རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཇེ་སྡུག་ཏུ་འགྲོ་བཞིན་ཡོད་སྟབས། རྒྱ་གཞུང་ལ་རང་སྐྱོན་ངོས་ལེན་དང་དུས་ཐོག་གསལ་བཤད་བྱེད་དུ་འཇུག་དགོས་པའི་འབོད་སྐུལ་བྱས་འདུག
ཟླ་འདིའི་ཚེས་ ༡༢ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཚོགས་པས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༩ ཚེས་ ༡༤ ཉིན་ཇི་ནི་ཝ་(Geneva)གྲོང་ཁྱེར་དུ། འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༠ པ་འཚོགས་འཆར་ཡོད་པ་ལྟར། རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཚོགས་པ་དང་དེ་མིན་གྱི་གཞུང་འབྲེལ་མ་ཡིན་པའི་ཚོགས་པ་ (NGO) ཁག་ ༦ མཉམ་འབྲེལ་གྱིས། རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་ཡོད་པར་བརྟེན། རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་ནག་གཞུང་ལ་རྒྱལ་ནང་གི་འགྲོ་བ་མིའི་ཐོང་ཐང་གནས་བབ་ཧ་ཅང་ཛ་དྲག་ཆགས་ཡོད་པ་ངོས་ལེན་དང་། དུས་ཐོག་གསལ་བཤད་བྱེད་དུ་འཇུག་དགོས་པའི་འབོད་སྐུལ་ཞུ་ཡིག་ཅིག་རྒྱལ་སྤྱིའི་འགྲོ་བ་མིའི་ཐོབ་ཐང་ཆེད་དོན་སྐུ་ཚབ་ཚོགས་པར་ཕུལ་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཚོགས་པ་ (IHSR) དང་ཤར་ཨེ་ཤ་ཡའི་འགྲོ་བ་མིའི་ཐོབ་ཐང་ལས་འཆར་ཁང་(EAPM) གཉིས་ཀྱི་འགན་འཛིན་སྐུ་ཞབས་སེ་ར་བྷི་རོ་ཁི་སི་ (Sarah M. Brooks)ཡིས། ད་ལོའི་ཕྱི་ཟླ་ ༧ ཚེས་ ༩ ཉིན་འགྲོ་བ་མིའི་ཐོབ་ཐང་ཁྲིམས་རྩོད་པ་ཝང་ཡུ་ (Wang Yu) གློ་བུར་གར་སོང་ཆ་མེད་དུ་གྱུར་རྗེས། རྒྱ་ནག་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ ༢༣༠ ལྷག་ལ་རྒྱ་ནག་གཞུང་གིས་མུ་མཐུད་དུ་སུན་བཙིར་གཏོང་མུས་ཡིན་སྟབས། ཟླ་རྗེས་མར་རྒྱ་ནག་གཞུང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་རྐུབ་སྟེགས་སྒང་སྡོད་སྐབས། རྒྱ་ནག་ནང་འགྲོ་བ་མིའི་ཐོབ་ཐང་རྡོག་རོལ་གཏོང་གིན་ཡོད་པའི་གནད་དོན་དེ། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་ཡོངས་ཀྱི་གཞི་རྩའི་སེམས་ཁྲལ་ཞིག་ཆགས་ཡོད། ཅེས་དང་།
ཡང་ཁོང་གིས། རྒྱ་ནག་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་དེ་ཚོས་ད་ལྟའི་རྒྱ་ནག་གཞུང་གི་སྲིད་ཇུས་ལམ་ཕྱོགས་བཅོས་བསྒྱུར་གཏོང་དགོས་པའི་ལས་འགུལ་ལ་མོས་མཐུན་བྱས་པའི་རྐྱེན་གྱིས། ཁོ་ཚོ་རྒྱ་ནག་གཞུང་གི་དྲག་གནོན་འོག་ཚུད་པ་རེད། ཁོ་ཚོ་ཚང་མ་ས་གནས་དང་རྒྱལ་ཡོངས་རིམ་པའི་གྱོད་དོན་ཞུ་གཏུག་དང་ཁྲིམས་རྩོད་བྱེད་མཁན་ཡིན། ཉེ་ཆར་ཁོ་ཚོ་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་སྡེ་ཁག་གི་གསར་འགོད་ལྷན་ཚོགས་དང་མཉམ་འབྲེལ་རྒྱལ་ཚོགས་ཀྱི་འཛམ་གླིང་ཁྲིམས་རྩོད་ཞུ་གཏུག་སོགས་ཀྱི་ཚོགས་ཁོངས་སུ་ཞུགས་ཡོད་སྟབས། འཛམ་གླིང་མཉམ་འབྲེལ་རྒྱལ་ཚོགས་ཀྱིས་རང་གི་ཚོགས་མི་སུ་ཞིག་རང་དབང་གི་སྒོ་ནས་རང་གི་ལས་དོན་ལ་གཞོལ་བར་སྲུང་སྐྱོབ་བྱེད་པའམ། ཡང་ན་ཁོ་ཚོའི་གྱོད་དོན་གྱི་དྲང་བདེན་འཚོལ་ཞིབ་ལས་དོན་ལ་སྲུང་སྐྱོབ་དགོས་པའི་འགན་ཁུར་ཡོད་པ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ཚོ་ཧྲིན་ལེ་ (Cao Shunli) ཡིས་མཚོན་པའི་རྒྱལ་ནང་གི་རང་དབང་དམངས་གཙོ་དང་འགྲོ་བ་མིའི་ཐོབ་ཐང་དོན་གཉེར་མཁན་ཚོར་ཐེབས་པའི་མནར་གཅོད་དང་། བཙོན་འཇུག་གི་གནད་དོན་སོགས་སྔར་ལས་ལྷག་པའི་བརྡ་ལན་གསལ་བོ་སྤྲོད་དགོས་ཡོད། ཅེས་བརྗོད་འདུག
དེ་ཡང་འབོད་སྐུལ་སྙན་ཞུ་དེའི་ནང་། རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཚོགས་པ་དང་གཞུང་འབྲེལ་མ་ཡིན་པའི་ཚོགས་སྡེ་ ༦ གི་ངོས་ནས། ད་ལོའི་ཕྱི་ཟླ་ ༩ ཚེས་ ༡༤ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་ཆེན་ཐེངས་ ༣༠ པ་སྐོང་ཚོགས་ཐོག རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་གླེང་སློང་བྱེད་དགོས་པའི་འབོད་སྐུལ་ཞུས་ཡོད་པ་མ་ཟད། ཞུ་ཡིག་དེའི་ནང་རྒྱ་ནག་གཞུང་གིས་རྒྱལ་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་དང་། དེ་དང་འབྲེལ་ཡོད་མི་སྣ་ཚོར་དྲག་གནོན་བྱས་པ་ཁོ་ན་མ་ཡིན་པར། ད་དུང་རྒྱ་ནག་ནང་གི་ཆོས་ལུགས་རང་དབང་ལ་དམ་དྲག་དང་རྒྱལ་སྲུང་ཁྲིམས་གཞི་ལག་བསྟར། ཉེས་དོན་གྱི་བཅའ་ཁྲིམས་ལེགས་བཅོས་ལ་བརྟེན་ནས། རྒྱལ་ནང་གི་འདུ་འཛོམས་རང་དབང་དང་ཚོགས་འཛུགས་རང་དབང་། སྨྲ་བརྗོད་རང་དབང་བཅས་ལ་འཇིགས་སྐུལ་གཏོང་བ་དང་། འགྲོ་བ་མིའི་ཐོབ་ཐང་སྲུང་སྐྱོབ་པ་ཚོར་མུ་མཐུད་མནར་གཅོད་གཏོང་བ། དཔོན་རིགས་ཚོའི་གནོན་འཚེ་ལ་འགན་ཁུར་མེད་པ་དང་གང་འདོད་མུན་བཙོན་དུ་འཇུག་པ་སོགས་ཚུད་ཡོད། ཅེས་བརྗོད་འདུག
