བློ་གྲོས་རབ་བརྟན།
ངའི་ཆེད་རྩོམ་༼སྲིད་སྐྱོང་དང་འོས་མི་རྩེད་ཆས་མ་རེད༽ཅེས་པར་ཀླུ་མཁར་བྱམས་ཀྱི་རྒྱབ་སྐྱོར་ཚོགས་ཆུང་ཟེར་བས་ལན་ཞིག་བོད་ཀྱི་དུས་བབ་དྲ་ངོར་༢༠༡༥/༨/༢༨ ལ་བཀོད་འདུག དངོས་གནས་བྱས་ན་ངས་ཀླུ་བྱམས་འོས་མི་འདོན་མཁན་བོད་རྒྱལ་ཡོངས་རང་བཙན་ལྷན་ཚོགས་ཀྱི་འོས་འདོན་སྟངས་ཐད་ནས་སྐད་ཆ་གཙོ་བོ་བཤད་ཡོད། དེར་བརྟེན་ལན་ཞིག་ཡོད་ན་ཚོགས་པ་དེ་ནས་ཡོང་དགོས་མོད། འོན་ཀྱང་དེ་ལས་མ་བསླེབས་པར་ཀླུ་མཁར་བྱམས་ལ་རྒྱབ་སྐྱོར་བྱེད་མཁན་ཚོགས་ཆུང་ནས་བསླེབས་འདུག ལན་དེ་བཀླགས་རྗེས་ད་དུང་སྔར་བཞིན་“སྲིད་སྐྱོང་དང་འོས་མི་རྩེད་ཆས་རེད་“འདུག
ང་ལ་གསལ་ཁ་འདོན་དགོས་ས་དེ་བོད་རྒྱལ་ཡོངས་རང་བཙན་ལྷན་ཚོགས་ཀྱིས་འོས་མི་འདོན་སྟངས་ཐད་ནས་རེད། ངས་རང་བཙན་ལྷན་ཚོགས་ཀྱིས་འོས་མི་འདོན་ཆོག་གི་མ་རེད་ཟེར་གྱི་མེད་ལ། ཚོགས་པ་ཞིག་གི་དངོས་ནས་འོས་མི་འདོན་སྐབས་ཤེས་འཇོན་གང་ཐད་ནས་མི་རྩེ་མོའི་ནང་གི་ཏོག་དེ་འདོན་དགོས་པ་བསྙོན་དུ་མེད་ན། ཁྱེད་ཅག་གིས་ཀླུ་མཁར་བྱམས་རང་བཙན་ལྷན་ཚོགས་ཀྱི་ཚོགས་མི་གཙོ་གྲས་ཤིག་ཡིན་རབས་བཤད་པ་ལས་གཙོ་བོའི་ནང་གི་ཏོག་དེ་ཀླུ་བྱམས་ཡིན་པ་བསྟན་མེད་ཅིང་། ཚོགས་མི་གཙོ་གྲས་ཤིག་རེད་ཅེས་པས་ད་དུང་ལན་ཐེབས་མེད་ལ། རང་བཙན་ལྷན་ཚོགས་ཀྱི་རྒྱུན་ལས་རྣམས་ལྷན་འཛོམས་ཀྱིས་གྲོས་བསྡུར་གྱི་ལམ་ནས་ཀླུ་བྱམས་བཏོན་པ་ཡིན་པའི་བདེན་དཔང་དངོས་སྟོན་རྒྱུ་ཡོད་ན་འགྲིག་འདུག དེ་མེད་ཕྱིན་ཆད་ད་དུང་ཡང་ཁོང་ཚོ་ལ་མཚོན་ན”སྲིད་སྐྱོང་དང་འོས་མི་རྩེད་ཆས་རེད་“འདུག
བར་གནས་ཤིག་གིས་ཀླུ་བྱམས་ཡག་རབ་རྒྱན་རབ་བཤད་ན་རྣ་བར་འགྲོ་ཡི་རེད། དེ་མིན་ཀླུ་བྱམས་ལ་རྒྱབ་སྐྱོར་བ་ཞིག་གིས་ཀླུ་བྱམས་བཟང་རབ་བཤད་ན་རྣ་བར་འགྲོ་ཁག་པོ་རེད། རྒྱུ་མཚན་ནི་ཁྱེད་ཅག་ཕྱོགས་གཅིག་ལ་ལྷུངས་ཚར་བས་རེད། གང་ལྟར་ངས་ཀླུ་བྱམས་སྒེར་ལ་ཅི་ཡང་རྗོད་ཀྱིན་མེད་ལ། ད་དུང་དེ་སྔའི་ཆེད་རྩོམ་དུ་མི་དྲང་བོ་ཞིག་དང་ཁ་རུ་ཁ་ཐུག་ཅིག་རེད་ཅེས་པ་རང་འཇགས་ཡིན།
གལ་ཆེན་བ་ཞིག་ནི་ཁྱེད་ཅག་གིས་༼སྟབས་མ་ལེགས་པ་ཞིག་ལ་བོད་རང་བཙན་འཐབ་རྩོད་པ་ཚོར་བཙན་བྱོལ་ནང་ཕྱོགས་གང་ཐད་ནས་ནུས་མེད་བཟོ་བཞིན་པའི་༽ རང་བཙན་འཐབ་རྩོད་ཚོ་ལབ་ན་གོ་བ་ག་འདྲ་ཞིག་ལེན་དགོས་པ་རེད། ཚོགས་པ་ཞིག་ལ་གོ་དགོས་ན་ཚོགས་པ་གང་དང་གང་རེད། ཡང་ན་མི་སྒེར་བ་ཡིན་ན་སུ་དང་སུ་རེད། དེ་དང་པོ་གསལ་ཁ་བཏོན་རྗེས་དེ་ནས་སྒྲིག་འཛུགས་དང་ཚོགས་སྡེ། ཡང་ན་སུ་དང་གང་གིས་རང་བཙན་འཐབ་རྩོད་ནུས་མེད་བཟོ་བཞིན་པ་རེད། ཇི་ལྟར་བཟོ་བཞིན་ཡོད་པ་རེད། འདི་སྐད་ཆ་ཆུང་ཆུང་ཞིག་གཏད་ནས་མ་རེད་ལ། ཚོད་ཚོད་ལ་མི་དཀྱུས་མ་ཞིག་ཁ་ནས་ཐོན་པའི་ཚིག་ཀྱང་མ་རེད། འདི་སྲིད་སྐྱོང་གི་འོས་མིར་རྒྱབ་སྐྱོར་ཚོགས་ཆུང་གི་ཁ་ནས་ཐོན་པ་རེད། འདི་དག་ལ་ཁོངས་དང་ལུང་དངོས་ཡོད་གཞིར་བཞག་གིས་ར་སྤྲད་དེ། ཡིན་ན་ཡིན་པ་དང་མིན་ན་མིན་པ་དེ་མི་མང་ལ་གསལ་བོ་བཟོ་དགོས་པའི་གནད་དོན་ཞིག་རེད།
ད་དུང་སྐད་ཆ་གཞན་ཞིག་ལ་༼བར་ལམ་ཞིག་བོད་དོན་འཐབ་རྩོད་ཀྱི་གནས་བབས་འདི་ཉམ་ཆགས་སོང་ཡོད་༽ཅེས་བཤད་འདུག འདི་དོན་ལ་གནས་པའི་སྐད་ཆ་ཞིག་རེད་དམ། བོད་དོན་ཟེར་ན་གོ་བ་ག་འདྲ་ལེན་གྱི་ཡོད། འདི་གཅིག་ཡིན། གཉིས་ནས་ངས་ནོར་མེད་ན་ཁྱེད་ཅག་གི་ལྟ་སྟངས་ཡིན་ན། བོད་མིའི་སྒྲིག་འཛུགས་ནས་རྒྱ་གཞུང་ལ་སྤྲད་པའི་ས་གནས་རང་སྐྱོང་གི་ཡིག་ཆ་ལ་ཡ་ལན་མ་སྤྲད་པ་དེ་རེད། འདི་ནི་བཀའ་ཤག་གོང་མའི་སྐབས་གདོང་དང་གདོང་ཐུག་སྟེ་བོད་དོན་ཐད་ཀར་བཤད་པའི་ལས་རིམ་གྱི་ཆ་ཤས་གལ་ཆེན་ཞིག་རེད། འདིས་རྒྱ་གཞུང་ལ་རྒྱུ་མཚན་དང་གནས་ལུགས། བདེན་པ་དང་དོན་དངོས་གཞི་བཟུང་གི་སྐད་ཆ་སྨྲ་རྒྱུ་མེད་པའི་གནས་སུ་བསྐྱལ་ཏེ། ཚོད་ཚོད་ལ་བོད་རང་བཙན་དང་བོད་ཆེན་པོ་རྩོད་ཀྱིན་འདུག་ཅེས་བསྒྲགས་ཏེ་ཁག་འཁྲི་བྱེད་བཞིན་ཡོད་ཅིང་། བོད་རང་བཙན་ནི་རྒྱ་ནག་གཞུང་ལ་མཚོན་ན་རྩོད་དགོས་པ་ཞིག་ཆགས་ཡོད། ད་ལྟའི་རྒྱ་གཞུང་གིས་བོད་རང་བཙན་སྤྲོད་མི་སྲིད་ཅིང་། བོད་མི་ཚོས་ལེན་མི་ཐུབ་པའི་གདེང་ཚོད། རྒྱལ་སྤྱི་ནས་རྒྱབ་སྐྱོར་མེད་པའི་དོན་དངོས་བཅས་ཀྱིས་རེད། དེར་བརྟེན་རང་བཙན་བརྩད་ན་རང་སྐྱོང་དང་སྐད་ཡིག་རིག་གཞུང་སྲུང་སྐྱོབ་སོགས་ཀྱི་ཐད་ནས་སྐད་ཆ་བཤད་མི་དགོས་ལ། ༧གོང་ས་མཆོག་དང་བོད་མིའི་སྒྲིག་འཛུགས་ཀྱིས་རང་བཙན་རྩོད་ཀྱིན་མེད་ནའང་རྩོད་ཀྱིན་འདུག་ལབ་ཀྱི་ཡོད་པ་ལྟར་བོད་མི་ཚོས་ཀྱང་འཇོན་མིན་ལ་མ་ལྟོས་པར་རང་བཙན་རྩོད་ཁུལ་བྱས་ན། རྒྱ་ནག་གཞུང་གིས་༧གོང་ས་མཆོག་དང་བོད་མིའི་སྒྲིག་འཛུགས། རྒྱལ་སྤྱིའི་སྤྱི་ཚོགས་བཅས་ལ་གདོང་ལེན་བྱེད་པར་ལས་སླ་རུ་དང་སྟབས་བདེ་རུ་གྱུར་ཡོད།
ལར་ནས་བཙན་བྱོལ་བོད་མིའི་ཁྲོད་དུ་རང་སྐྱོང་དང་རང་བཙན་རྩོད་མཁན་གཉིས་ཡོད་པའི་ཁུལ་རེད། ྄དངོས་གནས་བྱས་ན་རང་བཙན་རྩོད་མཁན་ཚོས་ལས་ཀ་མང་བ་བྱེད་དགོས་མོད། འོན་ཀྱང་དོན་ལ་རང་སྐྱོང་རྩོད་མཁན་ཚོས་རྒྱ་གཞུང་དང་མཉམ་དུ་འབྲེལ་བ་སླར་གསོ་དང་། པེ་ཅིན་དུ་སྐུ་ཚབ་ཐེངས་མང་མངགས་ཏེ་བོད་དོན་ཐད་གྲོས་བསྡུར་རིམ་པར་བྱས་པ་སོགས་ལས་ཀ་མང་བ་བྱས་ཡོད། རང་བཙན་པ་ཚོས་རང་བཙན་ཆེད་དུ་ལས་ཀ་འདི་བྱས་པ་རེད་ཅེས་ཡོངས་གྲགས་སུ་ཅི་ཡང་སྟོན་རྒྱུ་མེད་ན། ལས་སླ་ཤོས་ནི་བཙན་བྱོལ་ནང་རང་བཙན་རྩོད་རྒྱུ་དེ་རེད།
བོད་ཀྱི་དུས་བབ་ཀྱི་དྲ་རྒྱ་གསར་པར་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཡོད།
ཀླུ་མཁར་བྱམས་སྲིད་སྐྱོང་ཐོབ་ཚེ་ང་ཟླ་བའི་གྲོང་ཁྱེར་ནང་སྒོམ་བརྒྱབ་ཏུ་འགྲོ་ཐག་གཅོད་ཡིན། ཧཧཧཧ
སྲོང་བཙན་ཁྱེད་རང་ཟླ་བའི་གྲོང་ཁྱེར་ལ་འགྲོ་མིན་ང་ཚོ་ལ་མཆུ་ཏོག་རྩ་བ་ནས་མེད་པ་མ་ཟད། ད་ལྟ་ཁྱེད་རང་གིས་ས་གནས་གང་ཞིག་ནས་ཅི་ཞིག་བྱེད་བཞིན་ཡོད་མེད་ལའང་མཆུ་ཏོག་མེད་དོ།
ཁྱེད་རང་གི་འོས་ཤོག་རིན་ཐང་ཅན་དེ་སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་ལ་བླུག་རོགས་ཞེས་འབོད་སྐུལ་ཞུ་མཁན་ལྷ་འདྲེ་མི་སུ་གང་ཡང་མེད་འདུག
བློ་གྲོས་རབ་བརྟན་ལགས། སྐུ་ཁམས་བཟང་།ཉིད་ཀྱིས་ཉིན་ལྟར་རང་ཉིད་ཀྱི་རྩོམ་ཡིག་ལ་མཆན་ཡོད་མེད་ཆེད་ཡང་ཡང་ལྟ་ཡི་ཡོད་ཤག་རེད། རྒྱ་གར་གྱི་རང་བཙན་འཐབ་རྩོད་པ་སྐྱེས་མཆོག་དམ་པ་གྷན་དྷི་མཆོག་གིས་སྲིད་དོན་ནི་རྩེད་མོ་ཞིག་རེད་ཅེས་འགྲེལ་བ་ལྟར། སྲིད་སྐྱོང་འོས་མི་རྩེད་ཆས་ཤིག་ཡིན་དང་ཡིན། སྲིད་སྐྱོང་འོས་མི་ཡིན་ན་ངེས་པར་དུ་དབུ་མའི་ལམ་ལ་རྒྱབ་སྐྱོར་ཡོད་མཁན་ཞིག་ཡིན་དགོས་པ་དང་དེ་མིན་སྲིད་བྱུས་དེ་དང་འགལ་བའམ་རང་བཙན་རྩོད་མཁན་ཞིག་སྲིད་སྐྱོང་འོས་མི་ལངས་ན་་རྩེད་ཆས་ཡིན་པའི་རྒྱུ་མཚན་ནི་བྱིས་པའི་སྐད་ཆ་རང་རེད། གལ་སྲིད་ཁྱེད་ཀྱི་བསམ་པ་ལྟར་ཡིན་དགོས་ན༸གོང་ས་མཆོག་གིས་གསོལ་རས་བསྩལ་བའི་དམངས་གཙོ་འདི་སྤྱི་ཚོགས་རིང་ལུགས་ཀྱི་དམངས་གཙོ་ཡིན་ན་ཡག་ཤོས་རེད།
སྲིད་དོན་ཚན་རིག་གི་ངོས་ནས་བཤད་ན་སྲིད་དོན་ཟེར་བ་དམངས་ཀྱི་ཆེད་དུ་ཡིན་ཞིང་དམངས་ཀྱི་དོན་དུ་བསྒྲུབ་དགོས་ཟེར། སྡོམ་ཚིག་འདི་གཉིས་དང་འགལ་ཚེ་དམངས་ཀྱིས་གསར་བརྗེའི་ངོ་བོ་ཐོག་ནས་སྲིད་གཞུང་མགོ་རྟིག་སློག་ངེས་རེད། དེ་ན་སྲིད་སྐྱོང་འོས་མི་ལངས་པ་ལ་ལྟ་གྲུབ་ལངས་ཕྱོགས་ཀྱི་ས་མཚམས་བཅད་པ་དང་ས་མཚམས་དེ་ལས་བརྒལ་ན་རྩེད་ཆས་ཆགས་པའི་ངེས་པ་མེད་བསམ།
ཁྱེད་རང་གིས་ལྟོས་དང་། ༢༠༡༦ལོའི་ཨ་རིའི་སྲིད་འཛིན་འོས་མི་ལ་མཚོན་ན། སྤྱི་མཐུན་ཚོགས་པའི་ནང་སྲིད་འཛིན་འོས་མི་ལངས་མཁན་༡༧་དང་དམངས་གཙོ་ཚོགས་པའི་ནང་སྲིད་འཛིན་འོས་མི་ལངས་མཁན་ ༥ བྱུང་བ་རེད། སྲིད་འཛིན་འོས་མི་རེ་རེའི་རྒྱབ་ལྗོངས་ལོ་རྒྱུས་དང་ཤེས་ཡོན། འཇོན་ཐང་གང་ཅིའི་ཐད་ནས་མ་འདྲ་བ་ཡོད་པ་མ་ཟད་། ཁོང་ཚོས་འབྱུང་འགྱུར་ཨ་རིའི་ནང་སྲིད། རྒྱལ་སྲུང་བདེ་འཇགས། ཕྱི་འབྲེལ་སྲིད་ཇུས། དྲ་ཚུགས་བདེ་འཇགས། དམག་དོན་ལ་སོགས་འགྲེལ་སྟངས་སྣ་ཚོགས་ཡོང་གི་ཡོད། མདོ་བསྡུས་ན། ཁྱེད་ཀྱིས་ཁོང་ཚོ་ཚང་མས་འཛམ་གླིང་ནང་སྙན་གྲགས་ཡོད་པའི་ཨ་རིའི་སྲིད་འཛིན་འོས་མི་དང་འོས་བསྡུ་ལ་རྩེད་ཆས་བྱེད་ཀྱི་འདུག་ཅེས་བརྗོད་ཀྱི་ཡིན་ནམ།
ཡག་པ་བྲིས་འདུག
བོད་ཀྱི་དུས་བབ་ཀྱི་དྲ་རྒྱ་གསར་པར་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཡོད།
དུས་བབ་ཀྱི་དྲ་རྒྱ་གསར་པར་འཚམས་འདྲི་ཡོད
སྤྱི་བཏང་ད་བར་དུ་སྲིད་སྐྱོང་འོས་མི་ལོང་མཁན་ལྔ་བྱུང་བའི་ནང་ནས་ཡོངས་གྲགས་སུ་བློ་སྤེན་བཀྲ་བྱམས་ཁོང་ཚོ་བཞི་ཡིན་ས་རེད་ ང་ནི་ཁོང་ཚོ་བཞི་ཡི་ནང་ནས་འོས་སུ་ཐོབ་ན་ཁྱེད་པར་མེད་ རྒྱུ་མཚན་དེར་བརྟེན་ནས་ད་ལོ་འོས་བླུག་གི་མིན་
དྲ་ཚུགས་གསར་པར་འཚམས་འདྲི་ཞུ།
འཚམས་འདྲི་ཞུ།
ངས་བློ་བྲོས་རབ་བརྟན་གྱི་རྩོམ་ཡིག་ལ་མཆན་ཞིག་བཞག་ཀྱང་དུས་བབས་ཚང་གི་མཆན་དེ་འདིར་བཏོན་མིན་འདུག
འོན་ཀྱང་ངས་སེམས་ཤུགས་མ་ཆག་པར་སླར་ཡང་ཞུ་འདོད་བྱུང་། བློ་བྲོས་རབ་བརྟན་གྱི་རྩོམ་ཡིག་གི་རང་བཙན་རྩོད་མཁན་ལ་འཁང་ར་དང་ཁྱད་གསོད་བྱེད་ཀྱི་འདུག་ལ་ལྷག་པར་དུ་ཀླུ་མཁར་བྱམས་ལ་སྒེར་བཙུགས་ཀྱི་སྐྱོན་འདོན་བཞིན་འདུག རང་བཙན་རྩོད་མཁན་ལ་ཟུར་ཟ་དང་འཁང་ར་བྱེད་རྒྱུ་མང་དྲགས་ན་དེ་ནི་འགན་འཁུར་མེད་པའི་གླེང་མོལ་ཞིག་ཡིན།
སུ་ལ་འོས་ཤོག་ཐོབ་ཀྱང་ང་ལ་ཁྱད་པར་དེ་ཙམ་མེད་ཀྱང་། འོས་མི་འདེམས་སྟངས་འདི་བརྒྱུད་ནས་ངའི་གྲོགས་པོ་མང་པོ་ཞིག་གི་མི་གཤིས་ངོ་མ་དེ་མཐོང་ཐུབ་སོང་། དེ་ནི་གོ་སྐབས་ཡག་པོ་ཞིག་ལ་རྩི་གིན་ཡོད།
བློ་གྲོས་རབ་བརྟན་ལགས་ཀྱིས་དངོས་དོན་ཞིག་གསུངས་འདུག། འཐབ་རྩོད་ཅི་ཞིག་བྱ་འདོད་ཀྱང་རྩོད་ས་མི་ནོར་བྱེད་དགོས་པ་གལ་གང་ཆེ།
བློ་གྲོས་རབ་བསྟན་ལགས་ཀྱིས་དོན་དངོས་ཞིག་གསུངས་འདུག། རང་བཙན་རྩོད་མཁན་ཚོར་ཁྱོད་ཚོས་རང་བཙན་རྩོད་ན་མི་འགྲིག་ཟེར་མཁན་སུ་ཞིག་ཡོད་མ་རེད། དབུ་མའི་ལམ་གྱི་ཐོག་ནས་བོད་དོན་རྩོད་མཁན་ཡིན་ནའང་རེད། བོད་རང་བཙན་རྩོད་མཁན་ཡིན་ནའང་རེད། གང་ལྟར་རྩོད་ས་དེ་ངོས་ཟིན་པ་དགོས་ངེས་རེད། གཞན་རྩོད་དགོས་སར་མ་རྩོད་པར་མི་དགོས་སར་རྩོད་པ་ཡིན་ན་རྙོག་གྲའི་རྒྱུ་ལས་གཞན་ཅི་ཡོང་།