ཉེ་ལམ་ཚེས་ ༣༠ ཉིན་གྱི་དགོང་མོར། དྷ་ས་བྷག་སུའི་ལམ་ཁར་རྒྱ་གར་བ་གསུམ་གྱིས་བོད་པའི་ཕོ་གསར་ཞིག་ལ་དོན་མེད་དུ་གྲིས་བརྒྱབ་སྟེ་བསད་ཡོད་པ་དང་། ཉིན་དེའི་ཉིན་རྒྱབ་རྒྱ་གར་ཉེན་རྟོག་པས་མི་གསོད་ལག་དམར་གསུམ་འཛིན་བཟུང་བྱས་ཏེ། ད་ལྟ་དྷ་ཤོད་ཀ་ཅ་རུལ་བཙོན་ཁང་དུ་ཁྲིམས་བཤེར་བྱེད་བཞིན་ཡོད་འདུག
དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་བདེ་སྲུང་དྲུང་ཆེ་འཕགས་པ་ཚེ་རིང་ལགས་སུ་བཅར་འདྲི་ཞུས་པར་ཁོང་གིས། ཚེས་ ༣༡ ཉིན་གྱི་ཞོགས་པར་གནས་ཚུལ་དེ་ང་ཚོས་གོ་མ་ཐག ང་ཚོས་ས་གནས་ཉེན་རྟོག་ལས་ཁུངས་དང་རྒྱ་གར་གྱི་འབྲེལ་ཡོད་ལས་ཁུངས་ཚང་མར་འབྲེལ་བ་བྱས་པ་ཡིན། སྐབས་དེར་༧གོང་ས་མཆོག་གཙུག་ལག་ཁང་དུ་བཞུགས་ཡོད་སྟབས་ང་ཚོ་སྨན་ཁང་ལ་འགྲོ་རྒྱུ་བྱུང་ཡོད་པ་མ་རེད། ས་གནས་མགོ་འཛིན་དང་མདོ་སྨད་དབུས་རྒྱུན་ལས་རྣམ་པ་ཚོས་དངོས་གནས་ཡག་པོ་བྱས་སོང་། དངོས་ཡོད་གནས་ཚུལ་ལ་ལྟ་རྒྱུ་དེ་གལ་ཆེན་པོ་རེད། བོད་མི་ཞིག་འདས་གྲོངས་ཕྱིན་པར་ཧ་ཅང་བློ་ཕམ་ཆེན་པོ་བྱུང་། ཞེས་གསུངས་སོང་།
རྒྱ་གར་ཉེན་རྟོག་པས་དོགས་ཡོད་མི་གསུམ་འཛིན་བཟུང་བྱས་ཡོད་རབ་འདུག་པ་དེ་བདེན་པ་ཡིན་མིན་དྲིས་པར་ཁོང་གིས། དེ་བདེན་པ་རེད། ཚེས་ ༣༡ ཉིན་རྒྱབ་ནས་འཛིན་བཟུང་བྱས་འདུག ཁོ་ཚོས་ཀྱང་ངོས་ལེན་བྱས་འདུག མི་བསད་པ་དེ་ནག་ཉེས་ཆེན་པོ་རེད། ད་ལྟ་ཁྲིམས་ལ་སྦྱར་ཡོད་པ་རེད། ཁྲིམས་ལ་ང་ཚོ་ཚང་མས་བརྩི་བཀུར་བྱ་དགོས། རྒྱ་གར་ཡུལ་མི་དང་ང་ཚོ་བཙན་བྱོལ་བོད་མི་སུ་ཡིན་ཡང་ཁྲིམས་ལ་བརྩི་བཀུར་བྱ་དགོས་པ་རེད། ཁ་སང་དེ་རིང་སྤྱི་ཚོགས་ནང་སྐད་ཆ་འདྲ་མིན་དང་གཞོན་སྐྱེས་ཚོས་ངར་ཤུགས་ཆེན་པོ་བྱེད་ཀྱི་ཡོད་ས་རེད། ཐུགས་ཁག་ཡོད་པ་མ་རེད་དེ། དེ་འདྲ་མ་གནང་ན་ཡག་པོ་ཡོད་པ་རེད་བསམ་གྱི་འདུག ཅེས་གསུངས་སོང་།
མཇུག་ཏུ་ཁོང་ལ་དགོང་མོ་དེར་གྲོངས་ཟིན་པའི་ཕོ་གསར་དེ་དང་མཉམ་དུ་ཡོད་པའི་བུ་མོ་དེའི་སྐོར་དྲིས་པར་ཁོང་གིས། ཁ་སང་ས་གནས་མགོ་འཛིན་དང་མདོ་སྨད་དབུས་རྒྱུན་ཚོགས་གཙོ་སོགས་སོང་སྟེ། ཉེན་རྟོག་པར་བུ་མོ་དེར་སྲུང་སྐྱོབ་ཡག་པོ་བྱེད་རོགས་ཞེས་སྙན་སེང་ཞུས་འདུག ད་ལྟ་མི་གསོད་མཁན་འཛིན་བཟུང་བྱས་ཟིན་པ་དང་། ཁྲིམས་ཐོག་ཐག་གཅོད་ཡོང་རྒྱུར་བརྟེན་བུ་མོའི་བདེ་འཇགས་ལ་སྐྱོན་ཡོང་གི་མ་རེད་བསམ་གྱི་འདུག ཅེས་གསུངས་སོང་།
གསར་འགོད་པས་དྷ་རམ་ས་ལའི་ས་གནས་མགོ་འཛིན་བསོད་ནམས་རྡོ་རྗེ་ལགས་སུ། བོད་པའི་ཕོ་གསར་གསོད་མཁན་གྱི་རྒྱ་གར་བ་དེ་དག་གང་ནས་ཡིན་པ་དང་། ཁོང་ཚོའི་ཁྲོད་ཀྱི་མི་གཅིག་སྔོན་ཆད་དྷ་སྟེང་བོད་ཁྱིམ་སློབ་གྲྭར་ཞུགས་མྱོང་རབ་འདུག་པ་བདེན་པ་ཡིན་མིན་དྲིས་པར་ཁོང་གིས། གྲི་རྒྱག་མཁན་གཅིག་སྔོན་མ་བོད་ཁྱིམ་སློབ་གྲྭའི་ནང་ཞུགས་ཏེ་འཚར་ལོངས་བྱུང་བ་ཞིག་ཡིན་པ་བདེན་པ་རེད། དེ་ཁ་གསལ་པོ་ཆགས་ཚར་བ་རེད། ཁོ་རང་ཨ་མདོའི་གྲོང་གསེབ་རང་ལ་འདུག་མཁན་གྱི་ཡུལ་མི་ཞིག་གི་བུ་ཕྲུག་རེད། གྲི་རྒྱག་མཁན་གཞན་པ་དེ་ཚོའི་ནང་ནས་གཅིག་ད་ལྟ་བྷག་སུའུ་ནང་ལས་ཀ་བྱེད་མཁན་རེད།
ཐེངས་འདིའི་གནད་དོན་གྱི་འགན་གཙོ་བོ་སུས་འཁུར་གྱི་ཡོད་མེད་དྲིས་པར། ད་ལྟའི་གནས་སྟངས་འདྲ་བོ་ཡིན་ན། ས་གནས་མགོ་འཛིན་གྱིས་དམིགས་བསལ་གྱིས་འགན་འཁུར་བའི་ཐོག་ནས་མདོ་སྨད་ཆོལ་ཁའི་རྒྱུན་ལས་རྣམ་པས་འགན་འཁུར་གྱི་ཡོད་པ་རེད། མ་འོངས་པར་ཁྲིམས་ཁང་ནས་ཐག་གཅོད་བྱེད་སྐབས་དཔང་རྟགས་ཡག་པོ་དགོས་ཀྱི་ཡོད་སྟབས། དཔང་རྟགས་ཀྱི་ཆེད་དུ་ང་ཚོ་ཚང་མ་མཉམ་རུབ་བྱེད་དགོས་པ་རེད། གཡས་གཡོན་གྱི་བོད་པ་གཅིག་གཉིས་ཀྱིས་དངོས་སུ་མཐོང་འདུག་ཀྱང་། ཁོང་ཚོ་མདུན་ལ་ཐོན་ནས་བཤད་ཐུབ་ཀྱི་མེད་སྟབས། ཁོང་ཚོར་ང་ཚོས་བདེན་དཔང་གནང་རོགས་ཟེར་ནས་འབོད་སྐུལ་ཞུ་ཡི་ཡོད། ག་ཚོད་ཀྱིས་མི་མང་པོས་ལབ་པ་ཡིན་ན། ནག་ཉེས་འདི་རིགས་ཀྱི་ནང་ཉེས་ཅན་ཁྲིམས་ཁང་ནས་ཀློད་གྲོལ་བཏང་ཟེར་བའི་གནས་སྟངས་རྩ་བ་ཉིད་ནས་ཡོད་པ་མ་རེད། ཅེས་བརྗོད་བྱུང་།
དེ་རིང་བུ་མོ་དེས་ཉེས་ཅན་ངོ་རྟགས་འཛིན་གྱི་ཡོད་པའི་སྐོར་ལ་ཁོང་གིས། དེ་རིང་ཉིན་རྒྱབ་ཆུ་ཚོད་ ༣ ཐོག་བུ་མོ་དེས་ཉེས་ཅན་རྣམས་ངོས་འཛིན་བྱ་རྒྱུ་ཡིན་པ་དང་། ངོས་འཛིན་བྱེད་སྟངས་དེ་ག་འདྲ་རེད་ཟེར་ན། ཉེས་ཅན་གསུམ་དང་ཁོ་ཚོ་འདྲ་བོ་དྲུག་བདུན་ཞིག་མཉམ་དུ་བཞག་སྟེ། ཤེལ་སྒོ་ཞིག་གི་ནང་ནས་བུ་མོས་ཁོ་ཚོ་མཐོང་བ་དང་། ཁོ་ཚོས་བུ་མོ་མི་མཐོང་བ་བཟོས་ཏེ་མི་དེ་དག་ངོས་འཛིན་བྱ་དགོས་པ་རེད། ང་ཚོའི་ངོས་ནས་བུ་མོ་དེས་གྲི་རྒྱག་མཁན་དེ་རེད། སྦག་སྦག་གཏོང་མཁན་དེ་རེད་ཅེས་ངོ་རྟགས་ཆོད་པར་ཡིད་ཆེས་ཡོད། ཅེས་གསུངས་སོང་།
གསར་འགོད་པས་མདོ་སྨད་དབུས་རྒྱུན་ཚོགས་གཙོ་གངས་རི་ལགས་སུ་བཅར་འདྲི་ཞུས་པར་ཁོང་གིས། ཚེས་ ༣༡ ཉིན་གྱི་ཞོགས་པར་གནས་ཚུལ་དེ་ཐོས་མ་ཐག མདོ་སྨད་དབུས་རྒྱུན་ལས་དང་ས་གནས་རྒྱུན་ལས། དྷ་སའི་ས་གནས་མགོ་འཛིན། འདས་པོའི་མི་བདག་དགེ་བསྟན་པ་བཀྲ་ཤིས་ལགས་དང་ང་ཚོ་ཉེན་རྟོག་པའི་སར་སོང་པ་ཡིན། ཉེན་རྟོག་པ་ཚོར་སྙན་སེང་ཞུ་དུས་ཁོ་ཚོས་དཔེ་ཡག་པོ་བྱས་སོང་། ཉི་མ་དེའི་ཉིན་རྒྱབ་ཉེན་རྟོག་པས་ལག་དམར་གསུམ་འཛིན་བཟུང་བྱས་ཡོད་ས་རེད། ང་ཚོར་སྟོན་གྱི་མི་འདུག ཉེན་རྟོག་པ་ཚོས་ས། “ཁྱོད་རང་ཚོས་སེམས་ཁྲལ་མ་བྱེད། ཁོ་ཚོའི་གྲི་དང་སྦག་སྦག་ཚང་མ་བཟུང་ཡོད། བློ་བདེ་བོ་བྱོས” ཞེས་ནས་ཤོད་ཀྱི་འདུག དེ་ནས་ང་ཚོས་ཉེན་རྟོག་པར་ཁྱོད་རང་ཚོས་དྲང་མོ་དྲང་བཞག་གནང་རོགས་ལབ་པ་ཡིན། ཞེས་བརྗོད་སོང་།
འདས་པོའི་གྲོགས་མོ་དེའི་སྐོར་དྲིས་པར་ཁོང་གིས། བུ་མོ་དེར་ང་ཚོ་དངོས་སུ་ཐུག་སྟེ། སེམས་ཁྲེལ་རྩ་བ་ནས་བྱེད་དགོས་མ་རེད། ཁྱེད་རང་སྲུང་མཁན་ང་ཚོས་གོ་སྒྲིག་བྱེད་ཀྱི་ཡོད། དགོང་མོ་དེར་ཁྱོད་རང་གཉིས་ལ་ག་རེ་བྱུང་བ་དེ་ཉེན་རྟོག་པར་གསལ་བོ་ལབ་དགོས་པ་རེད། ང་ཚོར་བདེན་དཔང་གཅིག་ཡོད་པ་དེ་བུ་མོ་ཁྱོད་རང་རེད། ཁྱེད་རང་ག་བ་ཐུག་པ་ཡིན་ན་དྲང་མོ་དྲང་རྐྱང་བཤད་དེ་ཁྱེད་རང་གིས་ཤུགས་རྒྱག་དགོས་རེད། ཅེས་ལབ་པ་ཡིན། མོ་རང་གིས་ཀྱང་ཡིན་དང་ཡིན་ལབ་སོང་། ཁ་སང་ཉེན་རྟོག་པ་ཚོས་ཀྱང་ང་ཚོས་ལས་ཀ་བྱེད་དགོས་པ་དེ་བྱས་ཡོད། མཐའ་མ་ཁྱེད་རང་ཚོ་རེད་ཅེས་ནས་བཤད་ཀྱི་འདུག
ཉེན་རྟོག་པ་ཚོས་ཕུང་བོར་བརྟག་དཔྱད་བྱས་རྗེས་ང་ཚོར་སྤྲད་སོང་། དེ་རིང་གཟའ་ཟླ་བ་ཉི་མ་ཡག་པོ་ཞིག་ཡིན་སྟབས། ཕུང་པོ་མེར་བསྲེགས་གནང་པ་རེད། མདང་དགོང་ནས་གཞུང་འབྲེལ་མ་ཡིན་པའི་ཚོགས་པ་ཁག་ཚང་མ་ཕེབས་སོང་ལ། དེ་རིང་ཞོགས་པར་མེར་བསྲེགས་སྐབས་སུའང་མི་ཧ་ཅང་མང་པོ་ཕེབས་ཏེ་གདུང་སེམས་མཉམ་སྐྱེད་གནང་གི་འདུག དེ་བཞིན། དེ་རིང་དྷ་རམ་ས་ལའི་ཚོང་ཁང་དང་ཟ་ཁང་ཚང་མས་མྱ་ངན་བྱས་ཏེ་སྒོ་རྒྱག་གི་ཡིན་ཟེར་གྱི་འདུག དེར་མ་ཟད། ཕལ་ཆེར་སང་ཉིན་གནང་ཉིན་ཞི་བའི་སྒོ་ནས་སུ་གང་ལ་སྡུག་མེད་པར་བློ་ཕམ་ཡོད་པའི་སྒང་ནས་སྒོ་བརྒྱབ་ནས་སྡོད་ཀྱི་ཡིན་ཟེར་གྱི་འདུག ང་ཚོས་ཀྱང་སྒོ་རྒྱག་དགོས་པ་མ་རེད་ཟེར་ནས་ལབ་ཤེས་ཀྱི་མ་རེད། ཅེས་བརྗོད་སོང་།
དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཁག་གི་མི་སྣ་དང་དྷ་ས་ཁུལ་གྱི་མང་ཚོགས་ཚོས་དེ་རིང་ཞོགས་པར་འདས་པོའི་ཕུང་བོ་མེར་བསྲེགས་གནང་རྗེས་དྷ་ཤོད་ཀ་ཅ་རུལ་ཁྲིམས་ཁང་སྒོ་ཁར་འཛོམས་ཏེ། མི་མང་ ༢༠༠ ལྷག་གི་ས་རྟགས་བསྡུ་རུབ་གནང་སྟེ། ས་གནས་ཆེས་མཐོའི་ཉེན་རྟོག་མགོ་བ་(Abhishek dhulal)ཞུ་བ་ཁོང་ལ། བོད་པའི་ཕོ་གསར་དེའི་ཆེད་དུ་བོད་མི་ཚོས་དོ་ནུབ་མྱ་ངན་གྱི་མར་མེ་ཁྲོམ་སྐོར་གནང་རྒྱུ་དང་། སང་ཉིན་མུ་མཐུད་དུ་དྷ་ས་ཁུལ་གྱི་མང་ཚོགས་ཀྱིས་ཚོང་ཁང་ཟ་ཁང་ཁག་སྒོ་བརྒྱབ་སྟེ་མྱ་ངན་མཆོད་འབུལ་བྱ་རྒྱུའི་ཆོག་མཆན་ཞུས་ཏེ་བཀའ་འཁྲོལ་རེག་ཡོད་འདུག
གསར་འགོད་པ། འཇིགས་མེད་རྒྱ་མཚོ།
རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་ཐོན་པའི་བོད་པ་གསོད་མཁན་གྱི་ལག་དམར་བ་དག་གི་མིང་། ཀེ་ལ་ཤ (Kailash)དང་། ཪིནཀུ་ (Rinku)། མ་ཧེ་ཤ་ཀུ་མར་ (Mahesh Kumar) བཅས་ཡིན་འདུག
འོ་ཡ་ཚིག་གཅིག་གཉིས་ཞིག་བྲིས་མཆོག་པ་ཞུ་ཡི་གེའི་དག་ཆ་དེ་ཙམ་ཡག་པོ་མེད་དེར་དགོང་དག་བྱས། འོ་ཡ་ད་ནང་དོན་ཅི་ཡིན་ཟེར་ན་ཁྲིམས་ལ་ཡིད་ཆེས་བྱས་མིག་གི་དངོས་སུ་ཐོང་མཁན་གི་དཔང་པོ་བྱས་དེ་ནས་ཡུལ་མི་དང་ཕན་ཚུལ་མཐུན་པོ་བྱས་འོ་ཡ་ཕན་ཚུལ་དབར་རྣམ་འགྱུར་གང་བྱུང་མ་བརྟན་ན་ཡག་ལེ་རེད་བསམ་གི་འདུག་རྡ་རམས་ས་ལ་རི་ཙོག་ཙོག་དེའི་སྟིང་ནམ་ཡང་བོད་མེར་དབང་བའི་ས་ལག་ཐེལ་ཙམ་ཡང་མེད་བྱས་ཙང་འགྲོན་བདག་ལ་རྣམ་འགྱུར་མི་ལེགས་པ་མི་བརྟན་པར་དཔེར་ན་༼བྱ་མི་སྒྲོག་པར་སྒོ་ང་ལེན་༽ཞེས་པའི་དཔེ་ལྟར་བྱས་ན་ཁེ་མ་ཏོག་གྱོང་ཙ་བ་ནས་རག་གི་མ་རེད་ཨ་རོ་དེ་རྒན་པོ་ངའི་ཤ་ཚའི་བསམ་ཚུལ་ཡིན་ཏ་
དངོས་གནས་ཡིད་སྐྱོ་བའི་གནས་ཚུལ་ཞིག་རེད། ཡིན་ཡང་གཞན་ལ་གནོད་ཤུགས་དང་འཁོན་འཛིན་གྱིས་འདས་པོ་ལ་ཕན་མི་སྲིད། ཁྲིམས་ལུགས་ལག་སྟར་བྱས་རྒྱུ་ཤིན་ཏུ་གལ་ཆེ་ལ་དེ་ལ་ཡིད་ཆེས་ཡང་དགོས།
མི་གསོད་ལག་དམར་གཏེ་བོ་དེའི་ཐོག་བརྩེགས་ཁང་པ་ཞིག་ཨ་མདོའི་གྲོང་གསེབ་ཏུ་ཡོད་པ་དང་། ཁང་པ་དེའི་ནང་བོད་པ་གསར་འབྱོར་བ་མང་པོ་བསྡད་ཡོད་པའི་སྐད་ཆ་འདུག གྲོངས་ཟིན་པའི་བོད་པའི་ཕོ་གསར་དེའི་ངོ་ཤེས་གྲོགས་པོ་མང་པོ་ཞིག་གིས་ལག་མར་གྱི་ཁང་པའི་ནང་སྡོད་མཁན་ཚོར་འབོད་སྐུལ་ཞུས་ཏེ། ཁང་པ་དེའི་ནང་ནས་བོད་པ་མི་གཅིག་ཀྱང་མི་སྡོད་རྒྱུ་དང་། གལ་སྲིད་ཁང་པ་རེག་མིན་དང་དངུལ་གྱི་དཀའ་ངལ་སོགས་འཕྲད་ན་འདས་པོའི་གྲོགས་ཕོ་མོ་ཚོས་རོགས་རམ་བྱ་རྒྱུར་འབོད་སྐུལ་དང་བརྒྱུད་སྐུལ་བྱེད་བཞིན་འདུག འདི་ཧ་ཅང་ཡག་པོ་རེད་བསམ་གྱི་འདུག ད་རེས་ཀྱི་གོ་སྐབས་འདི་བརྒྱུད་དེ་རྡ་རམ་ས་ལ་ཁུལ་གྱི་བོད་མི་ཚོས་ཁྱོན་ཡོངས་ནས་རྒྱ་གར་བ་ཚོར་རྣམ་འགྱུར་ཞིག་སྟོན་དགོས་ཀྱི་འདུག