ཁེ་ན་ཌའི་མཛངས་མ་ཨེན་སི་ཊ་སི་ལིན་(Anastasia Lin)རྒྱ་ནག་སན་ཡར་ཚོགས་བཞིན་པའི་འཛམ་གླིང་འཛངས་མའི་འགྲན་བསྡུར་སྟེང་ཞུགས་པར་སྐྱོད་སྐབས། ཁ་སང་ཞོགས་པ་ཆུ་ཚོད་ ༦ པའི་སྟེང་ཧོང་ཀོང་གནམ་ཐང་ནས་བཀག་འགོག་བྱས་ཡོད་འདུག
དེ་རིང་ལྟ་སྐྱོང་དྲ་བས་གནས་ཚུལ་སྤེལ་བའི་ནང་། ཁེ་ན་ཌའི་ཊོར་རོན་ཊོར་ཟློས་གར་སློབ་སྦྱོང་བྱེད་བཞིན་པའི་ཨེན་སི་ཊ་སི་ལིན་གྱི་གྲོགས་མོ་ཞིག་གིས། རྒྱ་གཞུང་གི་འབྲེལ་ཡོད་མི་སྣ་ཞིག་གིས་ཁ་པར་བརྒྱུད་དེ་ཨེན་སི་ཊ་སི་ལིན་གནམ་ཐང་གི་ཐོངས་མཆན་སྤྲོད་རྒྱུ་མིན་སྐོར་བརྗོད་ཡོད་སྟབས། ཁོ་མོ་ཧོང་ཀོང་གནམ་ཐང་བརྒྱུད་ནས་སན་ཡ་ལ་འགྲོ་རྒྱུ་བྱུང་མི་འདུག ཅེས་བརྗོད་འདུག
ཁེ་ན་ཌའི་མཛངས་མ་ཨེན་སི་ཊ་སི་ལིན་ལགས་ཀྱིས་རང་ཉིད་ཀྱི་ངོ་དེབ་བརྒྱུད་ནས་བརྒྱུད་དེ་བརྗོད་རྒྱུར། རྒྱ་ནག་གི་འཛམ་གླིང་མཛངས་མ་གོ་སྒྲིག་ཚོགས་པས་འཛམ་གླིང་མཛངས་མའི་འགྲན་ཞུགས་པ་གཞན་པ་ལྟར་ང་ལ་མགྲོན་ཤོག་སྐུར་མེད་སྟབས་ཐོངས་མཆན་རག་ཡོད་པ་མ་རེད། མགྲོན་ཤོག་སྐུར་མེད་པའི་རྒྱུ་མཚན་ལ་འགྲལ་བཤད་གང་ཡང་མི་འདུག སྤྱིར་རྒྱ་ནག་གི་ཁྲིམས་ལུགས་ནང་ཁེ་ན་ཌ་དང་རྒྱལ་ཁབ་གཞན་པའི་མི་སེར་སན་ཡའི་གནམ་ཐང་ལ་འབྱོར་ཏེ་ཐོངས་མཆན་རག་པའི་འགྲོ་ལུགས་ཤིག་ཡོད་སྟབས། ངས་དེ་ལྟར་ཐབས་ཤེས་བྱས་ཀྱང་སྟབས་མ་ལེགས་པ་ཞིག་ལ། ཧོང་ཀོང་བརྒྱུད་ནས་འགྲོ་སྐབས་ང་བཀག་འགོག་བྱས་སོང་། ཡིན་ཡང་ཁོ་ཚོར་ང་བཀག་འགོག་བྱེད་དགོས་པའི་རྒྱུ་མཚན་གང་ཡང་བཤད་རྒྱུ་མི་འདུག
ཁོ་མོས་མུ་མཐུད་དུ། འཛམ་གླིང་མཛངས་མ་འགྲན་བསྡུར་གྱི་འབོད་ཚིག་ནི་ ༼མཛེས་པའི་དམིགས་མདུན༽རེད། ངའི་དམིགས་མདུན་ཏེ། རང་ཉིད་ཀྱི་སྐད་ཆ་བཤད་མི་ཐུབ་པར་བཙོན་ཁང་དང་ངལ་རྩོལ་ཁང་དུ་ལྷག་ཏེ་དྲག་གནོད་དང་བཙན་ཤེད་གྱིས་བཀག་འགོག་བྱས་པའི་མི་རྣམས་ཀྱི་ཆེད་དུ་ཞུ་གཏུགས་བྱ་རྒྱུ་དེ་ཡིན། དེ་དང་མཉམ་དུ་ངས་གཉའ་གནོན་འོག་ཏུ་ཡོད་པའི་མི་རྣམས་ལ་སྙིང་སྟོབས་བསྐྲུན་རྒྱུའི་མདུན་པ་ཡོད། དྲག་གནོན་འོག་ལོ་མང་ཕྱིན་པའི་མི་རྣམས་ཀྱིས་རང་དབང་གིས་བསམ་བློ་གཏོང་རྒྱུ་བརྗེད་འགྲོ་བཞིན་འདུག ཅེས་བརྗོད་འདུག
དེ་རིང་བྷེ་བྷེ་སི་རྒྱ་ཡིག་སྡེ་ཚན་གྱིས་རྒྱ་ནག་གི་གནས་ཚུལ་ལུང་འདྲེན་བྱས་པའི་ནང་། ཁ་སང་རྒྱ་ནག་གི་གོ་ལའི་དུས་བབ་དྲ་རྒྱའི་དཔྱད་བརྗོད་ནང་། ལོ་རབས་ ༩༠ ནང་སྐྱེས་པའི་བུ་མོ་འདི་རྒྱ་ནག་ལ་རྒོལ་རྡུང་གཏོང་མཁན་གྱི་ལག་ཆ་ལྟ་བུར་གྱུར་ཡོད་པ་དང་། ཁོ་མོའི་སྒེར་གྱི་དྲ་རྒྱའི་སྟེང་ཐེངས་མང་པོར་བོད་རང་བཙན་དང་ཡུ་གུར་རང་བཙན། ཆོས་འཁོར་རྩ་རླུང་སྒོམ་སྒྲུབ་བཅས་ཕྱི་རྒྱལ་ལ་ཡོད་པའི་དགྲ་བོ་ཚོ་དང་མཉམ་བཞུགས་བྱས་འདུག ཅེས་དང་། མོའི་རྒྱབ་ཀྱི་མི་ཁག་ཅིག་གིས་ཆབ་སྲིད་དང་འབྲེལ་བ་མེད་པའི་བྱེད་སྒོ་འདི་རྒོལ་རྡུང་གི་སྟོབས་ཤུགས་སུ་བསྒྱུར་ཏེ། རྒྱ་ནག་གི་སྡིངས་ཆར་བར་ཆད་བྱ་འཆར་ཡོད་སྟབས། རྒྱ་ནག་མི་དམངས་དང་སྲིད་གཞུང་གཉིས་ནས་ངེས་པར་དུ་གྲ་སྒྲིག་ཨང་གསར་བྱ་དགོས་ཀྱི་འདུག ཅེས་བཀོད་ཡོད་འདུག
གསར་འགོད་པ། འཇིགས་མེད་རྒྱ་མཚོ།
