རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཁྲི་འདོན་བྱས་ཏེ་ལོ་ ༢༠ འཁོར་བའི་མཛད་སྒོའི་སྟེང་། བོད་རང་སྐྱོང་ལྗོངས་དམར་ཤོག་དྲུང་ཆེ་ཁྲིན་ཆོན་ཀོ་ཡིས་རྒྱལ་མཚན་ནོར་བུ་དངོས་སུ་གཙང་བཀྲ་ཤེས་ལྷུན་པོའི་དོ་དམ་ཨུ་ལྷན་གཙོ་འཛིན་དུ་བསྐོས་པའི་དཔང་ཡིག་སྤྲད་ཡོད་འདུག
རོའུ་ཊར་གསང་ཁང་གིས་སྤེལ་བའི་གནས་ཚུལ་ལྟར་ན། ཁ་སང་གཙང་བཀྲ་ཤིས་ལྷུན་པོ་དགོན་དུ་རྒྱ་གཞུང་གིས་བསྐོ་བཞག་བྱས་པའི་པཎ་ཆེན་རྒྱལ་མཚན་ནོར་བུ་ཁྲི་འདོན་བྱས་ཏེ་ལོ་ ༢༠ འཁོར་བའི་མཛད་སྒོ་ཞིག་ཚོགས་ཡོད་པ་དང་། མཛད་སྒོ་དེའི་སྟེང་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཁྲིན་ཆོན་ཀོ་ཡིས། པཎ་ཆེན་རྒྱལ་མཚན་ནོར་བུ་དགོན་པའི་དོ་དམ་ཨུ་ལྷན་གྱི་གཙོ་འཛིན་ལ་དངོས་སུ་བསྐོ་བཞག་བྱས་པའི་དཔང་ཡིག་ཅིག་སྤྲད་ཡོད་པ་མ་ཟད། ༧གོང་ས་སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་དགེ་འདུན་ཆོས་ཀྱི་ཉི་མ་མཆོག་པཎ་ཆེན་བླ་མའི་ཡང་སྲིད་ངོ་མ་མིན་པར། རྒྱ་གཞུང་གིས་བསྐོ་བཞག་བྱས་པའི་རྒྱལ་མཚན་ནོར་བུ་པཎ་ཆེན་བླ་མ་སྐུ་ཕྲེང་བཅུ་པའི་ཡང་སྲིད་ངོ་མ་ཡིན་པ་དང་། ཁོའི་རེ་བར་པཎ་ཆེན་རྒྱལ་མཚན་ནོར་བུས་མེས་རྒྱལ་གོང་བུ་ཆིག་གྱུར་གྱི་འགན་སྲུང་ལ་དམར་ཤོག་ཚོགས་པ་དང་མཉམ་དུ་མདུན་སྐྱོད་བྱེད་པའི་ཡིད་ཆེས་ཡོད། ཅེས་སོགས་བརྗོད་ཡོད་འདུག
ཡང་ཁོས་སྐྱབས་བཅོལ་དུ་ཡོད་པའི་ཏཱ་ལའི་བླ་མ་དང་ཁ་བྲལ་རིགས་ལུགས་པར་དོགས་ཟོན་དགོས་སྐོར་དང་། ནང་བསྟན་ཆོས་ལུགས་ནི་ལོ་རྒྱུས་རང་བཞིན་ལྡན་པའི་དར་འཕེལ་བྱུང་བ་ཞིག་ཡིན་སྟབས། ནང་པ་བ་ཚང་མས་ཆོས་ལུགས་ཀྱི་རང་དབང་ལོངས་སུ་སྤྱོད་ཀྱི་ཡོད་ལུགས་སོགས་བརྗོད་འདུག
རོའུ་ཊར་གསར་ཁང་གིས་འདིའི་སྐོར་གྱི་གནས་ཚུལ་སྤེལ་བའི་ནང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སང་གེ་མཆོག་གིས་གསར་འགོད་པར། རྒྱ་ནག་གི་དབང་འཛིན་པ་ཚོས་གནད་དོན་འདིའི་ཐད་ལ་ཁྲིམས་མཐུན་ལུགས་མཐུན་དང་ཡིད་རྟོན་འཕེར་བའི་ལས་ཀ་ཞིག་བྱས་མེད་སྐོར་བརྗོད་ཡོད་འདུག
གནས་ཚུལ་འདིའི་ནང་མུ་མཐུད་དུ། རྒྱ་ནག་གི་བཙན་དབང་འོག་༧གོང་ས་ཏཱ་ལའི་བླ་མས་ངོས་འཛིན་གནང་བའི་པཎ་ཆེན་སྐུ་ཕྲེང་བཅུ་པའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་ད་བར་གར་ཁྲིད་གང་ཡོད་ཤེས་རྟོགས་མེད་པ་ཆགས་པའི་གནད་དོན་འདི་བོད་རྒྱ་གཉིས་བར་གྱི་རྩོད་གཞི་གཙོ་བོ་ཞིག་དང་། གཞིས་བྱེས་བོད་མིའི་སེམས་ཁུར་ཆེས་ཤོས་ཤིག་ཡིན་པ་མ་ཟད། རྒྱ་ནག་གཞུང་གིས་ཏཱ་ལའི་བླ་མའི་ཡང་སྲིད་ནི་བོད་རྒྱ་གོང་བུ་གཅིག་གྱུར་ཡོང་ཐབས་ཀྱི་ལྡེ་མིག་ལྟ་བུ་ཞིག་ཏུ་ངོས་འཛིན་དང་རེ་སྒུག་བྱེད་ཀྱི་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ།
