ཨ་རིའི་ཕྱི་སྲིད་དྲུང་ཆེ་ཇོན་ཁེད་རི་ཡིས་ཕྱི་སྲིད་བློན་ཆེན་གྱི་ལྷན་ཚོགས་ཐོག་ཨེ་ཤ་ཡའི་མཚོ་ཁུལ་གྱི་བདག་དབང་གནད་དོན་ལ་ཐེ་བྱུས་བྱེད་དགོས་སྐོར་བརྗོད་འདུག
ཁ་སང་ཨ་རིའི་གྲོང་ཁྱེར་ནེའུ་ཡོག་ཏུ་རྒྱ་གར་གྱི་ཕྱི་སྲིད་བློན་ཆེན་ལྕམ་སུ་ཞི་མ་སོ་ཝ་ར་ཇཱ་དང་ཨ་རིའི་ཕྱི་སྲིད་དྲུང་ཆེ་ཇོན་ཁེད་རི། ཉི་ཧོང་གི་ཕྱི་སྲིད་བློན་ཆེན་ཧྥ་མེ་ཀེ་ཤི་ཌ་ (Fumio Kishida) རྣམ་གསུམ་གྱིས་ལྷན་ཚོགས་ཤིག་བསྡུས་ཏེ། བྱང་ཀོ་རི་ཡའི་འཇིགས་སྐུལ་དང་། རྒྱ་ནག་གཞུང་གི་ལྷོ་རྒྱ་ནག་རྒྱ་མཚོ་དང་ཞི་བདེ་རྒྱ་མཚོའི་བདག་དབང་རྩོད་ལེན་བྱེད་བཞིན་ཡོད་པར་གདོང་ལེན་བྱེད་ཕྱོགས་བཅས་ཀྱི་གནད་དོན་ཁག་ཅིག་ཐོག་གོ་བསྡུར་བྱས་ཡོད་འདུག
རྒྱ་གར་དུས་བབ་ཐོག་ཨ་རིའི་ཕྱི་སྲིད་དྲུང་ཆེ་ཇོན་ཁེད་རི་ཡིས། ལྷན་ཚོགས་འདི་ཚོགས་དགོས་དོན་ནི་ཉེ་ལམ་ཨེ་ཤ་ཡའི་མངའ་ཁུལ་རྒྱལ་ཁབ་ཁག་ཏུ་ཕྱིའི་བཙན་འཛུལ་རྐྱེན་པས་གདོང་ལེན་བྱེད་དགོས་པ་གང་དག་ཅིག་ཐོན་བཞིན་ཡོད་སྟབས། མ་འོངས་པར་རྒྱལ་ཁབ་གསུམ་པོས་མཚོ་ཁུལ་གྱི་བདེ་འཇགས་ཐོག་མཉམ་ལས་བྱེད་ཤུགས་ཆེ་རུ་བཏང་ནས་དགྲ་བོར་ཁ་གཏད་གཅོག་ཐུབ་པ་བྱ་རྒྱུ་ཡིན། ཞེས་དང་། ཡང་ཉི་ཧོང་གི་ཕྱི་སྲིད་བློན་ཆེན་ཧྥ་མེ་ཀེ་ཤི་ཌ་ཡིས། ད་ལྟ་ཨེ་ཤ་ཡའི་མངའ་ཁུལ་རྒྱལ་ཁབ་ཁག་གི་བདེ་འཇགས་ལ་ཉེན་ཁ་འཕྲད་བཞིན་ཡོད་སྟབས། ཨ་རི་དང་ཉི་ཧོང་། ལྷོ་ཀོ་རི་ཡ་བཅས་ཀྱིས་དམག་དཔུང་གི་མཉམ་ལས་ནུས་པ་འདོན་རྒྱུའི་དུས་ལ་བབས་འདུག ཅེས་བརྗོད་འདུག
ཐུན་མོང་གི་གསར་འགོད་གསལ་བསྒྲགས་ནང་། ད་ལྟ་ང་ཚོས་འཛམ་གླིང་ཞི་བདེ་དང་དམངས་གཙོ་གོང་འཕེལ། རྒྱལ་སྤྱིའི་བདེ་འཇགས་བཅས་ཀྱི་ཐད་མཉམ་ལས་མཉམ་ཁུར་བྱས་ཏེ། མཚོ་ཁུལ་གྱི་བཅའ་ཡིག་ལ་རྡོག་རོལ་གཏོང་མཁན་གྱི་རྒྱལ་ཁབ་དང་ཚོགས་པ་སྒྲིག་འཛུགས་ཁག་གི་ཤུགས་རྐྱེན་འགོག་རྒྱུ་དང་། དེ་བཞིན་འཇིགས་སྐུལ་རིང་ལུགས་པ་དག་རྩ་མེད་བཟོ་རྒྱུར་རྩོད་ལེན་བྱ་རྒྱུ་ཡིན། ཞེས་བརྗོད་འདུག
ཨོ་བྷ་མས་ཨེ་ཤ་ཡ་དང་སྒོས་སུ་ཞི་བདེ་རྒྱ་མཚོའི་མངའ་ཁུལ་རྒྱལ་ཁབ་དག་ནི་ཨ་རིའི་ཆབ་སྲིད་ཀྱི་ཁ་ཕྱོགས་བསྒྱུར་རྒྱུའི་ལྟེ་དབུས་ཤིག་ཏུ་ངོས་འཛིན་བྱས་ཏེ། ཉི་ཧོང་དང་རྒྱ་གར། ལྷོ་ཀོ་རི་ཡ་དང་ཧྥི་ལེ་ཕིན་སོགས་དང་མཛའ་མཐུན་འབྲེལ་ལམ་བཙུགས་ནས་རྒྱ་ནག་གཞུང་གི་ཤུགས་རྐྱེན་དང་། རྒྱ་སྐྱེད་རིང་ལུགས་ཀྱི་བསམ་སྤྱོད་དག་ལ་ཚོད་འཛིན་བྱ་རྒྱུའི་བྱ་འགུལ་སྣ་ཚོགས་ཤིག་བརྩམས་དང་རྩོམ་མུས་ཡིན་སྟབས། ཉེ་ལམ་ལོ་ཤས་ནས་བཟུང་རྒྱ་ནག་གཞུང་གིས་ཕྱོགས་གཅིག་ནས་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་གསར་བཟོ་དང་འབྲེལ། ལྷོ་རྒྱ་ནག་རྒྱ་མཚོའི་བདག་དབང་རྩོད་ལེན་ཤུགས་ཆེ་བྱས་པ་དང་། ཕྱོགས་གཞན་ཞིག་ནས་ཉི་ཧོང་ཕུད་པའི་ཨ་རིའི་མཐུན་གྲོགས་རྒྱལ་ཁབ་ཁག་དང་འབྲེལ་བ་ཟབ་ཏུ་བཏང་སྟེ། ཨེ་ཤ་ཡ་དང་ཨ་ཧྥི་རི་ཀ དཀྱིལ་ཤར་ཡུལ་གྲུ་བཅས་ཀྱི་གཙོས་དཔལ་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་ཁག་དང་མ་གྲོས་བསམ་པ་གཅིག་མཐུན་གྱི་མཉམ་ལས་བྱས་ནས་ཨ་རིར་ཁ་གཏད་གཅོག་མགོ་བཙུགས་ཡོད། ལྷག་པར་དུ་ཉེ་བའི་ལོ་ཤས་ནས་བཟུང་ཞི་ཅིན་ཕིན་གྱིས་རྒྱ་ནག་གི་རྨི་ལམ་ཞེས་པའི་འབོད་ཚིག་ཅིག་འུར་འདོན་བྱས་ཏེ། རྒྱལ་སྤྱིའི་ཐོག་དར་གོས་ལམ་བུ་དང་། ཡར་རྒྱས་འགྲོ་བཞིན་པའི་རྒྱལ་ཁབ་ཁག་གི་མཉམ་ལས་དངུལ་ཁང་ཞེས་པ་སོགས་གསར་གཏོད་བྱས་ཏེ། རྒྱལ་སྤྱིའི་སྣེ་ཁྲིད་རྒྱལ་ཁབ་ཅིག་ཏུ་འགྱུར་ཐབས་བྱེད་བཞིན་ཡོད་སྟབས། ཨ་རིས་རྒྱ་ནག་གི་དཔལ་འབྱོར་ཉམས་ཉེས་འགྲོ་བཞིན་ཡོད་པ་དང་བསྟུན་ཏེ། ད་རེས་རྒྱ་གར་དང་ཉི་ཧོང་གི་ཕྱི་སྲིད་བློན་ཆེན་གྱི་ལྷན་ཚོགས་ཤིག་བསྐོངས་ནས་རྒྱ་ནག་གཞུང་གི་གནོན་ཤུགས་འགོག་ཆེད་ཆབ་སྲིད་ཀྱི་ཁ་ཡང་གྲག་མགོ་བཙུགས་ཡོད།
ཁ་སང་ནཱ་རེན་ཌ་མུ་དྷེས་ཨོ་བྷ་མ་ཐུག་སྐབས། ང་ཚོས་ཨ་རི་དང་ཉི་ཧོང་མཉམ་དུ་ཨེ་ཤ་ཡའི་ཞི་བདེ་རྒྱ་མཚོ་དང་རྒྱ་གར་རྒྱ་མཚོའི་མངའ་ཁུལ་གྱི་བདག་དབང་གནད་དོན་ཐོག་ཆིག་སྒྲིལ་གྱི་ནུས་སྟོབས་སྤུངས་རྒྱུ་མ་ཟད། ཨ་རིས་སྣེ་ཁྲིད་པའི་ཞི་བདེ་རྒྱ་མཚོའི་མངའ་ཁུལ་རྒྱལ་ཁབ་ཁག་གི་དཔལ་འབྱོར་མཉམ་འདེགས་ཐོག་ཞུགས་རྒྱུར་རེ་བ་ཆེན་པོ་འཆང་བཞིན་ཡོད་སྐོར་བརྗོད་ཡོད་སྟབས། ཨོ་བྷ་མས། ང་ཚོ་མནའ་མཐུན་རྒྱལ་ཁབ་ཁག་གིས་ལྷོ་རྒྱ་ནག་རྒྱ་མཚོ་དང་ཞི་བདེ་རྒྱ་མཚོའི་བདག་དབང་ལ་སྲུང་སྐྱོབ་བྱས་ཏེ། རྒྱ་སྐྱེད་རིང་ལུགས་པའི་བསམ་སྦྱོར་ལ་ཚོད་འཛིན་ཐུབ་པ་བྱེད་དགོས། ཞེས་བརྗོད་འདུག
གསར་འགོད་པ། དོན་གྲུབ།
