རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། སང་ཉིན་རྒྱལ་སྤྱིའི་ཨོ་ལིམ་པིག་ལུས་རྩལ་འགྲན་ཚོགས་གོ་སྒྲིག་ཚུགས་ཆུང་གི་ངོས་ནས། མ་ལེ་ཤི་ཡའི་རྒྱལ་ས་ཁུ་ལཱ་ལུམ་ཕུར་ (Kuala Lumpur)ཞེས་པ་རུ། ༢༠༢༢ ལོའི་དགུན་ཁའི་རྒྱལ་སྤྱིའི་ཨོ་རྩེད་འགྲན་ཚོགས་དེ་རྒྱལ་ཁབ་གང་དུ་འཚོགས་མིན་ཐད་གསང་བའི་འོས་ཤོག་བླུག་རྒྱུ་ཡིན་འདུག
པེ་ཅིན་གཞུང་གིས་རྩེད་འགྲན་གྱི་མགྲོན་བདག་རྒྱ་ནག་ལ་འཐོབ་ཐབས་སུ་སྐུལ་སློང་ལས་འགུལ་སྣ་ཚོགས་ཤིག་རྩོམ་བཞིན་ཡོད་ཀྱང་། རྒྱལ་སྤྱིའི་འགྲོ་བ་མིའི་ཐོབ་ཐང་ལས་འགུལ་ཚོགས་པ་ཁག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཚབས་ཆེན་ཡིན་སྟབས། ༢༠༢༢ ལོའི་དགུན་ཁའི་ཨོ་རྩེད་འགྲན་ཚོགས་དེ་པེ་ཅིན་ལ་སྤྲོད་མི་རུང་བའི་འབོད་སྐུལ་ཞུ་བཞིན་ཡོད་འདུག
ཁ་སང་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་གནས་ཚུལ་སྤེལ་བའི་ནང་། ༢༠༢༢ ལོའི་དགུན་ཁའི་ཨོ་རྩེད་འགྲན་ཚོགས་བསྐོང་སའི་གྲོང་ཁྱེར་འོས་འདེམས་ཐག་གཅོད་ཁྱབ་བསྒྲགས་བྱེད་པར་ཉིན་གཉིས་ལས་མེད་པའི་སྐབས་འདིར། པེ་ཅིན་གཞུང་གི་དགུན་ཁའི་ཨོ་རྩེད་ཚོགས་ཆུང་གི་སྐུ་ཚབ་ཚོགས་པ་མ་ལེ་ཤེ་ཡའི་རྒྱལ་ས་ཁུ་ལཱ་ལུམ་ཕུར་དུ་བསླེབས་པ་དང་མཐའ་མཇུག་གི་འོས་ཤོག་བླུག་རྒྱུར་སྐུལ་སློང་ལས་འགུལ་སྤེལ་བཞིན་ཡོད་ཅིང་། ཁོ་ཚོས་ ༢༠༠༨ ལོའི་པེ་ཅིན་ཨོ་རྩལ་ཚོགས་ཆུང་གི་ཉམས་མྱོང་གཞིར་བྱས་ཏེ་ད་རེབ་ཀྱི་འོས་ཤོག་བླུག་རྒྱུར་སྐུལ་སློང་བྱེད་ཀྱི་ཡོད་འདུག
༢༠༠༨ ལོར་པེ་ཅིན་དུ་ཨོ་རྩེད་འགྲན་ཚོགས་བསྐོངས་སྐབས། རྒྱ་ནག་གིས་རྒྱལ་སྤྱིའི་ཨོ་རྩེད་ལྷན་ཚོགས་ལ་ཁས་ལེན་བྱས་པའི་འགྲོ་བ་མིའི་ཐོབ་ཐང་གི་དོན་གནད་ཁག་སྣང་མེད་བཏང་ཡོད་པ་དང་། ཨོ་རྩེད་ར་བ་གསར་རྒྱག་སྐབས་རྩ་འཛིན་སྒྲིག་གཞིར་སྣང་མེད་བཏང་སྟེ། མི་དམངས་ཁྲི་ཕྲག་མང་པོ་བཙན་ཤེད་ཀྱིས་གནས་སྤོར་དུ་བཅུག་པ་མ་ཟད། གུན་གསབ་ཀྱང་འོས་འཚམས་ཞིག་སྤྲད་མི་འདུག ལྷག་པར་དུ་ཨོ་རྩལ་འགྲན་ཚོགས་དངོས་གཞིའི་སྐབས་སྡུག་ཕྱོགས་ཀྱི་གསར་འགྱུར་བཀག་སྡོམ་ཞིབ་བཤེར་བྱས་པ་སོགས་འཁོད་འདུག
ཁ་སང་དབྱིན་ཇིའི་ལྟ་སྲུང་དྲ་བས་གནས་ཚུལ་སྤེལ་བའི་ནང་། རྒྱ་ནག་གི་འགྲོ་བ་མིའི་སྲུང་སྐྱོབ་ཚོགས་པས་ ༢༠༡༣ ལོའི་ཟླ་ ༣ པར་ཞི་ཅིན་ཕིན་རྒྱ་ནག་གི་སྲིད་འཛིན་དུ་བསྡད་པ་ནས་ད་ལྟའི་བར་དུ་ཉུང་མཐའ་ཡང་གཞུང་ལ་ཁ་གཏད་གཅོག་མཁན་དང་ལས་འགུལ་སྤེལ་མཁན། དགེ་རྒན་ཆེན་མོ་བ་དང་གསར་འགོད་པ་སོགས་འགྲོ་བ་མིའི་ཐོབ་ཐང་དོན་གཉེར་མཁན་ ༡༨༠༠ འཛིན་བཟུང་བྱས་ཡོད་པ་མ་ཟད། ཉེ་བའི་བདུན་ཕྲག་ཁ་ཤས་ནང་འགྲོ་བ་མིའི་ཐོབ་ཐང་གི་ཁྲིམས་རྩོད་པ་ ༢༦༠ ཙམ་མངོན་གསལ་དོད་པོས་བཀག་འགོག་དང་འདྲི་གཅོད་བྱས་ཡོད་སྟབས། རྒྱལ་སྤྱིའི་ཨོ་ལིམ་པིག་ཚུགས་ཆུང་གིས་རྒྱ་ནག་ནང་དགུན་ཁའི་ཨོ་རྩེད་འགྲན་ཚོགས་སྤྲོད་རྒྱུ་རྩ་བ་ནས་ཁས་ལེན་བྱེད་མ་རུང་སྐོར་བཀོད་འདུག
ཟླ་འདིའི་ཚེས་ ༢༣ ཉིན་བོད་ཀྱི་ཆབ་སྲིད་བཙོན་པ་མགོ་ལོག་འཇིགས་མེད་ལགས་དང་། འཛམ་གླིང་ཡུ་གུར་ལྷན་ ཚོགས་ཀྱི་ཚོགས་གཙོ་རེ་བྷེ་ཡཱ་ཁ་ཌིར་ (Rebiya Kadeer)། ནང་སོག་འགྲོ་བ་མིའི་ཆ་འཕྲིན་ལྟེ་གནས་ཀྱི་ཚོགས་གཙོ་ཧི་བྷ་ཐུ་ (He Batu)། མི་དམངས་ཀྱི་ནུས་ཤུགས་གསར་འཛུགས་བྱེད་མཁན་ཨ་རིར་གནས་སྡོད་རྒྱ་རིགས་ཡཱང་ཅན་ལེ་ (Yang Jianli) བཅས་ཀྱིས་མཉམ་འབྲེལ་ཐོག རྒྱལ་སྤྱིའི་ཨོ་རྩེད་ལྷན་ཚོགས་ལ་ཞུ་ཡིག་ཅིག་ཕུལ་བའི་ནང་། རྒྱ་ནག་གཞུང་གིས་ ༢༠༠༨ ལོའི་པེ་ཅིན་ཨོ་རྩེད་འགྲན་ཚོགས་འགྲུབ་རྗེས། དེ་སྔ་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་ཁས་ལེན་བྱས་པའི་གནད་དོན་ཁག་རྡོག་རོལ་ཚབས་ཆེན་བཏང་སྟེ། རྒྱལ་སྤྱིའི་ཨོ་རྩེད་འགྲན་ཚོགས་ལ་སྣང་ཆུང་ཁྱད་གསོད་ཚད་མེད་བྱས་ཡོད་སྐོར་དང་། ༢༠༠༨ ལོའི་ཨོ་རྩེད་འགྲན་ཚོགས་དེས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་འགྲོ་བའི་ཚབ་ཏུ་རྦད་དེ་ཇེ་སྡུག་ཏུ་སོང་ཡོད་པ་དང་། ཉེ་ཆར་འགྲོ་བ་མིའི་ཐོབ་ཐང་དོན་གཉེར་བྱེད་མཁན་ཁྲིམས་རྩོད་པ་འཛིན་བཟུང་བྱས་པ་དང་། ནང་སོག་དང་ཤིན་ཅང་སོགས་ཀྱི་གྲངས་ཉུང་མི་རིགས་ལ་དྲག་གནོན་བྱས་པ་སོགས། གལ་སྲིད་རྒྱལ་སྤྱིའི་ཨོ་རྩེད་ལྷན་ཚོགས་ཀྱིས་ ༢༠༢༢ ཀྱི་དགུན་ཁའི་ཨོ་རྩེད་འགྲན་ཚོགས་པེ་ཅིན་ནང་འཚོགས་རྒྱུ་ངོས་ལེན་བྱས་ཚེ། རྒྱ་ནག་ནང་གི་འགྲོ་བ་མིའི་ཐོབ་ཐང་གནད་དོན་ཡག་པོ་ཡོད་པའི་གནས་སྟངས་ཤིག་རྒྱལ་སྤྱིའི་སྟེང་ཁྱབ་བརྡལ་འགྲོ་རྒྱུར་དངོས་གཏན་ཡིན་སྟབས། རྒྱལ་སྤྱིའི་ཨོ་རྩེད་ལྷན་ཚོགས་བདེན་པའི་ལོ་རྒྱུས་ཀྱི་དབང་བོར་བཞུགས་ཏེ་རྒྱ་ནག་ནང་འཚོགས་རྒྱུ་ངོས་ལེན་མི་བྱེད་པར། རྒྱ་གཞུང་གིས་འགྲོ་བ་མིའི་ཐོབ་ཐང་ལ་དོ་འཁུར་དགོས་པའི་ལམ་སྟོན་བྱ་རྒྱུའི་རེ་སྐུལ་ཞུས་འདུག
ཚེས་ ༢༨ ཉིན། རྒྱ་ནག་ཕྱི་སྲིད་ལྷན་ཁང་གིས་བསྒྲགས་གཏམ་ཞིག་སྤེལ་པའི་ནང་། དགུན་ཁའི་ཨོ་རྩེད་འགྲན་ཚོགས་པེ་ཅིན་ནང་བསྐོང་དགོས་པའི་དམིགས་ཡུལ་ནི་རྒྱ་ནག་མི་མང་གིས་རྒྱལ་ནང་གི་ཨོ་རྩེད་ཡར་རྒྱས་གཏོང་རྒྱུ་དང་། རྒྱ་མི་ས་ཡ་ ༣༠༠ ལྷག་དགུན་ཁའི་རྩེད་འགྲན་ནང་འཛུལ་ཞུགས་བྱ་རྒྱུ་ཡིན་ཞེས་དང་། རྒྱ་ནག་མི་དམངས་བྱིངས་ཀྱིས་སེམས་གཏིང་ནས་ངོ་མཚར་བའི་དགུན་ཁའི་ཨོ་རྩེད་འགྲན་ཚོགས་ལེགས་འགྲུབ་འབྱུང་པའི་རེ་ལྟོས་བྱེད་བཞིན་པའི་སྐབས་འདིར། མི་དམངས་རེ་ཟུང་གིས་ཨོ་རྩེད་འགྲན་ཚོགས་དེ་ཆབ་སྲིད་ཐད་ལ་བེད་སྤྱོད་བྱེད་བཞིན་པ་དེ་ནི་ཨོ་རྩེད་འགྲན་ཚོགས་ཀྱི་རིན་ཐང་སྣང་མེད་བཏང་པ་ཞིག་རེད། ཅེས་བརྗོད་འདུག
༢༠༡༤ ལོའི་ཟླ་ ༡༢ ནང་རྒྱ་སྤྱིའི་ཨོ་རྩེད་ཚོགས་ཆུང་གིས་༼ ༢༠༢༠ ཨོ་ལོམ་ཕེ་ཁིའི་གྲོས་འཆར་༽ ཞེས་པའི་གྲོས་གཞི་ཞིག་ལེགས་བཅོས་བྱས་ཡོད་འདུག གྲོས་འཆར་དེའི་ནང་ཐོག་མར་རྒྱལ་ཁབ་ཅིག་གིས་ཨོ་རྩེད་འགྲན་ཚོགས་བསྐོང་རྒྱུ་ཁས་ལེན་བྱེད་སྐབས། རྒྱལ་ཁབ་དེའི་ནང་འགྲོ་བ་མིའི་ཐོབ་ཐང་ཡོད་པ་དང་ལས་བཟོ་བའི་རང་དབང་ཡོད་པ། ཁོར་ཡུག་སྲུང་སྐྱོབ་དགོས་པ་སོགས་ཀྱི་མཐུན་རྐྱེན་ནི་རྒྱལ་ཁབ་དེའི་ཆ་རྐྱེན་གཙོ་བོ་ཞིག་ཡིན་སྐོར་བཀོད་ཡོད་འདུག
