ཁ་སང་སྲིད་སྐྱོང་བློ་བཟང་སེང་གེ་མཆོག་ལ་ཨ་རིའི་གཙུག་ལག་སློབ་ཆེན་ཞིག་གིས་སྙན་གྲགས་ཆེ་བའི་གཟེངས་རྟགས་ཤིག་ཕུལ་ཡོད་འདུག
ཟླ་འདིའི་ཚེས་ ༡༣ ཉིན་ཨ་རིའི་ས་ལིས་བུ་རི་ (Salisbury University ) གཙུག་ལག་སློབ་གཉེར་ཁང་གི་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་སློབ་ཆེན་དེའི་སྙན་གྲགས་ཆེ་བའི་སྲིད་འཛིན་གྱི་གཟེངས་རྟགས་ (Presidential Medal) ཕུལ་བའི་མཛད་སྒོ་བསྡུས་ཡོད་པ་དང་། མཛད་སྒོའི་ཐོག་གཙུག་ལག་སློབ་ཆེན་གྱི་ངེས་སྟོན་པ་ཌོ་ཌི་ལེ་ (Dr. Janet Dudley-Eshbach) མཆོག་གི་དབུས་དགེ་ལས་སློབ་ཕྲུག་སོགས་མི་གྲངས་ ༡༠༠༠ ཡས་མས་འཛོམས་ཡོད་འདུག
བོད་མིའི་སྒྲིག་འཛུགས་ཀྱི་དྲ་བའི་ནང་གནས་ཚུལ་སྤེལ་བ་ལྟར་ན། གཟེངས་རྟགས་ཕུལ་བའི་མཛད་སྒོའི་ཐོག་སྲིད་སྐྱོང་མཆོག་གིས་གསུང་བཤད་གནང་དོན། དེ་རིང་གཙུག་ལག་སློབ་ཁང་གིས་ངོས་ལ་ཆེ་བསྟོད་ཀྱི་རྟགས་མ་འདི་འདྲ་ཞིག་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་མ་ཟད། ངོས་ལ་ཆེ་མཐོང་ཧ་ཅང་ཐོབ་པ་ཞིག་བྱུང་། ངོས་ནི་མི་ཚང་ཉམ་ཆུང་ཞིག་ནས་ཡིན་པ་མ་ཟད། འདི་ལྟ་བུའི་རྟགས་མ་ཐོབ་རྒྱུའི་འོས་ཆོས་གང་ཡང་ཚང་བ་ཞིག་མཐོང་གི་མེད་ཀྱང་། བོད་མི་ཚོས་བདེན་པའི་འཐབ་རྩོད་བྱེད་བཞིན་པའི་དུས་སྐབས་འདིར་ངོས་ལ་ཆེ་བསྟོད་ཀྱི་གཟེངས་རྟགས་འདི་འདྲ་ཞིག་གནང་བ་དེས། གཞིས་ལུས་བོད་མི་ཚོར་བརྡ་ལན་ཤུགས་ཆེན་པོ་ཞིག་གཏོང་ངེས་ཡིན། བོད་ནང་གི་གཞིས་ལུས་སྤུན་ཟླ་ཚོར་རྒྱབ་སྐྱོར་བྱེད་མཁན་ཡོད་པ་མ་ཟད། ཁོང་ཚོས་འགྲོ་བ་མིའི་ཐོབ་ཐང་དང་དྲང་བདེན། རང་དབང་སོགས་རྩོད་ལེན་བྱེད་བཞིན་པར་རྒྱལ་སྤྱིའི་ཐོག་རྒྱབ་སྐྱོར་ཡོད་པའི་རྣམ་པ་གསལ་བཏོན་དང་། བོད་ནང་གི་གཞིས་ལུས་རྒྱ་ཆེའི་མི་མང་དང་། ༧གོང་ས་མཆོག་གིས་བོད་མི་ཚོར་དམངས་གཙོའི་ལམ་བཟང་གསོལ་སྩལ་མཛད་རྒྱུའི་ཐུགས་ཀྱི་འཆར་སྣང་གཙོས། ཆོས་ལུགས་མཐུན་སྒྲིལ་དང་འགྲོ་བ་མིའི་བཟང་སྤྱོད་དང་འབྲེལ་བའི་བྱམས་བརྩེ་དང་བཟོད་བསྲན་སོགས་བཟང་པོའི་རིན་ཐང་གོང་མཐོར་གཏོང་གནང་མཛད་རྒྱུའི་མཛད་རྗེས་ལ་རྗེས་སུ་ཡི་རང་དང་བསྔགས་བརྗོད་ཞུས་ཏེ། ངས་རྟགས་མ་འདི་དང་ལེན་ཞུས་པ་ཡིན། ཞེས་གསུངས་འདུག
སྲིད་སྐྱོང་མཆོག་གིས་བོད་བརྒྱུད་ནང་བསྟན་དང་འབྲེལ་བའི་ཐོག་གསུངས་དོན། གཙུག་ལག་སློབ་གྲྭའི་ངེས་སྟོན་པ་མཆོག་གིས་ངོས་ལ་ལོ་ལྟར་གཙུག་ལག་སློབ་གྲྭ་འདིར་བོད་པའི་དགེ་འདུན་པ་ཁག་གཅིག་ཕེབས་ནས་རྡུལ་ཚོན་དཀྱིལ་འཁོར་བཞེངས་རྒྱུས་མཚོན་བོད་བརྒྱུད་ནང་བསྟན་གྱི་འགྲེམས་སྟོན་གོ་སྒྲིག་གནང་སྲོལ་ཡོད་སྐོར་གསུངས་པ་དང་སྦྲགས། རྡུལ་ཚོན་དཀྱིལ་འཁོར་གྱི་མཛེས་སྡུག་ལ་ངེས་སྟོན་པ་མཆོག་ཧ་ཅང་ཡིད་དབང་འཕྲོག་བྱུང་གསུང་པ་མ་ཟད། རྡུལ་ཚོན་དཀྱིལ་འཁོར་བཞེངས་སྐྲུན་སྐབས་དགེ་འདུན་པ་ཚོས་སྐུ་ལས་ཧ་ཅང་ཆེན་པོས་བཞེངས་སྐྲུན་གནང་ཡང་མཐར་དཀྱིལ་འཁོར་ཤིག་པ་དེར་ཏོག་ཙམ་ཡ་མཚན་བསྐྱེས་སྐོར་གསུང་བྱུང་། དེ་ནི་ནང་པ་ཚོས་དུས་རྟག་ཏུ་ཡིད་ལ་དྲན་བཞིན་པའི་འདུས་བྱས་ཐམས་ཅད་མི་རྟག་པ་ཡིན་པ་དེ་སེམས་འགུལ་གཏོང་ཆེད་ཡིན་པ་དང་། ང་ཚོ་འགྲོ་བ་མི་ཞིག་ཡིན་ནའང་སྐྱེས་ནས་མཐར་འཆི་རྒྱུ་ཡིན་པ་མ་ཟད། འཆི་བ་ལས་གཡོལ་ཐབས་མེད་སྟབས། ང་ཚོ་འཚོ་བའི་རིང་མི་ཚེ་དོན་དང་ལྡན་པ་ཞིག་བྱེད་དགོས། དེ་འདྲ་བྱུང་བ་ཡིན་ན་གསོན་དགོས་ཆོད་ཡོད་སྟབས། ངོས་ཀྱིས་ཨ་རིའི་ཀེམ་བྷི་རི་ཆི་མཐོ་སློབ་བཞག་ནས་རྒྱ་གར་དུ་ཕྱིན་པ་རེད། ཉེ་ལམ་རྒྱ་ནག་གི་སྲིད་འཛིན་ཞི་ཅིན་ཕིན་ཨ་རིར་བསླེབས་ཡོད་པ་མ་ཟད། སྐབས་དེར་ཨ་རྒྱ་གཉིས་ཀྱིས་དྲ་རྒྱའི་བདེ་འཇགས་ (Cyber Security) ཐོག་བགྲོ་གླེང་གནང་ཡོད་པ་རེད། ཅེས་སོགས་གསུངས་འདུག
ལྷོ་ཨ་ཧྥི་རི་ཀའི་ཡེ་ཤུའི་ཆོས་དཔོན་ཌ་སེ་མོན་ཌེ་ཀྲུ་ཌོ་མཆོག་གིས་འཚམས་འཕྲིན་ཞིག་གནང་བའི་ནང་། འཁྲུག་རྩོད་དང་སྡུག་བསྔལ་གྱིས་མནར་བའི་དུས་སྐབས་འདི་འདྲ་ཞིག་ལ། ཁྱེད་ལ་ཞི་བདེ་དང་བློ་གྲོས་གོང་སྤེལ་གྱི་སྲིད་འཛིན་གཟེངས་རྟགས་གནང་བར་ངོས་ཀྱིས་འཚམས་འདྲི་ཞུ་བཞིན་ཡོད། ད་ལྟ་རྒྱལ་སྤྱིའི་ཐོག་དམག་འཁྲུག་ལས་གཡོལ་ཆེད་རྒྱལ་ཁབ་གཞན་ནང་སྐྱབས་བཅོལ་འགྲོ་དགོས་བྱུང་བཞིན་ཡོད་པ་དེས། འཛམ་གླིང་མི་མང་ཧང་སང་ཡོད་སྟབས། ང་ཚོའི་འཛམ་གླིང་འདིར་ཁྱེད་ལྟ་བུའི་ཞི་བདེ་དང་མཐུན་སྒྲིལ་ལ་མོས་པའི་ཕུལ་བྱུང་གི་མགོ་ཁྲིད་གང་མང་དགོས་ཀྱི་ཡོད་པ་རེད། ཅེས་བཀོད་འདུག
གསར་འགོད་པ། དོན་གྲུབ།
གཟེངས་རྟགས་འདི་ནི་བོད་མི་རིགས་ཀྱི་འཐབ་རྩོད་རྒྱུན་གནས་དང་བཙན་བྱོལ་བོད་མིའི་སྒྲིག་འཛུགས་ཀྱི་”སྲིད་སྐྱོང་”རྒྱལ་སྤྱིའི་ཆབ་སྲིད་ཀྱི་དེབ་ཐེར་དུ་ངོས་ལེན་བརྩི་བཀུར་མཆིས་པར་མཚོན་ཐུབ།
བོད་གངས་ཅན་གྱི་སྲིད་སྐྱོང་མཆོག་ལ་ཨ་རིའི་གསེར་གྱི་རྟགས་མ་གནང་ཐོབ་པར་དགའ་སྤྲོས་རྟེན་འབྲེལ་ཞུ། མུ་མཐུད་ནས་རང་གི་ཕྱག་ལས་རྒྱུན་སྐྱོང་གནང་སྟེ་དེ་བས་ཀྱང་མཛད་རྗེས་ཆེ་ཙམ་འཇོག་པའི་སློན་ལམ་ཡོད། སྲིད་སྐྱོང་རྒྱལ་གྱུར་ཅིག