བུད་མེད་ཀྱི་ཁེ་དབང་མཐོར་འདེགས།

ཕྱི་ལོ་ ༢༠༡༣ ལོར་སོ་ཌི་ཨ་ར་བྷི་ཡའི་(Saudi Arabia)བུད་མེད་བརྒྱ་ཆ་ ༢༠ གྲོང་ཁྱེར་སྤྱི་ཁྱབ་ལྷན་ཁང་ཁག་གི་འོས་འདེམས་ནང་ཞུགས་ཆོག་པའི་བཀའ་ཁྱབ་བསྒྲགས་པ་ནས་བཟུང་། ཟླ་འདིའི་ཕྱི་ཚེས་ ༡༢ ཉིན་སོ་ཌི་ཨ་ར་བྷི་ཡ་ནང་འཚོགས་རྒྱུའི་གྲོང་ཁྱེར་སྤྱི་ཁྱབ་ལྷན་ཁང་ཁག་གི་འོས་བསྡུའི་ཁྲོད་བུད་མེད་འོས་ཞུགས་པ་ ༩༠༠ ཟིན་གྱི་ཡོད་འདུག

དེ་རིང་སི་ཨན་ཨན་གསར་ཁང་གིས་གནས་ཚུལ་སྤེལ་པའི་ནང་། ཉེ་ལམ་ནས་སོ་ཌི་ཨ་ར་བྷི་ཡ་ནང་བུད་མེད་ཀྱི་ཐོབ་ཐང་ལ་འཕོ་འགྱུར་ཆེན་པོ་འབྱུང་བཞིན་ཡོད་པ་དང་། ལྷག་པར་དུ་ཕྱི་ལོ་ ༢༠༡༡ ལོར་སོ་ཌིའི་རྒྱལ་པོ་ཨབ་དྷུལ་ལ་ཧ་ (King Abdullah) མཆོག་གིས་བུད་མེད་ཚོ་གྲོང་ཁྱེར་སྤྱི་ཁྱབ་ལྷན་ཁང་ཁག་གི་འོས་བསྡུའི་ནང་ཞུགས་ཆོག་པའི་བཀའ་ཁྱབ་བསྒྲགས་པ་ནས་བཟུང་སྟེ། ད་ལྟར་བུད་མེད་ ༩༠༠ ལྷག་གིས་སྤྱི་དམངས་ལས་ཁུངས་ཀྱི་གོ་གནས་བརྩོན་ལེན་བྱེད་ཀྱི་ཡོད་པ་དང་། འདི་ནི་སོ་ཌི་ཨ་ར་བྷི་ཡའི་རྒྱལ་རབས་རིམ་བྱུང་གི་ལོ་རྒྱུས་ཁྲོད་བུད་མེད་ཀྱིས་རྒྱལ་གཞུང་གི་ལས་གནས་བརྩོན་ལེན་བྱས་པ་ཐོག་དང་པོ་ཡིན་ཞིང་། ཟླ་འདིའི་ཕྱི་ཚེས་ ༡༢ ཉིན་སོ་ཌི་ཨ་ར་བྷི་ཡའི་ནང་གྲོང་ཁྱེར་སྤྱི་ཁྱབ་ལྷན་ཁང་ཁག་གི་འདེམས་བསྐོ་འཚོགས་གཏན་འཁེལ་ཡོད་པ་དེ་སོ་ཌིའི་བུད་མེད་ཚོར་མཚོན་ན། རྒྱལ་གཞུང་གི་ལས་སྒོར་ཞུགས་པའི་གོ་སྐབས་ཐོག་མ་ཆགས་ཀྱི་ཡོད་སྐོར་བརྗོད་འདུག

དེ་འབྲེལ་གྱི་ཆབ་སྲིད་དཔྱད་བརྗོད་ཅིག་གི་ནང་། སོ་ཌི་ཨ་ར་བྷི་ཡའི་ཆབ་སྲིད་འཕོ་འགྱུར་འདི་ནི་སྲིད་དབང་མགོ་མཇུག་ལྡོག་པ་ཞིག་དང་། བུད་མེད་ཚོ་གྲོང་ཁྱེར་སྤྱི་ཁྱབ་ལྷན་ཁང་གི་འོས་འདེམས་ནང་ཞུགས་ཆོག་པ་ཙམ་ལས་དངོས་སུ་དབང་ཆ་བཟུང་ཆོག་གི་མེད་སྐོར་བརྗོད་འདུག་ལ། སོ་ཌི་ཨ་ར་བྷི་ཡའི་བུད་མེད་ཁེ་དབང་རྩོད་ལེན་པ་དང་གྲོང་ཁྱེར་སྤྱི་ཁྱབ་ལྷན་ཁང་གི་འོས་མི་ལུ་ཇེན་ཧ་ཐི་ལུད་ (Loujain Hathloul) དང་། ན་སི་མ་ཨལ་ས་ཌ་ (Nasema al-Sada) ཟེར་བ་གཉིས་ཀྱིས། ཁོ་མོ་གཉིས་ཀྱི་མིང་ཡིག་འོས་མིའི་ཐོ་གཞུང་ནས་བསུབས་ཡོད་སྟབས། ཁོ་མོ་གཉིས་ཀྱིས་དྲང་བདེན་མ་ཡིན་པའི་འོས་བསྡུའི་སྒྲིག་འཛུགས་འདི་ཞུ་གཏུག་བྱ་འཆར་ཡོད་སྐོར་བརྗོད་འདུག

ཨ་རིའི་རྒྱལ་སྲུང་ལྷན་ཁང་གིས་སོ་ཌི་ཨ་ར་བྷི་ཡའི་ནང་གྲོང་ཁྱེར་སྤྱི་ཁྱབ་ལྷན་ཁང་གི་འོས་མི་འདེམས་བསྐོ་བྱེད་སྲོལ་དེ་ནི་གྲོས་ཚོགས་ཀྱི་སྲིད་སྟེགས་ཕྱེད་ཀ་གྲོང་ཁྱེར་སྤྱི་ཁྱབ་ལྷན་ཁང་ཁག་ནས་འདེམས་བསྐོ་བྱེད་ཀྱི་ཡོད་པ་དང་། སྲིད་སྟེགས་ཕྱེད་ཀ་དེ་སོ་ཌིའི་རྒྱལ་པོས་མོས་འདེམས་བྱེད་ཀྱི་ཡོད་པ་ཞིག་ཡིན་སྐོར་བརྗོད་འདུག

གནས་ཚུལ་ལྟར་ན། ཐེངས་འདིའི་འོས་བསྡུའི་ནང་སོ་ཌི་ཨ་ར་བྷི་ཡའི་ནང་བུད་མེད་འོས་ཞུགས་པ་ ༡༣༠༦༠༠ དང་སྐྱེས་པ་འོས་འདེམས་པ་ས་ཡ་ ༡ ལྷག་ཡོད་པ་དང་། ཐེངས་འདིའི་འོས་བསྡུའི་ནང་མཉམ་ཞུགས་མ་བྱས་པའི་མི་གྲངས་ས་ཡ་ ༢༡ ཡོད་ཅིང་། སོ་ཌི་ཨ་ར་བྷི་ཡའི་འོས་བསྡུ་ལས་ཁུངས་གིས་གྲོང་ཁྱེར་སྤྱི་ཁྱབ་ལྷན་ཁང་ཁག་ ༢༨༤ ནང་འོས་འགྲན་པ་ ༧༠༠༠ མཉམ་ཞུགས་བྱས་ཡོད་སྐོར་བསྒྲགས་འདུག་ལ། ཉེ་བའི་ཆར་ནས་སོ་ཌི་ཨ་ར་བྷི་ཡའི་ནང་རང་དབང་དམངས་གཙོའི་འོས་བསྡུ་ལག་བསྟར་བྱེད་ཀྱི་ཡོད་ནའང་། སོ་ཌི་ཨ་ར་བྷི་ཡ་རྒྱལ་ཁབ་འདི་ད་དུང་ཁ་ཆེའི་སུ་ནེ་གྲུབ་མཐར་ (Sunni Islam) གཏོགས་པའི་སོ་ཌིའི་རྒྱལ་རབས་རིམ་བྱུང་གི་རྒྱལ་རྒྱུད་རྣམས་ཀྱིས་མངའ་དབང་སྒྱུར་བཞིན་ཡོད་པ་དང་། རྒྱལ་གཞུང་གི་ལས་སྒོར་ཞུགས་པའི་བུད་མེད་ཚོར་ཁེ་དབང་གང་ཡང་མེད་ཁར། བུད་མེད་ཚོས་རླངས་འཁོར་གཏོང་མི་ཆོག་པ་དང་། སྐྱེས་པའི་ལྟ་སྲུང་མེད་པར་ཁོ་མོ་ཚོ་རང་དབང་གི་སྒོ་ནས་ཚོ་ཡུལ་སྐོར་སྤྲོ་འཆམ་ལ་འགྲོ་བའམ་ཤེས་ཡོན་སློབ་གསོའི་ལས་སྒོར་ཞུགས་ཆོག་གི་མེད་པ་རེད།

གསར་འགོད་པ། པདྨ་རྒྱལ།