བཙན་བྱོལ་བོད་མིའི་འོས་བསྡུ་ཆེན་མོ་སླེབས་ལ་ཉེ་བ་དང་། བཙན་བྱོལ་སྤྱི་ཚོགས་ནང་ཚོགས་པ་སྒྲིག་འཛུགས་དང་མི་སྒེར་པ་སོགས་ཀྱིས་སོ་སོའི་མངོན་འདོད་དང་ལངས་ཕྱོགས་གཞིར་བཟུང་འོས་མི་བཀྲམ་བཞིན་འདུག་ལ། འོས་མིར་ལངས་མཁན་ཚོས་ཀྱང་མ་འོངས་ལས་འཆར་སྐོར་མི་མང་ནང་ཁྱབ་བསྒྲགས་བྱེད་བཞིན་པའི་དུས་འདིར།སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་ལ་རྒྱབ་སྐྱོར་གྱིས་འོས་མིར་བཏོན་པ་ དང་འབྲེལ་བའི་རྩོམ་ཡིག་ཅིག་ལ་ལན་འདེབས་གསལ་བཤད་ཅིག་བྱེད་རྒྱུ་ཡིན།
༢༠༡༥ ལོའི་ཕྱི་ཟླ་༨ ཚེས་༢༤ ཉིན་བོད་ཀྱི་དུས་བབ་དྲ་རྒྱའི་ཐོག་བློ་གྲོས་རབ་བརྟན་ཞེས་པའི་མཚན་ཐོག་ནས་“སྲིད་སྐྱོང་དང་འོས་མི་རྩེད་ཆས་མ་རེད་”ཅེས་པའི་བསམ་ཚུལ་ཞིག་བཏོན་འདུག སྤྱིར་བཏང་མི་སོ་སོས་བསམ་ཚུལ་གང་བཤད་པ་ཡིན་ཡང་། འདིའི་རྒྱབ་ལོག་ནས་མི་མང་ཁྲོད་དཀྲོག་གཏམ་ཞིག་འགྲོ་ཉེན་ཡོད་པས།ང་ཚོས་གསལ་བཤད་ཐུང་ངུ་ཞིག་བྱེད་འདོད་བྱུང་། དེ་ཡང་བསམ་ཚུལ་དེའི་ནང་བོད་རྒྱལ་ཡོངས་རང་བཙན་ལྷན་ཚོགས་ཀྱིས་ཀླུ་མཁར་བྱམས་སྲིད་སྐྱོང་འོས་མིར་བཏོན་པ་མ་འགྲིག་སྐོར་ནས་འཕྲོས་དེ་“བོད་རྒྱལ་ཡོངས་རང་བཙན་ལྷན་ཚོགས་ཀྱིས་རང་གི་མངོན་འདོད་བསྒྲུབ་པའི་སྲིད་སྐྱོང་འོས་མི་ཞིག་མིང་ འདོན་གནང་སྟེ། རང་གི་མངོན་འདོད་བོད་མིའི་སྒྲིག་འཛུགས་ཀྱི་བཀའ་ཤག་ཏུ་བསྐྱེལ་ལ་འབད་རྒྱུ་རེད་བསམ།
འོན་ཀྱང་དོན་ལ་དེ་ལས་ལྡོག་སྟེ་སྲིད་སྐྱོང་དང་སྲིད་སྐྱོང་འོས་མིའི་རྩེད་མོ་རྩེ་བཞིན་འདུག”ཅེས་འཁོད་འདུག འོས་མི་གཅིག་བཏོན་པ་དེ་རྩེད་མོ་ཡིན་མི་སྲིད་ལ། ཚོགས་མི་ཚང་མ་ལངས་དགོས་པའི་ངེས་པ་མེད། དེ་བས་མི་གཅིག་གི་ཐོག་འོས་སྤུངས་དགོས་པ་ལས། ཁ་འཐོར་དུ་སོང་ན་ག་ལ་འགྲིག བསམ་ཚུལ་དེའི་ནང་“རང་བཙན་ཚོགས་པར་མཚོན་ན་ཚོགས་པའི་ཚོགས་ཁོངས་སུ་རྩོམ་པ་པོ་གྲགས་ཅན་འཇམ་དབྱངས་ནོར་བུ་དང་། དེ་མིན་འཇིགས་མེད་ཨོ་རྒྱན། བསྟན་འཛིན་བརྩོན་འགྲུས་སོགས་ང་ཡིན་ན་ཁྱོད་ཡིན་ཟེར་མཁན་བཅུ་གྲངས་ཤིག་ཡོད་ཚོད་རེད་ལ། དེ་དག་ལས་གཅིག་ངེས་པར་དུ་སྲིད་སྐྱོང་ལ་ལང་དགོས་ཏེ།ཚོགས་པ་དེའི་ལངས་ཕྱོགས་ནི་རང་བཙན་ཡིན་ཞིང་། ད་ལྟའི་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་ཇུས་ལ་སྐྱོན་བརྗོད་དང་མ་འགྲིག་མ་འཐུས་རྐྱང་ཤོད་འབྲི་བྱེད་མཁན་ཡིན་པས་སོ་”ཞེས་ཀླུ་མཁར་བྱམས་འོས་མིར་བཏོན་པ་དེ་འགྲིག་གི་མེད་པའི་སྐོར་ཞིག་གསལ་འདུག དེ་བསམ་ཚུལ་འདོད་མཁན་བོད་རྒྱལ་ཡོངས་རང་བཙན་ལྷན་ཚོགས་ལ་རྒྱུས་མངའ་མེད་པར་གང་བྱུང་བཤད་པ་ཞིག་ལས་མ་འདས།
དེ་ཡང་གཅིག་ནས་རྩོམ་པ་པོ་བསྟན་འཛིན་བརྩོན་འགྲུས་ནི་ཚོགས་པ་དེའི་ཚོགས་མི་མ་རེད་ལ། ཨ་ཚོགས་ཀླུ་མཁར་བྱམས་ཚོགས་པ་དེ་འགོ་འཛུགས་མཁན་གཙོ་གྲས་དང་། ཨེ་ཤ་ཡའི་ཕྱོགས་ནས་འགན་ཁུར་མཁན་གཙོ་བོ་རེད། གང་ལྟར་ཀླུ་མཁར་བྱམས་ནི་རང་བཙན་ལྷན་ཚོགས་ཀྱི་མི་སྣ་གཙོ་གྲས་ཤིག་ཡིན་པ་མ་ཟད། བོད་ཕྱི་ནང་གཉིས་ཀར་རྒྱུས་མངའ་ཡོད་མཁན་དང་། བོད་དང་རྒྱ་ནག་ནས་སློབ་སྦྱོང་ཐོན། རྒྱ་ནག་གི་བཙན་འོག་ནས་ཐད་གར་བོད་མི་རིགས་ཀྱི་འཐབ་རྩོད་དང་རྒྱ་ནག་དམར་པོའི་གཞུང་ལ་ངོ་རྒོལ་ཐོག་རྒྱའི་བཙོན་དུ་ཚུད་མྱོང་པའི་འཐབ་རྩོད་པ་ཁོང་བོད་རྒྱལ་ཡོངས་རང་བཙན་ལྷན་ཚོགས་ཀྱིས་འོས་མིར་བཏོན་པ་དོན་ལ་གནས། བོད་ཕྱི་ནང་གཉིས་ནས་ཁོང་གི་བོད་རང་བཙན་གྱི་འཐབ་རྩོད་ལ་རྒྱབ་སྐྱོར་ཡོད་པ་རྒྱུས་ལོན་བྱས་ན། ཁོང་སྲིད་སྐྱོང་འོས་མིར་བཏོན་པར་ཁྱེད་ཧང་སང་དགོས་དོན་དེ་བས་མེད།
ད་དུང་གསལ་བོར་བཤད་ན། ཨ་ཚོགས་ཀླུ་མཁར་བྱམས་ནི་ཐོག་མར་རྒྱ་གར་ནང་གི་གཞོན་སྐྱེས་ཤེས་ཡོན་ཅན་སྐོར་ཞིག་གིས་འོས་མིར་བཏོན་ཡོད་པ་དང་། ཁོང་གིས་ཡོངས་ཁྱབ་གསར་འགོད་གསལ་བསྒྲགས་བཏང་རྗེས་སུ་རང་བཙན་ལྷན་ཚོགས་ཀྱིས་ཆོག་ཆན་ཞུས་པའི་ཐོག་ནས་སྲིད་སྐྱོང་འོས་མིར་བཏོན་པ་ཞིག་རེད། ཤེས་དགོས་པ་ཞིག་ནི། མང་ཚོགས་སམ་ཚོགས་སྡེ་གང་རུང་གིས་སྲིད་སྤྱིའི་འོས་མི་བཏོན་པར་བེད་སྤྱོད་བྱེད་ཀྱི་ཡོད་པ་དང་འོས་མིའི་ཁོག་པའི་ནང་འཛུལ་ཡོད་པར་བསྙོན་པ་ནི་མང་གཙོའི་ལྟ་གྲུབ་ལ་གོ་རྟོགས་ཞན་པས་རེད། དེ་ལྟར་ཡིན་ན། བོད་རྒྱལ་ཡོངས་མང་གཙོ་ཚོགས་པས་བློ་བཟང་སེང་གེ་དང་སྤེན་པ་ཚེ་རིང་གཉིས་སྲིད་སྐྱོང་འོས་མིར་བཏོན་པ་དེ། མང་གཙོ་ཚོགས་པས་ཁོང་གཉིས་བེད་སྤྱོད་དང་ཁོག་པར་འཛུལ་ཡོད་པ་རེད་དམ།
བསམ་ཚུལ་དེའི་ནང་“རང་བཙན་རང་བཙན་ཞེས་ལབ་བསྡད་པ་དེ་ཁ་ཙམ་མམ། ཡང་ན་རྒྱབ་ནས་ཅིག་བཤད་བསྡད་པ་ལས་མདུན་ལ་འཐོན་པར་གདེང་སྤོབས་མེད་པ་ཡིན་ནམ་”ཞེས་འཁོད་འདུག་ན། ཚང་མ་སྲིད་སྐྱོང་འོས་མིར་ལངས་ས་ཞིག་མེད་པ་མངོན་གསལ་ཡིན་པ་ལས། མདུན་ལ་ཐོན་ཏེ་འོས་མི་ཁྱབ་བསྒྲགས་དང་། དེའི་ཁྱད་ཆོས་ཀྱི་རྩོམ་ཡིག་ཀྱང་སྤེལ་བཞིན་ཡོད་པ་དེ་རེད། ད་དུང་བསམ་ཚུལ་དེའི་ནང་ཀླུ་མཁར་བྱམས་ཀྱི་ཁོག་པར་འཛུལ་བ་ཡིན་སྐོར་དང་“ཁྱེད་ཅག་གི་དམིགས་ཡུལ་ངོ་མ་དེ་ཡང་སྲིད་སྐྱོང་གི་རྒྱལ་ཁ་འཐོབ་དགོས་པ་དེ་མ་ཡིན་པར། མང་ཁྲོད་དུ་རང་གི་ལྟ་བ་དང་ལངས་ཕྱོགས་ཁྱབ་བསྒྲགས་བྱ་རྒྱུ་དེ་རེད་”ཅེས་ཀླུ་མཁར་བྱམས་ཀྱི་འོས་འགྲན་དེ་ནུས་མེད་གཏོང་ཐབས་ལྟ་བུ་བཤད་འདུག་ཀྱང་། ཀླུ་མཁར་བྱམས་མི་ཁག་ཅིག་གིས་ཆུ་སྣ་གར་ཁྲིད་མ་ཡིན་པ་འདས་པའི་ཁོང་གི་ལོ་རྒྱུས་ལ་གཟིགས་ན་ཤེས་རྟོགས་ཐུབ། ང་ཚོས་ཁྱེད་ཀྱིས་མཐོང་བ་ལྟར་མིན་པར་ཁོང་འོས་མིར་ལངས་པ་དེར་རེ་བ་ཆེན་པོས་རྒྱབ་སྐྱོར་ཕྱི་གསལ་ནང་གསལ་བྱེད་ཀྱི་ཡོད་ལ། དེའི་རིགས་མང་པོ་ལབ་དགོས་པར་མ་མཐོང་།
འོན་ཀྱང་སྲིད་སྐྱོང་འོས་མིར་ལངས་པ་དེ་ཁྱབ་བསྒྲགས་ཙམ་གྱི་ཆེད་དུ་མ་ཡིན་པ་མ་ཟད། བཙན་བྱོལ་བོད་མི་རྣམས་སྐྱབས་བཅོལ་དུ་ཡོང་དགོས་དོན་འཐབ་རྩོད་ལ་ཁ་ཕྱོགས་ནས་གཞུང་འཛིན་གྱི་གྲ་སྒྲིག་ཨང་གསར་ཡོད་པ་ཉིན་དང་པོའི་གསར་འགོད་གསལ་བསྒྲགས་དང་། དེ་བཞིན་མ་འོངས་ལས་འཆར་སྐོར་མི་མང་ཁྲོད་གཏམ་བཤད་གནང་དང་གནང་བཞིན་ཡོད་པ་རེད། བོད་ཀྱི་འཐབ་རྩོད་སྐོར་ལ་ལོ་མང་རིང་བོད་ཕྱི་ནང་གཉིས་ནང་ཉམས་ཞིབ་བྱས་པའི་རྩོམ་ཡིག་མང་པོ་ཡོད་པ་མ་ཟད། རྒྱའི་བཙོན་ཁང་དུ་ཡང་ལོ་མང་རིང་འཐབ་རྩོད་པའི་དཀའ་ངལ་མྱངས་མཁན་ཞིག་རེད།
མཇུག་ཏུ་ཁྱེད་ཀྱིས་ཀླུ་མཁར་བྱམས་མི་ཡག་པོ་ཡིན་སྐོར་ཞིག་ཀྱང་འཁོད་འདུག་མོད། བསམ་བློ་སྡུག་ས་ནས་བཏང་ན། བར་ལམ་ཞིག་བོད་དོན་འཐབ་རྩོད་ཀྱི་གནས་བབས་འདི་ཉམ་ཆགས་སོང་ཡོད་པ་མ་ཟད། ༧གོང་ས་མཆོག་གི་དགོངས་གཞི་བོད་མིའི་སྒྲིག་འཛུགས་ཀྱི་སྲིད་ཇུས་ས་གནས་མི་རིགས་རང་སྐྱོང་བསམ་འཆར་ཡིག་ཆ་རྒྱ་ནག་གིས་རྩིས་མེད་བཏང་བ་དང་། སྟབས་མ་ལེགས་པ་ཞིག་ལ་བོད་རང་བཙན་འཐབ་རྩོད་པ་ཚོར་བཙན་བྱོལ་ནང་ཕྱོགས་གང་ཐད་ནས་ནུས་མེད་བཟོ་བཞིན་པའི་སྐབས་འདིར། ཁྱེད་ཀྱིས་ཀྱང་བོད་རང་བཙན་ལ་མོས་པ་དང་། བོད་མིའི་སྒྲིག་འཛུགས་འདི་འཐབ་རྩོད་པ་ཞིག་གི་ངོ་བོ་ཚད་ལྡན་དུ་གནས་རྒྱུར་རེ་བ་བྱེད་མཁན་ཚོའི་བར་དཀྲུག་ཤིང་དཀྲོག་གཏམ་ཞིག་ཀྱང་ཨེ་ཡིན་སྙམ་པའི་དོག་པ་བྱུང་ཡང་། དེ་ལྟར་མིན་པའི་རེ་བ་ཡོད།
མཐའ་དོན་སོ་སོའི་ལུང་ཚན་གཅིག་པར་རྒྱབ་སྐྱོར་ཙམ་དང་། ནང་ཁུལ་ཆབ་སྲིད་འཁྲབ་སྟོན་པའི་ལས་རོགས་ཁག་ཅིག་ལ་ནང་མོལ་གྱིས་རྒྱབ་སྐྱོར་བྱས་པ་ལྟ་བུ་མིན་པར། བོད་མི་རིགས་ཀྱི་མ་འོངས་འཐབ་རྩོད་ལ་ཁ་ཕྱོགས་ཏེ།འཐབ་རྩོད་ཀྱི་ཆེད་དུ་ཕུགས་བསམ་ལྡན་པ་སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་ལ་རྒྱབ་སྐྱོར་བྱས་པ་དེ་བོད་དོན་འཐབ་རྩོད་ལ་དོན་སྙིང་ལྡན་ཡོད་པར་ངོས་འཛིན་བྱ་ཆོག་པ་ཞིག་ཡིན་པས། བོད་རྒྱལ་ཡོངས་རང་བཙན་ལྷན་ཚོགས་དང་། བོད་མི་རིགས་ཀྱི་འཐབ་རྩོད་དོན་དུ་སེམས་ཁུར་ཡོད་མཁན་ཚོས་རྒྱབ་སྐྱོར་གནང་བ་དོན་ལ་ཕན་པ་རེད།
ད་དུང་སྤྱི་ཚོགས་དྲ་གནས་ཁག་ཏུ་མངོན་གསལ་མེད་པའི་འདྲ་འབུ་ཁག་ཅིག་གིས་ཨ་ཚོགས་ཀླུ་མཁར་བྱམས་ལ་དད་པ་མེད་སྐོར་དང་འབྲེལ་ནས་སྐྱོན་འདོགས་བྱེད་ཀྱི་འདུག་ཀྱང་། མིའི་སེམས་ལ་དད་པ་ཡོད་མེད་ནི་གཞན་གྱིས་ཚོད་བགམ་བྱས་ནས་བཤད་ཐུབ་པ་ཞིག་མིན་ལ། དེ་བས་ཚིག་གཅིག་གཉིས་བཤད་སྟངས་ཀྱིས་དད་པ་ཡོད་མེད་གཉིས་ཀ་བསྒྲུབ་མི་ཐུབ། རྒྱལ་ཁབ་དང་མི་རིགས་ཤིག་གི་འཐབ་རྩོད་ཐོག་ནས་བཤད་ན་ཆོས་ལུགས་བྱེ་བྲག་པ་ཞིག་ལ་དད་མོས་ཡོད་དང་མེད་དེ་གནད་དོན་ཞིག་ཆགས་མེད། དེའི་རིགས་ལ་ལན་འདེབས་དགོས་གལ་ཡང་མ་མཐོང་།།
སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་ཀྱི་རྒྱབ་སྐྱོར་ཚོགས་ཆུང་ནས་༢༠༡༦ ཟླ་༨ ཚེས་༢༦ ཉིན་སྤེལ།
སྲིད་སྐྱོང་ནི་སུ་ལ་ཐོབ་ཀྱང་ཁྱད་པར་མེད་མོད། མི་སུ་ཡིན་ཡང་རང་ཉིད་མི་དགའ་སའམ་ཁ་གཏད་དེའི་སྐད་ཆ་ལ་ཉན་རྒྱུ་ནི་རྒྱུ་མཚན་དང་གནས་ལུགས་སྲུང་བརྩི་བྱས་པ་ཙམ་ལས་རང་གི་ལ་རྒྱ་ཤོར་བ་ནམ་ཡང་མིན། ཀླུ་མཁར་བྱམས་ལ་འོས་ཐོབ་ན་སྙིང་ནས་དགའ་བསུ་ཡོད་མོད། ཁོ་ལ་ཐལ་དྲག་པ་དང་ཉེན་ཆེ་བའི་ཆ་ཞིག་འདུག ང་ཆེས་དོགས་པའམ་སྐྲག་ས་དེ་ཡིན། མ་གཏོགས་གཞན་ཁོ་ལ་བློ་སྤོབས་དང་གདེངས་ཚོད་ཡོད་པས་ཧ་ཅང་དགའ་ཡོད།
ཀླུ་མཁར་བྱམས་ཀྱི་གཏམ་བཤད་ནས་སློབ་སྦྱོང་མང་པོ་ལེན་རྒྱུ་ཡོད་པ་རེད། དམིགས་བསལ་བོད་རྒྱའི་ཆབ་སྲིད་རྙོག་གླེང་སྐོར་དེ་རེད།
ཧ་ཅང་ཕྱི་དྲགས་པའི་ལན་འདེབས་འདི་ཚ་བོ་ཚ་བོ་གནད་དུ་འཁེལ་བའི་གསལ་བཤད་ཅིག་ཏུ་གོ་མ་སོང་། ད་དུང་ལན་འདེབས་མང་པོ་ཞིག་ཀྱང་ལྷག་ནས་ཡོད་པ་འདྲ། རྣམ་པ་ཚོ་སྐུ་ཐང་ཆད་ངེས་རེད། ཤུགས་རྒྱོབས་ཤིག་མང་པོ་ཞིག་སྦྱངས་ཀྱི་རེད།
ཀླུ་མཁར་ལ་འོས་མི་ཕངས་ཟེར་མཁན་ཚོས་ཁོང་ལ་ལམ་སེང་མ་འབ་པར་ཁོའི་སྐད་ཆར་ཉན་དགོས་པ་རེད་ཟེར་འདོད།
རྒྱལ་ཁབ་མི་རིགས་ལ་བསམ་བློ་གཏོང་ན་ཨ་ཚོགས་ཀླུ་མཁར་བྱམས་ལས་ཡན་སུ་གང་མེད། ད་དུང་ཉི་མ་གཏོང་ནས་བསྡད་ན་སུ་ལ་བླུགས་ན་ཁྱད་པར་མེད།