འཇར་འགོག་དུས་དྲན་ལ་ཞུགས་པར་ངོ་རྒོལ།

ཐའེ་ཝན་གོ་མིན་ཏང་ཚོགས་པའི་ཚོགས་གཙོ་ཟུར་བ་ལིན་ཁྲན་(Lien Chan)རྒྱ་གཞུང་གི་འཇར་འགོག་དུས་དྲན་ཐོག་ཕེབས་པར་ཐའེ་ཝན་གཞུང་འཛིན་ཁ་གཏད་ཚོགས་པ་སོགས་ནས་སྐྱོན་བརྗོད་བྱེད་བཞིན་འདུག

ཐའེ་ཝན་གྱི་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ལིན་ཀྲན་སྐུ་འཁོར་གཙོ་གྲས་ཁྲང་ཅོན་ཁོན་ (Chang Jung-kung) གྱིས། གཙོ་འཛིན་ཟུར་བ་ལེན་ཀྲན་གྱིས་ཀྲུང་ཧྭ་མི་རིགས་ཀྱི་སྤྱི་མཐུན་ལོ་རྒྱུས་རིང་བཞིན་ལ་བསམ་བློ་བཏང་ནས་འགྲོ་རྒྱུ་གཏན་ཁེལ་བྱས་པ་དང་། དམག་དཔུང་རྔམ་སྟོན་གྱི་ལས་རིམ་དང་འབྲེལ་ཡོད་བྱེད་སྒོ་སོགས་ལ་མཉམ་ཞུགས་གནང་རྗེས། རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུགས་འཕྲད་བྱས་ཏེ་མཚོ་ངོགས་གཉིས་ཀྱི་འབྲེལ་བ་གླེང་སློང་བྱེད་པར་རེ་བ་བཅང་ཡོད་སྐོར་བརྗོད་འདུག

དེའི་ཐད་ཐའེ་ཝན་གྱི་སྲིད་འཛིན་ལྷན་ཁང་གི་འགན་འཛིན་ཧའོ་པེ་ཚོན་ (Hau Pei-tsun) གྱིས། རྒན་ཡོལ་ཞུས་ཟིན་པའི་རྒྱལ་ཁབ་ཀྱི་དམག་དཔོན་ཞིག་པེ་ཅིན་གྱི་དམག་དཔུང་རྔམ་སྟོན་ལ་ལྟ་རུ་འགྲོ་དགོས་ན། ཐའེ་ཝན་མི་མང་ནས་བསྡུས་པའི་རྒན་ཡོལ་གྱི་རོགས་དངུལ་ལེན་རྒྱུ་སྤང་དགོས་པ་རེད། ཅེས་བརྗོད་འདུག ཐའེ་ཝན་གཞུང་འཛིན་ཁ་གཏད་ཚོགས་པས་འཇར་འགོག་དམག་འཁྲུག་བྱེད་མཁན་ནི། ཀྲུང་ཧྭ་མིན་གོ་ཡི་དམག་མི་ཡིན་པ་དང་། ཀྲུང་ཧྭ་མིན་གོ་ཡིས་སྣེ་ཁྲིད་དེ་ཉི་ཧོང་ལ་ཕར་རྒོལ་བྱས་པ་དེ་ལོ་རྒྱུས་ཀྱི་དངོས་ཡོད་གནས་ཚུལ་རེད། གལ་སྲིད་རྒན་ཡོལ་ཞུས་ཟིན་པའི་རྒྱལ་ཁབ་ཀྱི་མགོ་ཁྲིད་ཅིག་རྒྱ་ནག་གི་དམག་དཔུང་རྔམ་སྟོན་ལ་འཛུལ་བཞུགས་བྱས་པ་ཡིན་ན། ཕྱི་གླིང་བས་རྒྱ་ནག་གིས་སྣེ་ཁྲིད་པའི་འཇར་འགོག་དམག་འཁྲུག་ལ་རྒྱབ་སྐྱོར་བྱས་པ་བརྗོད་རྒྱུ་རེད། ཅེས་བརྗོད་འདུག

གཞན་ཡང་། ཟླ་འདིའི་ཚེས་ ༢༧ ཉིན་ཧོང་ཀོང་མིན་པའོ་ (Ming Bao)ཞེས་པའི་ཐོག རྒྱ་ནག་གཞུང་གིས་འཇར་འགོག་དམག་འཁྲུག་གི་བདེན་པའི་ལོ་རྒྱུས་སླར་གསོ་བྱ་དགོས་པའི་འབོད་སྐུལ་འཕྲིན་ཡིག་ཅིག་སྤེལ་བའི་ནང་། ལོ་ ༨ ཀྱི་ནང་འཇར་པན་དང་འཐབ་རྒོལ་བཏང་པ་དེ་རྒྱ་ནག་མི་རིགས་ཀྱི་ཆེས་རྩ་ཆེ་བའི་བསམ་གྱི་འབྱོར་བ་ཡིན་པ་མ་ཟད། རྒྱལ་ཁབ་ལ་དུང་བའི་སློབ་གསོའི་བརྗོད་དོན་ཡག་ཤོས་དེ་རེད། འོན་ཀྱང་། འཇར་འགོག་དམག་འཁྲུག་གི་མགོ་འཁྲིད་གོ་མིན་ཏང་གི་སྤྱི་ཁྱབ་གཙོ་འཛིན་ཅང་ཅེ་ཧྲི་ཡིན་པ་ནི་གཡོལ་ཐེབས་མེད་དངོས་ཡོད་གནས་ཚུལ་ལྕགས་ལ་བརྡུངས་པ་ལྟ་བུ་རེད། ཕྱི་ལོ་ ༡༩༤༩ ལོ་གོ་མིན་ཏང་གིས་རྒྱ་ནག་སྐམ་སའི་སྲིད་དབང་ཤོར་བ་དང་། འཇར་འགོག་དམག་འཁྲུག་གི་དངོས་བྱུང་ལོ་རྒྱུས་སྦ་གསང་བྱས་པ་མ་ཟད་འཁྱོག་བཤད་བྱེད་བཞིན་འདུག འཇར་འགོག་དམག་འཁྲུག་རྒྱལ་ཁ་ཐོབ་པ་ཀྲུང་ཧྭ་མི་རིགས་ཡོངས་ཀྱིས་བྱས་རྗེས་ཡིན་པ་དང་ཅང་སྐུ་ཞབས་ཁོ་རང་གི་ལེགས་གྲུབ་གཅིག་པུ་ཡང་མ་རེད། ཡིན་ན་ཡང་། ཁོང་ནི་དབུ་འཁྲིད་ཡིན་པ་ལོ་རྒྱུས་ཀྱི་དངོས་ཡོད་རྩོད་མེད་རེད། ཅེས་དང་། འཇར་འགོག་དམག་འཁྲུག་དུས་སྟོན་དང་བསྟུན་ཏེ་བློ་སྤོབས་ཆེན་པོའི་ངང་བདེན་པའི་སྙིང་དོན་དང་། འཇར་འགོག་དམག་འཁྲུག་གི་ལོ་རྒྱུས་དངོས་ལ་ཞིབ་འཇུག་བྱས་ཏེ། དྲང་པོ་དྲང་གཞག་དང་དངོས་ཡོད་གནས་ཚུལ་བརྗོད་རོགས་ཞུ། ཞེས་བྲིས་འདུག

གསར་འགོད་པ། འཇིགས་མེད་རྒྱ་མཚོ།