ཞི་ཅིན་ཕིན་གྱི་རླངས་འཁོར་བཀག

རྒྱ་ནག་གི་སྲིད་འཛིན་ཞི་ཅིན་ཕིན་ཨ་རིའི་ཕོ་བྲང་དཀར་པོའི་ནང་བསྐྱོད་པའི་ལམ་བར་དུ་ངོ་རྒོལ་བས་ཁོ་བོའི་རླངས་འཁོར་བཀག་སྟེ་ངོ་རྒོལ་ཤུགས་ཆེན་བྱས་འདུག

རྒྱལ་སྤྱིའི་གསར་ལམ་ཁག་ནས་གནས་ཚུལ་ཐོན་པ་ལྟར་ན། ཟླ་འདིའི་ཚེས་ ༢༥ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་ཨ་རིར་རྒྱལ་དོན་སྐོར་སྐྱོད་དུ་བསླེབས་ཏེ་ཨ་རིའི་ཕོ་བྲང་དཀར་བོའི་ནང་བསྐྱོད་པའི་ལམ་བར་དུ། ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གཙོས་བོད་ཀྱི་ཚོགས་པ་ཁག་དང་། ཡུ་གུར་དང་རྒྱ་ནག་དམངས་གཙོ་དོན་གཉེར་ཚོགས་པ། དེ་བཞིན་ཆོས་འཁོར་རྩ་རླུང་སྒོམ་སྒྲུབ་པ་སོགས་ནས་ངོ་རྒོལ་འབོད་ཚིག་༼ཅང་ཙེ་མིན་ཁྲིམས་ལ་སྦྱར་དགོས་༽ཞེས་པ་སོགས་ཀྱི་འཕྲེད་དར་འཕྱར་ནས་ཞི་རྒོལ་བྱས་ཡོད་པ་དང་། ཕྱི་སྡོད་རྒྱ་རིགས་འཐབ་རྩོད་པ་མཱ་ཡོན་ཐེན་(Ma Yongtian) གྱི་གཙོས་རྒྱ་རིགས་ཁག་ཅིག་གིས་ཞི་ཅིན་ཕིན་གྱི་རླངས་འཁོར་ཐེངས་ཁ་ཤས་ལ་བཀག་ཡོད་པ་མ་ཟད། རླངས་འཁོར་མདུན་དུ་འཕྲེད་ཉལ་བྱས་ཏེ་ངོ་རྒོལ་ཤུགས་ཆེན་བྱས་ཡོད་སྟབས། ཞི་རྒོལ་བ་མཱ་ཡོན་ཐེན་ཨ་རིའི་ཉེན་རྟོག་པས་ཆུ་ཚོད་གསུམ་ལ་བཀག་གཉེར་བྱས་ཡོད་འདུག གཞན་ཡང་། ཟླ་འདིའི་ཚེས་ ༢༦ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་མཉམ་འབྲེལ་རྒྱལ་ཚོགས་སུ་གཏམ་བཤད་སྤེལ་སྐབས། དཔོན་རིགས་མང་པོ་ཚོགས་བཅར་བྱས་མེད་སྟབས། རྐུབ་བཀྱག་མང་ཆེ་ཤོས་སྟོང་པར་ལྷག་ཡོད་འདུག

ཟླ་འདིའི་ཚེས་ ༢༥ ཉིན་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་གསར་འགོད་ལྷན་ཚོགས་ཤིག་གི་སྟེང་མཉམ་བཞུགས་བྱེད་སྐབས། ཨ་རིའི་སྲིད་འཛིན་ཨོ་བྷ་མས། ང་ཚོས་བོད་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཏུ་ངོས་འཛིན་བྱེད་ཀྱི་ཡོད་ཀྱང་། ང་ཚོས་མུ་མཐུད་དུ་རྒྱ་ནག་གི་མགོ་ཁྲིད་ཚོས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་རྒྱུ་དང་། ༧ཏཱ་ལའི་བླ་མ་མཆོག་དང་ཁོང་གི་སྐུ་ཚབ་མཉམ་དུ་འབྲེལ་མོལ་བྱ་རྒྱུར་སྐུལ་མ་བྱེད་ཀྱི་ཡོད། ཅེས་སོགས་བརྗོད་འདུག

ཕྱི་སྡོད་རྒྱ་མིའི་དྲ་རྒྱ་ཏཱ་ཅི་ཡོན་གྱི་ཐོག་རྐུན་ཇག་འཛིན་དུས་སྔོན་ལ་གཏེ་བོ་འཛིན་དགོས། ཅང་ཙེ་མིན་འཛིན་དགོས་ཞེས་པའི་རྩོམ་ཡིག་ཅིག་སྤེལ་བའི་ནང་། ཅང་ཙེ་མིན་གྱིས་ཆོས་འཁོར་རྩ་རླུང་ལ་གནོད་སྐྱོན་བཟོས་པ་དང་རྒྱ་ནག་གཞུང་གི་ལས་ཀྱི་སྣེ་མོ་བ་ཡོད་ཚད་རུལ་སུངས་ཏུ་གྱུར་ཡོད་པ་དང་། ཁྲིམས་ལུགས་མགོ་གཏིང་སློག་པ། དཔལ་འབྱོར་ཡ་མ་ཟུང་གིས་ཡར་རྒྱས་སོང་བ། རང་བྱུང་ཁོར་ཡུག་འབག་བཙོག་བཟོས་པ།  སྤྱི་ཚོགས་ཀུན་སྤྱོད་མ་རབས་ཐ་ཤལ་ཅན་དུ་གྱུར་པའི་མཇུག་འབྲས་བྱུང་བ་སོགས་བཀོད་ཡོད་པ་དང་། ཡང་རྩོམ་ཡིག་དེའི་ནང་། རྒྱ་ནག་གཞུང་འཛིན་པའི་ལྐོག་ཟ་རུལ་སུངས་དང་གཡེམ་སྤྱོད་ཀྱི་ཚད་མཐོ་ཤོས་སུ་བསླེབ་ཡོད་སྐོར་སོགས་བཀོད་འདུག

ཨ་རིའི་ཇའོ་ཇེ་མཱ་སོན་ (George Mason University) གཙུག་ལག་སློབ་ཆེན་གྱི་དགེ་རྒན་ཆེན་མོ་ཀྲང་ཐེན་ལེང་ (Zhang Tianliang) གིས། སྤྱིར་བཏང་སྐྱེས་ཐོབ་ཀྱི་ཤེས་རབ་ཡོད་པའི་མི་དཀྱུས་མ་ཞིག་གིས་མི་ཡག་པོ་ཞིག་ལ་གནོད་པ་བྱ་མི་སྲིད། ཅང་ཙེ་མིན་གྱིས་ཆོས་འཁོར་རྩ་རླུང་སྒོམ་སྒྲུག་པ་རྩ་མེད་བཟོ་ཆེད། ཀུན་སྤྱོད་དབེན་པའི་མི་ཐ་ཤལ་དག་དངུལ་སྒོར་གྱིས་ཉོས་དེ་བེད་སྤྱོད་བཏང་ཡོད་སྟབས། རྒྱ་ནག་གཞུང་འཛིན་པའི་སྡེའི་གོང་ནས་འོག་བར་གྱི་དབང་འཛིན་པ་ཚང་མས་ལྐོག་ཟ་རུལ་སུངས་ཚབས་ཆེན་བྱས་འདུག ཅང་ཙེ་མིན་གྱིས་ཆོས་འཁོར་རྩ་རླུང་སྒོམ་སྒྲུབ་པར་གནོད་སྐྱོན་བཟོས་པའི་བརྒྱུད་རིམ་ཁྲོད། ཁོས་རྒྱ་ནག་གི་བཅའ་ཁྲིམས་ལ་གཏོར་སྐྱོན་ཚབས་ཆེན་བཏང་པ་དང་། སྔོན་ཆད་ཧུའུ་ཡོ་པང་དང་ཀྲོ་ཙེ་ཡཱང་། ཆའོ་ཧྲི། ཁོ་ཚོས་རྒྱ་ནག་ནང་ལ་བཅའ་ཁྲིམས་ཀྱི་སྒྲིག་ཁྲིམས་ཤིག་འཛུགས་རྒྱུའི་དམིགས་འབེན་ཡོད་ཀྱང་། བཅའ་ཁྲིམས་ཀྱི་སྒྲིག་ཁྲིམས་ངོ་མས་མུ་མཐུད་དུ་གནོད་སྐྱོན་བྱ་མི་སྲིད་སྟབས། ཅང་ཙེ་མིན་གྱིས་རྒྱ་ནག་གི་ཁྲིམས་ལུགས་ཡོངས་རྫོགས་ལ་གཏོར་བཤིག་བཏང་རྗེས། རྒྱ་ནག་སྤྱི་ཚོགས་དེ་འབུ་ཆེ་བས་ཆུང་བ་ཟ་ཡི་ཡོད་པ་ལྟ་བུ་ཞིག་ཏུ་གྱུར་ཡོད་པ་དང་། སུ་ལ་དབང་ཆ་ཡོད་ན་དེས་རང་སྣང་གང་དྲན་བྱེད་པ་རེད། ཅེས་སོགས་བརྗོད་འདུག

ཁ་སང་འཛམ་གླིང་རྒྱལ་ཁབ་ ༨༠ ལྷག་གི་ཆེས་མཐོའི་དཔོན་རིགས་ལྷན་འཛོམས་སྐབས། མཉམ་འབྲེལ་རྒྱལ་ཚོགས་ཀྱི་གོ་སྒྲིག་འོག་ཆེས་མཐོའི་འཛམ་གླིང་བུད་མེད་ལྷན་ཚོགས་ཀྱི་ཚོགས་འདུ་ཞིག་བསྐོངས་ཡོད་པ་དང་། སྐབས་དེར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱ་གཞུང་གིས་མཉམ་འབྲེལ་རྒྱལ་ཚོགས་ཀྱི་བུད་མེད་ཁེ་དབང་སྲུང་སྐྱོབ་ཚན་པར་ཨ་སྒོར་ས་ཡ་ ༡༠ ཞལ་འདེབས་སུ་འབུལ་རྒྱུ་དང་། འབྱུང་འགྱུར་གྱི་ལོ་ ༥ ཡི་ནང་ཡར་རྒྱས་འགྲོ་བཞིན་པའི་རྒྱལ་ཁབ་ཁག་གི་ནང་མ་བུའི་བདེ་ཐང་ལྟེ་གནས་ཁང་ ༡༠༠ དང་བུད་མེད་སློབ་གྲྭ་ཁག་ ༡༠༠ འཛུགས་རྒྱུ་ཡིན་སྐོར་སོགས་བརྗོད་འདུག

གསར་འགོད་པ། འཇིགས་མེད་རྒྱ་མཚོ།