དེ་རིང་འདི་གའི་གསར་འགོད་པས་ས་གནས་ཁག་ཅིག་ལ་ཁ་པར་བཏང་སྟེ། སྲིད་སྐྱོང་གི་བསྡུའི་མཇུག་འབྲས་རྩད་ཞིབ་བྱས་པར། ས་གནས་མང་དག་ཅིག་གིས་ད་ལྟ་གྲངས་བཤེར་བྱེད་མུས་ཡིན་ཞིང་། ས་གནས་ཆུང་ཁག་ ༡༡ ནང་གྲངས་བཤེར་གྲུབ་པའི་གནས་སྟངས་ནི། སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་འོས་གྲངས་ ༡༩༩༣ དང་། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་འོས་གྲངས་ ༦༧༦ ། ཨ་ཚོགས་ཀླུ་མཁར་བྱམས་ལགས་སུ་འོས་ ༡༩༡ ། བཀྲ་ཤིས་དབང་འདུས་ལགས་སུ་འོས་ ༡༡༠ བཅས་རེད་འདུག
གཞན། ཟླ་འདིའི་ཚེས་ ༡༩ ཉིན་དབུས་འོས་བསྡུ་ལས་ཁང་གིས་སྲིད་སྐྱོད་དང་སྤྱི་འཐུས་ཀྱི་དངོས་གཞིའི་འོས་གཞི་བཀྲམ་ཕྱོགས་སྐོར་ལ་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་། དང་པོ། འོས་སྒྲིག་དོན་ཚན་ ༤༩ ནང་གསལ་ལྟར་སྐབས་ ༡༦ པའི་བོད་མི་མང་སྤྱི་འཐུས་ཐོབ་ཁུངས་སོ་སོའི་ཐོབ་ཆའི་གྲངས་ཚད་ཀྱི་གསུམ་ལྡབ་ལས་མི་ཉུང་བའི་སྔོན་འགྲོའི་འོས་གཞི་འདོན་རྒྱུ་དང་། དངོས་གཞིའི་སྐབས་ཐོབ་ཁོངས་སོ་སོའི་ཐོབ་ཆའི་གྲངས་ཚད་ཀྱི་ཉིས་ལྡབ་ཐོག་དང་བླངས་ཇི་ཡོད་བཅས་འདོན་རྒྱུ། གཉིས་པ། འོས་སྒྲིག་དོན་ཚན་ ༦༧ ནང་གསལ་ལྟར། སྲིད་སྐྱོང་གི་དངོས་གཞིའི་འོས་གཞི་གཏན་འབེབས་གསལ་བསྒྲགས་མ་བྱས་གོང་དུ་འོས་ཁོངས་ནས་དགོངས་ཞུ་ཕྱིར་འཐེན་གོ་སྐབས་སྤྲོད་ཆེད་འོས་དམིགས་དྲུག་ལས་མ་མང་བ་སྔོན་འགྲོའི་འོས་གཞིར་འདོན་རྒྱུ་དང་། དངོས་གཞིའི་སྐབས་འོས་གཞི་གཉིས་ལས་མ་ཉུང་བ་གསལ་བསྒྲགས་བྱེད་དགོས། ཞེས་གསལ་བའི་དགོངས་དོན་ལྟར། དངོས་གཞིའི་འོས་གཞི་གཉིས་འདོན་རྒྱུ་ཡིན་ཞིང་། གལ་སྲིད་གཉིས་པ་དང་གསུམ་པའི་བར་འོས་ཐོབ་བརྒྱ་ཆ་ཉི་ཤུ་ལས་ཉུང་བ་ཡིན་ཚེ་དངོས་གཞིའི་འོས་གཞི་གསུམ་འདོན་རྒྱུ་ཡིན། ཅི་སྟེ་སྲིད་སྐྱོང་གི་དངོས་གཞིའི་འོས་ཐོབ་དང་པོ་དང་གཉིས་པ་འདྲ་མཉམ་བྱུང་ཚེ་སྐབས་མཚམས་ཐག་གཅོད་བྱ་རྒྱུ་བཅས་ཀྱི་གསལ་བསྒྲགས་སུ་ཞེས་བཀོད་འདུག
གསར་འགོད་པ། དོན་གྲུབ།
གོང་གསལ་་སྲིད་སྐྱོང་འོས་མི་སོ་སོའི་འོས་ཐོབ་ལྟར་འགོ་ནས་བཀོད་གནང་འདུག་ཀྱང་བཀྲིས་དབང་འདུས་ཀྱི་འོས་ཐོབ་ཀླུ་མཁར་བྱམས་ལས་ཉུང་འདུག་ཀྱང་ཁོང་གི་གོང་དུ་བཞག་དགོས་དོན་གང་ཡིན་ནམ།།
བོད་ཀྱི་དུས་བབ་ལགས
བཀའ་ཁྲི་དང་སྤྱི་འཐུས་འོས་བསྡུའི་མཐའ་མའི་གྲུབ་འབྲས་ཕྱིར་བསྒྲགས་བྱེད་རྒྱུའི་འོས་འགན་བོད་གཞུང་འོས་བསྡུ་ལས་ཁུངས་ལ་ཡོད་པ་ལས། བོད་ཀྱི་དུས་བབ་ལྟ་བུའི་སྒེར་གཉེར་ཚོགས་པ་སུ་ཞིག་ལ་ཡང་མེད་པ་ཁྱོད་ཀྱི་ཀྱང་ཤེས་ལ་ང་ཚོའི་ཀྱང་ཤེས་མོད། འོ་ན། ཇི་ཞིག་ལ་འབྱོན་ལྡོག་མགོ་རིལ་བྱེད་ཀྱི་ཡོད། རང་གཞུང་ལ་འགྲོ་ལུགས་ཞིག་ཡོད་པས་འགྲོ་ལུགས་ལྟར་འགྲོ་བཅུགས་རོགས་ཞུ་རྒྱུ་ཡིན།
འབའ་ཚང་བློ་ལགས།
ཁྱོད་ཀྱི་གཞུང་སེམས་དང་སྤྱི་སེམས་ཡི་རངས་ཡོད། འོན་ཀྱང་། ང་ཚོའང་གསར་ཁང་ཞིག་ཡིན་པའི་ངོས་ཐད་ནས་མི་མང་གིས་ཧ་གོ་འདོད་ཀྱིས་སྒུག་བསྡད་ཡོད་པའི་གནས་ཚུལ་གང་ན་ཅི་རེག་འབད་པས་བཙལ་ཏེ་ཀློག་པ་པོ་ཚོའི་སྦྱན་ལམ་དུ་འབུལ་རྒྱུ་ང་ཚོའི་ལས་འགན་རེད། དེ་གཅིག་ཡིན། གཉིས་པ། ཉེ་ལམ་དབུས་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་མཆོག་གིས། “ད་རེས་བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་སུ་འོས་བསྡུའི་ས་ཚིགས་གྲངས་ ༦༣༦ ཙམ་ཡོད། ས་གནས་ཁག་གི་འོས་གྲངས་སང་ཉིན་གནངས་ཉིན་རིམ་པ་བཞིན་བསྒྲགས་ཡོང་གི་རེད། དབུས་འོས་བསྡུ་ལས་ཁང་གི་ཕྱོགས་བསྡོམས་དེ་ཕྱི་ཟླ་ ༡༢ པའི་ཚེས་ ༢ ཉིན་གསལ་བསྒྲགས་གནང་ཡོང་གི་རེད། ” ཅེས་གསུངས་ཡོད་པ་ཐོས་མ་བྱུང་ངམ།