ཤར་ཕྱོགས་ཁུག་རྟ།
གདན་ས་ཆེན་པོ་དགའ་སེར་གཉིས་གཙོས་བཙན་བྱོལ་བོད་མིའི་སྡོད་གནས་ཁག་ཅིག་ཏུ། འོས་བསྡུའི་ཁྱབ་བསྒྲགས་ཆེད་བསྐྱོད་པའི་ཀླུ་མཁར་བྱམས་ལ་རང་གི་ས་ཁོངས་སུ་གཏམ་བཤད་ཞུ་སའི་སྡིངས་ཆ་མ་སྤྲད་པའི་གནས་ཚུལ་དང་འབྲེལ། སྒེར་གྱི་རྒྱུད་ལམ་གང་སར་ཡིག་རིགས་སྣ་མང་ཐོག་དེའི་ཐད་བཟང་ངན་གཉིས་ཀྱི་བསམ་ཚུལ་སྤེལ་བའི་ནང་། མི་རེ་ཟུང་གཅིག་རྗེས་གཅིག་འཐམས་ཀྱིས་”སྨྲ་བརྗོད་རང་དབང་མེད་ཚུལ་”དང་། ”མང་གཙོའི་གོ་རྟོགས་མེད་ཚུལ་”གཉིས་གང་སར་བྲིས་ཏེ་བཀྲམས་འདུག་པ་ལས། དེའི་རྒྱུ་མཚན་འབྲི་རྒྱུ་རྙེད་མེད་པ་མིག་ཡོད་ཕྱིན་མི་མཐོང་བ་མེད་པའི་གནས་སྟངས་བྱུང་འདུག
དཔལ་ལྡན་བདེ་སྲུང་བཀའ་བློན་མཆོག་གིས། ”དུག་སྦྲང་གི་གཤོག་པས་བྲག་རིར་གཞུས་ན། མི་རྣམས་གད་མོ་འཆོར་བའི་”ངང་ཚུལ་ལས་མ་འདས་གསུངས་པ་ལྟར། གླེང་གཞི་ཅན་དང་རྙོག་གླེང་བཟོ་རྒྱུར་ཧུར་བརྩོན་བྱེད་པའི་མི་སྣ་རེ་འགའི་བྱེད་བབ་གླེང་རིན་མེད་པ་དང་། གླེང་ན་དགོས་ཕན་ཏིལ་འབྲུ་ཙམ་འཕྲལ་ཕུག་གང་དུའང་མེད་པ་ཕྱོགས་ཡོངས་ནས་དཔག་ཐུབ་ཀྱང་། བྱུང་རབས་ཡིག་ཚགས་ནང་བདེན་པ་མིན་པའི་གནས་ཚུལ་མི་ཡོང་ཆེད། གདན་ས་ཆེན་པོ་དགའ་ལྡན་དང་སེ་ར་བླ་སྤྱིའི་ཐག་གཅོད་དེ་དོན་ལ་གནས་ཚུལ་རྒྱུ་མཚན་དང་བཅས་བཤད་འདོད་བྱུང་།
མང་གཙོའི་གོ་དོན་ཐད་ད་བར་འཇིག་རྟེན་འདིའི་སྟེང་མཚན་ཉིད་གཅིག་གྱུར་ཞིག་བྱུང་མེད་ནའང་། མི་མང་གི་མངོན་འདོད་དབུས་སུ་འཇོག་པ་དང་། མངོན་འདོད་མི་མཐུན་པ་འཛིན་མཁན་ཉུང་ངུ་ཡོད་ཆོག་པ། མང་ཉུང་ཕྱོགས་ཕན་ཚུན་བར་རྒྱུ་མཚན་ལྡན་པའི་བསམ་ཚུལ་མི་མཐུན་པ་བྱུང་ན་བརྩི་བཀུར་བྱེད་དགོས་པའི་གུ་ཡངས་ཡོད་དགོས་པ་མ་ཟད། རྒྱལ་ཁབ་བམ་མངའ་སྡེ། ཡང་ན་སྐྱབས་བཅོལ་བའི་གནས་བབ་གང་ཞིག་ཡིན་ཡང་། སྤྱི་མོས་སམ་མང་མོས་ཀྱིས་དེའི་མདུན་ལམ་སྒྲུབ་ཐུབ་དུ་ཐག་བཅད་པའི་ཁྲིམས་སྒྲིག་ཁག་ལ་ངེས་པར་དུ་མངོན་འདོད་མི་མཐུན་པ་འཛིན་མཁན་ཚོས་ཀྱང་བརྩི་བཀུར་དང་། འགན་འཁུར་དགོས་པ་ཡིན་ལ། སྲིད་དོན་ཚོགས་པ་ཡོད་མེད་དང་། ཐད་ཀའི་མང་གཙོ་དང་སྐུ་ཚབ་ཀྱི་མང་གཙོ་སོགས་གང་ཞིག་ཡིན་མིན་ལ་མ་ལྟོས་པར། ཕྱི་ལོ་མ་བྱུང་གོང་གི་ ༥༠༧ ལོར་ཐོག་མར་གྷི་རིག་ཡུལ་དུ་མང་གཙོ་བྱུང་བ་ནས་ད་བར་གྱི་འཕེལ་འགྱུར་ལ་རོབ་ཙམ་བལྟས་ཏེ་དཔྱད་ན། མང་གཙོའི་མཚན་ཉིད་ཅིག་རྙེད་པ་ནི་མི་མང་གི་མངོན་འདོད་སྤུངས་ཏེ་ཐག་བཅད་པའི་ཁྲིམས་དེར་བསྐྱར་བཅོས་ཀྱི་ལམ་ནས་ཕྱིར་མི་མང་ལ་དབང་བསྒྱུར་བྱེད་པའམ། མི་མང་གི་མངོན་འདོད་ལ་འགན་ལེན་ཁེག་ཐེག་བྱེད་པ་ལ་ཟེར་དགོས་པར་འདོད་པས། དེང་གི་ཆར་འཇིག་རྟེན་འདིར་མང་གཙོའི་རྒྱལ་ཁབ་ ༡༢༣ ཡོད་པའི་ཁྲོད། རྒྱལ་ཁབ་ཀྱི་རྩ་ཁྲིམས་ཀྱི་གཞི་གདན་རང་རང་ཡུལ་མིའི་མངོན་འདོད་དབུས་སུ་བཞག་སྟེ་གཏན་འབེབས་མ་གནང་བ་གཅིག་ཀྱང་མེད་པ་མཁས་རྣམས་མགྲིན་གཅིག་གིས་བཞེད།
རྒྱུ་མཚན་དེས་༧གོང་ས་སྐྱབས་མགོན་ཆེན་པོ་༧སྐུ་ཕྲེང་བཅུ་བཞི་བ་ཆེན་པོ་མཆོག་ནི་བོད་ཀྱི་ངོ་བོ་དང་བླ་སྲོག་ཡིན་པ། མང་གཙོའི་ལམ་ནས་མགྲིན་གཅིག་དབྱངས་གཅིག་གིས་ངོས་འཛིན་གནང་བ་ཙམ་མ་ཟད། ༧གོང་ས་ཆེན་པོར་ཐུགས་འདུན་མེད་བཞིན་དུ་བཅའ་ཁྲིམས་རིན་པོ་ཆེ་བསྐྱར་བཅོས་སྐབས།་བོད་མིའི་བླ་སྲོག་ཡིན་པ་བཅའ་ཁྲིམས་དོན་ཚན་དང་པོར་འགོད་འབུལ་གཏན་འབེབས་གནང་བ་ནི་ཀུན་ལ་མངལ་གསལ་བཞིན་དུ། བཙན་བྱོལ་བོད་མིའི་མང་གཙོ་དང་ཁྲིམས་ཀྱི་བྱུང་རིམ་དེ་དག་ལ་སྔ་ཕྱི་བར་གསུམ་དུ་རྩིས་མེད་སྣང་ཆུང་གིས་” མང་གཙོ་དངོས་སུ་ལག་བསྟར་” ཟེར་བ་ལྟ་བུ་གཞི་མེད་ཀྱི་ཐ་སྙད་སྤྱད་དེ། ༧བརྩེ་ཆེན་དབུ་ཁྲིད་ཀྱིས་བཙན་ཐབས་སུ་གནང་བའི་རང་རེའི་མང་གཙོ་ལ་ལོག་འགྲེལ་དང་། བཅའ་ཁྲིམས་དགོངས་དོན་བོད་དང་བོད་མིའི་ངོ་ཚབ་མཚོན་པའི་༧གོང་ས་ཆེན་པོར་དངོས་ཤུགས་རྒྱུད་གསུམ་ནས་མཚན་སྨོད་ཞུ་མཁན་ཞིག་ལ། སྡིངས་ཆ་མི་སྤྲོད་པ། རིང་སར་འཇོག་པ། ཐ་ན་བོད་དང་བོད་མིའི་ལས་དོན་ཆེ་ཕྲ་གང་གི་ཆེད་དུའང་མཉམ་རུབ་མི་བྱེད་རྒྱུའི་ཐོབ་ཐང་ཆ་ཚང་བོད་མི་མི་རེ་ངོ་རེར་ཡོད་ལ། ཐ་ན་བོད་མིའི་གྲས་ནས་ཕུད་རྒྱུའི་ལམ་ཁ་ཡོད་པ་ཚང་མ། མང་གཙོའི་འགྲོ་ལུགས་དང་མཐུན་པ་མ་ཟད། ཁྲིམས་དང་ཡོངས་སུ་མཐུན་པ་ཡིན། དཔེར་ན་ཨ་རིར་ལྟ་བུར་མཚོན་ན། སྲིད་འཛིན་ཨའོ་བྷ་མས་སྒེར་གྱི་སྒྲིག་འཛུགས་ལ་བདག་པའི་ས་ཁོངས་ནས་གཏམ་བཤད་གནང་དགོས་ཚེ། ཆོག་མཆན་ཞུ་ཡུལ་སྒེར་གྱི་སྒྲིག་འཛུགས་དེ་ཡིན་ལ། ཆོག་མཆན་སྤྲོད་དང་མི་སྤྲོད་དབང་ཆ་ཚང་མ་སྒེར་གྱི་སྒྲིག་འཛུགས་དེར་ཡོད་པས། མང་གཙོ་ཡིན་མིན་དང་གཏམ་བརྗོད་རང་དབང་ཡོད་མེད་ལ་འབྲེལ་བ་གང་ཡང་མེད།
གཉིས། ད་འོ་ན་གཏམ་བརྗོད་རང་དབང་བཀག་པ་རེད་དམ་ཟེར་ན། གཏམ་བརྗོད་ནི་བཅའ་ཁྲིམས་རིན་པོ་ཆེ་དོན་ཚན ༡༢ པའི་ནང་བོད་མི་རྣམས་ལ་ཡོད་པའི་གཞི་རྩའི་རང་དབང་དང་ཐོབ་ཐང་ཁག་གི་གྲས་སུ་འདུ་བ་ཡིན་པས། བཙན་བྱོལ་བོད་མི་ཚོར་གཏམ་བརྗོད་རང་དབང་ཆ་ཚང་ཡོད། འོན་ཀྱང་། བཅའ་ཁྲིམས་རིན་པོ་ཆེར་གཏམ་བརྗོད་རང་དབང་གི་ས་མཚམས་ད་དུང་གཏན་འབེབས་བྱས་མེད། མི་རིགས་ཀྱི་རིག་གནས་དང་གོམས་གཤིས་ཡག་པོ་མེད་པའི་རྒྱལ་ཁབ་ཚོས་གཏམ་བརྗོད་ཀྱི་ས་མཚམས་ཁྲིམས་ཐོག་གཏན་འབེབས་གནང་སྔ་བ་ཁྲིམས་ལུགས་པ་དང་ཆབ་སྲིད་པ་ཚོས་བཞེད་ལ། མང་གཙོའི་ལམ་སྲོལ་ནང་དེ་ནི་དགོས་ངེས་ཅན་ཞིག་ཡིན་པ་བཤད་ག་ལ་དགོས། ཡིན་ནའང་བོད་མི་རྣམས་ལ་རྒྱུ་འབྲས་ཁྲིམས་ལུགས་དང་ཡ་རབས་ལམ་སྲོལ་གྱི་འདུ་ཤེས་གཏིང་ཟབ་པ། ངོ་ཚ་ཤེས་ཤིང་ཁྲེལ་ཡོད་པས་སྤྱི་ཚོགས་ལ་བརྡབ་གསིག་གཏོང་གཞིའི་གཞི་མེད་ཀྱི་གཏམ་བརྗོད་ཀྱིས་མཚོན་ལུས་ངག་ཡིད་གསུམ་གྱི་སྤྱོད་ངན་ཐོན་པ་ཉུང་ཉུང་ཡིན་ནའང་། བོད་མི་རེ་འགས་མང་གཙོ་ཁ་ནས་སྒྲོག་ཞོར་དོན་དུ་གཏམ་བརྗོད་རང་དབང་གི་ས་མཚམས་ལས་བརྒལ་བའི་གཞི་མེད་གཏམ་བཤད་རྐྱང་ཞུ་བཞིན་པ་མཐོང་གསལ་འདི་རེད། གནས་ཡུལ་རྒྱ་གར་གྱི་རྩ་ཁྲིམས་དོན་ཚན ༡༩ པའི་ནང་གསེས་གཏམ་བརྗོད་རང་དབང་གི་ས་མཚམས་ཁག་ལ་གཞིགས་ན་ཀླུ་མཁར་བྱམས་ལྟ་བུར། གཏམ་བཤད་ཞུ་སའི་སྡིངས་ཆ་སྤྲོད་དགོས་པའི་གནས་བབ་ཕར་ཞོག བཙོན་ཁང་དུ་བསྐྱལ་ཆོག་པའི་ཉེས་པ་འབབ་པའང་གསལ་བོ་ཡིན་སྟབས། མང་གཙོ་དང་ཁྲིམས་ལུགས། བོད་མིའི་ཐུན་མོང་མིན་པའི་རྒྱུ་འབྲས་རིག་གནས་སོགས་གང་ནས་ལྟོས་ཀྱང་ཁོའི་སྨྲ་བརྗོད་རང་དབང་འགོག་རྒྱུ་ལྟ་ཅི། དེ་ལས་ལྡོག་སྟེ་ཁོ་ནི་ཁྲིམས་ལུགས་དང་མང་གཙོར་དོན་དམ་པའི་བརྩི་བཀུར་ཞུ་མི་ཐུབ་མཁན་ཞིག་ཡིན་པ་གསལ་བོ་ཆགས་ཡོད་སྟབས། གདན་ས་ཆེན་པོ་དགའ་ལྡན་དང་སེ་ར་ནས་ཁོང་གི་གཏམ་བཤད་བཀག་འགོག་གནང་བ་ནི་དོན་ལ་གནས་པ་ཞིག་རེད།
མཐའ་དོན། སློབ་དཔོན་ཆེན་མོ་ཟམ་གདོང་རིན་པོ་ཆེ་མཆོག་གི་ཞལ་སྔ་ནས། ” མིའི་འགྲོ་བ་ནི་སྤྱི་ཚོགས་ལ་བརྟེན་པའི་སྲོག་ཆགས་ཤིག་ཡིན་པས། སྤྱི་ཚོགས་མེད་པར་འཚོ་མི་ནུས། སྤྱི་ཚོགས་རྒྱ་ཆེར་ཕྱིན་སྐབས་སྒྲིག་འཛུགས་མེད་ན་གནས་མི་ཐུབ། སྒྲིག་འཛུགས་ནི་ལམ་སྲོལ་དང་ཁྲིམས་ལ་བརྟེན་དགོས་” ཞེས་གསུངས་པ་བཞིན། ངོ་བོ་དང་དམིགས་ཡུལ་མི་གསལ་བའི་གླེང་གཞི་ཅན་གྱི་མི་རེ་ཟུང་གིས་སྤྱི་ཚོགས་ནང་གླེང་རྙོག་བསྐྲུན་སྐབས། མང་གཙོའི་སྤྱི་ཚོགས་ཀྱི་མ་གདན་ཁྲིམས་ཀྱིས་བསྒྱུར་བའི་གནས་བབ་ལ་བློ་འཁེལ་རྒྱུའི་སྤོབས་པ་མ་རྙེད་པར། གང་སར་གཡམ་རྒྱུགས་ཀྱིས་ཚོད་དཔག་དང་ཁ་ཐུག་དྲན་ཚུལ་འབའ་ཞིག་ཐད་སྤྲོས་བྱས་ན། ཤེས་ཡོན་པའི་ལུགས་སུ་མི་རུང་ཞིང་། སྤྱི་ཚོགས་ནང་བརྡབ་གསིག་ཡོང་ཉེན་ཆེ་བ་བཤད་མ་དགོས་པས། གནད་དོན་ཅི་ཞིག་ལྷག་སྐབས་སོ་སོ་ནག་འཐོམས་མེར་ཆུ་སྣ་གར་ཁྲིད་ཆགས་མ་དགོས་པ་ཞིག་ཏུ་འགྱུར་དགོས་ན། མང་གཙོ་དང་ཁྲིམས་ཀྱི་གནད་དོན་འདི་རིགས་ལ་དོ་སྣང་ཞིབ་ཚགས་གནང་གལ་ཞེས་ཀྱང་ཞུ་ཐལ་ཤོར་ལ།
ཁོ་བོས་གོང་དུ་བརྗོད་པ་བཞིན། བསམ་བཞིན་ལོག་པའི་ལམ་དུ་ཁྱད་གསོད་ཀྱིས་ཞུགས་མཁན་ཞིག་ལ་ལམ་ནོར་ལྡོག་ཤེས་ཤིག་གཏན་དུ་ཡོང་རེ་མེད་ཀྱང་། བཙན་བྱོལ་བོད་མིའི་མང་གཙོའི་བྱུང་རབས་ལ་འགན་འཁུར་གྱིས་གནས་བབ་འདི་དག་ལོ་རྒྱུས་ཡིག་ཚགས་སུ་དུས་ལྟར་འཇོག་བློ་ནོན་མི་ཐུབ་པ་ཞིག་སྐྱེ་བས། ཡི་གེ་འདི་དག་འབྲི་བའི་ངལ་བ་དང་དུ་བླངས་པ་ཡིན་ལ། རྒྱུ་མཚན་ཕྲ་མོ་ཙམ་གྱི་ལན་འདེབས་རེ་ཡོད་པ་ཡིན་ན། ཅལ་འདྲོགས་ཕྱོགས་ཙམ་མཐོང་མཁན་དག་ལའང་ལན་སྟེར་རྒྱུའི་ངལ་བ་མུ་མཐུད་ལེན་འདོད་ཡོད། བདེན་པ་རྒྱལ་ལོ། གནས་ལུགས་རྒྱལ་ལོ།།
