ཨལ་ཁཱ་ཌ་དང་འབྲེལ་བ་ཡོད་པའི་འཇིགས་སྐུལ་དྲག་སྤྱོད་པས་གསོལ་མགྲོན་ཁང་ཞིག་ཏུ་མི་ ༡༧༠ བཙན་ཁྲིད་བྱས་པའི་གྲས་ཀྱི་མི་ ༢༧ དམར་གསོད་བཏང་ཡོད་འདུག
རྒྱལ་སྤྱིའི་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཁ་སང་ཞོགས་པར་ནུབ་ཨ་ཧྥི་རེ་ཁའི་རྒྱལ་ཁབ་མ་ལེའི་(Mali) ཡི་བྷ་མ་ཁོ་ (Bamako) ཞེས་པའི་གྲོང་ཁྱེར་གྱི་གསོལ་མགྲོན་ཁང་ (Radisson Blu Hotel) ནང་ལག་ཏུ་མེ་མདའ་ཐོགས་པའི་འཇིགས་སྐུལ་དྲག་སྤྱོད་པ་ ༡༠ ཡིས་མི་མང་ནང་གང་བྱུང་མེ་མདའ་བརྒྱབ་སྟེ། ལས་ཀ་བ་ ༡༧༠ དང་ཁེ་ལས་པ་ ༡༤༠ བཙན་ཁྲིད་བྱས་པའི་གྲས་ཀྱི་མི་ ༢༧ དམར་གསོད་བཏང་བ་དང་མི་ ༣༠ ཙམ་ཕྱིར་ཀློད་ཡོད་འདུག
བརྒྱུད་ལམ་ཁག་ཏུ་འཇིགས་སྐུལ་དྲག་སྤྱོད་པས་མི་མང་དམར་གསོད་བཏང་བའི་གྲས་སུ་ཨ་རི་བ་ ༡ དང་བྷལ་ཇེམ་གྱི་མི་ ༡ ། རྒྱ་ནག་གི་མི་ ༤ ། དེ་བཞིན་འཇིགས་སྐུལ་དྲག་སྤྱོད་པ་ ༥ བཅས་ཡོད་ཅིང་། ཐེངས་འདིའི་དྲག་སྤྱོད་པ་དག་ནི་ཨལ་ཁཱ་ཌ་དང་འབྲེལ་བ་ཡོད་པའི་ཁ་ཆེ་མངའ་ཁུལ་གྱི་འཇིགས་སྐུལ་དྲག་སྤྱོད་པ་ (IS) ཡིན་པར་ཚོད་དཔག་བྱེད་ཀྱི་འདུག
བྷ་མ་ཁོ་གྲོང་ཁྱེར་གྱི་བདེ་སྲུང་ལྷན་ཁང་ནས་གནས་ཚུལ་བསྒྲགས་པའི་ནང་། ཞོགས་པའི་ཐོ་རེངས་ཆུ་ཚོད་ ༦ པ་ཡས་མས་ལ་འཇིགས་སྐུལ་དྲག་སྤྱོད་པ་མི་བཅུས་གྲོང་ཁྱེར་དེའི་བསྟི་གནས་སུ་ཡོད་པའི་ཐོག་རྩེག་བདུན་ཅན་གྱི་གསོལ་མགྲོན་ཁང་ཞིག་ནང་གང་བྱུང་མེ་མདའ་བརྒྱབ་པ་དང་ཨ་རབ་སྐད་ཀྱིས“དཀོན་མཆོག་རླབས་ཆེན་ཡིན” (Allahu Akbar) ཞེས་སྐད་བརྒྱབ་ནས་སྐོར་སྲུང་བ་མི་གཉིས་བསད་ཡོད་སྐོར་བཀོད་འདུག་ལ། རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། འཇིགས་སྐུལ་དྲག་སྤྱོད་པས་བཙན་ཁྲིད་བྱས་པའི་གྲས་སུ་རྒྱ་ནག་གི་ཁེ་ལས་པ་ཁ་ཤས་ཡོད་སྐོར་བརྗོད་འདུག
ཁ་སང་ཞོགས་པ་ནས་འཇིགས་སྐུལ་དྲག་སྤྱོད་པས་འཇབ་རྒོལ་བྱེད་སའི་གསོལ་མགྲོན་ཁང་དང་། དོགས་གཞིའི་སྲང་ལམ་ཁག་དང་མངའ་ཁུལ་ཁག་ཏུ་སྐོར་སྲུང་དམག་དཔུང་འབོར་ཆེན་འགྲེམ་འཇོག་གིས་བཀག་སྡོམ་བྱས་ཡོད་འདུག
གནས་ཚུལ་ལྟར་ན། ཕྱི་ལོ་ ༢༠༡༢ ལོ་ནས་བཟུང་ནུབ་ཨ་ཧྥི་རེ་ཁའི་རྒྱལ་ཁབ་མ་ལེའི་ནང་ཨལ་ཁཱ་ཌ་དང་འབྲེལ་བ་ཡོད་པའི་འཇིགས་སྐུལ་དྲག་སྤྱོད་པས་བསྟུད་མུར་ཟིང་འཁྲུག་སློང་གི་ཡོད་པར་འཛམ་གླིང་མཉམ་འབྲེལ་རྒྱལ་ཚོགས་དང་ཨ་ཧྥི་རེ་ཁ། ཧྥ་རན་སི་སོགས་ཀྱི་སྲུང་དམག་གི་རམ་འདེགས་འོག་མ་ལེའི་རྒྱལ་སྲུང་དམག་དཔུང་གིས་འཇིགས་སྐུལ་དྲག་སྤྱོད་པར་འགོག་རྒོལ་བྱེད་ཀྱི་ཡོད་ནའང་། མི་གསོད་ཁྲག་སྦྱོར་གྱི་དོན་རྐྱེན་མུ་མཐུད་འབྱུང་བཞིན་ཡོད་ཅིང་། འདི་ལོའི་ཕྱི་ཟླ་ ༨ ནང་མ་ལེའི་གྲོང་རྡལ་སི་བ་རི་ (Sevare) ཞེས་པའི་ནང་ལག་ཏུ་མེ་མདའ་ཐོགས་པའི་འཇིགས་སྐུལ་དྲག་སྤྱོད་པས་མི་མང་པོ་བཙན་ཁྲིད་བྱས་པའི་གྲས་ཀྱི་མི་ ༡༣ དམར་གསོད་བཏང་ཡོད་འདུག
གསར་འགོད་པ། པདྨ་རྒྱལ།
