རང་ཤ་བཅད་ནས་ཁྱི་ཁར་གཡུག

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༧༧ སྟེང་གི་རྩོམ་སྒྲིག་པའི་གཏམ།

ཉེ་བའི་ལོ་ཤས་ནས་བཟུང་རྒྱ་གཞུང་གིས་ཕྱི་ཕྱོགས་སུ་སྒོ་མོ་ཆེས་ཆེར་ཕྱེས་ཡོད་པའི་རྣམ་པ་བསྟན་ཏེ། བོད་ནང་གནམ་ས་བླ་འོག་བརྗེས་པ་ལྟ་བུའི་འགྱུར་ལྡོག་བྱུང་ཡོད་ལ། ཕྱི་ན་ཡོད་པའི་བོད་རིགས་ཚོ་བོད་དུ་ལོག་རྒྱུར་དགའ་བསུ་ཡོད་སྐོར་གྱི་དྲིལ་བསྒྲགས་སྣ་ཚོགས་བྱས་པ་དང་བསྟུན། གཞིས་བཞུགས་ཕ་མ་གཉེན་ཉེ་དང་བཟའ་ཟླ་བུ་ཕྲུག ད་དུང་དད་ལྡན་སེར་སྐྱ་ཁྲི་འབུམ་གྱི་རེ་སྨོན་ལྟར། རྒྱ་བལ་འབྲུག་གསུམ་གྱི་གཙོས་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བཙན་བྱོལ་བོད་མིའི་ནང་བོད་ལ་གཉེན་འཕྲད་དུ་འགྲོ་མཁན་དང་གཏན་དུ་སྡོད་མཁན་ཧ་ཅང་མང་པོ་ཡོད་པ་རེད།

 
གཞིས་བཞུགས་བོད་མི་ཚོས་བོད་ས་དང་རྒྱ་ནག་ཅེས་ཚིག་གིས་འབོད་སྟངས་ལོག་ག་ཡིན་ལ། སེམས་ཀྱིས་འཛིན་སྟངས་ཀྱང་རྦད་དེ་ཐ་དད་རེད། ཡིན་ནའང་། བཙན་བྱོལ་བོད་མིའི་སྤྱི་ཚོགས་ཁྲོད་རང་མི་རང་ཡུལ་དུ་ལོག་ནའང་༧གོང་ས་སྐྱབས་མགོན་ཆེན་པོ་མཆོག་དང་བཙན་བྱོལ་བོད་མིའི་སྒྲིག་འཛུགས་ལ་ཡིད་ཐང་ཆད་སོང་བའམ་རེ་བ་བརླགས་སོང་བ། ཡང་ན་ངོ་ལོག་སྟེ་རྒྱ་ནག་ལ་མགོ་བཏགས་པའི་ཚོར་སྣང་ངམ། བཤད་ཡམས་མེ་ལྕེ་ལྟ་བུ་ཞིག་མཆེད་ཀྱིན་ཡོད་པ་དེ་རང་ཤ་བཅད་ནས་ཁྱི་སྔུན་དུ་གཡུག་པ་དང་ཨ་ན་མ་ན་རེད། ད་ལྟ་ང་ཚོ་གཞན་ཡུལ་དུ་ཡོད་ཀྱང་བོད་གངས་རིའི་ལྗོངས་དེ་ང་ཚོ་ཚང་མའི་ཆེས་མཐའ་མཇུག་གི་དུར་ས་ཡིན་པ་གཏན་ནས་བརྗེད་མི་རུང་།

 
སྔར་གྱི་བཀའ་ཤག་རིམ་པས་རང་ས་རང་སྲུང་བྱེད་པ་གལ་གནད་དུ་གཟིགས་ཏེ། གཞིས་སུ་བཞུགས་པའི་བོད་མི་ཚོས་རང་ཡུལ་ནས་བརྟན་པོར་གནས་བཅས་ཏེ་རང་ཡུལ་སྲུང་དགོས་པའི་བཀའ་སློབ་ཐེངས་མང་ཕེབས་མྱོང་ལ། ད་ལྟའི་བཀའ་ཤག་གིས་ཀྱང་གཞིས་ལུས་རྒྱ་ཆེའི་མི་མང་གི་མངོན་འདོད་ལྟར། མ་འོངས་ལོ་ངོ་ ༥ ཡི་ཆབ་སྲིད་ཀྱི་དམིགས་ཡུལ་ཆེ་ཤོས་༧གོང་ས་མཆོག་བོད་ལ་གདན་འདྲེན་ཞུ་རྒྱུ་དེ་ཡིན་ཞེས་ཁ་གསལ་གཏིང་གསལ་གྱིས་གསུངས་ཡོད་པ་དང་། དེ་བཞིན་མི་མང་གི་ངོས་ནས་བཤད་ནའང་། དབུ་མ་དང་རང་བཙན་གྱི་ལྟ་བ་གླེང་མཁན་དང་བརྩོན་ལེན་བྱེད་མཁན་སུ་ཡིན་ནའང་མཐར་ཐུག་གི་དམིགས་ཡུལ་རང་ཡུལ་དུ་ལོག་རྒྱུ་དེ་ཡིན་ལ། གཏན་ནས་མ་ནོར་བའི་འདམ་ག་ཞིག་ཀྱང་ཡིན་ངེས་རེད།

 
རྒྱ་ནག་གཞུང་གིས་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་འདི་ནུས་མེད་འགུལ་མེད་དུ་གཏོང་ཆེད། དྲིལ་བསྒྲགས་ཀྱི་བློ་ཁ་བོད་ནང་དུ་ཕྱོགས་ནས་བཙན་བྱོལ་བོད་མིར་གཞི་མེད་བསྙོན་འཛུགས་དང་འཁྱོག་བཤད་སྣ་ཚོགས་བྱེད་ཀྱིན་ཡོད་ལ། དྲིལ་བསྒྲགས་ཀྱི་བློ་ཁ་ཕྱི་ཕྱོགས་སུ་གཏད་ནས་གཞིས་བཞུགས་བོད་མི་ཚོས་གུང་ཁྲན་ཏང་ལ་བསྟོད་གླུ་ལེན་བཞིན་ཡོད་པ་དང་། གུང་ཁྲན་ཏང་གི་དབང་བསྒྱུར་འོག་བོད་ལ་རང་དབང་བདེ་སྐྱིད་ཀྱི་ཉི་མ་ཤར་ཡོད་སྐོར་གྱི་འུར་གཏམ་བསྒྲགས་ཏེ། བོད་ཕྱི་ནང་གཉིས་བར་གྱི་ཡིད་ཆེས་དང་དམ་ཚིགས་ཉམས་དམས་སུ་གཏོང་ཐབས་དང་། བོད་མི་ནང་ཁུལ་ལ་འགལ་བ་བཟོ་ཐབས་ཀྱི་སྲིད་ཇུས་འདྲ་མིན་སྣ་ཚོགས་དངོས་ཤུགས་བརྒྱུད་གསུམ་ནས་སྤེལ་བཞིན་ཡོད་པ་རེད།

 
བོད་ཕྱི་ནང་གཉིས་བར་འགྲོ་འོང་གི་ལམ་ཁ་ཏོག་ཙམ་ཡོད་པ་འདི་ལ་བརྟེན་ནས། འདས་པའི་མི་ལོ་ལྔ་བཅུ་ལྷག་གི་རིང་གཞིས་བྱེས་གཉིས་བར་གྱི་བསམ་བློའི་འབྲེལ་ཐག་དང་། ཕ་མ་བུ་ཕྲུག་དང་གཉེན་ཉེ་རིང་གི་འབྲེལ་ཐག ཆོས་ལུགས་དང་ཟང་ཟིང་གི་འབྲེལ་ཐག ཆབ་སྲིད་ཀྱི་གནས་བབ་རྒྱུས་ལོན་དང་སྐྱིད་སྡུག་མཉམ་མྱོང་གི་འབྲེལ་ཐག་བཅས་རྒྱུན་གནས་ཐུབ་པ་དེ་གང་ལ་བསྟེན་ནས་བྱུང་བ་རེད། ཐ་ན་བོད་ནང་གི་འདས་པོའི་བསྔོ་རྟེན་དང་གསོན་པོའི་སྐྱབས་རྟེན་དྷ་སར་འབྱོར་ཐུབ་ཀྱིན་ཡོད་ལ། སྔ་དྲོར་ཕར་རྒྱབ་ནས་ཀུ་བཏབས་པ་ཕྱི་དྲོར་ཚུར་རྒྱབ་ནས་ཐོས་ཐུབ་པ་དག མི་རབས་བརྗེས་ཀྱང་འབྲེལ་ཐག་མ་ཆད་པའི་བོད་ཕྱི་ནང་གཉིས་བར་གྱི་འགྲོ་འོང་ཁོ་ནར་བརྟེན་ནས་བྱུང་བ་རེད། དེ་བས་གནས་སྐབས་ཀྱི་ཆབ་སྲིད་མིག་རྒྱ་དོག་པོ་ཙམ་དང་། གློ་བུར་བའི་ཚོར་ཤུགས་ཐན་ཐུན་གྱི་དབང་དུ་སོང་སྟེ།  གཞིས་བྱེས་གཉིས་བར་གྱི་འགྲོ་འོང་ལ་བཀག་སྡོམ་བྱེད་པ་དང་། རང་ཡུལ་བོད་དུ་ལོག་མཁན་ཚོར་ནག་ཉེས་ཀྱི་ཞྭ་མོ་མ་སྐོན་རོགས།