྒྱལ་ནང་དུ་ཚེ་བཙོན་གྱི་ལོ་ཚད་མི་ལོ་ ༢༠ ཡིན་སྐོར་སོགས་བཀོད་འདུག

གནས་ཚུལ་བསྒྲགས་གསལ་ལྟར་ན། ཤིང་ནགས་གཅོད་མཁན་རྒྱ་རིགས་དེ་ཚོ་ད་ལོའི་ཕྱི་ཟླ་ ༡ ནང་རྒྱ་ནག་གི་བྱང་ཤར་མཐའ་མཚམས་སུ་ཉེ་བའི་འབར་མའི་ནུབ་རྒྱུད་མངའ་སྡེ་ཁ་ཆེན་ (Kachin) ཞེས་པའི་ནང་འཛིན་བཟུང་བྱས་ཡོད་པ་དང་། དེ་ཡང་ཉེ་ལམ་འབར་མའི་གཞུང་གིས་རང་བྱུང་སྐྱེ་དངོས་གཅོད་འབྲེག་བཀག་འགོག་བྱ་འགུལ་སྤེལ་བའི་སྐབས་སུ་འཇུ་བཟུང་ཐེབས་པ་ཞིག་ཡིན་ཞིང་། རྒྱ་རིགས་དེ་ཚོའི་གྲས་ཀྱི་ལོ་ན་ ༡༧ ལ་སོན་པའི་གཞོན་སྐྱེས་གཉིས་ལ་མི་ལོ་ ༡༠ དང་། དེའི་གྲས་ཀྱི་བུད་མེད་ཚོའི་ལག་ཏུ་སྨན་རྫས་རིགས་ཡོད་སྟབས། ཁོ་མོ་ཚོར་མི་ལོ་ ༢༥ ཁྲིམས་ཐག་བཅས་བཅད་ཡོད་འདུག

འབར་མའི་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཁིང་ (Lu Kang) ཟེར་བ་ཞིག་གིས་བརྗོད་དོན་ལྟར་ན། རྒྱ་ནག་གཞུང་གིས་ཐེངས་འདིའི་ཚད་བརྒལ་ཉེས་ཆད་སྐོར་ལ་སེམས་འཚབ་བྱེད་ཀྱི་ཡོད་པ་མ་ཟད། འབར་མའི་གཞུང་གིས་རྒྱ་རིགས་དེ་ཚོ་ཤིང་ནགས་གཅོད་འབྲེག་གི་ཉེས་འཛུགས་འོག་འཛིན་བཟུང་བྱས་པ་རེད། ཅེས་ཡང་ནས་བསྐྱར་དུ་འབར་མའི་གཞུང་ལ་སྐྱོན་བརྗོད་བྱས་ཤིང་། རྒྱ་ནག་གཞུང་འབྲེལ་ཞིན་ཧྭ་གསར་ཁང་ནས། འབར་མའི་གཞུང་གིས་ཤིང་ནགས་གཅོད་མཁན་ཚོའི་དངོས་ཡོད་གནས་སྟངས་ལ་གཞིགས་ཏེ། བསམ་ཤེས་གུ་ཡངས་དང་ཁྲིམས་མཐུན་ལུགས་མཐུན་གྱི་སྒོ་ནས་གནད་དོན་ཐག་གཅོད་དགོས་སྐོར་བརྗོད་ཡོད་འདུག

གནས་ཚུལ་ལྟར་ན། འབར་མའི་དམག་གཞུང་གིས་དུས་རྒྱུན་གླང་ཆེན་མང་པོ་བཀོལ་སྤྱོད་ཀྱིས་ཤིང་ནགས་འཛད་མེད་གཅོད་འབྲེག་བྱས་ཏེ། ཧ་ལམ་འབར་མའི་རྒྱལ་ནང་གི་རང་བྱུང་ནགས་ཚལ་སྟོང་ཉེན་ཡོད་སྟབས། ༢༠༡༡ ལོ་ནས་འབར་མའི་དྲག་པོའི་སྲིད་གཞུང་གི་གཞོགས་གཏོགས་འབར་མའི་དམངས་གཞུང་གིས་རང་རྒྱལ་གྱི་བཟོ་ལས་ཐོན་སྐྱེད་ལ་ཚད་འཛིན་དང་ཤིང་ཆ་ནང་འདྲེན་བཀག་འགོག་བྱེད་མུས་ཡིན་ནའང་། མི་མང་གིས་འབར་མའི་དྲག་པོའི་དམག་གཞུང་ནས་ནམ་རྒྱུན་མཐའ་མཚམས་ཁག་ཏུ་ཤིང་ནགས་གཅོད་མཁན་ཚོ་དང་ངན་པ་ལག་འབྲེལ་བྱེད་བཞིན་པར་སྐྱོད་བརྗོད་བྱེད་ཀྱི་ཡོད་འདུག