གོ་མིན་ཏང་དང་གུང་ཁྲན་ཏང་འཐབ་འཁྲུག་མཇུག་བསྒྲིལ་བའི་ལོ་ངོ་ ༦༠ རྗེས་ཀྱི་རྒྱ་ནག་དང་ཐའེ་ཝན་གྱི་སྲིད་འཛིན་ཐུག་འཕྲད་ཐོག་མ་གནང་རྒྱུ་ཡིན་འདུག
ཁ་སང་ཐའེ་ཝན་སྲིད་འཛིན་ལྷན་ཁང་གི་མགྲིན་ཚབ་པ་ཁྲིན་ཡེ་ཞིན་ (Chen Yixin) གྱིས། ཟླ་འདིའི་ཚེས་ ༧ ཉིན་ཐའེ་ཝན་གྱི་སྲིད་འཛིན་མཱ་ཡོན་ཅའུ་ (Ma Ying-jeou) དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་སེང་གྷ་པུར་ནས་ཐུག་འཕྲད་བྱ་འཆར་ཡོད་པ་ཁྱབ་བསྒྲགས་བྱས་འདུག དེ་ནི་ཕྱི་ལོ་ ༡༩༤༩ ལོར་རྒྱལ་ཁབ་གཉིས་བར་འཐབ་འཁྲུག་མཇུག་སྒྲིལ་རྗེས་ཕྱོགས་གཉིས་ཀྱི་སྲིད་འཛིན་ཐུག་འཕྲད་བྱས་པ་ཐོག་མ་དེ་ཆགས་རྒྱུ་ཡིན་འདུག
མགྲིན་ཚབ་པ་ཁྲིན་ཡེ་ཞིན་གྱིས། སྲིད་འཛིན་མཱ་ཡོན་ཅའུ་ཡི་ཐུག་འཕྲད་དེའི་དམིགས་ཡུལ་གཙོ་བོ་རྒྱ་མཚོའི་མཐའ་ གཉིས་ཞི་བདེ་ལྷང་འཇགས་ཡོང་ཐབས་དང་། ད་ལྟའི་ཐའེ་ཝན་གྱི་མཚོ་མཐའ་མུ་མཐུད་གནས་ཐབས་བྱ་རྒྱུ་དེ་རེད། སྐབས་དེར་ཕྱོགས་གཉིས་ཀྱིས་མཉམ་འབྲེལ་གྱི་གཏམ་བཤད་དང་གྲོས་ཆོད་ལ་ས་རྟགས་རྒྱག་རྒྱུ་གང་ཡང་ཡོད་པ་མ་རེད། ཅེས་བརྗོད་འདུག
དེ་རིང་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། རྒྱ་ནག་རྒྱལ་སྲིད་སྤྱི་ཁྱབ་ཁང་ཐའེ་ཝན་ལས་དོན་གཞུང་སྒྲུབ་ཁང་གི་འགན་འཛིན་ཀྲང་ཀྲི་ཅོན་ (Zhang zhijun) གྱིས། ཟླ་འདིའི་ཚེས་ ༧ ཉིན་མཚོ་མཐའ་གཉིས་ཀྱི་མགོ་ཁྲིད་ཞི་ཅིན་ཕིན་དང་མཱ་ཡོན་ཅའུ་གཉིས་སེང་གྷ་པུར་ནས་ཐུག་འཕྲད་བྱས་ཏེ། ཕྱོགས་གཉིས་ཀྱི་ཞི་བདེ་འབྲེལ་ལམ་གོང་འཕེལ་ཐད་བསམ་ཚུལ་བརྗེ་རེས་བྱ་རྒྱུ་རེད། ད་རེབ་ཀྱི་ཐུག་འཕྲད་དེ་མགོ་ཁྲིད་གཉིས་ཀྱི་ཐོབ་ཐང་དང་མཚན་གནས་ཀྱི་ངོས་ནས་འདུ་འཛོམས་བྱུང་བ་ཞིག་ཡིན་པ་ཕྱོགས་གཉིས་གས་མོས་མཐུན་ཡོད་པ་མ་ཟད། འདི་ནི་ཕྱོགས་གཉིས་ཀྱི་ཆབ་སྲིད་མི་མཐུན་པ་ཐག་གཅོད་མ་བྱས་པའི་གནས་སྟངས་འོག་རྒྱ་ནག་གཅིག་གི་རྩ་དོན་གཞིར་བཟུང་སྟེ་དངོས་ཡོད་གནས་ཚུལ་གཞི་རྩར་བཟུང་སྟེ་གོ་སྒྲིག་བྱས་པ་ཞིག་ཡིན། ཞེས་བརྗོད་འདུག
ཁ་སང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་མ་ཨེ་ལེ་ཟ་བྷེ་ཐི་ (Elizabeth Trudeau) ཡིས། འདས་པའི་ལོ་ཤས་རིང་ཐའེ་ཝན་གྱི་མཚོ་མཐའ་དང་སྐམ་སའི་གནད་དོན་མཐུན་པོ་དང་བརྟན་པོ་ཡོང་པ་དེ། ཨ་རི་དང་ཐའེ་ཝན་གྱི་ས་ཁུལ་ལ་ཁེ་ཕན་ཆེན་པོ་བྱུང་ཡོད་པ་དང་། ང་ཚོས་པེ་ཅིན་སྲིད་གཞུང་དང་ཐའེ་པེ་སྲིད་གཞུང་གཉིས་ནས་མུ་མཐུད་དུ་ཆེ་མཐོང་དང་གུས་ཞབས་ཐོག་གྲོས་མོལ་བྱ་རྒྱུར་སྐུལ་མ་གཏོང་གི་ཡོད། མཚོའ་མཐའི་གནད་དོན་ཞི་བའི་ངང་ཐག་གཅོད་དང་། ཕྱོགས་གཉིས་ཀྱི་མི་མང་གིས་ངོས་ལེན་ཡོད་པའི་ཐག་གཅོད་ཡོང་རྒྱུར་ང་ཚོར་ཡིད་ཆེས་ཡོད། ཉེ་བའི་ལོ་ཤས་ནང་ཐའེ་ཝན་དང་རྒྱ་ནག་སྐམ་ས་གཉིས་ཀྱི་འབྲེལ་བ་གོང་འཕེལ་དུ་འགྲོ་བཞིན་པ་དེར་ང་ཚོས་དགའ་བསུ་བྱེད་བཞིན་ཡོད། ཅེས་བརྗོད་འདུག
དེ་རིང་ཕྱི་དྲོ་ཆུ་ཚོད་ ༤།༣༠ ཐོག་ཀྲུང་ཧྭ་གོ་མིན་ཏང་གི་རྒྱ་ནག་སྐམ་ས་ཚོགས་པའི་མགོ་གཙོ་ཞཱ་ལི་ཡན་ (Xia Liyan) གྱིས་མཱ་ཡོན་ཅའུ་དང་ཞི་ཅིན་ཕིན་གཉིས་ཀྱི་ཐུག་འཕྲད་སྐོར་ལ་གསར་འགོད་ལྷན་ཚོགས་ཤིག་བསྐངས་ཏེ། མཱ་ཡོན་ཅའུ་ས་ཆ་གང་དུ་སོང་ཡང་སྲིད་འཛིན་གྱི་ཐོབ་ཐང་ལ་འགྱུར་བ་རྩ་བ་ནས་ཡོད་པ་མ་རེད། ཅེས་ཡང་ཡང་བརྗོད་ཡོད་འདུག
སང་ཉིན་ཐའེ་ཝན་གྱི་སྲིད་འཛིན་མཱ་ཡོན་ཅའུ་ཡིས་རྒྱལ་སྤྱི་རང་བཞིན་གྱི་གསར་འགོད་ལྷན་ཚོགས་ཤིག་བསྐོང་སྟེ་ཁོ་རང་ད་རེབ་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་འཕྲད་བྱེད་འཆར་གྱི་ནང་དོན་སྐོར་གསལ་བཤད་ཞུ་རྒྱུ་ཡིན་འདུག
གསར་འགོད་པ། འཇིགས་མེད་རྒྱ་མཚོ།
ངས་ཤེས་ཚོད་ལ་ཐེ་ཝན་དང་རྒྱ་ནག་སྐམ་སའི་སྲིད་འཛིན་རིམ་པའི་ཆེས་མཐོའི་ཐུག་འཕྲད་འདི་ཐེངས་དང་པོ་ཡིན་སྙམ། གཞན་ཚོའི་འབྲེལ་མོལ་ཡར་རྒྱས་འགྲོ་གི་ཡོད་ཀྱང་། བོད་དོན་འདི་ད་སྐབས་གང་ལའང་སླེབས་ཀྱི་མི་འདུག དེ་ལས་ཀྱང་མི་དགོས་རྒྱུ་ནང་ཁུལ་སྐྱོན་འཛུགས་དང་རྙོག་གླེང་མང་པོ་ཞིག་བྱུང་བ་རེད། བཙན་བྱོལ་བོད་མི་ཚོས་སྐྱོན་འཛུགས་བྱེད་སྟངས་ལ་གཅིག་ལྟོས་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་རྒྱ་དམར་གྱི་དངུལ་ཟ་མཁན་རེད་ཟེར་ནས་སྐྱོན་འཛུགས་དང་། བོད་མིའི་སྒྲིག་འཛུགས་ཀྱི་ཚོགས་གཙོ་མཆོག་མི་གསོད་ལག་དམར་དང་མི་ཚོང་རྒྱག་མཁན་ཟེར་ནས་སྐྱོན་འཛུགས། རང་བཙན་འཐབ་རྩོད་པ་ཀླུ་མཁར་བྱམས་དོལ་རྒྱལ་ཚོགས་པར་འབྲེལ་བ་ཡོད་ཚུལ་སོགས་ཀྱི་གླེང་རྙོག་འདི་དག་གིས་བོད་ནང་གི་བོད་མི་ཚོར་སེམས་ཤུགས་ཆག་རྒྱུ་བཟོ་གི་ཡོད། བོད་ནང་གི་བོད་མི་ཚོས་གོ་ཚེ་རྒྱལ་བ་རིན་པོ་ཆེ་མ་གཏོགས་བཙན་བྱོལ་ནང་གི་འགོ་ཁྲིད་ཚོར་ལྟ་ས་གང་ཡང་མེད་པར་ཞེད་སྣང་སྐྱེས་དགོས་པ་ཞིག་ཡིན་པར་སྒྲུབ་ཀྱི་ཡོད། མི་གོ་བ་ཅན་ལ་ཚིག་གཅིག རྟ་གོ་བ་ཅན་ལ་ལྕགས་གཅིག་ཟེར་བ་ཡིན་མོད། ང་ཚོ་ནི་མགོ་མཇུག་ལྡོག་ནས་འགྲོ་གི་འདུག