རྒྱ་ནག་ནས་ཡིན་པའི་རྒྱ་རིགས་སློབ་ཕྲུག་ནས་༧གོང་ས་མཆོག་ཞལ་མཇལ་གསུང་ཐོས་བྱུང་རྗེས་ཀྱི་སེམས་ཚོར་ཞེས་པའི་བཅར་འདྲིའི་རྩོམ་ཡིག་འདི་ནི་ནོ་ཝེ་བོད་ཀྱི་རླུང་འཕྲིན་ཁང་གི་རྒྱ་ཡིག་དྲྭ་རྒྱའི་ཐོག་བཀོད་འདུག རྒྱ་སྐད་རྒྱ་ཡིག་མ་མཁྱེན་མཁན་གྱི་ཀློག་པ་པོ་རྣམས་ནས་རྒྱ་རིགས་ཀྱིས་བོད་དོན་ཐོག་བསམ་ཚུལ་ཇི་ཡོད་མཁྱེན་རྟོགས་ཆེད་གུས་པས་བོད་སྒྱུར་ཞུས་པ་ཡིན། ཚང་མས་ཐུགས་སྣང་ཡོང་བའི་རེ་བ་ཡོད། ཐུགས་རྗེ་ཆེ།
༄༅། རྒྱ་ནག་ནས་ཡིན་པའི་རྒྱ་རིགས་སློབ་ཕྲུག་ནས་༧གོང་ས་༧སྐྱབས་མགོན་ཆེན་པོའི་ཞལ་མཇལ་གསུང་ཐོས་བྱུང་རྗེས་ཀྱི་སེམས་ཚོར།
དྲུང་འཕར་ཀུན་དགའ་བཀྲིས་ཀྱིས་བོད་སྒྱུར་ཞུས།
ལོ་འདིའི་ཕྱི་ཟླ་ ༦ པའི་ཟླ་འགོར་༧གོང་ས་༧སྐྱབས་མགོན་ཆེན་པོ་མཆོག་ཨོ་སི་ཀྲོ་ལིར་ཡར་ཆིབས་སྒྱུར་བསྐྱངས་སྐབས་རྒྱ་ནག་སྐམ་ས་ཆེན་པོ་དང་། ཧོང་ཀོང་། ཐེ་ཝན་བཅས་ཀྱི་སློབ་ཕྲུག་ཁག་ཅིག་ནས་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུས། དེའི་ཁྲོད་ནས་རྒྱ་ནག་ནས་ཡིན་པའི་སློབ་མ་ཀྲང་ཧྲང་(Zhang Shang)གིས་འདི་ག་རླུང་འཕྲིན་ཁང་(ནོ་ཝེ་བོད་ཀྱི་རླུང་འཕྲིན་ཁང་།)གི་བཅར་འདྲི་དང་ལེན་གནང་སྐབས། ༧གོང་ས་མཆོག་ཞལ་མཇལ་བྱུང་རྗེས་སེམས་ལ་ཚོར་བ་ཇི་བྱུང་དང་། ཨོ་སི་ཀྲོ་ལི་ཡར་ཡོད་པའི་རྒྱ་ནག་ནས་ཡིན་པའི་སློབ་ཕྲུག་དང་བོད་མིའི་དབར་ཕན་ཚུན་འབྲེལ་ལམ་ཇི་བྱུང་སོགས་ཀྱི་སྐོར་ལ་གླེང་མོལ་གནང་།
ནོོ་ཝེ་བོད་ཀྱི་རླུང་འཕྲིན་ཁང་། ཀྲང་ཧྲང་གིས་སྔོན་ལ་ཁོང་དང་། དེ་མིན་གྱི་རྒྱ་ནག་དང་། ཧོང་ཀོང་། ཐེ་ཝན་བཅས་ཀྱི་སློབ་མ་ཚོས་༧གོང་ས་མཆོག་མཇལ་བའི་སྐབས་ཀྱི་གནས་ཚུལ་ངོ་སྤྲོད་གནང་བ་མ་ཟད། ཁོང་གི་སེམས་ལ་ཚོར་བ་ཇི་བྱུང་ངོ་སྤྲོད་གནང་བྱུང་།
ཀྲང་ཧྲང་། ཁྱེད་ཀྱིས་ང་ལ་སེམས་ཚོར་ཇི་བྱུང་བཀའ་འདྲི་གནང་པ་རེད། ང་རང་ཧ་ཅང་གི་དགའ་པོ་བྱུང་། གང་ཡིན་ཟེར་ན། རྒྱ་ནག་ནས་ཡིན་པའི་རྒྱ་རིགས་སློབ་ཕྲུག་ཚོས་༧གོང་ས་མཆོག་མཇལ་འདོད་ཡོད་པ་འདི་རང་གིས་ང་རང་དགའ་པོ་བྱུང་། ཐོག་མར་ངས་སློབ་ཕྲུག་ཚོར་འབྲེལ་བ་བྱེད་སྐབས་དཀའ་ངལ་ཕྲན་བུ་འཕྲད་བྱུང་། སློབ་མ་ཁ་ཤས་ཀྱིས་༧གོང་ས་མཆོག་མཇལ་རྒྱུའི་འདོད་པ་དེ་ཙམ་མི་འདུག ཕལ་ཆེར་རྒྱ་ནག་དམར་པོའི་གཞུང་གིས་ཀླད་པ་གཏིང་ཟབ་བཀྲུས་པའི་རྒྱུ་མཚན་གྱིས་མིན་ནམ་སློབ་མ་ཁ་ཤས་ནས་༧གོང་ས་མཆོག་ནི་བོད་རང་བཙན་རྩོད་མཁན་ཡིན་པར་ངོས་འཛིན་བྱེད་ཀྱི་འདུག དེ་རྗེས་ངས་༧གོང་ས་མཆོག་གིས་དབུ་མའི་ལམ་རྒྱུན་འཁྱོངས་གནང་གི་ཡོད་པ་ལས་རང་བཙན་རྩོད་གླེང་གནང་གི་མེད་པ་དང་། ཁོང་གིས་བོད་ཀྱི་ཆོས་དང་། རིག་གཞུང་། མི་མང་གི་ཁེ་དབང་བཅས་སྲུང་སྐྱོབ་གནང་ཆེད་དུ་མིང་དོན་མཚུངས་པའི་རང་སྐྱོང་རྩོད་ལེན་གནང་གི་ཡོད་སྐོར་སོགས་ཀྱི་དངོས་དོན་འགྲེལ་བརྗོད་བྱས་པ་ཡིན། འོན་ཀྱང་སློབ་ཕྲུག་ཁ་ཤས་ལ་འགྲེལ་བརྗོད་ག་ཚོད་བྱས་ཀྱང་ཕན་ཐོགས་མི་འདུག་སྟབས། ངས་འགྲེལ་བཤད་ཟུགས་ས་ཡོད་པའི་སློབ་མ་ཁ་ཤས་དང་། རྣམ་ཀུན་བོད་ཀྱི་གནད་དོན་ལ་དོ་སྣང་ཡོད་པའི་སློབ་མ་རེ་ཟུང་དང་སྐད་ཆ་བཤད་པ་ཡིན། མཐར་བོད་ལ་དོ་སྣང་ཡོད་པའི་སློབ་མ་དེ་ཚོའི་གྲས་དང་། ད་དུང་ཧོང་ཀོང་དང་། ཐེ་ཝན་ནས་ཡིན་པའི་སློབ་མ་ཁ་ཤས་བཅས་སློབ་མ་ཁག་ཅིག་༧གོང་ས་མཆོག་གི་མཇལ་ཁར་བཅར་བ་རེད།
མཇལ་ཁའི་དུས་ཡུན་རིང་པོ་དེ་ཙམ་མིན་ཀྱང་། དེའི་དོན་སྙིང་ནི་ཧ་ཅང་ཟབ་མོ་ཡིན་པའི་ཚོར་སྣང་བྱུང་། གང་ཡིན་ཟེར་ན། ང་ཚོས་ཐད་ཀར་༧གོང་ས་མཆོག་དངོས་སུ་མཇལ་རྒྱུ་བྱུང་བ་དང་། ༧གོང་ས་མཆོག་ནས་ཀྱང་སློབ་མ་རྣམས་ལ་ཐད་ཀར་བོད་ཀྱི་སྐོར་འགྲེལ་བརྗོད་གནང་བ་རེད། ༧གོང་ས་མཆོག་ནི་ཐུགས་གཤིས་འཇམ་ལ་མཇལ་བདེ་བ་དང་། འགྲོགས་བདེ་ལ་གཤིབ་བདེ་བ། དཔེར་ན། ང་ཚོར་ཕྱག་བཏང་བ་གནང་སྐབས་ཤུགས་ཆེན་པོས་ཕྱག་བཏང་བ་བཅས་ཀྱིས་ཁོང་གིས་རྒྱ་རིགས་སློབ་མ་རྣམས་ལ་ཐུགས་སྣང་ཆེན་པོ་དང་། ནན་ཏན་གིས་མཇལ་འཕྲད་གནང་བ་ལས་ཆེ་ཉམས་རྒྱས་སྤྲོས་མཁན་གྱི་སྐྱེས་བུ་ཞིག་མིན་པའི་ཚོར་བ་སྟེར།
དེ་མིན་ད་དུང་ངས་བཤད་འདོད་པ་ནི། སློབ་ཕྲུག་དེ་འདྲ་མང་པོས་༧གོང་ས་མཆོག་མཇལ་བར་ཡོང་འདོད་བྱེད་པ་འདི་ཧ་ཅང་གི་འགོ་འཛུགས་བཟང་པོ་ཞིག་ཡིན་པ་མ་ཟད། ཞི་ཅིན་ཕིང་གིས་རྒྱ་རིགས་སློབ་ཕྲུག་ལ་འཐབ་ཕྱོགས་གཅིག་གྱུར་བྱེད་རྒྱུའི་འདུན་པ་མངོན་འགྱུར་མ་བྱུང་བ་རེད། གང་ཡིན་ཟེར་ན། སློབ་ཕྲུག་ཚོས་༧གོང་ས་མཆོག་མ་མཇལ་གོང་རྒྱ་ནག་གཞུང་གི་གསང་བའི་ལས་ཁུངས་ནས་རྒྱ་ནག་ནང་གི་ངའི་ནང་ལ་ཕྱིན་འདུག གསང་བའི་ལས་ཁུངས་ཀྱིས་ངའི་ནང་དུ་ཕྱིན་པའི་གནས་ཚུལ་དེ་ཐོག་མར་ཧ་གོ་དུས་ང་ནི་ཧང་སངས་སོང་། གང་ཡིན་ཟེར་ན། ང་ཕྱི་རྒྱལ་ཨོ་སི་ཀྲོ་ལི་ཡར་སློབ་སྦྱོང་བྱེད་ཀྱི་ཡོད་ཀྱང་། གསང་བའི་ལས་ཁུངས་ཀྱིས་རྒྱ་ནག་ཏུ་ཡོད་པའི་ངའི་ནང་ལ་ཕྱིན་ནས་ནང་མི་བཙལ་བས་རེད། ནང་མི་བཙལ་ཚར་བའི་རྗེས་ལ་ང་རང་གི་སེམས་ནང་ཞེད་སྣང་ཡང་བྱུང་། གསང་བའི་ལས་བྱེད་ཀྱིས་ངའི་ཕ་མ་གཉིས་ལ་ཁྱེད་རང་གི་བུ་ཏོག་ཙམ་མངོན་ཆུང་བྱས་ན་ཡག་པོ་ཡོད་པ་རེད་ཅེས་བཤད་པ་དང་ཆབས་ཅིག ཁྱེད་རང་གི་བུས་ “བོད་རང་བཙན་བྱེད་མཁན་གྱི་ཚོགས་པ་” དང་འགྲོ་འོང་བྱེད་ཀྱི་ཡོད་པ་ང་ཚོས་ཤེས་རྟོགས་བྱུང་ཞེས་བཤད་འདུག ༧གོང་ས་མཆོག་དང་ང་ཚོ་རྒྱ་རིགས་སློབ་ཕྲུག་རྣམས་ཀྱི་མཇལ་འཕྲད་དེ་གྲ་སྒྲིག་བྱེད་དུས་གསང་བ་བྱས་པ་མ་གཏོགས་མངོན་གསལ་དོད་པོ་བྱས་ཡོད་པ་མ་རེད། བྱས་ཙང་ཁོང་ཚོས་ངས་མཇལ་འཕྲད་དེ་འདྲ་ཞིག་གྲ་སྒྲིག་བྱེད་ཀྱི་ཡོད་པ་ཕལ་ཆེར་ཤེས་ཀྱི་མ་རེད། ཡིན་ན་ཡང་ངས་ས་གནས་བོད་རིགས་ཚོས་གོ་སྒྲིག་བྱས་པའི་ལས་འགུལ་ནང་མཉམ་ཞུགས་བྱས་པ་དེ་ཁོང་ཚོས་ཤེས་སྟབས། ང་དང་བོད་པའི་དབར་ལ་འགྲོ་འོང་ཡོད་པ་ཤེས་ཡོད་ཀྱི་རེད།
དེ་འདྲའི་གནས་སྟངས་འོག ༧གོང་ས་མཆོག་ཀྱང་ཨོ་སི་ཀྲོ་ལི་ཡར་ཕེབས་ལ་ཉེ་བར་བརྟེན། ངས་གཅིག་བྱེད་ཀྱི་ཡོད་ཀྱི་རེད་བསམ་ནས་ངའི་ནང་ལ་ཕྱིན་ནས་ནང་མིར་སྐད་ཆ་བཤད་པ་ཡིན་ས་རེད། རྗེས་སུ་དྲུག་བཞིའི་དོན་རྐྱེན་ཏེ། ཕྱི་ཟླ་ ༦ ཚེས་ ༤ སྔོན་ལ་གསང་བའི་ལས་ཁུངས་ཀྱི་མི་སྣ་སླར་ཡང་ངའི་ནང་ལ་ཐེངས་གཅིག་ཕྱིན་ནས་ཁྱེད་རང་གི་བུ་དྲུག་བཞིའི་དོན་རྐྱེན་ལ་དྲན་གསོ་ཞུ་བའི་ལས་འགུལ་ནང་ཞུགས་མ་བཅུག་ན་ཡག་པོ་ཡོད་པ་རེད་ཅེས་བཤད་འདུག དྲུག་བཞིའི་དོན་རྐྱེན་ལ་དྲན་གསོ་བྱེད་པའི་སྐབས་ངས་འོས་འཚམས་ཀྱི་མངོན་ཆུང་བྱས་པ་ཡིན། དེ་ནི་ངས་རྒྱ་གཞུང་གསང་བའི་ལས་ཁུངས་ལ་དཱ་ཀྲང་ཧྲིང་ཁོ་གཉའ་ཆག་འདུག་སྙམ་པའི་འཁྲུལ་སྣང་སླེབས་ཆེད་དུ་ཡིན། དོན་དུ་ངས་དེ་ལས་གལ་ཆེ་བའི་ལས་འགན་ཏེ། རྒྱ་རིགས་སློབ་ཕྲུག་དང་༧གོང་ས་མཆོག་མཇལ་རྒྱུའི་ལས་དོན་སྒྲུབ་ཀྱིན་ཡོད། ཕལ་ཆེར་ངས་མངོན་ཆུང་བྱས་པའི་རྒྱུ་མཚན་གྱིས་མིན་ནམ། དེའི་རྗེས་ལ་གསང་བའི་ལས་ཁུངས་ཀྱི་མི་ངའི་ནང་ལ་ཕྱིན་མི་འདུག ངས་གསང་བའི་སྒོ་ནས་མཇལ་འཕྲད་ཀྱི་ལས་དོན་དེ་གྲ་སྒྲིག་བྱས་མཐར་གནོན་ཤུགས་སྣ་ཚོགས་ལས་རྣམ་པར་རྒྱལ་ཏེ་རྒྱ་རིགས་སློབ་ཕྲུག་ཚོས་༧གོང་ས་མཆོག་མཇལ་ཐུབ་པ་བྱུང་། མཇལ་ཁ་ཚར་ནས་ང་ཚོ་ཕྱིར་ལོག་རྗེས་སློབ་ཕྲུག་ཚང་མ་ཧ་ཅང་གི་དགའ་པ་དང་།འདོད་པ་འཚིམས་པོ་བྱུང་འདུག ཁུལ་དེའི་རྒྱ་རིགས་འབྲེལ་མཐུད་པ་ཟླ་སྒྲོན་གྱིས་གལ་སྲིད་རྒྱ་རིགས་སློབ་ཕྲུག་རྣམས་སྟབས་མི་བདེ་བ་དང་། འཛེམས་ཆ་ཡོད་ན། མཇལ་ཁའི་སྐབས་ཀྱི་སྐུ་པར་ཡོངས་བསྒྲགས་བྱེད་ཀྱི་མིན་ཞེས་གསུངས་བྱུང་། ཧོང་ཀོང་དང་། ཐེ་ཝན་ནས་ཡིན་པའི་སློབ་ཕྲུག་ཚོས་འཛེམས་ཟོན་གང་ཡང་བྱེད་ཀྱི་མི་འདུག གང་ཡིན་ཟེར་ན། ཁོང་ཚོར་ཉེན་ཁ་ཡོད་པ་མ་རེད། འོན་ཀྱང་རྒྱ་ནག་ནས་ཡིན་པའི་ང་ཚོ་རྒྱ་རིགས་སློབ་མ་རྣམས་ནང་གྲོས་བྱས་པར། ང་ཚོས་རྒྱ་ནག་གཞུང་ལ་དེ་ལྟ་བུའི་འཇིགས་སྣང་བྱེད་རྒྱུ་མེད་པར་བློ་ཁོག་ཆེ་ཙམ་བྱེད་དགོས་པའི་ངོས་འཛིན་བྱས་པ་དང་འབྲེལ་མཇལ་ཁའི་སྐབས་ཀྱི་སྐུ་པར་རྣམས་ཡོངས་བསྒྲགས་ངང་དྲྭ་རྒྱའི་ཐོག་བཀོད་རྒྱུར་མོས་མཐུན་བྱས་པ་ཡིན། ངའི་བསམ་པར་དེ་ཡང་འགོ་འཛུགས་ཡག་པོ་ཞིག་རེད་བསམ་གྱི་ཡོད།
ང་ཚོས་ང་ཚོའི་གྲོགས་པོ་དང་། སློབ་གྲོགས་རྣམས་ལ་༧གོང་ས་མཆོག་མཇལ་བའི་ཚོར་སྣང་དང་། མཇལ་ཁའི་སྐབས་༧གོང་ས་མཆོག་ནས་འགྲེལ་བརྗོད་གནང་བའི་བོད་ཀྱི་དངོས་ཡོད་གནས་ཚུལ་དེ་ཚོ་འགྲེལ་བཤད་རྒྱ་དགོས་ཀྱི་འདུག་ཅེས་སྐད་ཆ་བྱུང་། གང་ཡིན་ཟེར་ན། མི་ཁག་ཅིག་རྒྱ་ནག་གུང་བྲན་གྱིས་ཀླད་པ་བཀྲུས་ཤུགས་ཆེ་དྲགས་པའི་རྐྱེན་གྱིས་མིན་ནམ། ༧གོང་ས་མཆོག་མཇལ་བའི་དབང་དུ་བཏང་ཡང་༧གོང་ས་མཆོག་ནས་གསུངས་པའི་སྐད་ཆར་ཁོང་ཚོས་ཉན་འཇོག་བྱེད་པའི་ངེས་པ་མེད། མི་དེ་རིགས་ཀྱི་ཀླད་པའི་ནང་གཞུང་གི་དྲིལ་བསྒྲགས་འཛུལ་ཤུགས་ཆེ་བས་༧གོང་ས་མཆོག་ནི་ “རྒྱ་རྒོལ་སྟོབས་ཤུགས་” ཡིན་པར་ངོས་འཛིན་བྱེད་ཀྱི་ཡོད། ༧གོང་ས་མཆོག་ནས་རྒྱ་རིགས་སློབ་མ་མཇལ་རྗེས་སློབ་ཕྲུག་ཚོས་སློབ་གྲོགས་ཀྱི་འདུ་ཤེས་ཐོག་ནས་སློབ་མ་གཞན་ལ་གནས་ཚུལ་འགྲེལ་བརྗོད་བྱེད་ཐུབ་ན། ཁྱད་པར་ཞིག་ཏན་ཏན་ཡོད་པ་རེད། གང་ཡིན་ཟེར་ན། ང་ཚོ་དང་ཁོང་ཚོའི་དབར་གྱི་འབྲེལ་བ་ནི་སློབ་ཕྲུག་གི་འབྲེལ་བ་དང་། གྲོགས་པོའི་འབྲེལ་བ་ཡིན་སྟབས་དངོས་ཡོད་གནས་ཚུལ་ག་རེ་ཡིན་པ་འགྲེལ་བརྗོད་བྱེད་སྐབས་ཁས་ལེན་བྱེད་རྒྱུ་ལས་སླ་བ་ཡོད་པ་རེད། གནས་ཚུལ་དངོས་རྣམས་དེ་ལྟར་གཅིག་ལ་གཅིག་བརྒྱུད་ཀྱིས་འགྲེལ་བཤད་བརྒྱབ་ནས་བོད་ཀྱི་གནད་དོན་ཐོག་རྒྱ་ནག་གུང་བྲན་གྱིས་རྫུན་ཤོད་ཀྱི་ཡོད་པ་དང་། རྒྱ་ནག་གཞུང་གིས་བོད་པར་ཁས་ལེན་བྱས་པ་རྣམས་དོན་ཐོག་དུ་ལག་བསྟར་བྱེད་ཀྱི་མེད་པར་དེ་ལས་ལྡོག་སྟེ། བོད་པར་དམའ་འབེབས་དང་། བོད་པས་ཁ་བྲལ་གཏོང་གི་ཡོད་ཚུལ་ཤོད་ཀྱི་ཡོད་པ་དེ་ཚོ་ཕྱི་རྒྱལ་དུ་ཡོད་པའི་རྒྱ་རིགས་སློབ་མ་ཚོས་མགོ་བོ་རྨོངས་ནས་མ་བསྡད་པར་ཤེས་པ་བྱེད་རྒྱུ་དང་། དེ་རྗེས་རྒྱ་རིགས་སློབ་མ་རྣམས་བརྒྱུད་ནས་རྒྱ་ནག་གི་རྒྱ་རིགས་སྔར་ལས་མང་བས་གནས་ཚུལ་དངོས་ཤེས་པ་བཟོ་རྒྱུ་དེ་ནི་ངའི་རེ་བ་ཡིན།
ཨོ་སི་ཀྲོ་ལི་ཡར་ཡོད་པའི་རྒྱ་རིགས་སློབ་ཕྲུག་དང་ཁུལ་དེའི་བོད་པའི་དབར་གྱི་འབྲེལ་ལམ་སྐོར་གླེང་སྐབས་ཀྲང་ཧྲིང་གིས་གསུང་དོན། རྒྱ་ནག་གཞུང་གིས་དུས་ཡུན་རིང་པོར་མི་དམངས་ཀྱི་ཀླད་པ་བཀྲུས་པའི་རྒྱུ་མཚན་ལ་བརྟེན་ནས་ཐོག་མར་རྒྱ་རིགས་སློབ་ཕྲུག་དང་འབྲེལ་བ་བྱེད་སྐབས་འགོག་རྐྱེན་འཕྲད་ཀྱི་ཡོད། རྒྱ་ནག་ནས་ཡིན་པའི་རྒྱ་རིགས་སློབ་ཕྲུག་དང་ཁུལ་དེའི་བོད་རིགས་དབར་ཐད་ཀར་འབྲེལ་བ་བྱེད་རྒྱུ་དེ་མང་པོ་རང་མ་རེད། ཧོང་ཀོང་དང་། ཐེ་ཝན་ནས་ཡིན་པའི་སློབ་ཕྲུག་ཚོས་འགྲོ་བ་མིའི་ཐོབ་ཐང་དང་། མང་གཙོ། བོད་ཀྱི་གནད་དོན་བཅས་ལ་སེམས་ཁུར་བྱེད་མཁན་ཨའོ་ཙམ་མང་པོ་ཡོད་རེད། ཡིན་ན་ཡང་རྒྱ་རིགས་སློབ་ཕྲུག་རྣམས་ཐོག་མར་རྒྱ་ནག་ནས་ཡོང་སྐབས་གང་ཡང་ཤེས་ཀྱི་མ་རེད། ཆེས་ཉུང་ཤས་ཤིག་གིས་རྒྱ་ནག་ནང་ཡོད་དུས་ནས་གཉེན་ཆས་འདྲ་འདྲ་མིན་བརྒྱུད་དེ་དྲྭ་ཐོག་ནས་ཕྱི་ལོགས་ཀྱི་གནས་ཚུལ་བལྟ་གི་རེད། ཁ་ཤས་ཕྱི་རྒྱལ་དུ་མ་སླེབས་གོང་འཕྲུལ་སྒྲ་དང་། ངོ་དེབ། Gmail ཟེར་བ་དེ་བེད་སྤྱོད་གཏན་ནས་བཏང་མྱོང་ཡོད་པ་མ་རེད། ཁག་ཅིག་ཕྱི་རྒྱལ་དུ་སླེབས་རྗེས་སྔར་དང་མི་འདྲ་བར་གནས་ཚུལ་འདྲ་མིན་སྣ་ཚོགས་མཐོང་གི་ཡོད་ཀྱང་། ཡུན་རིང་ཀླད་པ་བཀྲུས་པའི་རྒྱུ་མཚན་ལ་བརྟེན་ནས་སྔར་བཞིན་ཀླད་རྙིང་མཁྲེགས་བཟུང་བྱེད་མཁན་དེ་འདྲ་ཡོང་གི་ཡོད། དེང་སང་ང་ཚོས་སློབ་ཕྲུག་དེ་རིགས་(མཁྲེགས་བཟུང་བྱེད་མཁན།)དང་འབྲེལ་བ་བྱེད་རྒྱུའི་ཚོད་བལྟ་བྱེད་བཞིན་ཡོད། དེའི་དགོས་དམིགས་ནི་ཁོང་ཚོར་གནས་ཚུལ་ངོ་ཤེས་སུ་འཇུག་རྒྱུ་དང་། དེ་སྔ་ཤེས་བསྡད་པའི་གནས་ཚུལ་དེ་ཚོ་ནོར་འཁྲུལ་ཡིན་པ་དང་། མགོ་སྐོར་འོག་ཚུད་པ་ཡིན་པ་ཤེས་སུ་འཇུག་རྒྱུ་དེ་ཡིན།
ཀྲང་ཧྲང་། ཨོ་སི་ཀྲོ་ལི་ཡར་ཡོད་པའི་རྒྱ་རིགས་སློབ་ཕྲུག་དང་ཁུལ་དེའི་བོད་པའི་དབར་གྱི་འབྲེལ་ལམ་སྐོར་བཀའ་འདྲི་གནང་བའི་ཐད། སློབ་ཕྲུག་རྣམས་ལ་བོད་རིགས་ནི་མཛའ་མཐུན་བྱེད་མཁན་ཞིག་མིན་པ་སོགས་ཀྱི་སློབ་གསོ་ཡུན་རིང་བཏང་བའི་རྐྱེན་གྱིས་སློབ་ཕྲུག་དེ་ཚོ་ཨོ་སི་ཀྲོ་ལི་ཡར་འབྱོར་རྗེས་ཁུལ་དེའི་བོད་རིགས་དང་ཐད་ཀར་འབྲེལ་བ་བྱེད་མི་ཕོད་པའི་སྣང་ཚུལ་ཞིག་ཡོང་གི་འདུག་ཀྱང་། སློབ་ཕྲུག་ཚོས་གནས་ཚུལ་ངོ་མ་གསལ་པོ་ཤེས་པ་དང་། བོད་པ་ནི་མཛའ་མཐུན་བྱེད་མཁན་ཞིག་ཡིན་པ་རིམ་བཞིན་ངོ་འཕྲོད་བྱུང་མཚམས། བར་ཐག་དེ་ཚོ་མེད་པ་ཆགས་ཀྱི་རེད་བསམ་ཡིད་ཆེས་ཡོད། ལྷག་པར་དུ་༧གོང་ས་མཆོག་མཇལ་མྱོང་མཁན་སློབ་མ་དེ་ཚོས་༧གོང་ས་མཆོག་ནི་ཧ་ཅང་གི་མཛའ་གྲོགས་འཆམ་མཐུན་གནང་མཁན་ཞིག་ཡིན་པ་ཤེས་རྟོགས་བྱུང་བར་བརྟེན་མ་འོངས་པར་ཁུལ་དེའི་བོད་མི་ཚོས་སྐུའི་འཁྲུངས་སྐར་སྲུང་བརྩི་དང་། ལོ་གསར་གྱི་འདུ་འཛོམས་སོགས་ཀྱི་ལས་འགུལ་སྤེལ་བའི་སྐབས་ང་ཚོས་སློབ་གྲོགས་འཁྲིད་ནས་མཉམ་ཞུགས་བྱེད་ཐུབ་ན། རྒྱ་རིགས་སློབ་ཕྲུག་ཚོས་བོད་པ་དེ་ཚོ་ཁོང་ཚོས་བསམ་པ་ནང་བཞིན་མིན་པ་ཤེས་རྟོགས་བྱུང་ནས་འཁོན་སེམས་མེད་པ་བཟོ་རྒྱུ་དང་། བོད་ཀྱི་གནད་དོན་ཤེས་རྟོགས་བྱེད་རྒྱུར་ཕན་ཐོགས་ཡོད་སྟབས། ང་ཚོས་རྒྱ་ནག་ནས་ཡོང་པའི་སློབ་ཕྲུག་དང་བོད་པའི་དབར་འབྲེལ་བ་མང་ཙམ་བྱེད་ཐུབ་པའི་རེ་བ་བྱེད་ཀྱི་ཡོད།
བོད་རྒྱ་མང་ཚོགས་དབར་འབྲེལ་ལམ་བྱེད་པའི་ཁྲོད་ད་དུང་དཀའ་ངལ་མི་ཉུང་བ་ཞིག་ཡོད་ཀྱང་། སློབ་མ་ཀྲང་ཧྲང་གིས་དེའི་ཐད་དགོངས་ཚུལ་འདི་འདྲ་ཞིག་གསུང་གི་འདུག
ངས། རྒྱ་ནག་གི་སློབ་ཕྲུག་དང་ཁུལ་འདིའི་བོད་པའི་དབར་འབྲེལ་བ་བྱེད་རྒྱུ་དེ་མང་པོ་རང་མ་རེད་ཞུ་གི་ཡོད། འོན་ཀྱང་སློབ་ཕྲུག་མིན་པ་དང་། ཡང་ན་འདིར་གཏན་སྡོད་རྒྱ་རིགས་གཞན་པ་དེ་འདྲ་བོད་པའི་ལས་འགུལ་ནང་ཞུགས་ཀྱི་འདུག དེ་འདྲ་སོང་ཙང་ངས་རྒྱ་ནག་ནས་ཡིན་པའི་སློབ་ཕྲུག་དེ་ཚོ་བོད་པའི་འདུ་འཛོམས་སར་མཉམ་ཞུགས་ཐུབ་རྒྱུ་དེ་གལ་ཆེན་པོ་མཐོང་གི་ཡོད། ད་ལྟའི་དར་མ་དེ་ཚོ་མ་འོངས་པར་རིམ་བཞིན་ལོ་ན་རྒས་ནས་ལོ་རྒྱུས་ཀྱི་གར་སྟེགས་ནས་མེད་པར་གྱུར་རྒྱུ་ཡིན་པ་དང་། ང་ཚོའི་གྲས་ལོ་གཞོན་སློབ་ཕྲུག་དེ་ཚོ་མ་འོངས་པའི་གསར་སྐྱེས་སྟོབས་ཤུགས་ཆགས་རྒྱུ་ཡིན་ཞིང་། རྒྱ་ནག་ཏུ་ལོག་རྗེས་ཆབ་སྲིད་ཀྱི་ལས་གནས་ཐོག་སླེབས་སྲིད་ལ། ཐ་ན་རྒྱལ་ཁབ་ཀྱི་ཀྲུའུ་ཞི་ཡང་ཆགས་མ་སྲིད་པ་མ་རེད། དེར་བརྟེན་ང་ཚོའི་མི་རབས་འདི་དང་། གཞོན་སྐྱེས་ལོ་ཆུང་དང་། སློབ་ཕྲུག་བཅས་ལ་གནས་ཚུལ་ཤེས་སུ་བཅུག་པ་ཡིན་ན། ནམ་ཞིག་ཁོང་ཚོ་རྒྱ་ནག་ཏུ་ལོག་ནས་ཆབ་སྲིད་ཀྱི་ལས་ཀ་བྱས་རུང་མ་བྱས་རུང་། མ་མཐར་ང་ཚོའི་མི་རབས་འདིས་བོད་མི་རྣམས་ལ་འཛིན་པའི་རྣམ་འགྱུར་ཏན་ཏན་འགྱུར་བ་འགྲོ་གི་རེད་བསམ་གྱི་ཡོད།
མཇུག་ཏུ་ཀྲང་ཧྲང་གིས་འདི་ག་རླུང་འཕྲིན་ཁང་བརྒྱུད་ནས་ཕྱི་རྒྱལ་དུ་ཡོད་པའི་རྒྱ་ནག་གི་སློབ་ཕྲུག་རྣམས་ལ་གནས་ཚུལ་ངོ་མ་ཇི་ཡིན་ཤེས་རྟོགས་བྱེད་ཕོད་པ་དགོས་པ་དང་། ཤེས་རྟོགས་བྱས་རྗེས་ཤོད་ཕོད་པ་བྱེད་དགོས་པའི་འབོད་སྐུལ་གནང་གི་འདུག
ཀྲང་ཧྲང་། ཕྱི་རྒྱལ་དུ་ཡོད་པའི་སློབ་ཕྲུག་རྣམས་ལ་ངས་ན་ནིང་ཡང་རེ་སྐུལ་བྱས་པ་ཡིན། ངས་ཕྱི་རྒྱལ་དུ་ཡོད་པའི་སློབ་ཕྲུག་སྔར་ལས་མང་བས་ག་ལེར་ག་ལེར་རྒྱ་ནག་གི་གནས་ཚུལ་ངོ་མ་ག་རེ་ཡིན་པ་དང་། རྒྱ་ནག་གུང་བྲན་གྱི་ངོ་བོ་ག་རེ་ཡིན་པ། དོ་བདག་སོ་སོར་དེ་སྔ་ཀླད་བཀྲུས་ཀྱི་སློབ་གསོ་ག་རེ་ཐེབས་ཡོད་པ་ཤེས་པ་བྱེད་རྒྱུ་དང་། ཐ་ན་མདུན་དུ་ཐོན་ནས་ཤེས་པའི་གནས་ཚུལ་རྣམས་གཞན་ལ་ཤོད་ཕོད་པའི་ཚད་གཞིར་སླེབས་ཐུབ་པའི་རེ་བ་བྱེད་ཀྱི་ཡོད། སྔ་ལོ་ཧོང་ཀོང་ནང་སློབ་ཕྲུག་འདུ་འཛོམས་སྐབས་སུ་ཡང་ཤོད་ཕོད་པ་དགོས་ཀྱི་འདུག་ཅེས་བཤད་པ་ཡིན། ཕྲན་བུ་དྲགས་ཏུ་འགྲོ་གི་མེད་འགྲོ་བསམ་གྱི་འདུག སློབ་ཕྲུག་ཁ་ཤས་མདུན་དུ་ཐོན་ནས་སྐད་ཆ་བཤད་རྒྱུའི་འགོ་བཙུགས་ཀྱི་འདུག དཔེར་ན། དེ་སྔོན་ཨ་རིར་ཡོད་པའི་ ༡༩༨༠ ལོའི་རྗེས་སུ་སྐྱེས་པའི་སློབ་ཕྲུག་ཅིག་གིས་ཡོངས་བསྒྲགས་ཀྱི་ཡི་གེ་ཞིག་བཀྲམས་ནས་དྲུག་བཞིའི་གནད་དོན་དང་། བོད་ཀྱི་གནད་དོན་སོགས་རྒྱ་ནག་གུང་བྲན་གྱི་ལོ་རྒྱུས་གནད་དོན་འཚོལ་ཞིབ་བྱེད་དགོས་པའི་རེ་འབོད་བྱས་སོང་། གནས་ཚུལ་དེ་ཚོ་ནི་རིམ་བཞིན་ཡར་རྒྱས་འགྲོ་གི་ཡོད་པའི་བརྒྱུད་རིམ་གཅིག་རེད། སློབ་ཕྲུག་མང་པོས་གནས་ཚུལ་ངོ་མ་ཤེས་ཀྱི་ཡོད་པ་རེད། ངའི་རེ་བར་སློབ་ཕྲུག་སྔར་ལས་མང་བས་མགོ་བོ་རྨོངས་ཏེ་མ་བསྡད་པའི་རེ་བ་ཡོད། ཉིན་ཞིག་སློབ་ཕྲུག་ཚང་མ་དང་། གཞོན་སྐྱེས་ཚང་མས་རྒྱ་ནག་གུང་བྲན་གྱིས་རྫུན་གཏམ་ཤོད་ཀྱི་ཡོད་པ་གསལ་པོ་མཐོང་རྗེས་རྒྱ་ནག་གིས་རྫུན་བཤད་ཀྱང་མི་རྣམས་མགོ་སྐོར་ཐེབས་ཀྱི་མ་རེད། ཐེངས་འདིའི་མཇལ་འཕྲད་སྐབས་ང་ཚོར་གནད་དོན་ཅིག་འཕྲད་སོང་བ་ནི་སློབ་ཕྲུག་ཁ་ཤས་ཀྱིས་༧གོང་ས་མཆོག་མཇལ་འདོད་ཡོད་ཀྱང་། ༧གོང་ས་མཆོག་ཨོ་སི་ཀྲོ་ལི་ཡར་ཕེབས་པའི་དུས་ཚོད་དང་སློབ་གྲྭའི་ཡིག་ཚད་ཀྱི་དུས་ཚོད་གཉིས་མཉམ་དུ་འཁེལ་སྟབས་སློབ་མ་ཁག་གཅིག་མཇལ་ཁར་བཅར་ཐུབ་མ་སོང་། དེ་ནི་བློ་ཕམ་གྱི་གནས་ཚུལ་རེད། མ་འོངས་པར་ཆིབས་སྒྱུར་སྐབས་ཕྱི་ཟླ་ ༦ པའི་ཡིག་ཚད་ཀྱི་དུས་ཚོད་མ་འཁེལ་བ་ཞིག་བྱུང་ན། སློབ་ཕྲུག་དེ་ལས་མང་བས་༧གོང་ས་མཆོག་མཇལ་ཐུབ་རྒྱུ་རེད།
