གཡུ་སྒང་དགེ་འདུན།
སྤྱིར་མང་གཙོའི་ལམ་ལུགས་དེ་ཧ་ཅང་གི་རྩ་ཆེན་པོ་ཞིག་རེད་དེ། མང་ཚོགས་དཀྱུས་མ་ལ་ཤེས་ཡོན་དང་བསམ་བློའི་གོ་རྟོགས་ཀྱི་ཚད་ངེས་ཅན་ཞིག་མེད་ན་རང་ཉིད་ཀྱི་ཐོབ་དབང་དེ་སྐབས་འཚོལ་བ་དང་། སྤྱི་ཚོགས་ཁ་འཐོར་དུ་གཏོང་མཁན་སོགས་ཀྱི་བསམ་བློའི་གཡོ་འོག་ཚུད་འགྲོ་བས། ཧ་ཅང་ཉེན་ཁའི་རང་བཞིན་གྱི་ལམ་ཕྱོགས་ཤིག་ཆགས་འདུག རྒྱུ་མཚན་དེ་ལ་བརྟེན་ནས་ང་ཚོ་བོད་མི་ལ་མཚོན་ན་ད་དུང་མང་ཚོགས་ཀྱི་བསམ་བློའི་གོ་རྟོགས་ཆེའི་དམའ་ས་ཞིག་ན་ཡོད་པས་མང་གཙོའི་འགྲོ་སྟངས་གཙང་མ་ཞིག་འགྲོ་མི་ཐུབ་པ་མ་ཟད་འདེམ་བྱ་འདེམས་བྱེད་སྤྲས་དག་ཅིག་ཡོང་རྒྱུ་ཐེ་ཚོམ་དུ་གྱུར་ཡོད། འགོ་ཁྲིད་མཁན་རེ་གཉིས་ཀྱིས་མང་གཙོའི་ལམ་ཕྱོགས་བསྟན་ཀྱང་མང་ཚོགས་ཀྱི་བསམ་བློ་གཞན་དབང་ཅན་ཡིན་དུས་ལམ་ཕྱོགས་དེ་ལ་གོམ་པ་ཚད་ལྡན་ཞིག་སྤོ་མི་ཐུབ་པ་གཏན་ཁེལ་བ་ཞིག་རེད།
མ་འོངས་པའི་སྲིད་སྐྱོང་འོས་མིར་ལངས་མཁན་ཚོ་ཡིན་ནའང་འདྲ། སྤྱི་འཐུས་ལ་ལངས་མཁན་ཚོ་ཡིན་ནའང་འདྲ། ཁོ་ཚོས་གཏམ་བཤད་ཅི་འདྲ་བྱས་ཀྱང་གཙོ་བོ་འདེམས་མཁན་རང་ཉིད་ཀྱི་ངོས་ནས་མི་དེས་ སྔ་མའི་ཕྱག་ལས་གནང་བ་ལ་ཞིབ་གཟིགས་དང་། ད་ལྟའི་ཕྱག་ལས་གནང་བཞིན་པ་ལ་མིག་གིས་བལྟས། མ་འོངས་པའི་འཆར་འགོད་དེ་འགྲུབ་པའི་ནུས་ལྡན་ཞིག་རེད་དང་མ་རེད་བཅས་ལ་བརྟག་དཔྱད་བྱས་ཏེ། གཞི་ནས་མི་དེ་ལ་འོས་འཕངས་ན་ནོར་མེད་པར་འདོད། དེ་མིན་གཏམ་བཤད་གཅིག་བུ་ལ་ཆ་འཇོག་བྱས་ན་ནོར་འཁྲུལ་ཆེན་པོ་འབྱུང་བ་ཉག་ཅིག་རེད། ཁ་ནས་བཤད་ན་འདྲ་ཆགས་པོ་བཤད་མཁན་བརྒྱ་ཆའི་བདུན་ཅུ་ཟིན་ཐུབ། ཡིན་ནའང་ལག་བསྟར་ཕབ་ཐུབ་མཁན་བརྒྱ་ཆའི་ལྔ་བཅུ་ཟིན་མི་ཐུབ། ད་ལྟ་ང་ཚོའི་མིག་མཐོང་ལག་ཟིན་དུ་ཡོད་པ་ཞིག་དཔེ་མཚོན་དུ་དྲངས་ན། བླ་མ་དང་དགེ་བཤེས་སོགས་གཙོས་ཆོས་པ་ཚོའི་ཁྲོད་སེམས་ཅན་བསད་ན་སྡིག་པ་ཡོད་པ་དང་། དམར་ཟས་སྤོངས་ན་ཕན་ཡོན་ཡོད་ཚུལ་གསུང་མཁས་པའི་རིགས་བརྒྱ་ཆའི་དགུ་བཅུ་ཟིན་ཡོད། ཡིན་ནའང་དམར་ཟས་སྤངས་མཁན་བརྒྱ་ཆའི་བཅུ་ཟིན་ཁག་པོ་རེད། དེར་བརྟེན་མིག་མེད་གཡང་ལྷུང་འབྱུང་སྲིད་མོད། མིག་ལྡན་གཡང་མཆོང་བྱས་ན་ཐབས་སྐྱོ་བོ་ཆགས་པ་རེད། ང་ཚོའི་མིག་གིས་ཐག་རིང་པོ་ཞིག་ལ་ལྟ་མི་དགོས། ད་ལྟའི་སྲིད་སྐྱོང་ལས་ཐོག་གི་རྩ་དོན་གསུམ་གྱི་ཐད་ལ་བསམ་བློ་ཞིག་བཏང་ནའང་། འབྲས་བུ་ག་འདྲ་ཞིག་ཐོན་ཡོད་མེད་མི་ཚང་མའི་སེམས་ནང་ན། གསལ་གསལ་ཐིང་ཐིང་ཞིག་ཡོད་པ་རེད། དེ་ལ་ཡག་ཉེས་ཀྱི་འགྲེལ་བཤད་རྒྱག་མཁན་ཚོས་རང་ཉིད་ཀྱི་བསམ་བློ་གཞན་དབང་དུ་ གྱུར་པའི་རིགས་ལ་ལུས་སེམས་གཉིས་འཁྲུགས་སུ་བཅུགས་ཡོད་ལ། དེ་ནི་ང་ཚོ་ལ་མང་གཙོའི་བསམ་བློའི་ཆུ་ཚོད་ག་འདྲ་ཞིག་ཡོད་མེད་ར་འཕྲོད་བཅུགས་པ་ཙམ་རེད། ཆེས་རྙོག་འཛིངས་ཆེ་ཤོས་ནི་འོས་མིའི་རྒྱབ་སྐྱོར་བ་ཚོས་ཞེན་ཁོག་རང་བཞིན་དང་ རང་ཉིད་ཀྱི་འོས་མིའི་ཁ་གཏད་ལངས་མཁན་ལ་ཁུངས་སྐྱེལ་ཡོད་མེད་ལ་མ་ལྟོས་པར་ཉེས་ འཛུགས་ཅི་ཐུབ་བྱས་ཏེ་གནོད་སྐྱེལ་མཁན་གྱི་རིགས་སོགས་རེད།
གཞན་དབུ་མ་དང་རང་བཙན་གྱི་ཐད་ལ་རང་ཉིད་ཀྱི་བསམ་ཚུལ་ཐུང་ཐུང་ཞིག་བརྗོད་འདོད་བྱུང་། སྤྱིའི་ཆ་ནས་བཤད་ན་དོན་དངོས་ལོ་རྒྱུས་ལ་ནམ་ཡང་འགྱུར་བ་གཏོང་མི་ཐུབ། ཡིན་ནའང་། སྤྱི་ཚོགས་ཀྱི་འགྱུར་ལྡོག་གི་དབང་གིས་གནས་སྟངས་ལ་འགྱུར་བ་ཡོང་སྲིད་པ་ཞིག་རེད། གནས་སྟངས་འགྱུར་བའི་དབང་གིས་ལྟ་བའི་ལམ་ལུགས་སྣ་ཚོགས་ཡོང་ཆོག་ཆོག་ཅིག་ཏུ་གྱུར་ཡོད། དེའི་རྐྱེན་གྱིས་ང་ཚོ་བོད་ལ་མཚོན་ནའང་གོང་སྨྲས་ཀྱི་ལྟ་བའི་ལམ་ལུགས་གཉིས་ནི། དོན་དངོས་ཀྱི་ལམ་ལུགས་ཤིག་དང་། སྤྱི་ཚོགས་འགྱུར་ལྡོག་གི་ལམ་ལུགས་གཉིས་སུ་གྲུབ་ཡོད་ལ། འཛམ་གླིང་ལ་འགྱུར་བ་འགྲོ་བཞིན་ཡོད་དུས་ང་ཚོའི་དོན་དངོས་ཀྱི་ཐོག་ནས་བགྲོད་ན་བཟང་ངམ་སྤྱི་ཚོགས་ཀྱི་འགྲོས་དང་བསྟུན་ཏེ་ཐབས་ལམ་གཞན་གྱི་སྟེང་ནས་བགྲོད་ན་བཟང་། དེ་གཉིས་ཀྱི་གཅིག་བདམ་རྒྱུ་དེ་རེད། དེ་གཉིས་ཀྱི་གཅིག་འདེམ་དགོས་དུས། ང་ཚོའི་ངོས་ནས་བསམ་བློ་གཏོང་དགོས་པ་དེ་ཁ་གཏད་གཅོག་ཡུལ་རྒྱ་ནག་གི་ཨ་མཆོག་ཀྲོང་ཀྲོང་བྱེད་མིན་དང་། ཕྱིའི་རྒྱལ་ཁབ་ཁག་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་ལམ་དེ་གཉིས་ཀྱི་གང་ལ་རྒྱབ་སྐྱོར་ཤུགས་ཆེ་མིན་ལ་ལྟ་རྒྱུ་ལས་ལྷག་མེད། དོན་དངོས་ལོ་རྒྱུས་ལ་ནམ་ཡང་འགྱུར་བ་གཏོང་མི་ཐུབ་ཀྱང་ད་ལྟའི་ཆར་ང་ཚོ་བོད་པར་མཚོན་ན། སྤྱི་ཚོགས་འགྱུར་ལྡོག་གིས་བྱུང་བའི་ཐབས་ལམ་དབུ་མའི་ལམ་ལས་ལྷག་ཅིག་མེད་པ་ཕྱི་གསལ་ནང་གསལ་རེད། ཕྱི་གསལ་ནང་གསལ་ཡིན་པའི་འགྲེལ་བརྗོད་ཚིག་ཕྲེང་གཅིག་ཏུ་བསྡུས་ན། འགྲོ་བ་མིའི་ཐོབ་དབང་དང་མི་རིགས་རང་ཉིད་ཀྱི་ས་གནས་སུ་རིག་གཞུང་གོམས་གཤིས་ བདག་སྐྱོང་གི་དབང་ཚད་རེད། དེའི་ཐད་ལ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་རྒྱབ་སྐྱོར་དང་མཐོང་ག་འདྲ་ཞིག་འཇོག་གི་ཡོད་མེད་མིག་མཐོང་ལག་ཟིན་གྱུར་ཡོད་པ་ལ། བློ་གཟུ་བོར་གནས་པའི་བསམ་བློ་བ་ཚོ་ཡར་ཕུད་མི་མང་དཀྱུས་མ་ཚོས་ཀྱང་མཁྱེན་ཡོད་པའི་ཡིད་ཆེས་དང་། ཡིད་གཉིས་ཐེ་ཚོམ་མེད་པར་ཤར་བསྐྱོད་བྱེད་པའི་རེ་སྐུལ་ཀྱང་ཞུ་རྒྱུ།
མཐའ་དོན། ད་ལྟ་ང་ཚོའི་མི་མང་དཀྱུས་མ་ཚོའི་བསམ་བློ་འཁྲུགས་བསྡད་ཡོད་པས་ཆ་ནས་ངས་གསལ་འདེབས་ཞུ་རྒྱུ་ཞིག་ལ། དབུ་མའི་ལམ་ནི་༸གོང་ས་མཆོག་གིས་ཐུགས་བསམ་ནན་བཞེས་ཀྱིས་བཏོན་པའི་ཐབས་ལམ་ཞིག་དང་། ཁོང་གིས་ཉམས་མྱོང་མང་པོ་ཞིག་ཕྱོགས་སྡོམས་ཀྱིས་བཏོན་པའི་ཐབས་ལམ་ཞིག་ཡིན་པ་ལས། ཐུགས་ལ་ཅི་ཤར་གསུང་རྐྱང་གནང་བ་ཞིག་གཏན་ནས་མ་རེད། ལམ་འདི་ལ་དགག་ལན་རྒྱག་འདོད་ན། དང་པོ། རང་ཉིད་ཀྱི་ཤེས་ཚད་དང་འཇོན་ཐང་། ད་ལྟ་བར་དུ་རང་ཉིད་ཀྱིས་ལས་ཀའི་ཉམས་མྱོང་སོགས་༸གོང་ས་མཆོག་ལས་ལྷག་ཅིག་ཐོན་ཡོད་པ་ཞིག་དགོས་མོད། འོན་ཀྱང་། དེ་འདྲ་ཞིག་མེད་ན། དམའ་མཐའ་ཡང་ཕྱོགས་གང་ཐད་ནས་༸གོང་ས་མཆོག་གི་ཤེས་ཚད་འཇོན་ཐང་ཉམས་མྱོང་སོགས་དོ་མཉམ་པ་ཞིག་དགོས། དེ་མེད་ན་སྐད་ཅོར་བརྒྱབ་པ་ཙམ་དང་། མང་ཚོགས་དཀྱུས་མ་བསམ་བློ་གཞན་དབང་དུ་གྱུར་པའི་རིགས་ལ་མགོ་སྐོར་དང་། སྤྱི་ཚོགས་ལ་རྙོག་གྲ་སློང་བྱེད་ཙམ་ལས་དོན་སྙིང་ཅི་ཡང་མེད་པར་འདོད།
