ཨ་རིའི་ཁྲིམས་ཁང་གིས་མ་ལེ་ཞི་ཡའི་སྲིད་བློན་གྱིས་ལྐོག་ཟ་བྱས་ཡོད་མེད་ཐོག་འདྲི་རྩད་བྱ་འཆར་ཡོད་ཀྱང་སྲིད་བློན་གྱིས་ངོས་ལེན་བྱེད་ཀྱི་མེད་པ་རེད།
ཁ་སང་ནེའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཨ་རིའི་ཁྲིམས་ཁང་གིས་མ་ལེ་ཞི་ཡའི་སྲིད་བློན་ཎཱ་ཇེབ་ར་ཛཱ་ཁཱེ་ (Najib Razak) ཡི་གཙོས། ཁོང་གི་ལས་རོགས་འགས་གཞུང་དངུལ་ལྐོག་ཟ་བྱས་ཏེ་ཨ་རིར་ཨ་སྒོར་ས་ཡ་མང་པོས་རྒྱུ་ནོར་ཉོས་ཡོད་པའི་གྱོད་དོན་ཐད་རྟོག་ཞིབ་བྱེད་བཞིན་ཡོད་སྐོར་བཀོད་འདུག
ཡང་གནས་ཚུལ་དེའི་ནང་། ཨ་རིའི་ཁྲིམས་ཞིབ་ལྷན་ཁང་གིས་མ་ལེ་ཞི་ཡའི་སྲིད་བློན་ཎཱ་ཇེབ་ར་ཛཱ་ཁཱེ་ཡིས་ལྐོག་ཟ་རུལ་སུངས་བྱས་པའི་གྱོད་དོན་དང་། ཉེ་ལམ་ཁོང་གི་བུ་ཚབ་ཀྱིས་ཨ་རིར་ཨ་སྒོར་ས་ཡ་མང་པོ་སྤྲད་ནས་རྒྱུ་ནོར་ཉོས་ཡོད་པའི་གནད་དོན་ཐད་འདྲི་རྩད་བྱེད་བཞིན་ཡོད་པ་མ་ཟད། དེ་བཞིན་སྲིད་བློན་ཎཱ་ཇེབ་ར་ཛཱ་ཁཱེ་ཡི་དངུལ་འཛིན་ནང་ཨ་སྒོར་ས་ཡ་ ༦༨༡ བཅོལ་འཇོག་བྱས་ཡོད་པ་བཅས་ཀྱི་ཐད་འབྲེལ་ཡོད་མི་སྣར་སྐད་ཆ་དྲིས་ཡོད་ཀྱང་། སྲིད་བློན་ལས་ཁུངས་ནས་ད་བར་བརྡ་ལན་གང་ཡང་སྤྲད་མེད་པ་རེད། ཅེས་བརྗོད་འདུག
འདི་ལོའི་ཕྱི་ཟླ་ ༧ པའི་ནང་ཨ་རིའི་སྙན་གྲགས་ཅན་གྱི་ཚགས་ཤོག་ (The Wall Street Journal) ཅེས་པས་མ་ལེ་ཞི་ཡའི་སྲིད་བློན་ཎཱ་ཇེབ་ར་ཛཱ་ཁཱེ་ཡི་དངུལ་འཛིན་ནང་ཨ་སྒོར་ས་ཡ་ ༦༨༡ བཅོལ་འཇུག་བྱས་ཡོད་པའི་གནས་ཚུལ་བཀོད་ཡོད་པ་མ་ཟད། མ་ལེ་ཞི་ཡའི་རྟོག་ཞིབ་ཚོགས་ཆུང་ནས་ཀྱང་སྲིད་བློན་གྱིས་རྒྱལ་ཁབ་འཛུགས་སྐྲུན་བྱ་རྒྱུའི་མ་དངུལ་ལྐོག་ཟ་བྱས་པར་ངོས་འཛིན་བྱས་ཏེ་ཉུལ་ཞིབ་བྱེད་བཞིན་ཡོད་པ་བསྒྲགས་ཡོད་ཀྱང་། རོའུ་ཌར་གསར་ཁང་གིས་གནས་ཚུལ་དེ་བདེན་པ་ཡིན་མིན་ར་སྤྲོད་གང་ཡང་བྱས་མེད་པ་མ་ཟད། སྲིད་བློན་ཎཱ་ཇེབ་ར་ཛཱ་ཁཱེ་ཡིས་ཀྱང་གཞུང་དངུལ་ལྐོག་ཟ་བྱས་མེད་པ་དང་སྦྲགས། ཁོང་གི་དངུལ་འཛིན་ནང་ཨ་སྒོར་ས་ཡ་ ༦༨༡ བཅོལ་འཇོག་བྱས་མེད་པ། དེ་བཞིན་མ་ལེ་ཞི་ཡའི་བར་བརྒལ་སྲིད་གཞུང་ངོས་ནས་ཀྱང་སྲིད་བློན་གྱིས་གཞུང་དངུལ་ལྐོག་ཟ་གང་ཡང་བྱས་མེད་པ་བཅས་ཀྱི་འགྲེལ་བརྗོད་བྱས་ཡོད་སྟབས། ཨ་རིའི་ཁྲིམས་འཛིན་ཁང་གིས་སྲིད་བློན་ལ་རྟོག་ཞིབ་བྱེད་པར་དོ་ཕོག་བྱུང་ཚེ། མ་འོངས་པར་ཨ་རིས་དོན་རྐྱེན་དེའི་ཐད་ཉུལ་ཞིབ་བྱ་རྒྱུར་ལོ་གཅིག་ལྷག་འགོར་འགྱང་བྱུང་སྲིད་པ་ཞིག་ཡིན་འདུག
ད་ལྟ་སྲིད་བློན་ཎཱ་ཇེབ་ར་ཛཱ་ཁཱེ་ཡིས་ལྐོག་ཟ་རུལ་སུངས་བྱས་ཡོད་པའི་དོན་རྐྱེན་དེ་དང་འབྲེལ་བའི་ཐོག་མ་ལེ་ཞི་ཡའི་མང་ཚོགས་ཀྱིས། ཁོས་ལས་གནས་ནས་དགོངས་པ་ཞུ་དགོས་པའི་གནོན་ཤུགས་སྤྲོད་བཞིན་ཡོད་པ་མ་ཟད། ཕྱོགས་འགལ་ཚོགས་པས་ཀྱང་སྐྱོན་འཛུགས་ཤུགས་ཆེ་བྱེད་བཞིན་ཡོད་འདུག དེ་བཞིན་རྒྱལ་སྤྱིའི་རྒྱལ་ཁབ་འདྲ་མིན་གྱིས་ཁོ་བོར་སྡང་ཟུག་དང་མ་དགའ་བའི་རྣམ་འགྱུར་བསྟན་དང་སྟོན་བཞིན་ཡོད་སྟབས། ཉེ་སྔོན་མ་ལེ་ཞི་ཡའི་སྲིད་བློན་གྱིས་ཁོ་བོས་ལྐོག་ཟ་རུལ་སུངས་བྱས་ཡོད་པ་ཕྱིར་བསྒྲགས་བྱེད་མཁན་ཨ་རིའི་སྙན་གྲགས་ཅན་གྱི་ཚགས་ཤོག་ (The Wall Street Journal) ཁྲིམས་གཏུག་བྱས་ཡོད་པ་རེད།
རྒྱལ་སྤྱིའི་བརྒྱུད་ལམ་ཁག་ཏུ་མིང་སྨྲོས་མེད་པའི་མ་ལེ་ཞི་ཡའི་དངུལ་ཁང་གི་མཐོ་རིམ་ལས་བྱེད་ཅིག་གིས། འདས་པའི་ཟླ་ཤས་གོང་སྲིད་བློན་ཎཱ་ཇེབ་ར་ཛཱ་ཁཱེ་ཡི་དངུལ་འཛིན་ནང་དངུལ་ཕོན་ཆེ་ནང་འཇུག་བྱས་ཡོད་པ་དོན་དངོས་ཡིན་སྟབས། ད་ལྟ་ཁོང་གིས་གཞུང་དངུལ་སྒེར་སྤྱོད་བྱས་ཡོད་མེད་ཞིབ་འཇུག་ཚོགས་ཆུང་བསྐོས་ནས་རྟོག་ཞིབ་བྱ་དགོས་པ་ཆགས་ཡོད་སྐོར་བརྗོད་འདུག
གསར་འགོད་པ། དོན་གྲུབ།
