ཨ་རིའི་ས་ལིས་བུ་རི་གཙུག་ལག་སློབ་གཉེར་ཁང་གིས་སྲིད་སྐྱོང་བློ་བཟང་སེང་གེ་མཆོག་ལ་སྲིད་འཛིན་གྱི་རྟགས་མ་(Presidential Medal) འབུལ་རྒྱུ་ཡིན་འདུག
བོད་མིའི་སྒྲིག་འཛུགས་ཀྱི་དྲ་བའི་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་ཨ་རིའི་ས་ལིས་བུ་རི་ (Salisbury University )གཙུག་ལག་སློབ་གཉེར་ཁང་གིས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་སྙན་གྲགས་ཆེ་བའི་པེར་སི་ཌེན་ཤལ་རྟགས་མ་ (Presidential Medal) འབུལ་གཏན་འཁེལ་ཡོད་འདུག
གཙུག་ལག་སློབ་གཉེར་ཁང་དེས་པིར་སི་ཌེན་ཤལ་རྟགས་མ་སྤྱི་ཚོགས་ནང་གཟེངས་སུ་ཐོན་པ་དང་། འཆར་སྣང་ཅན་གྱི་དབུ་ཁྲིད་ཚོར་འབུལ་སྲོལ་ཡོད་པ་ལྟར། གཙུག་ལག་སློབ་གཉེར་ཁང་དེའི་འགན་འཛིན་ལྷན་ཚོགས་མཉམ་འཛོམས་ཐོག ཐེངས་འདིའི་རྟགས་མ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་འབུལ་གཏན་འཁེལ་ཏེ་གསལ་བསྒྲགས་གནང་ཡོད་སྟབས། ཟླ་འདིའི་ནང་སྲིད་སྐྱོང་མཆོག་ཁུལ་དེའི་ནང་ཕེབས་ཏེ་དམངས་གཙོ་དང་འབྲེལ་བའི་བརྗོད་གཞིའི་ཐོག་གསུང་བཤད་གནང་རྒྱུ་དང་འབྲེལ། ས་ལིས་བུ་རི་གཙུག་ལག་སློབ་གཉེར་ཁང་གི་དབུ་འཛིན་སྐུ་ཞབས་ཇ་ནི་ཌ་ཌུ་ཌ་ལི་( Dr. Janet Dudley-Eshbach )ལགས་ཀྱིས་རྟགས་མ་དེ་འབུལ་རྒྱུ་ཡིན་འདུག
ཆིབས་བསྒྱུར་དེ་དང་བསྟུན་ཨ་རིའི་བོ་སར་མན་རྩོད་རྙོག་འདུམ་འགྲིག་བསྟི་གནས་ཁང་ (Bosserman Centre for Conflict Resolution)གིས་མགྲོན་འབོད་ཞུས་པ་ལྟར། སྲིད་སྐྱོང་མཆོག་གིས་བསྟི་གནས་ཁང་དེར་འགྱུར་བ་གཏོང་རྒྱུར་གང་ཟག་གཅིག་གིས་ཀྱང་ཁྱད་པར་བཟོ་ཐུབ་ཅེས་པའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་པ་དང་། སྐབས་དེར་རྒྱལ་ཁབ་ཀྱི་དབུ་ཁྲིད་ཟུར་པ་ཁག་གཅིག་དང་ནོ་སྦེལ་གཟེངས་རྟགས་བཞེས་མྱོང་མཁན་གྱི་ཆེས་མཐོའི་མི་སྣ་ཁག་གཅིག་ཀྱང་མཉམ་ཞུགས་གནང་འཆར་ཡོད་འདུག
ལས་བྱ་བ་ལམ་ལྷོངས་སུ་འགྲོ་བའི་སྨོན་ལམ་ཞུ་རྒྱུ།
སྲིད་སྐྱོང་མཆོག་ལ་ བཀྲིས་བདེ་ལེགས་
སྲིད་སྐྱོང་མཆོག་ལ་རྟགས་྄མ་འབུལ་རྒྱུ་བྱས་པ་དེ་ང་ཚོ་བོད་རིགས་ཚོ་དགའ་སྤོབས་བྱེད་འོས་པ་ཞིག་ཡིན་པས་སྲིད་སྐྱོང་མཆོག་ལ་བཀྲ་ཤིས་བདེ་ལེགསདང་། མཛད་འཕྲིན་གོང་ནས་གོང་དུ་འཕེལ་བའི་སྨོན་འདུན་ཞུ།
གཏམ་བཟང་འདི་ལ། སྲིད་སྐྱོང་མཆོག་ལ་བཀྲ་ཤིས་བདེ་ལེགས་ཞུ།།