ཁ་སང་མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཁང་གིས་གསལ་བསྒྲགས་ཤིག་སྤེལ་ཏེ། ཉེ་ལམ་ཐའེ་ལན་ཌི་གཞུང་གིས་ཡུ་གུར་སྐྱབས་བཅོལ་ ༡༠༠ དང་། ཀྲར་ཀི་གཞུང་ལ་ཀྲར་ཀི་ཡི་ཕྱི་སྐྱོད་ལག་ཁྱེར་ཡོད་པའི་ཡུ་གུར་བ་ ༡༧༠ བཅས་རྒྱ་ནག་གཞུང་ལ་རྩིས་སྤྲོད་བྱས་ཡོད་པར། རྒྱལ་སྤྱིའི་ཁྲིམས་ལུགས་དང་འགལ་ཡོད་ཚུལ་གྱི་སྐྱོན་འཛུགས་བྱས་འདུག
རྒྱ་གར་དུས་བབ་ཐོག་མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཚོགས་ཀྱི་འགན་འཛིན་གཞོན་པ་ཝོལ་ཁཱར་ཀྲག་ (Volker Turk) ལགས་ཀྱིས། ཐའེ་ལན་ཌི་གཞུང་གིས་རྒྱལ་སྤྱིའི་ཁྲིམས་ལུགས་ལ་རྡོག་རོལ་བཏང་སྟེ། ཡུ་གུར་སྐྱབས་བཅོལ་ ༡༠༠ ཕྱིར་འཕུད་བཏང་ཡོད་པ་ནི་བློ་ཡུལ་ལ་གཤོང་དཀའ་བའི་གནད་དོན་ཞིག་ཡིན་སྟབས། ངས་འབྲེལ་ཡོད་གཞུང་གིས་རྒྱལ་སྤྱིའི་ཁྲིམས་ལུགས་ཀྱི་རྩ་དོན་དང་མ་འགལ་བར་གྱོད་དོན་འདིར་རྟོག་ཞིབ་ནན་མོ་བྱས་ཏེ། རྒྱལ་སྤྱིའི་མང་ཚོགས་ལ་གསལ་བཤད་ཞུ་རྒྱུ་དང་། མ་འོངས་པར་གནས་ཚུལ་དེ་རིགས་འཐོན་ཚེ་རྒྱལ་སྤྱིའི་ཁྲིམས་ལུགས་ལྟར་གཞུང་ལ་ཆད་པ་ཕོག་སྲིད་པ་ཞིག་རེད། ཅེས་བརྗོད་འདུག
ཐའེ་ལན་ཌི་སྲིད་བློན་པེར་ཡུ་ཌི་ (Prayut Chan-o-cha) ལགས་ཀྱིས། ང་ཚོས་རྒྱལ་སྤྱིའི་ཁྲིམས་ལུགས་དང་མཐུན་པ་སྐྱབས་བཅོལ་བའི་རྒྱལ་ཁོངས་རྩད་ཞིབ་བྱས་ཏེ། རང་ཡུལ་ལ་ཕྱིར་ལོག་བྱས་ཡོད་པ་ལས་རྒྱལ་སྤྱིའི་ཁྲིམས་ལུགས་ལ་རྡོག་རོལ་གང་ཡང་བཏང་མེད། ཅེས་དང་། ཡང་ཐའེ་ལན་ཌིའི་ལས་བྱེད་ཅིག་གིས། ང་ཚོར་རྒྱ་ནག་གཞུང་གིས་ཡུ་གུར་བ་ཚོའི་བདེ་འཇགས་ལ་འགན་ཁུར་རྒྱུའི་ཁས་ལེན་བྱས་ཡོད་སྟབས། ང་ཚོས་རྒྱལ་སྤྱིའི་ཁྲིམས་ལུགས་ལ་བརྩི་སྲུང་བྱས་ནས་རྒྱ་ནག་རྒྱལ་ཁོངས་ཀྱི་ཡུ་གུར་བ་རྒྱ་ནག་ནང་ཕྱིར་སློག་དང་། ཡུ་གུར་བ་ ༡༧༠ ཀྲར་ཀི་གཞུང་ལ་རྩིས་སྤྲོད་བྱས་ཡོད་སྟབས། ད་བར་ང་ཚོས་རྒྱལ་སྤྱིའི་ཁྲིམས་ལུགས་དང་འགལ་བའི་ནག་ཉེས་གང་ཡང་བསགས་མེད། ཅེས་བརྗོད་འདུག
༢༠༡༤ ལོའི་ཟླ་ ༣ པ་ནས་བཟུང་ཐའེ་ལན་ཌི་གཞུང་གིས་ཐའེ་ལན་ཌིའི་ནང་ཡོད་པའི་ཡུ་གུར་སྐྱབས་བཅོལ་བ་ ༣༠༠ ལྷག་བཀག་ཉར་བྱས་ཏེ། རྒྱལ་ཁོངས་རྩད་གཅོད་བྱས་པར་ཁོང་ཚོ་ཀྲར་ཀི་ནས་ཡིན་ལུགས་བརྗོད་ཡོད་ཀྱང་། ཐའེ་ལན་ཌི་གཞུང་གིས་རྒྱ་ནག་དང་ཀྲར་ཀི་གཞུང་ཚབ་བརྒྱུད་དེ་ཐོབ་ཐང་ཞིབ་བཤེར་བྱས་ཡོད་པ་མ་ཟད། རྒྱ་ནག་གཞུང་ཕྱོགས་ནས་ཁོང་ཚོ་ཤིན་ཅང་ཡུ་གུར་མི་རིགས་ཡིན་སྟབས། རྒྱ་ནག་ནང་ཕྱིར་སློག་གཏོང་དགོས་ལུགས་བརྗོད་པར་བརྟེན། ཟླ་འདིའི་ཚེས་ ༨ ཉིན་ཐའེ་ལན་ཌི་གཞུང་གིས་ཡུ་གུར་སྐྱབས་བཅོལ་བ་ ༡༠༠ རྒྱ་ནག་དང་། ཀྲར་ཀི་མི་སེར་ལག་འཁྱེར་ཡོད་པའི་ཡུ་གུར་བ་ ༡༧༠ ཀྲར་ཀི་ནང་ཕྱིར་ལོག་བཅས་བྱས་ཡོད་འདུག
རྒྱ་ནག་གཞུང་གིས་རྒྱ་ནག་ནང་ཕྱིར་སློག་བྱེད་མཁན་གྱི་ཡུ་གུར་བ་ཚོར་འཇིགས་སྐུལ་རིང་ལུགས་པ་དང་རྒྱལ་ཁབ་ཁ་བྲལ་གཏོང་མཁན་སོགས་ཀྱི་ཉེས་མིང་འདྲ་མིན་བཀལ་ཏེ། བཙོན་འཇུག་བྱས་ཡོད་སྟབས་མཉམ་འབྲེལ་རྒྱལ་ཚོགས་སྐྱབས་བཅོལ་ལྷན་ཁང་གཙོས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག དེ་བཞིན་རྒྱལ་ཁབ་ཁག་གི་གཞུང་བཅས་ཀྱིས་ཐའེ་ལན་ཌི་དང་རྒྱ་ནག་གཞུང་ལ་སྐྱོན་བརྗོད་བྱས་ཡོད་པ་མ་ཟད། ཁ་སང་མཉམ་འབྲེལ་རྒྱལ་ཚོགས་སྐྱབས་བཅོལ་ཁང་གི་འགན་འཛིན་གཞོན་པས་ཐའེ་ལན་ཌི་གཞུང་གི་ཐག་གཅོད་དེར་སྐྱོན་འཛུགས་དང་། ད་ལྟ་ཐའེ་ལན་ཌིའི་ནང་ཁྲིམས་མཐུན་ལག་ཁྱེར་མེད་པའི་ཡུ་གུར་བ་ ༥༠ ཡོད་པ་དག་གནས་སྐབས་རིང་ཐའེ་ལན་ཌིར་སྡོད་བཅུག་སྟེ། རྒྱལ་ཁབ་གཞན་ནང་སྐྱབས་བཅོལ་ཞུ་ཐུབ་པ་བྱེད་དགོས་སྐོར་བརྗོད་ཡོད།
དེ་རིང་རྒྱ་གར་ཧིན་རྡུ་སི་ཐན་དུས་བབ་ཐོག་འགྲོ་བ་མིའི་ཐོབ་ཐང་གནད་དོན་ཆེད་མཁས་པ་ཞིག་གིས། ཐའེ་ལན་ཌིའི་གཞུང་གིས་རྒྱ་ནག་གཞུང་ལ་ཡུ་གུར་སྐྱབས་བཅོལ་རྩིས་སྤྲོད་བྱས་པ་དེ་ནི། ཤན་པར་གྲི་སྤྲད་པ་ལྟ་བུ་ཞིག་ཆགས་ཡོད་སྟབས། ད་ལྟ་རྒྱ་ནག་གཞུང་གིས་ཁོ་ཚོར་ནག་ཉེས་འདྲ་མིན་བཀལ་ནས་ཁྲིམས་ཐག་གཅོད་ཀྱིན་ཡོད། ཅེས་བརྗོད་འདུག
