རྒྱལ་སྲུང་ལྷན་ཁང་གི་བློན་ཆེན་ཁྲང་ཝན་ཆན་ཟེར་བ་ཞིག་གིས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་གིས་མཉམ་འབྲེལ་བྱས་ཏེ། ཕྱིའི་ངན་སྐུལ་འཇིགས་སྣང་སྔོན་འགོག་གིས་སྤྱི་ཚོགས་བདེ་འཇགས་ཡོང་ཐུབ་ལ་བརྩོན་དགོས་ཟེར།
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བའི་ནང་། པེ་ཅིན་གྲོང་ཁྱེར་དུ་ཁ་སང་ནས་འཚོགས་བཞིན་པའི་ལྷོ་ཤར་ཨེ་ཤ་ཡའི་རྒྱལ་ཁབ་ ༡༠ ཆེས་མཐོའི་དཔོན་རིགས་ཚོགས་ཆེན་སྟེང་། རྒྱ་ནག་མི་དམངས་བཅིངས་འགྲོལ་དམག་དཔུང་ཟེར་བའི་དམག་སྤྱི་ཆེན་མོ་དང་རྒྱ་ནག་རྒྱལ་སྲུང་ལྷན་ཁང་གི་བློན་ཆེན་ཁྲང་ཝན་ཆན་ཟེར་བ་ཞིག་གིས། ད་ལྟའི་ཆར་སྤྱིར་བཏང་ལྷོ་ཤར་ཨེ་ཤ་ཡའི་མཚོ་ཁུལ་ཁག་གི་གནས་བབ་བརྟན་ལྷིང་ཡིན་རུང་། དཔལ་འབྱོར་ཉམས་ཆག་གི་གནོད་སྐྱོན་དང་རྒྱལ་སྲུང་རྩོད་ལེན་གྱི་དཀའ་རྙོག་མང་པོ་འབྱུང་མུས་ཡིན་ཞིང་། ལྷག་པར་དུ་ཕྱིའི་རྒྱལ་ཁབ་ཁག་གིས་དྲ་ལམ་དང་སྤྱི་ཚོགས་བརྒྱུད་ལམ་སོགས་ཀྱིས་ལྷོ་ཤར་ཨེ་ཤ་ཡའི་མཚོ་ཁུལ་དུ་རྩོད་གླེང་བརྒྱུད་སྐུལ་བྱས་ཏེ། སྤྱི་ཚོགས་བརྟན་ལྷིང་ལ་ཉེན་ཚབས་བཟོ་བཞིན་ཡོད་སྟབས། རྒྱ་ནག་གིས་ལྷོ་ཤར་ཨེ་ཤ་ཡའི་ཞི་བདེ་དང་བརྟན་ལྷིང་འགན་སྲུང་བྱ་ཆེད། ལྷོ་ཤར་ཨེ་ཤ་ཡའི་རྒྱལ་ཁབ་ཁག་དང་དམག་དོན་མཉམ་འབྲེལ་བྱེད་མོས་ཡོད། ཅེས་བརྗོད་འདུག་ཀྱང་། སྐབས་དེའི་གསར་འགོད་ལྷན་ཚོགས་ཐོག ཁོས་རྒྱ་ནག་ལྷོ་རྒྱུད་ཀྱི་མཚོ་ཁུལ་རྩོད་གླེང་གི་སྐོར་ལ་གསལ་བཤད་གང་ཡང་བྱས་མི་འདུག
འདས་པའི་ལོ་ངོ་འདི་དག་རིང་རྒྱ་གཞུང་གིས་ཝེ་ཋི་ནམ་དང་ཧྥེ་ལེ་ཕེན། མ་ལེ་ཞི་ཡ། ཐེ་ཝན། བྷུ་རུ་ནེ་སོགས་ལྷོ་ཤར་ཨེ་ཤ་ཡའི་གླིང་ཕྲན་རྒྱལ་ཁབ་ཁག་གི་མཚོ་ཁུལ་རྒྱ་ནག་གི་མངའ་ཁོངས་སུ་གླེང་སྟེ། རྒྱལ་ཁབ་དེ་དག་ནང་དམག་གྲུའི་ཚོང་གཉེར་ཐད་ཨ་སྒོར་ཐེར་འབུམ་མང་པོ་བཏང་ཡོད་ཀྱང་། ཉེ་ལམ་རྒྱ་གཞུང་གིས་ལྷོ་རྒྱུད་གླིང་ཕྲན་ཁག་ཅིག་བདག་བཟུང་གིས་གཞི་རྒྱ་ཆེ་བའི་འཛུགས་སྐྲུན་བྱས་པར་བརྟེན། རྒྱ་ནག་དང་ལྷོ་ཤར་ཨེ་ཤ་ཡའི་རྒྱལ་ཁབ་ཁག་བར་མཚོ་ཁུལ་རྩོད་གླེང་རྣོ་ངར་ཆེ་རུ་འགྲོ་བཞིན་ཡོད་པ་མ་ཟད། རྒྱ་གཞུང་གིས་ད་དུང་ནུབ་རྒྱུད་ཞིན་ཅང་ཡུ་གུར་རིགས་རང་སྐྱོང་ལྗོངས་ཀྱི་ཁ་ཆེ་དྲག་སྤྱོད་པས་དྲ་ལམ་ཁག་བརྒྱུད་ནས་ཕྱི་ཕྱོགས་ཀྱི་ཁ་ཆེ་དྲག་སྤྱོད་པར་ངན་འབྲེལ་བྱས་ཏེ་རྒྱ་ནག་ནང་ཟིང་ཆ་སློང་གི་ཡོད་ལུགས་བརྗོད་འདུག
ཕྱི་ལོ་ ༢༠༡༤ ལོ་ནས་ད་ལྟའི་བར་རྒྱ་གཞུང་གིས་ལྷོ་རྒྱུད་གླིང་ཕྲན་ཁག་འཛུགས་སྐྲུན་བྱེད་མགོ་བརྩམས་པ་དང་། ཨ་རིའི་གཙོས་ནུབ་གླིང་རྒྱལ་ཁབ་ཁག་གིས་རྒྱ་གཞུང་གིས་གླིང་ཕྲན་འཛུགས་སྐྲུན་བྱེད་བཞིན་པར་སྐྱོན་བརྗོད་ཤུགས་ཆེན་བྱེད་ཀྱིན་ཡོད་པ་མ་ཟད། རྒྱལ་སྤྱིའི་སྤྱི་ཚོགས་བརྒྱུད་ལམ་ཁག་ཏུ། ཨ་རིའི་གཞུང་གིས་རྒྱ་ནག་གིས་འཛུགས་སྐྲུན་བྱེད་བཞིན་པའི་གླིང་ཕྲན་ཁག་ལས་སྤྱི་ལེ་ ༡༢ གྱི་མཚམས་ནས་རང་དབང་གི་མཚོ་ལམ་ལ་རྟོག་ཞིབ་དང་འགན་སྲུང་བྱ་རྒྱུ་ཐག་བཅད་པ་དང་། རྒྱ་གཞུང་གིས་ལྷོ་རྒྱུད་གླིང་ཕྲན་དེ་དག་འཛུགས་སྐྲུན་བྱེད་དོན་ནི་སྤྱི་མང་གི་ཁེ་ཕན་བསྒྲུབ་པའི་སླད་དུ་ཡིན་པ་ལས། དམག་དཔུང་རྒྱ་བསྐྱེད་པའི་ཆེད་དུ་མིན་པ་དང་། ཡང་རྒྱ་ནག་གིས་རང་དབང་མཚོ་ལམ་གྱི་རྒྱལ་སྤྱིའི་རྩ་ཁྲིམས་རྩིས་མེད་དུ་གཏོང་གི་མེད་ལུགས་སོགས་རྗོད་ཀྱི་ཡོད་ཀྱང་། ཨ་རིའི་གཞུང་གིས་རྒྱ་ནག་གིས་རྒྱལ་སྤྱིའི་རྩ་ཁྲིམས་འོག་དེ་སྔའི་གླིང་ཕྲན་ཁག་འཛུགས་སྐྲུན་དང་བདག་བཟུང་བྱས་མི་ཆོག་པ་མ་ཟད། རང་དབང་མཚོ་ལམ་གྱི་རྩ་འཛིན་ལ་བརྩི་སྲུང་དགོས་སྐོར་བརྗོད་འདུག
