དཀྱིལ་ཤར་ཡུལ་གྲུ་ནས་ཡུ་རོབ་ཀྱི་རྒྱལ་ཁབ་ཁག་ཏུ་སྐྱབས་བཅོལ་ཡོང་མཁན་ཚོ་ལམ་བར་དུ་རྐྱེན་འདས་སོགས་ཀྱི་དཀའ་ངལ་མང་དག་ཅིག་འཕྲད་བཞིན་ཡོད་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༡༡ ལོར་སི་རེ་ཡར་ནང་འཁྲུག་ལངས་པ་ནས་བཟུང་ཡུལ་མི་ས་ཡ་ ༤ ཙམ་རྒྱལ་ཁབ་གཞན་དུ་ཉེན་ཡོལ་དུ་འགྲོ་དགོས་བྱུང་བ་མ་ཟད། འདི་ལོ་མེ་ཌི་ཏྲེ་ནི་ཡན་རྒྱ་མཚོ་བརྒྱུད་སྐྱབས་བཅོལ་བ་འབུམ་ ༣ ཙམ་ཡུ་རོབ་རྒྱལ་ཁབ་ཁག་ཏུ་འབྱོར་ཡོད་ཀྱང་། རྒྱལ་ཁབ་མང་པོ་ཞིག་གིས་མཐའ་མཚམས་ཁུལ་དུ་ལྕགས་རྭ་བརྒྱབ་པ་སོགས་ལྟ་སྲུང་ཤུགས་ཆེ་བྱས་པར་བརྟེན། ནད་མནར་དང་མཚོ་སྐྱོམ་སོགས་ཀྱིས་སྐྱབས་བཅོལ་བ་ ༢༥༠༠ ལྷག་རྐྱེན་འདས་དང་། ཟླ་འདིའི་ཚེས་ ༢ ཉིན་ཀྲར་ཀི་ཡི་བྷོ་ཌོམ་ (Bodrum) མཚོ་འགྲམ་ནས་སྐྱབས་བཅོལ་བ་ཁ་ཤས་ཀྱི་ཕུང་པོ་རྙེད་ཡོད་པ་མ་ཟད། ལོ་ ༣ ཅན་གྱི་ཕྲུ་གུ་ཆུང་ཆུང་ཨ་ཡེ་ལན་ཁར་ཌི་ (Aylan Kurdi) ཡི་ཕུང་པོ་སྙིང་རྗེ་བ་དེ་བརྒྱུད་ལམ་དུ་ཁྱབ་རྗེས། རྒྱལ་སྤྱིའི་ཐོག་སི་རེ་ཡའི་གནད་དོན་ཐོག་གླེང་སློང་ཆེན་པོ་བྱུང་བར་བརྟེན་ད་ལྟ་འཇར་མན་དང་དབྱིན་ཡུལ། ཨོ་སི་ཋོ་རི་ཡ་སོགས་ཀྱིས་སྐྱབས་བཅོལ་བ་ལེན་བཞིན་ཡོད་པ་མ་ཟད། གཏོང་ཕོད་ཅན་གྱི་ཕྱུག་བདག་དང་བྱམས་བརྩེ་ཅན་ཚོས་སྐྱབས་བཅོལ་བ་དེ་ཚོར་ས་ཆ་ཉོ་བ་སོགས་ཀྱི་རོགས་རམ་བྱེད་རྩིས་ཡོད་འདུག
ཉེ་ལམ་ཀྲར་ཀི་ཌོ་གྷན་གསར་ཁང་ (Turkey’s Dogan News Agency) གི་པར་པ་ལྕམ་ཎི་ལུ་ཧྥར་ཌེ་མར་ (Nilufer Demir) གྱིས། བྷོ་ཌོམ་མཚོ་འགྲམ་ནས་སྟོད་ཐུང་དམར་པོ་དང་གོས་ཐུང་སྔོ་ནག་གྱོན་པའི་ཕྲུ་གུ་ཆུང་ཆུང་ཨ་ཡེ་ལན་ཁར་ཌིའི་ཕུང་པོར་པར་བརྒྱབ་ནས་རྒྱལ་སྤྱིའི་ཐོག་ཁྱབ་བསྒྲགས་བྱས་ཡོད་སྟབས། ད་ལྟ་རི་མོ་མཁས་ཅན་ཚོས་ཕྲུ་གུ་ཆུང་ཆུང་དེ་སྣུམ་ཚོན་རི་མོ་སོགས་སུ་བཀོད་དེ་སྐྱབས་བཅོལ་བའི་དཀའ་སྡུག་མཚོན་པར་བྱས་ཡོད་པ་མ་ཟད། རྒྱལ་སྤྱིའི་རྒྱལ་ཁབ་ཁག་གིས་འགྲོ་བ་མིའི་རིགས་ཀྱི་འདུ་ཤེས་བཟུང་སྟེ་གཅིག་ཕན་གཅིག་གྲོགས་དང་གདུང་སེམས་མཉམ་སྐྱེད་ཞུ་དགོས་པའི་འབོད་སྐུལ་བྱས་ཡོད་པ་རེད།
ཡུ་རོབ་ཀྱི་རྒྱལ་ཁབ་ཁག་ནང་སྐྱབས་བཅོལ་དུ་ཡོང་མཁན་མང་ཆེ་བ་ནི་སི་རི་ཡ་དང་དཀྱིལ་ཤར་ཡུལ་གྲུ། ལྷོ་ཨ་ཧྥི་རི་ཁའི་རྒྱལ་ཁབ་ཁག་ཆགས་ཡོད་པ་དང་། འདི་ལོའི་ཟླ་ ༧ པའི་ནང་གཅིག་པུར་སྐྱབས་བཅོལ་བ་འབུམ་གཅིག་ལྷག་ཡུ་རོབ་ཁུལ་དུ་འབྱོར་ཡོད་པ་དང་། ད་ལྟ་ཧང་གྷེ་རི་དང་སར་བྷི་ཡའི་ས་མཚམས་བརྒྱུད་སྐྱབས་བཅོལ་བ་ཁྲི་སྟོང་མང་པོ་ཡུ་རོབ་རྒྱལ་ཁབ་ཁག་ཏུ་འབྱོར་བཞིན་ཡོད་སྟབས། རྒྱལ་ཁབ་དེ་གཉིས་ཀྱིས་ས་མཚམས་ཁུལ་དུ་ལྕགས་རྭ་བསྐོར་ནས་རྒྱལ་ནང་དུ་འཛུལ་འཇུག་གི་མེད་པར་བརྟེན། ཕྱི་ཟླ་༨ ཚེས་ ༢༧ ཉིན་ཨོ་སི་ཋོ་རི་ཡའི་ཉེན་རྟོག་པས་ཧང་གྷེ་རིའི་མཐའ་མཚམས་ཁུལ་ནས་དོལ་སྐྱེལ་རླངས་འཁོར་ཞིག་གི་ནང་ནས་སྐྱབས་བཅོལ་བའི་ཕུང་པོ་ ༧༡ རྙེད་ཡོད་པ་མ་ཟད། ཉིན་དེའི་མཚན་མོར་སྐྱབས་བཅོལ་བ་ ༣༨༧ རྩད་གཅོད་བྱུང་སྟེ་མི་ལྐོག་ཚོང་རྒྱག་མཁན་ ༥ འཛིན་བཟུང་བྱས་ཡོད་པ་རེད།
ཉིན་འགའི་སྔོན་དུ་འཇར་མན་སྲིད་བློན་ལྕམ་ཨང་གྷེ་ལ་མེར་གྷལ་མཆོག་གིས་ཡུ་རོབ་རྒྱལ་ཁབ་ཁག་གིས་མཉམ་རུབ་ཀྱིས་སྐྱབས་བཅོལ་བའི་དཀའ་ངལ་སེལ་མ་ཐུབ་ན། མནའ་མཐུན་རྒྱལ་ཁབ་ཀྱི་ཕམ་ཁ་ཡིན་པའི་འགྲེལ་བརྗོད་དང་འབྲེལ། ད་ལྟ་འཇར་མན་ནང་སྐྱབས་བཅོལ་བ་ཁྲི་ ༨ ཙམ་ཡོད་ཀྱང་། ད་དུང་སྐྱབས་བཅོལ་བ་ཁྲི་ ༢ ལྷག་ལེན་རྒྱུ་ཡིན་པ་ཕྱིར་བསྒྲགས་བྱས་ཡོད་སྟབས། དབྱིན་ཡུལ་གྱི་སྲིད་བློན་དང་ཨོ་སོ་ཋི་རི་ཡའི་རྒྱལ་པོ་མཆོག་གིས་ཀྱང་སྐྱབས་བཅོལ་བ་གང་མང་ལེན་རྒྱུའི་ཁས་ལེན་བྱས་པ་ལྟར། ཧང་གྷེ་རི་གཞུང་གིས་སྐྱབས་བཅོལ་བ་དེ་དག་མེ་འཁོར་ནང་བླུགས་ཏེ་རྒྱལ་ཁབ་དེ་དག་ནང་གཏོང་རྒྱུ་ཁས་ལེན་བྱས་ཡོད་ཀྱང་། ཟླ་འདིའི་ཕྱི་ཚེས་ ༣ ཉིན་ཧང་གྷེ་རི་གཞུང་གིས་མེ་འཁོར་དེ་དག་བཀག་འགོག་བྱས་ཡོད་སྟབས། དེ་རིང་རྒྱལ་ཁབ་དེ་དག་གིས་ཆེད་དུ་སྤྱི་སྤྱོད་རླངས་འཁོར་བཏང་སྟེ་སྐྱབས་བཅོལ་བ་དེ་རྣམས་སོ་སོའི་རྒྱལ་ཁབ་ནང་བསུ་ལེན་བྱེད་མགོ་ཚུགས་འདུག
མི་རིང་བར་ཟླ་འདིའི་ཚེས་༡༤ ཉིན་ཡུ་རོབ་མཐུན་ཚོགས་ཀྱི་ནང་སྲིད་བློན་ཆེན་གྱི་དམིགས་བསལ་ཚོགས་འདུ་འཚོགས་ཏེ། ཡུལ་མིའི་གནས་སྤོ་དང་སྐྱབས་བཅོལ་བའི་གནད་དོན་ཐོག་གྲོས་བསྡུར་བྱ་རྒྱུ་ཡིན་ཡང་། འདི་ལོའི་ཟླ་ ༧ པ་བར་ཡུ་རོབ་རྒྱལ་ཁབ་ཁག་ཏུ་གཞོན་སྐྱེས་ལས་མེད་ས་ཡ་ ༤ ལྷག་ཡོད་པ་མ་ཟད། དཔལ་འབྱོར་ཉམས་རྒུད་ཤུགས་ཆེ་ཕྱིན་ཡོད་པ་དང་། རྒྱལ་ཁབ་ཁ་ཤས་ཀྱིས་སྐྱབས་བཅོལ་བ་ལེན་རྒྱུར་ཁས་ལེན་བྱེད་ཀྱི་མེད་པ། ཁ་ཤས་ཀྱིས་སྐྱབས་བཅོལ་བའི་གནད་དོན་དང་མཐའ་མཚམས་བདེ་འཇགས་ཐོག་རྟོག་ཞིབ་བྱེད་ཤུགས་ཆེ་རུ་བཏང་ཡོད་སྟབས། གནད་དོན་དེའི་ཐོག་ཡུ་རོབ་རྒྱལ་ཁབ་ཁག་གྲོས་འཆམ་ཡོང་རྒྱུ་དཀའ་ལས་ཁག་པོ་ཆགས་ཡོད།
ད་ལྟའི་བར་རྒྱལ་སྤྱིའི་ཐོག་སྲོག་ཉེན་ལ་མ་འཛེམས་པར་རང་ཡུལ་ནས་བྲོས་བྱོལ་གྱིས་རྒྱལ་ཁབ་གཞན་ནང་སྐྱབས་བཅོལ་དུ་འགྲོ་མཁན་ས་ཡ་ ༦༠ ལྷག་བྱུང་ཡོད་སྟབས། ཟླ་སྔོན་མའི་ཚེས་ ༢༩ ཉིན་མཉམ་སྦྲེལ་མཉམ་ཚོགས་སྤྱི་ཁྱབ་དྲུང་ཆེ་བྷེན་ཁེ་མོན་ལགས་ཀྱིས། ཡུ་རོབ་མཐུན་ཚོགས་ངོས་ནས་སྐྱབས་བཅོལ་ཡོང་མཁན་ཚོར་སྐྱབས་བཅོལ་ཞུ་སའི་བརྒྱུད་ལམ་ཞིག་བཟོ་དགོས་སྐོར་བརྗོད་ཡོད་པ་དང་། ༢༠༡༦ ལོའི་ཟླ་ ༥ ཚེས་ ༢༣ ནས་ ༢༤ ཉིན་བར་མཉམ་སྦྲེལ་རྒྱལ་ཚོགས་ཀྱིས་ཀྲར་ཀི་རྒྱལ་ས་ཨི་སི་ཌན་བྷོལ་ནང་རྒྱལ་སྤྱིའི་འགྲོ་བ་མིའི་རིགས་ཀྱི་བདེ་སྡུག་ཅེས་པའི་ལྷན་ཚོགས་ཤིག་འཚོགས་རྒྱུ་གཏན་ཁེལ་ཡོད་པ་རེད།
འདས་ལོའི་ཟླ་ ༤ པའི་ནང་མཉམ་སྦྲེལ་རྒྱལ་ཚོགས་ནང་རྒྱལ་ཚོགས་ཀྱི་སྐྱབས་བཅོལ་ལྷན་ཁང་གི་སྐུ་ཚབ་ཧོ་ལི་ཝུ་ཌི་ཡི་གློག་བརྙན་འཁྲབ་སྟོན་མ་གྲགས་ཅན་ཨན་ཇེ་ལི་ཎ་ཇའོ་ལེ་ (Angelina Jolie) ཡིས། ད་བར་དམག་འཁྲུག་རྐྱེན་པས་སི་རེ་ཡའི་མི་སེར་ས་ཡ་ ༤ ཙམ་སྐྱབས་བཅོལ་དུ་འགྲོ་དགོས་བྱུང་ཡོད་ཀྱང་། རྒྱལ་སྤྱིའི་རྒྱལ་ཁབ་ཁག་གིས་ཁོ་ཚོར་སྙིང་རྗེ་བྱ་རྒྱུ་ཕར་ཞོག དེ་ལས་ལྡོག་སྟེ་དཀའ་ངལ་ཞིག་ལ་ངོས་འཛིན་བྱེད་ཀྱིན་ཡོད་སྟབས། ད་ལྟའང་ཁོ་ཚོའི་དཀའ་ངལ་སེལ་མ་ཐུབ་པར་ལྷག་ཡོད་པ་རེད། ཅེས་དང་། ཁ་སང་ཨེ་ཇེབ་ཀྱི་ཕྱུག་བདག་ཎཱ་གྷོ་བྷི་ (Naguib Sawiris) ཡིས་ཨི་ཊ་ལི་དང་གྷེར་སི་ལ་མཚོ་གླིང་མང་པོ་ཡོད་པའི་ཁྲོད་ནས་ང་ལ་གཅིག་བཙོང་པ་ཡིན་ན། ངས་ད་ལྟ་རྒྱལ་སྤྱིའི་རྒྱལ་ཁབ་ཁག་གིས་སྐྱབས་བཅོལ་བ་ཚོར་སྒོ་ཕྱུགས་སེམས་ཅན་ལྟར་བརྩི་བཞིན་པ་དག་མེད་པར་བཟོས་ཏེ། འགྲོ་བ་མིའི་རིགས་གཅིག་མཚུངས་ཡིན་པའི་འདུ་ཤེས་ཀྱིས་ཁོ་ཚོར་གནས་སྐབས་སྡོད་གནས་དང་དེའི་རྗེས་སློབ་གྲྭ་དང་ལས་ཀ་སྤྲོད་རྒྱུ་ཡིན། ངས་ལས་དོན་དེ་ཚོ་བསྒྲུབ་པར་ཨ་སྒོར་ས་ཡ་ ༡༠ ནས་ ༡༠༠ བར་གཏོང་དགོས་ཆགས་ཀྱི་རེད་ཅེས་བརྗོད་ཡོད་པ་རེད།
གསར་འགོད་པ། དོན་གྲུབ།
བཀྲིས་བདེ་ལེགས།