མཚོ་སྔོན་ཟི་ལིང་དུ་རྒྱ་ནག་གི་སློབ་ཆེན་ཁག་ནང་ཡོད་པའི་བོད་རིགས་སློབ་གྲྭ་ཆེན་མོ་བ་ཚོས་ཆེས་ཐོག་མའི་རྟགས་གསལ་འགྲན་བསྡུར་ཞིག་ཚོགས་ཡོད་འདུག
ཟླ་འདིའི་ཚེས་ ༥ ཉིན། མཚོ་སྔོན་ཟི་ལིང་གྲོང་ཁྱེར་གྱི་མཚོ་སྔོན་མི་རིགས་སློབ་ཆེན་དུ། རྒྱལ་ཡོངས་མི་རིགས་སློབ་ཆེན་གྱི་རྟགས་གསལ་འགྲན་ཚོགས་སྐབས་དང་པོ་ཟེར་བ་དེ་ཚོགས་ཡོད་པ་དང་། འགྲན་ཚོགས་དེའི་སྟེང་ནུབ་བྱང་མི་རིགས་སློབ་ཆེན་དང་ལྷོ་ནུབ་མི་རིགས་སློབ་ཆེན། ཀན་སུའུ་མི་རིགས་དགེ་འོས་སློབ་གླིང་། མཚོ་སྔོན་དགེ་ཐོན་སློབ་ཆེན། སི་ཁྲོན་མི་རིགས་སློབ་གླིང་། མཚོ་སྔོན་མི་རིགས་སློབ་ཆེན་བཅས་ཀྱི་དངོས་གཞི་དང་ཞིབ་འཇུག་སློབ་མ། དེ་བཞིན། མཚོ་ལྷོ་ཁུལ་མི་རིགས་སློབ་འབྲིང་དང་པོ་དང་གཉིས་པ། གངས་ལྗོངས་མི་རིགས་སློབ་གླིང་བཅས་ཀྱི་སློབ་མ་མཉམ་ཞུགས་གནང་ཡོད་འདུག
ཐེངས་འདིར་སློབ་ཆེན་ཁག་གི་བོད་རིགས་སློབ་མ་ཚོས་ཕན་ཚུན་ངོ་ཤེས་གྲོགས་པོ་དང་བསམ་བློ་བརྗེ་རེས་ཀྱི་གོ་སྐབས་བྱུང་ཡོད་པ་མ་ཟད། བོད་ཀྱི་བཅུ་ཕྲག་རིག་པའི་ཁྲོད་ཀྱི་ཚད་མ་རིག་པའི་ཁྱད་ཆོས་སྔོག་འདོན་དང་དར་སྤེལ་བྱས་ཡོད་པ་མ་ཟད། ཕུན་སུམ་ཚོགས་པའི་རིག་ལམ་ལ་བརྟེན་ནས་བོད་ཀྱི་རིག་གནས་སློབ་སྦྱོང་བྱེད་སྟངས་ཤིག་མང་ཚོགས་ལ་འགྲེམས་སྟོན་དར་སྤེལ་བྱས་ཡོད་འདུག
འགྲན་ཚོགས་འདིའི་སྐུ་མགྲོན་དུ་སི་ཁྲོན་དཀར་མཛེས་བཞག་པད་མ་ཐང་དགོན་པའི་བཞག་པ་རིན་པོ་ཆེ་ལགས་དང་། ཙོང་ཁ་བརྩེ་ཆེན་དར་རྒྱས་གླིང་གི་ལྷ་རམས་པ་འཇམ་དཔལ་བློ་ཤེས། མཚོ་སྔོན་འཇིགས་མེད་བོད་སྨན་ཁང་གི་འགན་འཛིན་འཇིགས་མེད་རྒྱལ་མཚན། གཞན། སློབ་ཆེན་ཁག་ཅིག་གི་རྒྱ་རིགས་དགེ་རྒན་ཆེན་མོ་བཅས་བཅས་ཕེབས་ཡོད་འདུག
