ཨོ་སི་ཊོ་ལི་ཡའི་ནང་བོད་དོན་འཐབ་རྩོད་དང་འབྲེལ་བའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་གློག་བརྙན་ཞིག་འཁྲབ་བཞིན་ཡོད་ཀྱང་རྒྱ་གཞུང་གིས་གནོན་ཤུགས་ཆེན་པོ་སྤྲོད་ཀྱི་ཡོད་འདུག
འདི་གར་རྩོམ་པ་པོ་ཤེལ་དགེ་འདུན་ཚེ་རིང་ལགས་ཀྱིས་གནས་ཚུལ་མཁོ་གཏོང་གནང་བ་ལྟར་ན། ཨོ་སི་ཊོ་ལི་ཡའི་གློག་བརྙན་བཟོ་སྐྲུན་ཁང་ཆེན་མོ་ཧྥོ་སི་ཊིལ་(Foxtel) དང་། ཨ་རིའི་ཚོང་གཉེར་ཁང་མཱ་ཆི་བྷོ་སི་(Matchbox)གཉིས་མཉམ་འབྲེལ་འོག ཟླ་འདིའི་ཕྱི་ཚེས་ ༢ ཉིན་ཨོ་སི་ཊོ་ལི་ཡའི་རྒྱལ་ས་ཁན་བྷི་ར་(Canberra)ཡི་རྒྱལ་ཡོངས་གྲོས་ཚོགས་ཁང་གི་མདུན་དུ། གྲོང་ཁྱེར་གྱི་གསང་བ་(Secret City)ཞེས་པའི་གློག་བརྙན་ཞིག་ཕབ་སྐྲུན་བྱེད་མགོ་བརྩམས་ཡོད་པ་དང་། གློག་བརྙན་དེའི་ནང་རྒྱ་ནག་གི་མེ་ཏོག་བ་སྤུའི་གསར་བརྗེའི་ལས་འགུལ་དང་། པེ་ཅིན་གནམ་བདེ་སྒོ་མོ་ཆེའི་ཐང་ཆེན་དུ་བོད་མིས་རང་ལུས་མེར་བསྲེགས་གནང་བ་སོགས་འཆར་སྣང་རང་བཞིན་དང་འདྲེས་པའི་བོད་དོན་འཐབ་རྩོད་ཚུད་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་འཁྲབ་གཞི་གཙོ་བོར་བཟུང་ཡོད་པ་དང་། གློག་བརྙན་འཁྲབ་སྟོན་པའི་ནང་བོད་མི་ ༦ ཡོད་འདུག
དེ་ཡང་གནས་ཚུལ་མཁོ་སྤྲོད་པས། རྒྱ་ནག་གཞུང་གིས་གློག་བརྙན་འདི་ཕབ་སྐྲུན་བྱེད་མཁན་གྱི་འབྲེལ་ཡོད་མི་སྣར་གནོན་ཤུགས་ཆེན་པོ་སྤྲོད་ཀྱི་ཡོད་པ་མ་ཟད། ཟླ་འདིའི་ཕྱི་ཚེས་ ༢ ཉིན་ང་ཚོ་བོད་མི་ ༦ གིས་ལག་ཏུ་བོད་དར་དང་བོད་དོན་འཕྲེད་དར་བཟུང་ནས་འཁྲབ་སྟོན་བྱེད་དུ་འགྲོ་སྐབས། ས་གནས་རྒྱ་ནག་གཞུང་ཚབ་ཁང་གིས་གནོན་ཤུགས་སྤྲད་པ་བརྒྱུད། རྒྱ་རིགས་འཁྲབ་སྟོན་པ་ཚོས་བོད་མི་འཁྲབ་སྟོན་པས་བོད་ཀྱི་རྒྱལ་དར་དང་འཕྲེད་དར་འཁུར་ནས་ཡོང་གི་འདུག་པས། ཁོ་ཚོ་དང་མཉམ་དུ་གློག་བརྙན་འཁྲབ་རྒྱུ་མིན་ཞེས་བརྗོད་འདུག ཡིན་ནའང་། གློག་བརྙན་འཁྲབ་ཁྲིད་པ་གཙོ་བོ་བཞི་ཡི་ནང་ནས་གསུམ་བོད་དོན་ལ་རྒྱབ་སྐྱོར་ཤུགས་ཆེན་པོ་གནང་མཁན་དེ་འདྲ་ཡིན་སྟབས། བོད་རིགས་འཁྲབ་སྟོན་པ་རྣམས་ཕྱིར་འབུད་བཏང་ན་འགྲིག་གི་མ་རེད། ཁོ་ཚོ་ཕྱིར་འབུད་བཏང་བ་ཡིན་ན་ང་ཚོས་འཁྲབ་ཁྲིད་བྱ་རྒྱུ་མིན་ཞེས་བརྗོད་ཡོད་པར་བརྟེན། མཐའ་མ་རྒྱ་རིགས་འཁྲབ་སྟོན་པ་རྣམས་རང་འགུལ་གྱིས་ཕྱིར་འབུད་དགོས་བྱུང་སོང་། དེ་རིང་ཁ་སང་ང་ཚོས་ཨོ་སི་ཊོ་ལི་ཡའི་གྲོང་ཁྱེར་སིག་ནེ་རུ་འཁྲབ་སྟོན་བྱེད་བཞིན་ཡིན་ལ། ཕྱི་ལོ་ ༢༠༡༦ ཟླ་ ༢ པའི་ནང་ང་ཚོས་འཁྲབ་པའི་གློག་བརྙན་འདི་ཨི་སི་ཊོ་ལི་ཡའི་གློག་བརྙན་བཟོ་སྐྲུན་ཁང་ཆེན་མོ་(Foxtel) གྱིས་རྒྱལ་སྤྱིའི་ཐོག་ཤར་གཏོང་བྱ་རྒྱུ་རེད། ཅེས་བརྗོད་བྱུང་།
གློག་བརྙན་གྱི་འཁྲབ་སྟོན་པའི་ནང་རྒྱ་གཞུང་གི་བཙན་གནོན་དམ་དྲག་འོག་འགྲོ་བ་མིའི་ཐོབ་ཐང་ཐད་དཀའ་ངལ་ཆེན་པོ་འཕྲད་བཞིན་ཡོད་པའི་བོད་དང་ཡུ་གུར་སོགས་གྲངས་ཉུང་མི་རིགས་ཀྱི་འཁྲབ་སྟོན་པ་ཁྱོན་མི་གྲངས་ ༢༠༠ ཡས་མས་ཡོད་པ་དང་། དེའི་ནང་རྒྱ་རིགས་འཁྲབ་སྟོན་པ་ ༢༠ ཙམ་ཡོད་འདུག གློག་བརྙན་དེའི་འཆར་འགོད་པ་ཧྥི་ལི་སི་ཊི་ཨ་བྷོ་ཐི་(Felicity Abbott)ལགས་ཀྱིས་བརྩོན་འགྲུས་འོད་ཟེར་ལགས་སུ་འབྲེལ་བ་གནང་བ་བརྒྱུད། ཨོ་སི་ཊོ་ལི་ཡའི་ནང་ཡོད་པའི་བོད་རིགས་བུ་མོ་རྣམ་སྲས་ལྷ་མོ་དང་སྐལ་བཟང་ས་འཛིན། བསོད་ནམས་ལྷ་མོ། བརྩོན་འགྲུས་འོད་ཟེར། ཤེལ་དགེ་འདུན་ཚེ་རིང་། ཚེ་བརྟན་བཅས་བུ་མོ་ ༣ དང་བུ་ ༣ གློག་བརྙན་འཁྲབ་སྟོན་པའི་ནང་ཚུད་ཡོད་འདུག
གསར་འགོད་པ། པདྨ་མཚོ།
ཁྱེད་རྣམས་པ་ཚང་མ་ལ་ཐུགས་རྗེ་ཞུ་རྒྱུ་ཡིན་ལས་འགུལ་འདེ་འདྲ་གཅིག་སྤེལ་ཐུབ་པ་ལ་རྗེས་སུ་ཡིད་རང་ཡིན་།