ཧིན་སྒོར་དུང་ཕྱུར་ ༤ ཡི་རོཊ་དངུལ་གནང་།

རྒྱ་གར་གཞུང་གིས་བོད་མིའི་སྒྲིག་འཛུགས་ནང་སྲིད་ལས་ཁུངས་ལ་མ་འོངས་ལོ་ ༥ ཡི་ནང་ཧིན་སྒོར་དུང་ཕྱུར་ ༤ ཡི་རོགས་དངུལ་གནང་གཏན་འཁེལ་ཡོད་འདུག

ཉེ་སྔོན་རྒྱ་གར་དབུས་གཞུང་ནས་བཙན་བྱོལ་བོད་མིའི་ནང་སྲིད་ལས་ཁུངས་ཀྱི་དབུས་ངལ་སེལ་ཚོགས་པའི་འཛིན་སྐྱོང་གི་འགྲོ་གྲོན་ཆེད། མ་འོངས་ལོ་ལྔ་ཚན་གཅིག་རིང་ལོ་རེར་ཧིན་སྒོར་འབུམ་ ༨༠༠ རེ་བཅས་ཁྱོན་ཧིན་སྒོར་དུང་ཕྱུར་ ༤ གནང་རྒྱུ་ཞལ་བཞེས་གནང་ཡོད་སྟབས། དེ་རིང་ཉིན་རྒྱབ་འདི་གའི་གསར་འགོད་པས་དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་སུ་གནས་ཚུལ་དེའི་སྐོར་བཀའ་འདྲི་ཞུས་ཡོད།

ནང་སྲིད་དྲུང་ཆེ་ལགས་ཀྱིས་རོགས་དངུལ་ཕོན་ཆེན་པོ་དེ་ཇི་ལྟར་རག་པ་དང་མ་འོངས་གཏོང་ཕྱོགས་སྐོར་ངོ་སྤྲོད་གནང་དོན། གཙོ་བོ་སྐབས་བཅུ་བཞི་པའི་བཀག་ཤག་གི་སྲིད་བྱུས་དགོངས་དོན་ལྟར་ནང་སྲིད་བཀའ་བློན་གཙོས་པའི་ཚང་མས་བར་ལམ་ཡུན་རིང་དཀའ་ལས་བསྐྱོན་པར་བརྟེན། བོད་མིའི་སྒྲིག་འཛུགས་ནང་ལ་དཀའ་ངལ་ཆེ་ས་གང་ནས་འཕྲད་ཀྱི་ཡོད་མེད་ཀྱི་དོན་ཚན་བཅོ་ལྔ་ཙམ་ཞིག་རྒྱ་གར་དབུས་གཞུང་ལ་སྙན་སེང་ཅིག་ཞུས་པ་རེད། སྙན་སེང་ཞུས་པའི་ནང་བོད་པའི་གཞིས་ཆགས་ཁག་དང་དམིགས་བསལ་ལྷོ་ཕྱོགས་ཁུལ་གྱི་གཞིས་ཆགས་གཙོས། རྒྱ་གར་གྱི་སྲུང་སྐྱོབ་ས་ཁུལ་གྱི་བོད་གཞིས་ཁག་ལ་ཕྱི་རྒྱལ་གྱི་མི་སྣ་ཡོང་སྐབས་བཀའ་ཁྲོལ་ཞུ་དགོས་པ་དེ་འདྲ་ཡོད་པར་བརྟེན། རྒྱ་གར་དབུས་གཞུང་ལ་ལམ་ལུགས་དེ་དག་ལ་ཕྲན་བུ་གུ་ཡངས་གནང་ཐུབ་ན་ཞེས་ཞུས་ཡོད་སྟབས། ཁོ་ཚོས་དེ་ཚོ་སྟབས་བདེ་པོ་ཞིག་ཡོང་རྒྱུར་དགོངས་པ་བཞེས་ཀྱི་ཡིན་གསུངས་པ་དང་འབྲེལ། དེ་དེ་བཞིན་གྱི་དོན་ཚན་གཉིས་ཐོག་ལ་ཞལ་བཞེས་གནང་ཐུབ་མེད་ཀྱང་། དེ་བྱིངས་ཀྱི་དོན་ཚན་བཅོ་ལྔ་ནས་ ༡༣ ཆ་ཚང་བོད་མིའི་གནས་སྟངས་དང་འབྲེལ་བ་ཡོད་པ་ཤ་སྟག་ཡིན་སྟབས། རྒྱ་གར་དབུས་གཞུང་ནང་སྲིད་ལྷན་ཁང་གི་འབྲེལ་ཡོད་ལས་ཁུངས་ཁག་ལ་སྔ་རྗེས་བཀའ་བསྡུར་མང་པོ་གནང་རྗེས། ཁོང་རྣམ་པས་བཀའ་སྡུར་གནང་བ་དག་བོད་པའི་གཞིས་ཆགས་ཡོད་སའི་མངའ་སྡེ་ཁག་བཅུ་གྲངས་ཁག་ལ་མངའ་སྡེའི་སྤྱི་ཁྱབ་ཀྱིས་སྤྱི་ཁྱབ་དྲུང་ཆེའི་མཚན་ཐོག་ནས་གསལ་བསྒྲགས་ཤིག་བཏང་ཡོད་པ་རེད། དེའི་ནང་རྒྱ་གར་གཞུང་གིས་བཙན་བྱོལ་བོད་མིར་སྲིད་བྱུས་འདི་འདྲ་ཞིག་འཛིན་རྒྱུའི་འཆར་གཞི་ཡོད་སྟབས། མངའ་སྡེ་སོ་སོས་ཁྲིམས་དང་མཐུན་མིན་ཐོག་ལ་ཞིབ་འཇུག་བྱས་ནས་རྒྱ་གར་དབུས་གཞུང་ལ་གཏོང་དགོས་པའི་བཀའ་གནང་ཡོད་པ་རེད། བཀའ་གནང་བ་ལྟར་མངའ་སྡེ་སོ་སོས་གནས་སྟངས་དེ་ཚོའི་ཐོག་ལ་ཞིབ་འཇུག་བྱས་ནས་རྒྱ་གར་དབུས་གཞུང་ནང་སྲིད་ལྷན་ཁང་ལ་བཏང་རྗེས། མཐར་རྒྱ་གར་དབུས་གཞུང་གིས་ལྡི་ལིར་བོད་དོན་གྱི་འབྲེལ་ཡོད་ལས་ཁུངས་ཁག་དང་ལྷན་དུ་སྔ་རྗེས་ཐེངས་གསུམ་ཙམ་རིང་བཀའ་བསྡུར་གནང་རྗེས། སྲིད་བྱུས་དེ་གཏན་འབེབས་གནང་བ་རེད། ཅེས་དང་།

ཁོང་གིས་མུ་མཐུད། སྲིད་བྱུས་དེའི་ནང་ལ་གཙོ་ཆེ་ཤོས་ང་ཚོ་བོད་མི་གནས་སའི་ས་ཆའི་བདག་དབང་ལ་སོགས་པ་དེ་རིགས་བོགས་མར་བླངས་ཡོད་སྟབས། གཞིས་ཆགས་ཁ་ཤས་ཀྱི་བོགས་དུས་ཚང་གི་ཡོད་སྟབས། དེ་ཚོའི་རིགས་གཅིག་གྱུར་ཡོང་ཆེད་དང་། ད་ལྟ་ང་ཚོ་རྒྱ་གར་གཞུང་གིས་གནང་བའི་ས་ཆའི་ཐོག་བསྡད་ཡོད་ཀྱང་། བསྡད་ས་འདི་ཉིད་ཁྲིམས་ཀྱི་སྒང་ལ་གནས་སྟངས་གང་འདྲ་ཆགས་ཡོད་མེད་གསལ་པོ་གང་ཡང་མེད་སྟབས། ད་ཕན་ང་ཚོར་དཀའ་ངལ་གང་ཡང་འཕྲད་མེད་ཀྱང་། མ་འོངས་པར་བོད་མིར་དགའ་མོས་མེད་མཁན་གྱི་རྒྱ་གར་བ་རེ་ཟུང་གིས་ས་ཆའི་བདག་དབང་དེ་རིགས་ཐོག་ཁ་མཆུ་དེ་འདྲ་ཚུགས་པ་ཡིན་ན། ང་ཚོའི་ཁྲིམས་མཐུན་བདག་དབང་གི་ཡིག་ཆ་དེ་ཡག་པོ་ཞིག་མེད་ན་ཉེན་ཁ་ཆགས་ཀྱི་ཡོད་སྟབས། ང་ཚོས་ཕུགས་ལ་དེ་ཚོའི་རིགས་ལ་དཀའ་ངལ་ཆེན་མོ་མ་འཕྲད་པའི་ཆེད་དུ་བསྒྱུར་བཅོས་ཞེ་དྲགས་བཏང་ཡོད་པ་རེད། དེ་དང་འབྲེལ་བའི་ཐོག་ནས་ནང་སྲིད་ལས་ཁུངས་ཀྱི་ཁྱབ་ཁོངས་སུ་སོ་ནམ་གཞིས་ཆགས་ཆེ་ཁག་ ༡༥ དང་། བཟོ་ལས་གཞིས་ཆགས་ཁག་ ༡༠ གྲངས་ཤིག བཟོ་ཞིང་གཞིས་ཆགས་ཁག་ ༡༠ གྲངས་ཤིག་བཅས་རྒྱ་གར་ནང་བོད་གཞིས་ཆེ་ཆུང་བསྡོམས་པའི་ ༤༧ དང་ ༤༨ ཙམ་ཞིག་ཡོད་སྟབས། དེ་ཚོའི་འཛིན་སྐྱོང་གི་འགྲོ་གྲོན་གཏོང་རྒྱུའི་དཀའ་ངལ་ཕལ་ཆེར་ལོ་རེ་ལས་མ་འདས་པར་ཆེ་རུ་འགྲོ་བཞིན་ཡོད་སྟབས། ང་ཚོས་རྒྱ་གར་དབུས་གཞུང་ལ་བོད་མིའི་གཞིས་ཆགས་ཁག་གི་འཛིན་སྐྱོང་འགྲོ་གྲོན་དག་རྒྱ་གར་གཞུང་གིས་གནང་ཐུབ་ན་དཔེ་མི་སྲིད་པའི་ཕན་ཐོགས་ཆེན་པོ་ཡོང་ས་རེད་ཅེས་ཡར་ཞུས་པ་པ་མ་ཟད། ནང་སྲིད་བཀའ་བློན་མཆོག་གཙོས་པའི་ལས་བྱེད་རྣམ་པས་སྔ་བར་ཕྱི་གསུམ་ཐོག་ནས་མཇུག་སྣོན་གནང་བར་བརྟེན། བར་ལམ་ཞིག་ནས་རྒྱ་གར་དབུས་གཞུང་ནང་སྲིད་ལྷན་ཁང་གིས་བཙན་བྱོལ་བོད་མིའི་སྒྲིག་འཛུགས་ནང་སྲིད་ལས་ཁུངས་ལ་ལོ་ལྔ་ཚན་ཞིག་ནང་ཧིན་སྒོར་འབུམ་ ༤༠༠༠ གནང་རྒྱུ་ཞལ་བཞེས་གནང་ཡོད་པ་རེད། ལོ་རེར་རྩིས་ན་འབུམ་ ༨༠༠ ཆགས་ཀྱི་ཡོད་པ་མ་ཟད། རོགས་དངུལ་དེ་དག་ ༢༠༡༥ ལོ་ནས་མགོ་འཛུགས་ཀྱིས་ ༢༠༡༩ དང་ ༢༠༢༠ བར་གནང་རྒྱུ་ཞལ་བཞེས་ཐོབ་ཡོད་པ་རེད། དེ་ཚོ་གནང་དགོས་དོན་གཙོ་བོ་ནི་ས་གནས་འགོ་འཛིན་ཁག་དང་ནང་སྲིད་ལས་ཁུངས་ཀྱི་དབུས་ངལ་སེལ་ཚོགས་པའི་འཛིན་སྐྱོང་གི་འགྲོ་གྲོན་གཏོང་ཆེད་དམིགས་ནས་གནང་བ་ཞིག་ཆགས་ཡོད་པ་རེད། ཅེས་གསུངས་བྱུང་།

རོགས་དངུལ་དེ་དག་ལས་འཆར་ག་པར་གཏོང་རྒྱུ་ཡིན་མིན་དྲིས་པར་ཁོང་གིས། རྒྱ་གར་དབུས་གཞུང་གིས་ལོ་རེར་ཧིན་སྒོར་འབུམ་ ༨༠༠ གསོལ་སྩལ་གནང་བཞག་པ་དེའི་དངུལ་འབོར་གྱི་བརྒྱ་ཆ་ ༢༥ དེ་ལས་བྱེད་ཀྱི་གསོལ་ཕོགས་ཆེད་དུ་གཏོང་ཆོག་གི་ཡོད་པ་དང་། དེ་དངུལ་འབོར་རྩིས་ན་ཕལ་ཆེར་འབུམ་ ༢༠༠ ལྷག་ཆགས་ཀྱི་ཡོད་པ་རེད། ལོ་གཅིག་ནང་སྲིད་ལས་ཁུངས་ཀྱིས་དབུས་ངལ་སེལ་ཚོགས་པའི་ཁྱབ་ཁོངས་ལས་བྱེད་ལ་ཕོགས་སྤྲོད་དགོས་པ་འབུམ་ ༢༥༠ ནས་ ༣༠༠ ཙམ་ཆགས་ཀྱི་ཡོད་སྟབས། དེའི་བརྒྱ་ཆ་ ༢༠ རྩ་གྲངས་ཤིག་མ་གཏོགས་དེ་བྱིངས་ཀྱི་དངུལ་ཆ་ཚང་རྒྱ་གར་གཞུང་གི་རོགས་དངུལ་དེ་ནས་གཏོང་ཐུབ་ཀྱི་ཡོད་པ་རེད། དེ་ནས་བརྒྱ་ཆ་ ༧༥ ལྷག་ཡོད་པ་དེ་གཞིས་ཆགས་ཁག་འཚོ་གནས་ཐུབ་ཆེད་འཛུགས་སྐྲུན་ལས་གཞིའི་ཐོག་གཏོང་དགོས་པ་ཆགས་ཀྱི་རེད། ས་གནས་སོ་སོས་ཕུགས་རྒྱང་རིང་པོར་དགོངས་པ་བཞེས་ནས་འཆར་གཞི་འདི་དང་དེ་ཡིན་ཟེར་ནས་ནང་སྲིད་ལས་ཁུངས་ལ་འབུལ་དགོས་པ་རེད། ང་ཚོས་ས་གནས་ཀྱི་གནས་སྟངས་ལ་དཔག་ནས་ཁུངས་འཁྱོལ་མིན་ཐད་སྔ་རྗེས་ཞིབ་འཇུག་བྱས་རྗེས། བཀའ་ཤག་ལ་བཀའ་ཁྲོལ་ཞུས་ནས་ཆོག་མཆན་གནང་བ་ཡིན་ན། ང་ཚོས་འཆར་དངུལ་སྤྲོད་རྒྱུ་བཅས་ཀྱི་བརྒྱུད་རིམ་འདི་འདྲ་ཡིན། ཞེས་གསུངས་བྱུང་།

མཇུག་ཏུ་ད་ལྟའི་རྒྱ་གར་གཞུང་གི་རོགས་དངུལ་འདི་དང་ ༼བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ ༢༠༡༤༽ ཞེས་པ་བར་ལ་འབྲེལ་བ་གང་ཆགས་ཡོད་མེད་དྲིས་པར་ཁོང་གིས། རྩ་བའི་རོགས་དངུལ་གནང་བ་དེ་ཚོའི་རིགས་ཏེ། ང་ཚོའི་འཐབ་རྩོད་འདི་གསལ་པོ་མ་བྱུང་བར་དུ་རྒྱ་གར་ནང་གནས་དགོས་པ་ཆགས་ཡོད། ང་ཚོར་རྒྱ་གར་མ་ཡིན་པའི་ས་ཆ་གཞན་ཞིག་ལ་འགྲོ་ཆོག་ཆོག་དང་སྡོད་ཆོག་ཆོག་གང་ཡང་མེད་སྟབས། ད་ལྟ་ང་ཚོའི་སྡོད་ས་འདི་ཁྲིམས་མཐུན་ཡག་པོ་ཞིག་ཆགས་མ་ཐུབ་པ་ཡིན་ན། མ་འོངས་པར་རང་བཞིན་གྱིས་དཀའ་ངལ་འཕྲད་རྒྱུ་ཡིན་སྟབས། ལས་གཞི་འདི་ངས་གོང་དུ་ཞུས་པའི་དོན་ཚན་ ༡༣ ནང་ལ་ཧ་ལམ་ཚུད་བསྡད་ཡོད་པ་རེད། དེ་ཚགས་ཚུད་ཡག་པོ་ཞིག་ཡོང་བར་དབུས་ངལ་སེལ་ཚོགས་པ་གཙོས་པའི་ས་གནས་འགོ་འཛིན་ཁག་གིས་འཛིན་སྐྱོང་ལས་ཀ་བྱེད་དགོས་པ་ཆགས་ཡོད་སྟབས། ལས་བྱེད་ལ་གླ་ཕོགས་སྤྲོད་དགོས་པར་བརྟེན། འདི་དང་རྒྱ་གར་དབུས་གཞུང་གིས་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ ༢༠༡༤ ཞེས་པ་དང་འབྲེལ་བ་ཡོད་བསྡད་པ་ཞིག་ཆགས་ཡོད། ཅེས་གསུངས་བྱུང་།

གསར་འགོད་པ། དོན་གྲུབ།