འདི་ལོའི་འབར་མའི་རྒྱལ་ཡོངས་འོས་བསྡུ་ཆེན་མོའི་ཁྲོད་ལྕམ་ཨང་སན་སུའུ་སྐྱིད་ལགས་ཀྱིས་སྣེ་ཁྲིད་པའི་དམངས་གཙོ་ཚོགས་པར་རྒྱལ་ཁ་འཐོབ་རྒྱུར་རེ་བ་ཆེན་པོ་ཡོད་འདུག
ཟླ་འདིའི་ཕྱི་ཚེས་ ༨ ཉིན་གྱི་ཞོགས་པར་འབར་མའི་རྒྱལ་ཡོངས་འོས་བསྡུ་ཆེན་མོ་དངོས་སུ་དབུ་འཛུགས་གནང་སྟེ། རྒྱལ་ཡོངས་ནང་ཉུང་མཐར་ས་གནས་ཁག་ཁྲི་ ༤ ལྷག་ནས་འོས་བླུགས་ཡོད་པ་དང་། ཕྱི་ཚེས་ ༩ ཉིན་འབར་མ་གཞུང་གིས་གྲོས་ཚོགས་ཀྱི་ཞབས་སྟེགས་ ༥༤ ཡི་གྲུབ་འབྲས་ཕྱིར་བསྒྲགས་བྱས་པ་ལྟར་ན། ལྕམ་ཨང་སན་སུའུ་སྐྱིད་(Aung San Suu Kyi)ལགས་ཀྱིས་སྣེ་ཁྲིད་པའི་འབར་མའི་རྒྱལ་ཡོངས་དམངས་གཙོ་ཚོགས་པར་གྲོས་ཚོགས་ཀྱི་ཞབས་སྟེགས་ ༤༨ ཐོབ་ཡོད་པ་དང་། དམངས་གཙོ་ཚོགས་པར་རྒྱལ་ཁ་འཐོབ་པར་འབར་མའི་གྲོས་ཚོགས་ཞབས་སྟེགས་ཀྱི་བརྒྱ་ཆ་ ༦༧ ངེས་པར་དུ་འཐོབ་དགོས་ཀྱི་ཡོད་ལ། ཚོགས་པ་རང་ངོས་ནས་ཞབས་སྟེགས་ཀྱི་བརྒྱ་ཆ་ ༧༠ འཐོབ་ཐུབ་པའི་ཚོད་དཔག་བྱེད་བཞིན་ཡོད་ཀྱང་། ད་ལྟའི་ཆར་གཞུང་ཕྱོགས་ནས་འོས་བསྡུའི་གྲུབ་འབྲས་ཆ་ཚང་ཕྱིར་བསྒྲགས་བྱས་མེད་པ་རེད།
འབར་མའི་མི་མང་གིས་ད་ལན་རྒྱལ་ཡོངས་དམངས་གཙོ་ཚོགས་པར་རྒྱལ་ཁ་འཐོབ་རྒྱུ་ཡིན་པ་བརྒྱ་ཆ་བརྒྱ་ཡིན་ཡང་། ད་ལྟའི་འབར་མ་གཞུང་གིས་འོས་བསྡུའི་གྲུབ་འབྲས་དང་ལེན་བྱ་རྒྱུ་ཡིན་མིན་ཐད་དོགས་པ་ཆེན་པོ་བྱེད་བཞིན་ཡོད་ཀྱང་། ཟླ་འདིའི་ཕྱི་ཚེས་ ༦ ཉིན་འབར་མའི་སྲིད་འཛིན་ཐེན་སིན་(Thein Sein)གྱིས། ཐེངས་འདིའི་འོས་བསྡུའི་གྲུབ་འབྲས་ལ་བརྟེན་ནས་བྱུང་བའི་སྲིད་གཞུང་གསར་པ་དེ་ངས་དང་ལེན་བྱ་རྒྱུ་ཡིན་ཞེས་བརྗོད་ཡོད་པ་དང་། དེ་བཞིན་འབར་མའི་དྲག་པོའི་དམག་གི་དཔོན་པོ་མེན་ཨང་ལེ་ཡིས། གལ་སྲིད་མི་མང་གིས་དམངས་གཙོ་ཚོགས་པ་བདམ་པ་ཡིན་ན། ང་ཚོས་དེ་དང་ལེན་མི་བྱེད་དོན་གང་ཡང་མེད་ལ། ཕྱི་ལོ་ ༡༩༩༠ ལོའི་འབར་མའི་འོས་བསྡུ་ཆེན་མོའི་ནོར་འཁྲུལ་དེ་བསྐྱར་དུ་བྱུང་གི་མ་རེད་ཅེས་བརྗོད་འདུག སྐབས་དེའི་འོས་བསྡུ་ཆེན་མོའི་ཁྲོད་དམངས་གཙོ་ཚོགས་པར་དྲག་གནོན་བྱས་པ་བརྒྱུད། དྲག་པོའི་གཞུང་འཛིན་ཚོགས་པར་རྒྱལ་ཁ་ཐོབ་ཡོད་ཀྱང་། གཞུང་ཕྱོགས་ནས་གནད་དོན་དེ་ངོས་ལེན་བྱས་མེད་པ་རེད།
འབར་མའི་རྩ་ཁྲིམས་ནང་བུ་དང་བུ་མོ་རྒྱལ་ཁབ་གཞན་གྱི་མི་སེར་ཡིན་ན་འབར་མའི་སྲིད་འཛིན་དུ་བསྐོ་བཞག་བྱེད་མི་ཆོག་པ་གཏན་འབེབས་བྱས་ཡོད་སྟབས། ཐེངས་འདིའི་འོས་བསྡུའི་ཁྲོད་རྒྱལ་ཡོངས་དམངས་གཙོ་ཚོགས་པར་རྒྱལ་ཁ་འཐོབ་པ་ཡིན་ནའང་། ཚོགས་པ་དེའི་དབུ་ཁྲིད་ལྕམ་ཨང་སན་སུའུ་སྐྱིད་ལགས་ཀྱི་ཁྱོ་ག་དང་བུ་གཉིས་དབྱིན་ཇིའི་མི་སེར་ཡིན་པས་མོ་སྲིད་འཛིན་དུ་བསྐོ་བཞག་བྱེད་ཆོག་གི་མེད་པ་རེད། ཡིན་ནའང་། ཟླ་འདིའི་ཕྱི་ཚེས་ ༩ ཉིན་ལྕམ་ཨང་སན་སུའུ་སྐྱིད་ལགས་ཀྱིས། གལ་སྲིད་དམངས་གཙོ་ཚོགས་པར་རྒྱལ་ཁ་འཐོབ་པ་ཡིན་ན། མོའི་གོ་གནས་སྲིད་འཛིན་ལས་ཀྱང་མཐོ་བ་ཡོད་སྐོར་བརྗོད་འདུག
ལོ་ ༥ རེའི་ནང་ཐེངས་གཅིག་འོས་འདེམས་བྱེད་ཀྱི་ཡོད་པའི་འབར་མའི་འོས་བསྡུ་ཆེན་མོ་དེའི་ཁྲོད་མཉམ་འབྲེལ་གྲོས་ཚོགས་(Assembly of the Union)དང་མི་མང་འཐུས་མིའི་གྲོས་ཚོགས་(House of Representatives) གཉིས་ཀྱི་འཐུས་མི་འདེམས་དགོས་པ་དང་། དེ་ནས་མཉམ་འབྲེལ་གྲོས་ཚོགས་ཀྱིས་སྲིད་འཛིན་གསར་པ་འོས་འདེམས་བྱེད་དགོས་པ་མ་ཟད། སྲིད་འཛིན་གསར་པས་སྣེ་ཁྲིད་པའི་སྲིད་གཞུང་གསར་པ་འཛུགས་དགོས་ཀྱི་ཡོད་ལ། ལོ་ངོ་ ༢༥ རྗེས་ཀྱི་ཡོངས་ཁྱབ་འོས་བསྡུ་ཆེན་མོ་དང་པོ་འདིའི་ནང་། འབར་མར་མི་གྲངས་ས་ཡ་ ༥༣ ལྷག་ཡོད་པའི་ཁྲོད་ནས་ས་ཡ་ ༣༠ ལྷག་ལ་འོས་བླུགས་པའི་ཐོབ་ཐང་ཡོད་ཀྱང་། ཁ་ཆེའི་རིགས་རྒྱུད་དུ་ངོས་འཛིན་བྱེད་བཞིན་ཡོད་པའི་རོ་ཧན་གྷ་སོགས་གྲངས་ཉུང་མི་རིགས་མི་འདྲ་བ་ ༡༠༠ ལྷག་ཡོད་པ་དེ་ཚོར་འོས་བླུགས་པའི་ཐོབ་ཐང་མེད་སྟབས། སྤྱིར་བཏང་ཐེངས་འདིའི་འོས་བསྡུ་ཆེན་མོར་དྲང་བདེན་བྱུང་ཡོད་པའི་ངོས་འཛིན་བྱེད་ཀྱི་ཡོད་ཀྱང་། འོས་བླུགས་ཀྱི་ཐོབ་ཐང་འདྲ་མཉམ་བྱུང་མེད་པ་རེད།
ཐེངས་འདིའི་འོས་བསྡུ་ཆེན་མོ་ནི་ཕྱི་ལོ་ ༢༠༡༡ ལོར་འབར་མ་དྲག་པོའི་དམག་གཞུང་ལ་དམངས་གཙོའི་བཅོས་བསྒྱུར་བྱུང་རྗེས་ཀྱི་རྒྱལ་ཡོངས་འོས་བསྡུ་ཐོག་མ་དེ་ཡིན་ལ། ཐེངས་འདིའི་འོས་བསྡུའི་ནང་ཆབ་སྲིད་ཚོགས་པ་ཁག་ ༩༠ ལྷག་ནས་འོས་མི་ ༦༠༠༠ བརྒལ་བས་གྲོས་ཚོགས་ཀྱི་ཞབས་སྟེགས་ ༦༦༤ ལ་འགྲན་རྩོད་བྱེད་བཞིན་ཡོད་སྟབས། རྒྱལ་སྤྱིའི་གནད་དོན་དཔྱད་ཞིབ་པ་ཚོས། ཐེངས་འདིའི་འོས་བསྡུ་ཆེན་མོ་འབར་མའི་དམངས་གཙོ་ཡི་མཚོན་རྟགས་ལྟ་བུ་ཞིག་ཏུ་ངོས་འཛིན་བྱེད་བཞིན་ཡོད་ཀྱང་། ཨ་རིའི་ཤར་ཨེ་ཤ་ཡའི་ཁུལ་གྱི་ལས་དོན་ལྷན་ཚོགས་ཀྱི་དྲུང་གཞོན་ཌཱ་ནི་ཡལ་རོ་སིལ་(Daneial Russel) ལགས་ཀྱིས། འདས་པའི་ལོ་ངོ་ ༥༠ ལྷག་གི་རིང་འབར་མ་དྲག་པོའི་དམག་གི་སྒེར་གཅོད་དབང་བསྒྱུར་འོག་གནས་ཡོད་སྟབས། འོས་བསྡུ་ཐེངས་གཅིག་གིས་དམངས་གཙོ་བསྐྱར་འཛུགས་བྱེད་མི་ཐུབ་ཀྱང་། ད་རེས་ཀྱི་འོས་བསྡུ་ཆེན་མོས་འབར་མའི་དམངས་གཙོའི་འཕེལ་རིམ་གཏོང་སྤེལ་དུ་གཏོང་བར་ནུས་པ་ཆེན་པོ་ཐོན་གྱི་ཡོད་སྐོར་བརྗོད་འདུག་ལ། ཉི་ཧོང་དང་ཨ་རི་སོགས་ནས་འབར་མའི་འོས་བསྡུ་ལ་ལྟ་ཞིབ་ཚོགས་པ་ཆེད་གཏོང་གནང་བ་སོགས། རྒྱལ་སྤྱིའི་ཐོག་ནས་ཐེངས་འདིའི་འབར་མའི་འོས་བསྡུ་ཆེན་མོ་དྲང་བདེན་ཡོང་བར་རྒྱབ་སྐྱོར་དང་རོགས་འདེགས་གནང་བཞིན་ཡོད་འདུག
གསར་འགོད་པ། པདྨ་མཚོ།
