སྐྱབས་བཅོལ་བའི་ཁྲོད་ནག་ཚོང་བ་འདུག

ད་ལྟའི་བར་ཡུ་རོབ་དང་ཏུར་ཀིའི་མཐའ་མཚམས་ཁག་བརྒྱུད་དེ་གྷི་རེ་སིར་སྐྱབས་བཅོལ་དུ་ཡོང་མཁན་མི་འབུམ་ ༧ ལྷག་ཡོད་པའི་གྲས་སུ་ནག་ཚོང་གཉེར་མཁན་མི་ ༢༠༠ ཡོད་འདུག

དེ་རིང་ཨེ་ཕེ་དང་རོའུ་ཊར་སོགས་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༡ ཉིན་ཏུར་ཀིའི་སྲིད་གཞུང་གིས་སི་རི་ཡ་དང་ཨ་ཧྥི་གྷན་སི་ཐན། ཨེ་རན་དང་ཨི་རག་བཅས་ནས་གྷི་རེ་སིར་སྐྱབས་བཅོལ་དུ་འགྲོ་མཁན་མི་ ༡༣༠༠ ཏུར་ཀིའི་གླིང་ཕྲན་གྲོང་རྡལ་ལུ་སི་བྷོ་སི་ (Lesbos) ཡི་ནང་བཀག་འགོག་བྱས་པའི་གྲས་སུ་ནག་ཚོང་གཉེར་མཁན་མི་ ༥ འཇུ་བཟུང་བྱས་ཡོད་པ་དང་། འདི་ལོ་གཅིག་པུར་གླིང་ཕྲན་གྲོང་རྡལ་དེའི་ནང་ཡུལ་བྱོལ་བ་མི་འབུམ་ ༤༢༥ འབྱོར་ཡོད་པ་དང་། དེ་མིན་གྷི་རེ་སིའི་གླིང་ཕྲན་ཁག་ནང་འབྱོར་ཟིན་པའི་ཡུལ་བྱོལ་བ་མི་འབུམ་ ༣ ཡོད་པ་ཚང་མ་ཡུ་རོབ་དང་ཏུར་ཀིའི་མཐའ་མཚམས་གླིང་ཕྲན་ཁག་ཏུ་རྟེན་གཞི་བྱས་ཡོད་པའི་ནག་ཚོང་གཉེར་མཁན་ཚོའི་གྲུ་གཟིངས་སྟེང་ཡོང་བ་ཡིན་ཞིང་། ཉེ་བའི་ཆར་ཡུ་རོབ་མཐུན་ཚོགས་ཀྱི་ངོས་ནས་ཨ་སྒོར་ཐེར་འཐུམ་ ༣ གྱི་འགྲོ་བགྲོན་བཏང་སྟེ། ཏུར་ཀིའི་སྲིད་གཞུང་གིས་གོང་ཞུས་རྒྱལ་ཁབ་ཁག་ནས་གྷི་རེ་སིའི་ནང་སྐྱབས་བཅོལ་དུ་ཡོང་མཁན་ཚོའི་གྲུ་གཟིངས་བཀག་སྡོམ་དང་ཞིབ་བཤེར་ནན་མོ་བྱེད་ཀྱི་ཡོད་འདུག

ཡུ་རོབ་མཐུན་ཚོགས་ཀྱི་རྒྱལ་སྤྱིའི་སྐྱབས་བཅོལ་སྒྲིག་འཛིགས་ཚན་པའི་མགྲིན་ཚབ་པ་ཨ་བྷེ་ཌ་ཝམ་མོ་ཧ་ (Abby Dwommoh) ཟེར་བ་ཞིག་གིས། སྐྱབས་བཅོལ་བ་ཚོ་མཐའ་མཚམས་ཀྱི་མཚོ་ལམ་མ་བཀག་སྔོན་ལ་བྲོས་བྱོལ་དུ་ཡོང་འདོད་ཡོད་པ་དང་། ད་སྐབས་གནམ་གཤིས་ཇེ་འཁྱག་ཏུ་འགྲོ་བཞིན་པ་དང་མཚོ་འགྲུལ་སྟབས་བདེ་མིན་པས། ང་ཚོས་སྐྱབས་བཅོལ་བའི་བདེ་འཇགས་ལ་སེམས་ཁུར་བྱེད་ཀྱི་ཡོད། ཅེས་བརྗོད་འདུག

ཏུར་ཀིའི་ནང་ཡུ་རོབ་མཐུན་ཚོགས་ཀྱི་ལས་དོན་ཁང་གི་འགན་འཛིན་བལ་ཁན་བྷོ་ཙི་ཁེར་(Volkan Bozkir) ཟེར་བ་ཞིག་གིས་ཡུ་རོབ་ནང་འབྱུང་བཞིན་པའི་སྐྱབས་བཅོལ་བའི་དཀའ་རྙོག་འདི་ནི་འཛམ་གླིང་འཁྲུག་ཆེན་གཉིས་པའི་གནས་བབ་ལས་ཀྱང་སྡུག་པ་དང་། སི་རི་ཡ་དང་ཨི་རག་སོགས་རྒྱལ་ཁབ་འདི་དག་ནང་ལངས་པའི་ཟིང་འཁྲུག་མཇུག་མ་སྒྲིལ་བར་དུ། ང་ཚོས་སྐྱབས་བཅོལ་བའི་དཀའ་རྙོག་གསར་བ་ཞིག་ལ་མུ་མཐུད་དུ་གདོང་ལེན་དགོས་སྐོར་བརྗོད་འདུག

གནས་ཚུལ་ལྟར་ན། འདི་ལོར་ཡུ་རོབ་དང་ཏུར་ཀིའི་མཐའ་མཚམས་ཁག་བརྒྱུད་ནས་གྷི་རེ་སིར་སྐྱབས་བཅོལ་དུ་འགྲོ་མཁན་མི་འབུམ་ ༧༢ བདེ་འཇགས་ངང་འབྱོར་ཡོད་པ་དང་། ཕྱི་ལོ་ ༢༠༡༤ ལོར་ཡུལ་བྱོལ་བ་ཁྲི་ ༣༤ འབྱོར་འདུག་ལ། ཟླ་སྔོན་མའི་ཚེས་ ༢༩ ཉིན་ཏུར་ཀིའི་སྲིད་གཞུང་གིས་ཡུ་རོབ་མཐུན་ཚོགས་ཀྱི་རམ་འདེགས་འོག སི་རི་ཡ་ནས་ཡོང་བའི་སྐྱབས་བཅོལ་ས་ཡ་ ༢ ལྷག་གི་འཚོ་གནས་ཐག་བཅད་ཡོད་པ་མ་ཟད། ཡུ་རོབ་མཐུན་ཚོགས་ནས་མ་འོངས་ལོ་ངོ་གཉིས་ནང་ཨེ་ཊ་ལེ་དང་གྷི་རེ་སིའི་ནང་ཡོད་པའི་སྐྱབས་བཅོལ་བ་འབུམ་ ༡༦༠ ས་ཁུལ་གཞན་ནང་གནས་སྤོར་རྒྱུ་ཁག་ཐག་བྱས་ཡོད་པ་དང་། ད་ལོ་གཅིག་པུར་ཏུར་ཀི་དང་གྷི་རེ་སིའི་མཐའ་མཚམས་ཁག་ཏུ་སི་རི་ཡའི་སྐྱབས་བཅོལ་བ་མི་ ༦༠༠ ལྷག་མཚོ་ནང་དུ་ལྷུང་སྟེ་འདས་གྲོངས་སུ་གྱུར་བའི་མི་མང་ཆེ་བ་བུད་མེད་དང་བྱིས་པ་ཡིན་འདུག

གསར་འགོད་པ། པདྨ་རྒྱལ།