དེ་རིང་བོད་ཀྱི་མཛངས་མ་བསྟན་འཛིན་དབྱངས་འཛོམས་ལགས་ཨེ་ཤ་ཡའི་མཛངས་མའི་འགྲན་སྡུར་ནང་ཞུགས་ཏེ་འགྱིང་འགྲོས་ཉམས་འགྱུར་བསྟན་ཡོད་འདུག
དེ་རིང་རྒྱ་གར་ལྷོ་ཕྱོགས་ཀེ་ར་ལཱ་མངའ་སྡེའི་ཀཱོ་ཆིན་གྲོང་ཁྱེར་གྱི་ལི་མེ་རེ་ཌན་ (Le Meridian) གསོལ་མགྲོན་ཁང་དུ། སྐུ་ཞབས་ཨ་ཇེ་ཌི་ར་ཝེ་པཱ་གྷ་སུ་སེའི་(Mr.Ajit Ravi Pegasus)ཁེ་ལས་ཀྱི་གོ་སྒྲིག་འོག ཕྱི་ལོ་ ༢༠༡༤ ལོའི་བོད་ཀྱི་མཛངས་མ་བསྟན་འཛིན་དབྱངས་འཛོམས་ལགས་མཱན་ཎཱ་རམ་ཨེ་ཤ་ཡའི་མཛངས་མའི་འགྲན་སྡུར་(Mannapuram Miss Asia) ཐེངས་ ༡༡ པའི་འགྲན་སྡུར་རིམ་པ་དང་པོའི་ནང་ཞུགས་ཏེ། སྡིངས་ཆའི་ཐོག་འགྱིང་འགྲོས་ (Ramp walk) ཉམས་འགྱུར་བསྟན་ཡོད་པ་དང་། ཐེངས་འདིའི་འགྲན་སྡུར་ནང་རྒྱ་གར་དང་རྒྱ་ནག བལ་ཡུལ། འབྲུག མ་ལེ་ཞི་ཡ་སོགས་ཨེ་ཤ་ཡའི་རྒྱལ་ཁབ་ཁག་བཅུ་གསུམ་གྱི་མཛངས་མ་ ༡༣ མཉམ་ཞུགས་བྱས་ཡོད་འདུག
རྒྱ་གར་གྱི་བང་ཆེན་གསར་ཁང་ལ་མཱན་ཎཱ་རམ་ཨེ་ཤ་ཡའི་མཛངས་མའི་འགྲན་སྡུར་གྱི་གོ་སྒྲིག་པས། ད་ལྟའི་མཛངས་མའི་འགྲན་སྡུར་འདི་ནི་ཨེ་ཤ་ཡའི་མཛངས་མ་རྣམས་ལ་རང་ཉིད་ཀྱི་ཐུན་མོང་མ་ཡིན་པའི་ཁྱད་ཆོས་དང་མཁྱེན་ཡོན་སྟོན་སའི་སྡིངས་ཆ་ཞིག་བསྐྲུན་ཆེད་གོ་སྒྲིག་བྱས་པ་ཞིག་ཡིན། དེ་རིང་ནས་བཟུང་ཉིན་ཤས་རིང་འགྲན་ཞུགས་པ་ཚོས་རིམ་པ་གསུམ་གྱི་འགྲན་སྡུར་བརྒྱུད། ཨེ་ཤ་ཡའི་མཛངས་མའི་དབུ་རྒྱན་གྱི་རྒྱལ་ཁ་རྩོད་ལེན་བྱ་རྒྱུ་རེད། ཅེས་བརྗོད་འདུག་ལ། དེ་བཞིན་ད་ལན་གྱི་འགྲན་སྡུར་དེ་སྙིང་གི་གཤག་བཅོས་བྱེད་དགོས་པའི་ཉམ་ཐག་ ༡༠༠ ཐམ་པའི་ཚེ་སྲོག་སྐྱོབ་ཆེད་དུ་གོ་སྒྲིག་བྱས་པ་ཡིན་ལུགས་ཀྱང་བསྒྲགས་འདུག
ཟླ་འདིའི་ཚེས་ ༡༢ ཉིན་ནས་བཟུང་ཁོང་མོས་རྒྱ་གར་ལྷོ་ཕྱོགས་ཀེ་ར་ལཱ་མངའ་སྡེའི་གྲོང་ཁྱེར་ཀཱོ་ཆིན་གྱི་བྷེ་མོན་ཌི་(Beaumonde The Fern Hotel) གསོལ་མགྲོན་ཁང་དུ། ཨེ་ཤ་ཡའི་མཛངས་མའི་སྔོན་འགྲོའི་འགྲན་སྡུར་ཁག་གི་ནང་བཞུགས་ཏེ་ཆས་གོས་སྒེག་ཉམས་བསྟན་ཡོད་པ་དང་། སྐབས་དེར་མི་མང་གིས་དྲ་ཐོག་འོས་ཤོག་འཕངས་པ་བརྒྱུད་ཁོང་མོར་འོས་ཤོག་བླུག་མཁན་ ༣༢༢༣ བྱུང་སྟེ་ཨང་དང་པོ་ཐོབ་འདུག འགྲན་སྡུར་རིམ་པ་བརྒྱུད་ཨེ་ཤ་ཡའི་མཛངས་མའི་རྒྱལ་ཁ་ཐོབ་མཁན་ལ་གསེར་རྒྱན་སྤྲས་པའི་ཨེ་ཤ་ཡའི་མཛངས་མའི་དབུ་རྒྱན་དང་ཧིན་སྒོར་འབུམ་ ༥ ཡི་བྱ་དགའ་ཡོད་པ་དང་། ཨང་གཉིས་པར་ཧིན་སྒོར་འབུམ་ ༢ དང་ཨང་གསུམ་པར་ཧིན་སྒོར་འབུམ་ ༡ བཅས་སྤྲོད་རྒྱུ་ཡིན་པ་མ་ཟད། འགྲན་བསྡུར་སྐབས་ཆས་གོས་དང་སྐྲ། འཛུམ་མདངས་དང་ཤ་མདོག གདོང་པ་དང་མིག མི་གཤིས། འགྱིང་འགྲོས། མཛངས་སྤྱོད། རིག་རྩལ། དེ་བཞིན་མང་ཚོགས་ཀྱིས་དགའ་མོས་ཆེ་ཤོས་བྱ་ཡུལ་དང་པར་བྱད་ལེགས་ཤོས་བཅས་ཀྱི་རྣམ་གྲངས་ཁག་ལ་བྱ་དགའ་སྤྲོད་རྒྱུ་ཡིན་འདུག
བསྟན་འཛིན་དབྱངས་འཛོམས་ལགས་ནི་རྒྱ་གར་བྱང་ཤར་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ནས་ཡིན་ཞིང་། ད་ལྟ་རང་ལོ་ ༢༤ ཡིན་པ་དང་། ཁོ་མོ་ཆུང་དུས་ནས་ས་གནས་སློབ་གྲྭར་འགྲིམས་ཏེ་བྷེང་ལོར་ནང་རྟེན་གཞི་བྱས་པའི་སྙན་གྲགས་ཅན་གྱི་ཁཱེ་སི་མཐོ་སློབ་ནང་སེམས་ཁམས་རིག་པ་དང་སྤྱི་ཚོགས་རིག་པའི་ཐོག་ཉེ་བའི་གཙུག་ལག་རབ་འབྱམས་ཐོན་རྗེས། དགེ་རྒན་འོས་སྦྱོང་གནང་སྟེ་ད་ལྟ་སྒང་ཏོག་ཏུ་ཁོ་མོའི་ཕ་མ་གཉིས་ཀྱིས་འཛིན་སྐྱོང་བྱེད་བཞིན་ཡོད་པའི་དཔལ་ཁང་ཤེས་ཡོན་འཕེལ་རྒྱས་བསྟི་གནས་ཁང་དུ་དགེ་རྒན་གྱི་ལས་ཀ་གཉེར་བའི་ཞོར་དུ། གྱོན་གོས་ཁྱབ་བསྒྲགས་བྱེད་བཞིན་ཡོད་འདུག ཕྱི་ལོ་ ༢༠༡༤ ལོར་ཁོ་མོར་བོད་ཀྱི་མཛངས་མའི་དབུ་རྒྱན་དང་ཧིན་སྒོར་འབུམ་ ༡ གི་བྱ་དགའ་ཐོབ་ཡོད་པ་དང་། ཁོ་མོས་བྱ་དགའི་དངུལ་རྣམས་རྡ་རམ་ས་ལའི་བྱམས་པ་གླིང་རྒན་གསོ་ཁང་དང་མེག་གྷན་ཉིན་སློབ་ལ་ཞལ་འདེབས་སུ་སྤྲད་ཡོད་པ་རེད།
ཁོང་མོར་བོད་ཀྱི་མཛངས་མའི་རྒྱལ་ཁ་ཐོབ་སྐབས། ཁོང་མོ་ཆུང་དུས་ནས་ཕ་མ་གཉིས་ཀྱི་ལམ་སྟོན་འོག་བོད་དོན་ལ་དོ་སྣང་ཆེན་པོ་ཡོད་པ་ལྟར། བོད་ཀྱི་མཛངས་མའི་མིང་ཐོག་ནས་མ་འོངས་པར་བོད་དོན་ཐོག་ལས་ཀ་གང་མང་བྱེད་པའི་གོ་སྐབས་ཡོད་པས། ཁོང་མོས་མུ་མཐུད་བོད་དོན་ཐོག་ལས་ཀ་བྱ་རྒྱུ་ཡིན་པ་མ་ཟད། བོད་པའི་མི་རབས་གསར་པ་ཚོའི་ཤེས་ཡོན་ཡར་རྒྱས་ཆེད་ཁོང་མོ་དགེ་རྒན་ཡག་པོ་ཞིག་བྱ་རྒྱུ་ཡིན་ལུགས་བརྗོད་ཡོད་པ་རེད།
གསར་འགོད་པ། དོན་གྲུབ།
གྲོགས་མོ་བསྟན་འཛིན་གཡང་འཛོམས་ལགས་སུ་རྟེན་འབྲེལ་ཞུ།