ཨ་རིའི་ནོར་སྲིད་ལྷན་ཁང་གིས་བྱང་ཀོ་རེ་ཡའི་ཁེ་ལས་ཁག་ཅིག་ལ་གཞུང་གི་རྡུལ་ཕྲན་མཚོན་ཆའི་ལས་གཞིར་རོགས་སྐྱོར་བྱེད་ཀྱི་ཡོད་པའི་ཉེས་འཛུགས་ཐོག་དཔལ་འབྱོར་གྱི་ཉེས་ཆད་བཅད་ཡོད་འདུག
ཁ་སང་ཨ་རིའི་ནོར་སྲིད་ལྷན་ཁང་གིས་བྱང་ཀོ་རེ་ཡའི་གོ་མཚོན་འཕེལ་རྒྱས་གཏོང་བར་དངོས་ཤུགས་བརྒྱུད་གསུམ་ནས་རོགས་སྐྱོར་བྱེད་མཁན་བྱང་ཀོ་རེ་ཡའི་གོ་མཚོན་འཕེལ་རྒྱས་ (Strategic Rocket Force) བསྟི་གནས་ཁང་དང་། ཌན་ཆུན་ཚོང་ལས་དངུལ་ཁང་(Tanchon Commercial Bank)། ཕྱི་དངུལ་བརྗེ་ལེན་དངུལ་ཁང་(foreign exchange bank)། གཏེར་ལས་དང་ཚོང་ལས་འཕེལ་རྒྱས་ཁང་སོགས་དངུལ་ཁང་གཉིས་དང་མཚོ་ཐོག་སྐྱེལ་འདྲེན་ཁེ་ལས་གསུམ་བཅས་ལ་དཔལ་འབྱོར་གྱི་ཉེས་ཆད་བཏང་ཡོད་པ་མ་ཟད། དོན་རྐྱེན་དེ་དང་འབྲེལ་བ་ཡོད་པའི་ལྦེ་ཋེ་ནམ་དང་སི་རེ་ཡར་རྟེན་གཞི་བྱས་པའི་ཌན་ཆུན་ཚོང་ལས་དངུལ་ཁང་གི་འཐུས་མི་བཞི་དང་། ཨུ་རུ་སུར་ཡོད་པའི་བྱང་ཀོ་རེ་ཡའི་ཕྱི་འབྲེལ་ཚོང་ལས་དངུལ་ཁང་གི་སྐུ་ཚབ་བཅས་ཐོ་གཞུང་ནག་པོའི་ཁོངས་སུ་འཇོག་རྒྱུ་ཡིན་པ་ཁྱབ་བསྒྲགས་བྱས་འདུག
བྷི་བྷི་སིས་ཨ་རིའི་ནོར་སྲིད་ལྷན་ཁང་གི་བསྒྲགས་གཏམ་ལུང་འདྲེན་བྱས་པའི་ནང་། ང་ཚོས་བྱང་ཀོ་རེ་ཡར་དཔལ་འབྱོར་ཉེས་ཆད་འཕར་མ་འདི་གཅོད་དགོས་དོན་ནི། ཉེ་ལམ་མཉམ་འབྲེལ་རྒྱལ་ཚོགས་དང་ཨ་རིས་བྱང་ཀོ་རེ་ཡར་དཔལ་འབྱོར་ཉེས་ཆད་བཅད་ཀྱང་། འབྲེལ་ཡོད་གཞུང་འཛིན་མི་སྣས་སྣང་མེད་བཏང་ནས་མུ་མཐུད་རྡུལ་ཕྲན་མཚོན་ཆ་བཟོ་བཞིན་ཡོད་སྟབས། ད་ཐེངས་དཔལ་འབྱོར་ཉེས་ཆད་གཅོད་དགོས་བྱུང་བ་རེད། ཅེས་དང་། ཨེ་ཤ་ཡའི་གསར་འཕྲིན་ཐོག་ཨ་རིའི་ནོར་སྲིད་ལྷན་ཁང་གི་དྲུང་འཕར་ཨེ་ཌམ་སི་ཛུ་བྷིན་ (Adam Szubin) ལགས་ཀྱིས། “བྱང་ཀོ་རེ་ཡས་རྡུལ་ཕྲན་མཚོན་ཆ་དང་གོ་མཚོན་དཀྱུས་མ་འདྲ་མིན་བསྐྲུན་ཏེ། རྒྱལ་སྤྱིའི་བདེ་འཇགས་ལ་ཉེན་ཁ་བཟོ་གཞིའི་བྱ་འགུལ་སྣ་ཚོགས་སྤེལ་བཞིན་ཡོད་སྟབས། ད་ཐེངས་ནོར་སྲིད་ལྷན་ཁང་གིས་བྱང་ཀོ་རེ་ཡའི་དཔལ་འབྱོར་གྱི་འབྱུང་ཁུངས་ཁག་ཐེར་འདོན་བྱས་ཏེ། ཁོ་ཚོའི་རྒྱལ་སྤྱིའི་དཔལ་འབྱོར་ཁེ་ཕན་འཕྲོག་རྒྱུ་ཡིན།”ཞེས་བརྗོད་འདུག
ཀེམ་ཇོན་ཨང་གིས་བྱང་ཀོ་རི་ཡའི་དབང་ཆ་བཟུང་རྗེས། རྡུལ་ཕྲན་མཚོན་ཆ་བཟོ་སྐྲུན་གྱི་ལས་གཞི་རྒྱ་ཆེ་རུ་བཏང་སྟེ། ལྷོ་བྱང་ཀོ་རེ་ཡའི་མཚོ་ཁུལ་དུ་ད་བར་ཤུགས་ཚད་ཆུང་འབྲིང་ཆེ་གསུམ་གྱི་རྡུལ་ཕྲན་མཚོན་ཆ་དང་སྒྱོགས་མདེལ་མི་འདྲ་བ་ ༢༨ ལྷག་ཚོད་ལྟ་བྱས་པ་མ་ཟད། ཨི་རན་དང་དཀྱིལ་ཤར་ཡུལ་གྲུ་ཁག་ཏུ་མཚོན་ཆ་འདྲ་མིན་བཙོངས་ནས་རྒྱལ་སྤྱིའི་བདེ་འཇགས་ལ་ཉེན་ཁ་བཟོས་ཡོད་སྟབས། མཉམ་འབྲེལ་རྒྱལ་ཚོགས་དང་ཨ་རི་གཙོས་རྒྱལ་སྤྱིའི་རྒྱལ་ཁབ་ཁག་གིས་སྐྱོན་བརྗོད་ཤུགས་ཆེ་བྱས་ཡོད་ཀྱང་། བྱང་ཀོ་རེ་ཡས་ཉན་འཇོག་གང་ཡང་བྱས་མེད་པར་བརྟེན། ཨ་རི་དང་མཉམ་འབྲེལ་རྒྱལ་ཚོགས་ཀྱིས་དཔལ་འབྱོར་ཉེས་ཆད་ཐེངས་གསུམ་ཙམ་བཏང་ཡོད།
འདས་ལོའི་ནང་རྒྱལ་སྤྱིའི་འགྲོ་བ་ཐོབ་ཐང་གི་སྒྲིག་འཛུགས་ཁག་ཅིག་གིས་བྱང་ཀོ་རེ་ཡས་རྡུལ་ཕྲན་མཚོན་ཆའི་བཟོ་སྐྲུན་འཕེལ་རྒྱས་གཏོང་ཆེད་ཆེད་ལས་མི་སྣ་དང་ལས་མི་བསྡུས་ཏེ། ཉིན་མཚན་ལྟོས་མེད་ལས་ཀ་སྐུལ་བ་དང་ལས་མི་མང་པོ་ཤི་བ་སོགས་ཀྱི་གྲུབ་དོན་སྙན་ཐོ་བཏོན་ཡོད་སྟབས། ཉེ་ལམ་མཉམ་འབྲེལ་རྒྱལ་ཚོགས་ཚོགས་མིའི་རྒྱལ་ཁབ་ཁག་ཅིག་གིས་སྐྱོན་བརྗོད་དང་། རྒྱལ་སྤྱིའི་ཞིབ་འཇུག་ཚོགས་ཆུང་རྟོག་ཞིབ་བྱེད་བར་གཏོང་དགོས་པ་བརྗོད་ཡོད་ཀྱང་། རྒྱ་ནག་དང་ཨུ་རུ་སུས་དང་ལེན་བྱས་མེད་པ་མ་ཟད། ད་ཐེངས་ཨ་རིས་བྱང་ཀོ་རེ་ཡར་དཔལ་འབྱོར་ཉེས་ཆད་བཅད་པར་རྒྱལ་ཁབ་མང་པོས་རྒྱབ་སྐྱོར་ཡོད་པའི་བསྒྲགས་གཏམ་སྤེལ་ཡོད་ཀྱང་། ཨུ་རུ་སུ་དང་རྒྱ་ནག་གིས་བཟང་ངན་གྱི་རྣམ་འགྱུར་གང་ཡང་བསྟན་མི་འདུག
དེ་རིང་ཨ་རིའི་ཕྱི་སྲིད་ལྷན་ཁང་གིས། བྱང་ཀོ་རེ་ཡས་རྒྱལ་སྤྱིའི་ཁྲིམས་ལུགས་ལ་བརྩི་སྲུང་གིས་རྡུལ་ཕྲན་མཚོན་ཆའི་ལས་འཆར་ཁག་མཚམས་འཇོག་མ་བྱས་སྟབས། ད་ལྟའི་དཀའ་ངལ་འདི་མྱོང་དགོས་བྱུང་བ་རེད། མ་འོངས་པར་ད་དུང་མུ་མཐུད་མཁྲེགས་འཛིན་ཅན་གྱི་སྲིད་བྱུས་བཟུང་བ་ཡིན་ན། ཕམ་ཁ་མྱོང་མཁན་དེ་ཀོ་རེ་ཡ་ཡིན་པ་ལས་རྒྱལ་སྤྱིའི་སྒྲིག་འཛུགས་མིན་སྟབས། ད་ལྟ་བྱང་ཀོ་རེ་ཡས་དགོངས་པ་བཞེས་ནས་བཟང་ཕྱོགས་ཀྱི་ཐབས་ལམ་ཞིག་འཚོལ་དགོས་པ་རེད། ཅེས་བརྗོད་འདུག
གསར་འགོད་པ། དོན་གྲུབ།