ཨབ་གྷན་གསང་བའི་ལས་ཁུངས་ཀྱི་མགོ་གཙོ་དང་ཨབ་གྷན་སྲིད་འཛིན་བར་པ་ཀི་སི་ཐན་དང་ཏ་ལི་བྷན་དྲག་སྤྱོད་ཤོག་ཁག་ལ་སྲིད་བྱུས་འཛིན་སྟངས་ཐོག་མ་འཆམ་པ་བྱུང་སྟེ་གསང་བའི་ལས་ཁུངས་མགོ་གཙོས་ལས་གནས་ནས་དགོངས་པ་ཞུས་ཡོད་འདུག
ཁ་སང་ཨབ་གྷན་གསང་བའི་ལས་ཁུངས་ཀྱི་མགོ་གཙོ་རམཱ་དྷུ་ལཱ་ཎཱ་བྷེལ་ (Rahmatullah Nabil) ཡིས། སྲིད་འཛིན་ཨཱ་ཤཱ་རབ་གྷཱ་ཎེ་ (Ashraf Ghani)ལ་དགོངས་ཤོག་ཕུལ་ཏེ་ལས་གནས་ནས་དགོངས་པ་ཞུས་ཡོད་ཅིང་། དེ་ནི་ཁོང་དང་སྲིད་འཛིན་ཨཱ་ཤཱ་རབ་གྷཱ་ཎེ་བར་ཏ་ལི་བྷན་དྲག་སྤྱོད་ཤོག་ཁག་དང་པ་ཀི་སི་ཐན་ལ་སྲིད་བྱུས་འཛིན་ཕྱོགས་བཅས་ཀྱི་ཐོག་ལྟ་བ་མ་མཐུན་པའི་དབང་གིས་དགོངས་པ་ཞུས་པ་ཞིག་ཡིན་འདུག
ཨེ་ཤ་ཡའི་དུས་བབ་སྟེང་རམཱ་དྷུ་ལཱ་ཎཱ་བྷེལ་ཡིས། ཉེ་ལམ་གཞུང་དང་གསང་བའི་ལས་ཁུངས་བར་སྲིད་བྱུས་ཁག་ཅིག་ཐོག་ལྟ་ཚུལ་མ་མཐུན་པ་བྱུང་སྟེ། ཕན་ཚུན་སྐྱོན་འཚང་སྔོག་རེས་བྱས་རྗེས་སྲིད་འཛིན་མཆོག་གིས་ངོས་ཀྱི་ལས་ཀར་ཚོད་འཛིན་བྱས་ཏེ་གནོན་ཤུགས་སྤྲོད་བཞིན་ཡོད་སྟབས། ངས་ལས་གནས་ནས་དགོངས་པ་མི་ཞུ་ཐབས་མེད་ཆགས་སོང་། ཞེས་བརྗོད་ཡོད་འདུག དེ་བཞིན། སྲིད་འཛིན་ཨཱ་ཤཱ་རབ་གྷཱ་ཎེ་ཡིས་ཀྱང་བསྒྲགས་གཏམ་ཞིག་སྤེལ་བའི་ནང་། ད་ལྟ་རྒྱལ་ཁབ་ཀྱི་བདེ་འཇགས་ལ་ཉེན་ཁ་འཕྲད་བཞིན་ཡོད་སྟབས། ད་ལན་རམཱ་དྷུ་ལཱ་ཎཱ་བྷེལ་ཡིས་ལས་གནས་ནས་དགོངས་པ་མ་ཞུས་ན་ཡག་པོ་ཡོད་ཀྱང་ཁོང་གི་ཐག་གཅོད་ལ་ངས་གུས་བརྩི་ཞུ་རྒྱུ་ཡིན། ཞེས་བརྗོད་འདུག
སྲིད་དོན་དབྱེ་ཞིབ་པ་ཚོས། ཐེངས་འདིར་ཨབ་གྷན་གསང་བའི་ལས་ཁུངས་ཀྱི་མགོ་གཙོ་དང་སྲིད་འཛིན་གཉིས་མ་འཆམ་པའི་རྒྱུ་རྐྱེན་གཙོ་བོ། ཨབ་གྷན་སྲིད་འཛིན་གྱིས་དེ་སྔོན་ནས་པ་ཀི་སི་ཐན་གཞུང་དང་འབྲེལ་བ་བྱེད་ཕྱོགས་དང་། ལྷག་པར་དུ་ཏ་ལི་བྷན་དྲག་སྤྱོད་ཤོག་ཁག་ལ་བཟུང་བའི་ལངས་ཕྱོགས་བརྟན་པོ་མེད་པ་བཅས་ལ་བརྟེན་ཏེ། ཨབ་གྷན་གསང་བའི་ལས་ཁུངས་ཀྱི་མགོ་གཙོ་རམཱ་དྷུ་ལཱ་ཎཱ་བྷེལ་གྱིས་དགོངས་པ་ཞུས་པར་ངོས་འཛིན་བྱས་འདུག
དེ་རིང་རྒྱ་གར་དུས་བབ་དང་ཧིན་རྡུ་སི་ཐན་དུས་བབ་ཀྱིས། ཕྱི་ལོ་ ༢༠༡༥ ལོའི་ ༩ པའི་ནང་ཏ་ལི་བྷན་དྲག་སྤྱོད་ཤོག་ཁག་གིས་ཨབ་གྷན་ཀུན་དྷ་ཛེ་གྲོང་ཁྱེར་ (Kunduz city) བཟུང་ཡོད་པ་མ་ཟད། ཉིན་ཤས་གོང་ཀུན་དྷ་ཧར་གནམ་ཐང་(Kandahar airport) ལ་འཇབ་རྒོལ་བྱས་ནས་མི་ ༥༠ ལྷག་བསད་ཡོད་སྟབས། ཨབ་གྷན་གསང་བའི་ལས་ཁུངས་ཀྱི་མགོ་གཙོ་རམཱ་དྷུ་ལཱ་ཎཱ་བྷེལ་དང་སྲིད་འཛིན་ཨཱ་ཤཱ་རབ་གྷཱ་ཎེ་བར་ཚིག་རྩོད་ཤོར་ཏེ། རམཱ་དྷུ་ལཱ་ཎཱ་བྷེལ་ཡིས་ལས་གནས་ནས་དགོངས་ཞུ་བྱས་པ་དེས། ད་ལྟ་ཨབ་གྷན་གྱི་མགོ་ཁྲིད་ནང་ཁུལ་ལྟ་ཕྱོགས་མཐུན་གྱི་མེད་པ་གསལ་པོར་རྟོགས་ཐུབ། ཅེས་བཀོད་འདུག
ལོ་ཤས་གོང་ནས་བཟུང་ཨ་རི་དང་ནུབ་བྱང་དམག་ཁུལ་གྱི་དམག་དཔུང་མང་ཆེ་བ་ཨབ་གྷན་ནས་ཕྱིར་འཐེན་བྱས་ཡོད་སྟབས། ཏ་ལི་བྷན་དྲག་སྤྱོད་ཤོག་ཁག་གི་སྟོབས་ཤུགས་ཆེ་རུ་ཕྱིན་ཏེ། ཨབ་གྷན་གྱི་ས་ཁུལ་མང་དག་ཅིག་ནང་འཇབ་རྒོལ་བྱས་ཏེ། ༢༠༡༤ ལོའི་མཇུག་ནས་ད་བར་ཉེན་རྟོག་པ་དང་དམག་མི། ཡུལ་མི་བཅས་ཁྱོན་མི་གྲངས་ ༡༥༠༠ ལྷག་བསད་ཡོད་སྟབས། ད་ལྟ་ཨབ་གྷན་མང་ཚོགས་ཀྱིས་གཞུང་ལ་སྐྱོན་བརྗོད་བྱེད་ཀྱིན་ཡོད་པ་རེད།
ཉིན་ཤས་གོང་པ་ཀི་སི་ཐན་གྱི་རྒྱལ་སར་ལྷོ་ཤར་ཨེ་ཤ་ཡའི་རྒྱལ་ཁབ་བར་ཞི་བདེའི་ལྷན་ཚོགས་བསྡུས་པའི་སྟེང་། ཨེ་ཤ་ཡའི་མངའ་ཁུལ་ནང་བརྟན་ལྷིང་ཡོང་རྒྱུར་རྒྱལ་ཁབ་ཚང་མས་ནུས་ཤུགས་འདོན་རྒྱུར་གྲོས་འཆམ་བྱུང་ཡོད་པ་མ་ཟད། ཨབ་གྷན་སྲིད་འཛིན་དང་པ་ཀི་སི་ཐན་སྲིད་བློན་ཐུག་འཕྲད་བྱས་ཏེ་ཐུན་མོང་ཐོག་ཏ་ལི་བྷན་དྲག་སྤྱོད་ཤོག་ཁག་ལ་རྒོལ་རྡུང་གཏོང་རྒྱུ་བྱས་ཡོད་ཀྱང་། ཨབ་གྷན་གྱི་ཕྱོགས་འགལ་ཚོགས་པ་དང་ཤེས་ཡོན་ཅན་མང་པོ་ཞིག་གིས་པ་ཀི་སི་ཐན་གཞུང་གིས་ཁ་ཞེ་གཉིས་མེད་ཐོག་དྲག་སྤྱོད་པ་དང་འཐབ་རྒོལ་བྱེད་མིན་ལ་དོགས་པ་ཡོད་སྐོར་སྐྱོན་བརྗོད་བྱེད་བཞིན་ཡོད།
ནེའུ་ཡོག་དུས་བབ་དང་གྷབ་གསར་འཕྲིན་གྱིས་གནས་ཚུལ་སྤེལ་བའི་ནང་། ཨབ་གྷན་སྲིད་འཛིན་གྱི་ངོ་དེབ་བརྒྱུད་རམཱ་དྷུ་ལཱ་ཎཱ་བྷེལ་ཡིས་ལས་གནས་ནས་དགོངས་པ་ཞུས་པ་གསལ་བསྒྲགས་བྱས་ཡོད་སྟབས། དྲ་དམངས་མང་པོ་ཞིག་གིས་ཨབ་གྷན་གཞུང་ལ་སྐྱོན་བརྗོད་ཀྱི་མཆན་མང་པོ་སྤེལ་ཡོད་པ་མ་ཟད། འགའ་ཞིག་གིས། “སྲིད་འཛིན་ངོ་ཚ་དགོས་པ་རེད། རམཱ་དྷུ་ལཱ་ཎཱ་བྷེལ་གྱིས་ཏ་ལི་བྷན་དང་པ་ཀི་སི་ཐན་ལ་སྐྱོན་བརྗོད་བྱས་པའི་རྐྱེན་གྱིས་ཁོས་དགོངས་པ་ཞུ་དགོས་ཆགས་པ་རེད་དམ” ཞེས་སོགས་བརྗོད་ཡོད་པ་དང་། རམཱ་དྷུ་ལཱ་ཎཱ་བྷེལ་གྱིས་ཀྱང་ “ཉེ་ལམ་པ་ཀི་སི་ཐན་སྲིད་བློན་ནཱ་ཝ་སེ་ཤཱ་རེབ་ཀྱིས་ཨབ་གྷན་ནི་པ་ཀི་སི་ཐན་གྱི་དགྲ་བོ་རེད་ཅེས་བརྗོད་མ་ཐག ཏ་ལི་བྷན་དྲག་སྤྱོད་ཤོག་ཁག་གིས་ཀྱང་ཁོའི་སྐད་ཆར་ཡིད་ཆེས་བྱས་ཏེ་ཀུན་དྷ་ཧར་གནམ་ཐང་ལ་འཇབ་རྒོལ་བྱས་ཏེ་མི་མང་པོ་བསད་པ་མ་ཟད། ཁ་ཤས་ཀྱི་མགོ་གཅོད་འབྲེག་བྱས་ཏེ་ས་ཆ་ཡོངས་རྫོགས་ཁྲག་གིས་ཁེངས་པ་བཟོས་པ་དེ་དང་། ཉེ་ལམ་ང་ཚོའི་མགོ་ཁྲིད་ཀྱིས་གོམ་པ་རྒྱག་སའི་པ་ཀི་སི་ཐན་གྱི་ས་གདན་དམར་པོ་(red carpet) གཉིས་ཀྱི་ཁ་དོག་གཅིག་པ་རེད།” ཅེས་བརྗོད་ཡོད་འདུག
ཨབ་གྷན་གྱི་དམག་དོན་ཆེད་མཁས་པ་མེར་ཛཱ་ཡཱར་མཱན་ཌི་ (Mirza Mohammad Yarmand) ཡིས། རམཱ་དྷུ་ལཱ་ཎཱ་བྷེལ་ཡིས་ལས་གནས་དགོངས་ཞུ་བྱས་པ་དེས། སྲིད་འཛིན་ཨཱ་ཤཱ་རབ་གྷཱ་ཎེས་པ་ཀི་སི་ཐན་ལ་འཛིན་པའི་སྲིད་བྱུས་ལ་ནོར་འཁྲུལ་ཤོར་གྱི་ཡོད་པ་གསལ་སྟོན་བྱས་པ་རེད། ཅེས་བརྗོད་འདུག
གསར་འགོད་པ། དོན་གྲུབ།
