གསར་དུ་ཤེས་རྟོགས་བྱུང་བར། ཕྱི་ཟླ་ ༡༡ ཚེས་ ༡༨ ཉིན། མདོ་སྨད་བླ་བྲང་རྒྱབ་ཡོར་སྡེ་བའི་གཡང་མོ་སྐྱིད་རྒྱ་ནག་གི་བཙོན་འོག་ནས་ཀློད་གྲོལ་བཏང་སྟེ་རྒྱ་གཞུང་ཉེན་རྟོག་པས་གསང་སྟབས་ཀྱིས་ཕྱིར་རང་ཁྱིམ་དུ་བསྐྱལ་ཡོད་འདུག
ཁོང་མོ་དེ་སྔོན་ ༢༠༡༢ ལོའི་ཟླ་ ༡༠ ཚེས་ ༢༣ ཉིན་བླ་བྲང་བསང་ཆུ་རྫོང་གི་སྲང་ལམ་དུ། བླ་བྲང་ལྷ་སྡེ་ཤོག་པ་བཞིའི་ནང་ཚུན་ཟ་ཡུ་སྡེ་བའི་རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་ཀྱིས་རང་ལུས་མེར་བསྲེགས་གནང་སྐབས། མང་ཚོགས་ཀྱིས་ཁོང་གི་སྐུ་ཕུང་རྒྱ་ལག་ཏུ་མི་ཤོར་ཐབས་ལ་རྒྱ་གཞུང་ཉེན་རྟོག་པ་དང་དམག་མི་བཀག་འགོག་བྱས་པའི་ཉེས་མིང་འོག་ ༢༠༡༢ ཟླ་ ༡༡ ཚེས་ ༡༨ ཉིན་འཛིན་བཟུང་བྱས་པ་ཞིག་ཡིན་འདུག
ཐེངས་འདིར་ཁོང་མོའི་བཙོན་འཇུག་གི་དུས་ཡུན་རྫོགས་ལ་ཉེ་སྐབས། ལྷ་སར་ཡོད་པའི་མོ་རང་གི་གཉེན་ཉེ་དག་གནམ་གྲུར་བསྡད་དེ་ལན་ཀྲུག་ལ་འབྱོར་ཡོད་པ་དང་། མོ་རང་གི་གྲོང་པ་ཁྱིམ་མཚེས་དང་གཉེན་ཉེ་ཚོས་ཀྱང་མོ་རང་བཙོན་གྲོལ་ཐོབ་པར་དགའ་བསུ་གྲ་རྒྱས་པོ་བྱེད་འཆར་ཡོད་ཀྱང་། བཙོན་ཁང་གིས་ཚེས་ ༡༨ ཉིན་གྱི་མཚན་མོར་གསང་སྟབས་ཀྱིས་མོ་རང་ཁྱིམ་དུ་བསྐྱལ་ཡོད་པ་མ་ཟད། མོ་རང་བཙོན་གྲོལ་བཏང་བའི་གནས་ཚུལ་དང་པར་སོགས་ཕྱི་ཕྱོགས་སུ་བསྒྲགས་མི་ཆོག་པ་དང་། མ་འོངས་པའི་ཟླ་ ༣ རིང་ཁ་པར་ཡང་ཉར་མི་ཆོག་པའི་བཙན་བཀའ་བཏང་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྡོ་རྗེ་རིན་ཆེན་ལགས་ཀྱིས་རང་ལུས་མེར་བསྲེགས་གནང་བའི་ཉིན་དེར། བླ་བྲང་རྫོང་ཐོག་གི་བོད་མི་བཞི་སྟོང་ལྔ་སྟོང་འདུ་འཛོམས་བྱས་ཏེ། རང་ལུས་མེར་བསྲེགས་གནང་མཁན་དེར་གདུང་སེམས་མཉམ་སྐྱེ་དང་རྒྱ་གཞུང་ཉེན་རྟོག་པ་དང་དམག་མི་ཚོའི་ཐོག་རྣམ་འགྱུར་མི་ལེགས་པས་བསྟན་ཡོད་ཀྱང་། སྐབས་དེར་འཛིན་བཟུང་སོགས་ཀྱི་གནས་ཚུལ་བྱུང་མེད་ཀྱང་། རྗེས་སུ་ཀྲུང་དབྱིང་གིས་རང་ལུས་མེར་བསྲེགས་སྐོར་ལ་དམ་དྲག་སྲིད་བྱུས་ལག་བསྟར་བྱེད་དགོས་པའི་བཀའ་རྒྱ་འབྱོར་སོང་ཟེར་ནས་ནག་ཉེས་ཡོད་མེད་ལ་མ་ལྟོས་པར། གོང་རིམ་གྱིས་མངགས་པའི་ལས་འགན་སྒྲུབ་ཐབས་ལ། རང་ལུས་མེར་བསྲེགས་གནང་ས་དེའི་ཉེ་འཁོར་གྱི་ཚོང་ཁང་མགྲོན་ཁང་གི་བདག་པོ་ཉམས་ཆུང་འགའ་འཛིན་བཟུང་བྱས་ཏེ་ཁྲིམས་ཐག་བཅད་པ་རེད། ཅེས་བརྗོད་སོང་།
སྐབས་དེར་མི་ ༡༡ འཛིན་བཟུང་བྱས་ཡོད་ཀྱང་རྗེས་སུ་ངོ་སོ་དང་རྒྱབ་རྩ་ཡོད་མཁན་དག་ཀློད་གྲོལ་བཏང་སྟེ། ༢༠༡༣ ཟླ་ ༡ ཚེས་ ༣༡ ཉིན་ཁོང་ཚོའི་ཁྲོད་ཀྱི་མི་ ༦ ལ་ཁྲིམས་ཐག་བཅད་ཡོད་ཅིང་། དེ་དག་ནི་གདུགས་དཀར་རྒྱལ་ལགས་སུ་ལོ་ ༤ དང་། ལྷ་མོ་དོན་གྲུབ་ལགས་སུ་ལོ་ ༧ ། སྐལ་བཟང་རྒྱ་མཚོ་ལགས་སུ་ལོ་ ༡༡ ། རྒྱབ་ཡོར་སྡེ་བའི་གཡང་མོ་སྐྱིད་ལགས་སུ་ལོ་ ༣ དང་། རང་ལོ་ ༤༩ ཡིན་པའི་པདྨ་མཚོ་ལགས་སུ་ལོ་ ༨ དང་མོའི་ཁྱོ་ག་རང་ལོ་ ༥༢ ཡིན་པ་པདྨ་དོན་གྲུབ་ལགས་སུ་ལོ་ ༡༢ བཅས་ཀྱི་ཁྲིམས་ཐག་བཅད་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན། “ཉེ་ཆར་ཀློད་གྲོལ་བཏང་ཟིན་པའི་གཡང་མོ་སྐྱིད་ཚང་གིས་རྫོང་གྲོང་ཁྱེར་དུ་རྒྱ་སྒོར་ཁྲི་ ༥༠༠ ལྷག་གི་མགྲོན་ཁང་ཞིག་ཕྱེ་ཡོད་པ་དང་། མོ་དང་གཉེན་ཉེའི་འབྲེལ་བ་ཡོད་པའི་པདྨ་དོན་གྲུབ་བཟའ་མི་གཉིས་ཀྱིས་ཀྱང་འཚེམ་ཁང་ཞིག་ཕྱེ་ཡོད་པ་རེད། གཅིག་བྱས་ན་རྒྱ་གཞུང་གིས་དེ་སྣང་བར་འགྲོ་ཡི་ཡོད་པ་མ་རེད། དེ་མ་གཏོགས་ཁོ་རང་ཚོར་དེ་ལྟ་བུའི་ཉེས་ཆད་ཅིག་གཅོད་དགོས་དོན་ཡོད་པ་མ་རེད། ཉིན་དེར་མི་བཞི་སྟོང་ལྔ་སྟོང་འཛོམས་པ་རེད།” ཅེས་བརྗོད་སོང་།
འབྲེལ་ཡོད་གསར་གནས།
༢༽བསང་ཆུ་རྫོང་དུ་ཡང་བསྐྱར་རང་ལུས་མེར་བསྲེགས།
༣༽རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་ནས་རང་ལུས་མེར་བསྲེགས།
